Mɑɑtieo 10
10
Yiesu tuomiinbɑ piik nɑn bɑnle lɑbɑɑl
(Mɑɑlk 3.13-19; Luk 6.12-16)
1K Yiesu din tɑn yiin u tuomiinbɑ *piik nɑn bɑnle nɑ, k tɑn cɑb’b yiikuo ɑ bii nyint nɑlnbiit niib ni, k biɑ te k bin nbɑ yiɑl yiɑlbuoli buoli kul nɑn bin nbɑ mɔk gbɑnɑntont kul n pɑɑk. 2U tuomiinbɑ piik nɑn bɑnle mɑnŋ sɑnɑ e nɑ. Sinsinn pɑɑk Siimɔn, wun nbɑ yɑɑ sɑnn biɑ din yi Piɑl nɑ nɑn u ninjɑ Andle nɑn Sɑɑk nɑn u ninjɑ Sɑn, bin nbɑ din tie Sebede wɑɑs nɑ 3nɑn Fiiliip nɑn Bɑɑltelemi nɑn Tuomɑ, nɑn Mɑɑtieo wun nbɑ din tie *lɑnpogɑɑltuɑ nɑ, nɑn Sɑɑk wun nbɑ din tie Alfe bijɑ nɑ, nɑn Tɑɑde 4nɑn Siimɔn wun nbɑ din luon ŋɑnm *Suifnbɑ i yen b mɔnŋ nɑ, nɑn Suudɑ Iskɑɑliɑɔt wun nbɑ din tɑn nyii Yiesu puol nɑ.
Yiesu tuun u puolpoweitieb
(Mɑɑlk 6.7-13; Luk 9.1-6)
5K Yiesu din tun u tuomiinbɑ piik nɑn bɑnle mɑnŋ, k kpɑɑn’m k yet ɑ: «I dɑɑ sɑɑ bin nbɑ k tie Islɑɑeltieb nɑ buol ni, k biɑ dɑɑ kuɑ *Sɑɑmɑɑliitieb doi ni, 6ŋɑɑn ii sɑɑ Islɑɑeltieb nbɑ tie nɑn pei nbɑ bot nɑ buol ni kuukuɑ e. 7Yɑɑ sɑɑ nɑ, ii muɑntl ɑ: ‹Yennu nɑɑn pel nɑ.› 8Ii te k bɑɑtb n pɑɑk, kii fiint kpienm, k biɑ te k gbɑɑtɑ ŋɑɑt n gbenn, kii biɑ kii nyint nɑlnbiit niib ni. I gɑɑl tebu yiikuo mɑnŋ yɑnn e, ii mun i biɑ kii tieb k dɑɑ gɑɑn likli. 9I dɑɑ jikt likli. Ii mi mɑn k yin jii kuuk k tien i likbuɑli ni. 10I dɑɑ jikt pɑkɑ k sɑɑ i sɔnu mɑnŋ, ɑmi liɑtfɔkt ŋɑnlele, ɑmi k jii tɑɑsɑɑliet k pukn, ɑmi kii diɑ pɑti, k mɑɑn l ŋɑn k tuontunnɔ n di u tuonɑ ni.
11«Digbɑngbenŋɑ ɑmi digbɑnbis nbɑ yɑɑ ni k i sɑɑ kuɑ, yin boi k lɑ nibulcimɔ ŋɑɑk ɑ, k kuɑ kii be lenŋ nɑn i fiilu dɑɑl. 12K yuo nbɑ k i yɑɑ i kuɑ ŋɑɑk nbɑ ni, yin fuont ŋɑɑk mɑnŋ ni tieb fɑnu. 13Ŋɑɑk mɑnŋ tieb i tie nibulcinm, i mɑnu n biɑl ŋɑɑk mɑnŋ tieb pɑɑk, ŋɑɑn nibulcinm i kɑɑ lenŋ, i mɑnu mɑnŋ biɑ sɑɑ jen i pɑɑk nɑ. 14Wun nbɑ sɑɑ yet i gɑɑlu k biɑ yet wun gbɑt i mɑɑn, yuo nbɑ k i nyii ŋɑɑk mɑnŋ ni ɑmi duo mɑnŋ ni, yin pit pit i tɑɑpɑnt ni tɑnt k lu. 15Bɑlmɔni e k n yien’i nɑ, dɑɑl nbɑ k Yennu tɑn sɑɑ bu niib buut nɑ, duo mɑnŋ niib tubdɑtu tɑn sɑɑ gɑl Suodonm tieb nɑn Guomuɔl tieb yɑl ɑ.»
Fɑlɑ bɑɑlu lɑbɑɑl
(Mɑɑlk 13.9-13; Luk 21.12-17)
16«Gotl mɑn, n tuun’i k i sii tie nɑn pei nbɑ be kinkɑtɑ sinsuuk ni nɑ e. Ii cek mɑn nɑn wɑɑlɑbli nɑ, ŋɑɑn kii be suon nnɑ nɑn ŋmɑnɑ nɑ. 17Ii mi mɑn niib po, k mɑɑn b tɑn sɑɑ suol’i sɑɑn nɑn’i bɑlbutieb buol ni, k biɑ buo’i lɑnbɑnɑ Suifnbɑ jɑɑnti diet ni. 18B tɑn sɑɑ sɑɑn nɑn’i tinŋ yudɑnm nɑn kpɑnbɑlɑ buol ni, yɑɑ wɑɑ’n nɑ pɑɑk, i sii tie n siɑlɑɑdɑnm k tul ŋɑnm nɑn bin nbɑ k tie Suifnbɑ nɑ. 19Ŋɑɑn b i tɑnŋ i sɑɑn nɑn’i buut dɑnm buol, i dɑɑ fɑbn yɑɑ sɑɑ pɑk biɑnŋ nbɑ ɑmi yɑɑ sɑɑ pɑk lin nbɑ yɑɑ pɑɑk. L yuo nɑ e k i sɑɑ lɑ mɔbonɑ nbɑ k i sɑɑ pɑk k jiin’m, 20k mɑɑn l k tie yinm kɑɑ tɑn sɑɑ pɑk, Bɑɑ Siek e tɑn sii be i ni k piɑk.
21«L yuo mɑnŋ, nilɔ tuu tɑn sɑɑ kuɑt u mɔnŋ mɔnŋ ninjɑ k bin kpi’u, k bɑɑnbɑ mun tɑn sɑɑ kuɑt b wɑɑs k bin kpi’b, k wɑɑs mun biɑ tɑn sɑɑ kɔn nɑn b dɑnm k cɑb’b nɑn kuun. 22K suɑ kul tɑn sii nɑn’i k mɑɑn yɑɑ wɑɑ’n nɑ pɑɑk, ŋɑɑn wun nbɑ tɑn gubn nɑn fɑlɑ yuo nɑ juontu tɑn sɑɑ lɑ fielu wɑɑ. 23B i tɑnŋ i muks’i digbɑn-yenn ni, yin nyi lenŋ k luɑl digbɑnliel ni. Bɑlmɔni e k n yien’i nɑ, i dɑɑ kɑn fit k lin k gbenn Suifnbɑ digbɑnɑ kul, k suɑ *Nisɑɑlk Bijɑ ponŋ jen ɑ.
24«Tɔn, wun nbɑ siɑn k cie u tumiituɑ. Tuontunnɔ mun biɑ k cie u Yonmdɑɑnɔ. 25L jɑnŋ nɑn wun nbɑ siɑn binbenŋ ii tie nɑn u wɑntuɑ binbenŋ nɑ, k tuontunnɔ binbenŋ ii mun ii tie nɑn u Yonmdɑɑnɔ binbenŋ nɑ. B i tɑnŋ i pul ŋɑɑdɑɑnɔ Beelsebuul, nlee k b ji sii yi u ŋɑɑtieb i?»
T sɑɑ tin ŋmee jɑŋmɑɑni?
(Luk 12.2-7)
26«I dɑɑ tiin niib jɑŋmɑɑni, siɑl kɑɑ k be wuol ni k tɑn kɑn wuot k nyi pɑɑnu ni, ɑmi k bɔl k tɑn kɑn nyi pɑɑnu ni. 27Lin nbɑ k n yien’i bunbɔnn ni nɑ, nyint’l mɑn yienin ni, k lin nbɑ k n lɔkn’i nɑ, i do mɔpinyelk pɑɑk kii muɑntl. 28I dɑɑ tiin bin nbɑ sɑɑ fit kpi i gbɑnɑnt, ŋɑɑn kɑn fit k kpi i siek, ŋɑɑn ii tiin mɑn Yennu nbɑ sɑɑ fit k biil i gbɑnɑnt nɑn i siek kul ɑ muu nbɑ kɑɑ gbennu nɑ ni nɑ. 29B k kɔi nuɑnbit bɑnle kuuk kuukuɑ ɑɑ? Ŋɑɑn b yenɔ kuɑ kɑn bɑɑ tinŋ ni k i Bɑɑ Yennu k mi u po. 30Yinm ŋɑnin, i yut mɔk kɑnn. 31L pɑɑk, i dɑɑ tiin jɑŋmɑɑni, k mɑɑn i mɔk nyuɑt k gɑl nuɑnbit bonciɑnn.»
Yenweiu lɑbɑɑl
(Luk 12.8-9)
32«Wun nbɑ nyint u mɔnŋ pɑɑnu ni niib buol ni nɑn u tie n yuɑ e, nnɑ e k n mun tɑn sɑɑ nyinn’ɔ pɑɑnu ni n Bɑɑ nbɑ be sɑnpɑɑpo nɑ buol, ɑ u tie n yuɑ e. 33Wun nbɑ yɑɑ ɑ u k mi’n niib ni, nnɑ e k n mun tɑn sɑɑ yet ɑ n k mi’u n Bɑɑ nbɑ be sɑnpɑɑpo nɑ buol ni.»
Bɔktu lɑbɑɑl
(Luk 12.51-53; 14.26-27)
34«I dɑɑ duki nɑn n bɑɑl nɑn mɑnu tingbounŋ nɑ tieb pɑɑk, n k bɑɑl nɑn mɑnu kɑɑ, ŋɑɑn n bɑɑl nɑn kunkɔnn e. 35N bɑɑl mɑɑ n tɑn tukn bonjɑbik e nɑn u bɑɑ, bonpobik nɑn u nɑɑ, puo nɑn u sipuok. 36Nilɔ mɔnŋ mɔnŋ ŋɑɑtieb e tɑn sii tie u dɑtɑi.
37«Wun nbɑ luon u nɑɑ ɑmi u bɑɑ k gɑl’n, u k ŋɑn nɑn wun tien n yuɑ. Wun nbɑ mun biɑ luon u bijɑ ɑmi u bipuo k gɑl’n, u k ŋɑn nɑn wun tien n yuɑ. 38Wun nbɑ k jii u kuun dɑpunpunn#Luonmtieb kɑɑl ni, l i tie k nilɔ tien lin nbɑ k ŋɑn nɑn nikpinu nɑ, b din tuu kpɑɑ’u dɑpunpunn pɑɑk e k wun kpo. L dɑɑnɔ din tuu lɑ fɑlɑ bonciɑnn e wɑɑ k tɑn kpo. L biɑ din tuu tie fei e k tul l dɑɑnɔ. k buk k wɑɑ’n, u k ŋɑn nɑn wun tien n yuɑ. 39Wun nbɑ yɑɑ ŋuɑ deki u mɑnfuol tɑn sɑɑ kɔnŋ’l ɑ, ŋɑɑn wun nbɑ kɔnŋ u mɑnfuol n pɑɑk, u tɑn sɑɑ lɑ u mɑnfuol ɑ.»
Bin nbɑ tɑn sɑɑ lɑ pɑɑɔk lɑbɑɑl
(Mɑɑlk 9.41)
40«Wun nbɑ gɑɑl’i sɑɑɔnŋ, u gɑɑl min e sɑɑɔnŋ, k wun nbɑ mun biɑ gɑɑl min sɑɑɔnŋ, u gɑɑl wun nbɑ tun’n nɑ e mun biɑk. 41Wun nbɑ gɑɑl *Yennu sɔkni sɑɑɔnŋ nɑn wɑɑ tie Yennu sɔkni nɑ pɑɑk, u tɑn sɑɑ gɑɑl Yennu sɔkni nyuɑt ɑ. Wun nbɑ gɑɑl niŋɑnɔ sɑɑɔnŋ nɑn wɑɑ tie niŋɑnɔ nɑ pɑɑk, u tɑn sɑɑ gɑɑl niŋɑnɔ nyuɑt ɑ. 42Wun nbɑ finn nyunmɑɑsn wɑɑnm-nnɑ kuukuɑ k tul n *puolpoweituɑ yenɔ nbɑ pɔ i ni, nɑn wɑɑ tie n puolpoweituɑ nɑ pɑɑk, bɑlmɔni e k n yien’i nɑ, u tɑn kɑn mi kɔnŋ l pɑɑɔk u.»
Селектирано:
Mɑɑtieo 10: MOBANT07
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Moba-Lok New Testament © Bible Society of Togo, 2007.