Kod 11
11
Babɛli sangasojan ka koo
1Diɲɛ kɔnɔ mɔgɔw bɛɛ tun be kaan kelen ni kuma kelen le fɔ.
2K'u to munumunu na ka to ka taga kɔrɔn ɲafan fɛ, u ye kɔkɛnɛ dɔ ye Sineyari mara la ka sigi yen. 3U y'a fɔ ɲɔgɔn ye ko: «Aw ye na, an ka biriki gosi k'u jɛni.» O kɛra u ka kabakuruw ye, ka bɔgɔmanan kɛ k'a lɔ. 4U ko: «Aw ye na, an ka dugu sigi, ka sangasojan lɔ a kɔnɔ, a kuun ka se fɔɔ sankolo la, an ka tɔgɔba sɔrɔ, janko an kana jɛnsɛn dugukolo yɔrɔ bɛɛ la.» 5U tun be dugu ni sangasojan min lɔra, Masaba jigira ka na o filɛ. 6A ko: «U bɛɛ ye siya kelen ye, u bɛɛ be kaan kelen fɔ. N'u y'a daminɛ ten, foyi tena u bali k'u ka koo latigɛninw kɛ. 7Aw ye to an ka jigi k'u ka kaan ɲagami, janko u kana ɲɔgɔn ka kaan mɛn tugu.» 8O la, Masaba y'u jɛnsɛn ka bɔ yen. U tagara dugukolo yɔrɔ bɛɛ la k'o dugu sigiko dabila. 9O le y'a to u y'o yɔrɔ wele ko Babɛli,#11.9 Babɛli ni kuma dɔ wɛrɛ fɔcogo bɔnin be ɲɔgɔn fɛ eburukan na, o min kɔrɔ ko ɲagamini. bari Masaba ye diɲɛ mɔgɔw bɛɛ ka kaan ɲagami yen, k'u jɛnsɛn ka bɔ o yɔrɔ la, ka taga dugukolo yɔrɔ bɛɛ la.
Sɛmu kɔmɔgɔw
10Sɛmu kɔmɔgɔw filɛ nin ye.
Sɛmu ye saan kɛmɛ sɔrɔ tuma min na, a ye Aripakisadi wolo, saan fila sanjiba tɛmɛnin kɔ. 11Aripakisadi wolonin kɔ, Sɛmu ye saan kɛmɛ duuru kɛ, a ye dencɛ ni denmuso wɛrɛw sɔrɔ.
12Aripakisadi ye saan bi saba ni duuru sɔrɔ tuma min na, a ye Sela wolo. 13Sela wolonin kɔ, Aripakisadi ye saan kɛmɛ naani ani saba kɛ, a ye dencɛ ni denmuso wɛrɛw sɔrɔ. 14Sela ye saan bi saba sɔrɔ tuma min na, a ye Ebɛri wolo. 15Ebɛri wolonin kɔ, Sela ye saan kɛmɛ naani ani saba kɛ, a ye dencɛ ni denmuso wɛrɛw sɔrɔ.
16Ebɛri ye saan bi saba ni naani sɔrɔ tuma min na, a ye Pelɛgi wolo. 17Pelɛgi wolonin kɔ, Ebɛri ye saan kɛmɛ naani ni bi saba kɛ, a ye dencɛ ni denmuso wɛrɛw sɔrɔ.
18Pelɛgi ye saan bi saba sɔrɔ tuma min na, a ye Erewu wolo. 19Erewu wolonin kɔ, Pelɛgi ye saan kɛmɛ fila ni kɔnɔntɔn kɛ, a ye dencɛ ni denmuso wɛrɛw sɔrɔ.
20Erewu ye saan bi saba ni fila sɔrɔ tuma min na, a ye Serugi wolo. 21Serugi wolonin kɔ, Erewu ye saan kɛmɛ fila ni wolonwula kɛ, a ye dencɛ ni denmuso wɛrɛw sɔrɔ.
22Serugi ye saan bi saba sɔrɔ tuma min na, a ye Nawɔri wolo. 23Nawɔri wolonin kɔ, Serugi ye saan kɛmɛ fila kɛ, a ye dencɛ ni denmuso wɛrɛw sɔrɔ.
24Nawɔri ye saan mugan ni kɔnɔntɔn sɔrɔ tuma min na, a ye Tera wolo. 25Tera wolonin kɔ, Nawɔri ye saan kɛmɛ ni tan ni kɔnɔntɔn kɛ, a ye dencɛ ni denmuso wɛrɛw sɔrɔ.
26Tera ye saan bi wolonwula sɔrɔ, a ye Abramu ni Nawɔri ani Aran wolo.
27Tera kɔmɔgɔw filɛ nin ye.
Tera ka deenw ye Abramu ni Nawɔri ani Aran ye. Aran fana tun ye Lɔti wolo. 28Aran kɔnna ka sa a facɛ Tera ɲa k'u to a wolodugu la Uri, Kalide jamana na. 29Abramu ni Nawɔri ye musow furu. Abramu muso tɔgɔ tun ko Sarayi, Nawɔri ta tɔgɔ ko Milika, o tun ye Aran denmuso ye. Aran le tun ye Milika ni Isika wolo. 30O y'a sɔrɔ Sarayi tun ye muso denwolobali ye, a ma deen sɔrɔ.
31Tera tagara n'a dencɛ Abramu ye, ani a mamaden Lɔti, min tun ye Aran dencɛ ye, ani a biranmuso Sarayi, min tun ye a dencɛ Abramu muso ye. U bɔra Uri, Kalide jamana na ko u be taga Kanaan jamana na. U sera Aran tuma min na, u sigira o yɔrɔ la.
32Tera sii bɛɛ tun ye saan kɛmɛ fila ni duuru ye. A sara Aran.
Селектирано:
Kod 11: AKKDC08
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
La Bible en Jula © Alliance Biblique du Burkina Faso, 2007.