John 4
4
Jesu le Samaria Numei Kiho
1John sangin Jesu in nungzui tam ngahzaw, tam baptise zaw hi, ci-in Pharisee-te in a za uh hi. 2 A taktakin Jesu hi loin a nungzuite in a baptise uh hizaw hi. 3 Topa in hih thu a zak ciangin Judea gam nusia-a, Galilee gamah khat vei a pai kik hi.#Jn 3:22,26
4 Amah Samaria gam tawnin a pai kul hi. 5 Tua hi-a Jacob in a tapa Joseph adingin a piakna mun kiang Samaria a khuapi khat, Sychar kici ah a tung hi. 6 Tua lai-ah Jacob tuikhuk a om hi. Jesu a khualzinna-in gim a, tuikhuk kiangah a tu hi. Tua hun pen nai gukna pawl ahi hi.#Jos 24:32
7 Samaria numei khat tui tawi-in va pai a, Jesu in ama kiangah, "Ka dawn ding tui nong pia diam?" a ci hi. 8 (A nungzuite an lei dingin khuapi sungah paikhin uh hi.)
9 Samaria numei in, "Nang Jew mi hi-in, kei Samaria numei ka hi hi, bangci-a tui dawn ding hong ngen na hi hiam?" a ci hi. (Ahang in, Samaria mite tawh Jew-te kithuah lo uh hi. e#4.9 Ahikeh Samaria mite zatsa kuangte a zang kei uh hi)#Isa 44:3; 55:1
10 Jesu in, "Pasian letsong thei-in, na kianga tui hong ngenpa thei hi lecin, ama kiangah na ngen zaw ding a, amah in a nungta tui hong pia khin zo ding hi," ci-in a dawng hi.#Jer 2:13; Kil 7:17
11 Numei in, "Sia aw, tuikhuk lah thuka, na khai nading bangmah na neih loh pi hih a nungta tui koi pan ngah thei ding na hi hiam? 12 Amah mah le a tate, a tuuhonte, a ganhonte in a dawnna uh, hih tuikhuk hong piapa ka pa uh Jacob sangin lianzaw na hi hiam?" a ci hi.#Kil 21:6
13 Jesu in, "Hih tui a dawnte peuhmah a dangtak kik ding hi; 14 ahi hangin kei piak tui a dawn mi peuhmah a dangtak ngei nawn kei ding hi. Ken ka piak tui, ama sungah tuinak suakin nuntak tawntungna dongin a phulto taktak ding hi," ci-in a dawng hi.#Jn 7:38
15 Numei in ama kiangah, "Sia aw, ka dangtak nawn loh nading le hih muna tui khai-a ka pai nawn loh nadingin, tua tui kei hong pia in," a ci hi.#Jn 6:34,35
16 Amah in tuanu kiangah, "Pai-in na pasal va sam inla, hong pai kik in," a ci hi.
17 Amah in, "Pasal ka nei kei hi," ci-in a dawng hi.
Jesu in, "Pasal ka nei kei hi, na cih amaan hi, 18 a taktakin pasal nga na nei zo a, tu-a na neih pa pen na pasal a hi kei hi. Tu-a na gen pak maan mahmah hi," a ci hi.
19 Numei in, "Sia aw, kamsang khat na hilam ka thei thei hi. 20 Ka pate un hih mualtungah bia uh a, ahi hangin no Jew-te in: Jerusalem bekah kibia thei hi, na ci se uh hi," a ci hi.
21 Jesu in, "Numei aw, kei hong um in. Hih mual tung ahi a, Jerusalem ah ahi zongin Pa na biak loh hun uh hong tung ding hi. 22 No Samaria mite in na theih lohpi uh na bia uh hi; kote in ka theih uh ka bia uh hi. Ahang in, hotkhiatna, Jew-te pan ahi hi. 23 Ahi hangin a bia taktakte in a kha le thutak a, Pa a biak hun uh hong tung ding tham loin tu-in a tung zo hi, ahang in, tua banga biate bek Pa in a zong hi. 24 Pasian in kha ahi hi. Amah a biate in kha le thutakin a bia pelmawh ding uh hi," a ci hi.
25 Tua numei in, "Tua Messiah (Christ kici) hong pai ding cih ka thei hi. Amah hong pai ciangin eite tungah na khempeuh hong telgen ding hi," a ci hi.
26 Tua ciangin Jesu in, "Amah pen tu-a nang hong hopih pa ka hi hi," a ci hi.#Jn 9:35-37
Nungzuite Jesu Kiang Tung Kik
27 Tua khit phetin a nungzuite tung kik uh a, numei tawh a kiho a muh uh ciangin lamdang a sa uh hi. Ahi hangin khat beek in, "Bang deihna hiam?" ahikeh "Bang hang tuanu hopih na hi hiam?" ci-in a dong kei uh hi.
28 Tua ciangin tua numei in tuibel nusia in khuapi sungah pai kik a, mite kiangah, 29 "Hong pai un, ka hihsa khempeuh kei tunga hong genpa khat hong en un. Hih pa Christ f#4.29 Ahikeh Messiah hi kha lo ding hiam?" a ci hi. 30 Amaute khuapi panin paikhia uh a, ama lam a zuan uh hi.#Mt 12:23
31 Tua kalin a nungzuite in, "Rabbi aw, bang khatpeuh ne in," ci-in a sawl uh hi.
32 Ahi hangin amah in amaute kiang ah, "A thu bangmah na theih loh uh an nek ding ka nei hi," a ci hi.#Job 23:12
33 Tua ciangin a nungzuite in, "Mi khatpeuh in an na puak zo hi ve maw?" a kici uh hi.
34 Jesu in, "Kei hong sawlpa deihna bang sep ding le tua nasep ka zawh ding, ka an ahi hi," a ci hi. 35 "Note in, ‘tu zawh kha li ciangin an lak hun ta ding hi,’ ci hi lo na hi uh hiam? Note kong hilh hi, khuadakin lote en dih un! Ante min khin in lak hun ta hi. 36 Tu nangawn in buh atpa in thaman a sang hi. A vawh pa le a at pa a lungdam khawm theih nadingin tu nangawnin tawntung nuntakna ading an a la hi. 37 ‘Mi khat in vawh a, midang khat in a at hi,’ kici in thumaan ahi hi. 38 Na sep loh uh at dingin note kong sawl hi. Midangte in nakpi-in na sem uh a, amau sep gah note in na at uh hi," a ci hi.#Job 31:8; Mt 26:39
Samaria Mi Tampi in Um
39 Tua numei in, "Ka hih ngeisa khempeuh hong gen hi," ci-a teci a panna hangin tua khuapi a Samaria mite tampi in amah a um uh hi. 40 Tua ciangin Samaria mite ama kiangah pai-in amaute kiangah a taam nadingin kho uh a, ni nih a taam hi. 41 Ama thugente hangin thu-um tampi a kibehlap hi.
42 Amaute in tua numei kiangah, "Nang hong genna hang bek-a um ka hi nawn kei uh a, ko mahmah in tu-in ka za uh a, hih mipa, leitung Honpa taktak hi, cih ka thei uh hi," a ci uh hi.#Lk 2:11
Jesu in Ulianpa Tapa Damsak
43 A ninih ni khit ciangin Galilee zuanin a pai hi. 44 (Jesu mahmah in, kamsangpa in ama gamah pahtawina ngah lo hi, cih a kawkkhia khin hi.) 45 Galilee ah a tun ciangin Galilee mite in amah a na muak uh hi. Amaute, Jerusalem a Paisan Pawi hun sungin va om kha uh ahi manin a hihsate khempeuh a mu zo uh hi.#Mt 13:57
46 Tui, lenggahzu a suahsakna mun Galilee gam Cana ah khat vei va hawh kik hi. Tua lai-ah kumpi nasem ulian khat oma, a tapa Capernaum ah cina-in a lum hi. 47 Hih pa in, Judea panin Galilee ah Jesu tung zo cih a zak ciangin ama kiangah va pai a, a si dektak a tapa a va damsak nadingin a thum hi.
48 Jesu in ama kiangah, "No mihingte in na lamdang le a lamdangte na muh loh ngalun na um ngei kei ding uh hi," ci-in a gen hi.#Da 4:2-3; Ns 2:43
49 Tua kumpi nasem ulianpa in, "Sia aw, ka ta a sih ma-in hong paisuk in" a ci hi."
50 Jesu in, "Pai lel in, na tapa nungta ding hi," a ci hi.
Tuapa in Jesu thugen muangpah a, a paikhia hi. 51 Amah lamkal ah a om laitakin a nasemte in a tapa nungta hi, cih thu tawh amah a na dawn uh hi. 52 Amah in a tapa noptuam hun a kan ciangin amaute in, "Zanni a nai sagihna hunin nattun a dam hi," a ci uh hi.#Ph 111:7
53 Jesu in, "Na tapa a nungta ding hi," a cih hun lian hi, cih a pa in a thei hi. Tua ciangin amah le a innkuanpihte in a um uh hi.#Ns 11:14
54 Hih pen Judea pan Galilee ah Jesu, tun zawh nalamdang a bawl a nihna ahi hi.#Jn 2:11
Селектирано:
John 4: ZIV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright 1994 Myanmar Center for World Mission