Mark 9

1Male a la ti banga an kôm han, “Nangni ki ril, hi taka om senkhat ngei hih chu Pathien Rêngram hah a sinthotheina leh a juong tung an mu mâka chu thi no ni ngei” a tia.

Mêl inthûlna

(Mat 17:1-13; Luk 9:28-36)

2Sûnruk suole chu Jisua'n Peter, Jacob le John a tuong ngeia, an theivaiin an omna muol insânga han a ruoi ngeia. An mitmu chungchakin Jisua mêl ahong inthûla,#2 Pet 1:17,18 3male a puonsilngei khom achekin ântêrdapa rammuola mîn tutên madôr ha rusûk minsâi thei no ni ngei. 4Hanchu ruoisi inthum ngei han Elijah le Moses'n Jisua an chongpuilâitak an mua. 5Peter'n Jisua kôm, “Minchupu, hi taka om hi ei ta rangin idôra asa mo ni zoi! Puon in inthum sin kin ta nangma rang inkhat, Moses rang inkhat, Elijah rang inkhat sin kin tih” a tia. 6Ama le adangngei ha an chi rai sikin a ti rang tak khom riet mak ngeia.

7Hanchu sûmphâi ajuong oma anni ngei hah sûmphâiin ajuong mukhu ngeia, sûmphâi renga hah chong ajuong inringa, “Ama hih ka Nâipasal moroitak ani, a chong rangâi roi!” a tia.#Mat 3:17; Mk 1:11; Luk 3:22 8Inrangin an en titira hannirese tute an kôla adang mu khâi mak ngeia; Jisua vai ke an kôm aom zoi.

9Muol chung renga an juong chuma Jisua'n an kôm, “Miriem Nâipasal hi thina renga ânthoinôk mâka chu nin neinun mu hi tute kôm ril no roi duo” tiin chong a bê ngeia.

10A chongbe ha an jôma, aniatachu ma roi ha an lâia, “‘Thina renga inthoinôk’ ti hih khoi tina mi hi?” tiin an injêk khôm phut zoi. 11Male anni han Jisua kôm, “Ithomo Balam minchupungeiin, Elijah a juong bak rang an ti?” tiin an rekela.#Mal 4:5; Mat 11:14

12Ama'n an kôm, “Neinun murdi cherêl rangin Elijah chu a juong bak ngêt rang ani. Hankhoma, ithomo Pathien Lekhabu'n, Miriem Nâipasalin la tuong ok a ta, hengpaiin la om atih, a tia? 13Nikhomrese, nangni ki ril Elijah chu a juong suo kêng ani zoi, male a chungroi Pathien Lekhabu'n ati anghan mingeiin a chunga an nuom lamtakin an lo zoi,” a tia.

Jisua'n pasalte ratha saloi dôn a mindam

(Mat 17:14-21; Luk 9:37-43)

14Ruoisingei kôm an juong tungin chu an kôla loko tamtak ngei le Balam minchupungei senkhatin an lei inkhalpui lâitak an juong mua. 15Mingei han Jisua an mu lehan an kamâm sabaka, male ama tieng an tânna chibai an va pêka. 16Jisua'n a ruoisingei kôm, “Anni ngei lehan khoi thurchi mo nin lei inkhal ha?” tiin a rekel ngeia.

17Lokongei lâia mi inkhatin a kôm, “Minchupu, ka nâipasal ratha saloi a dôna male a chongloi sikin no kôm ko hong tuong tiin a thuona. 18Ratha saloi ahong tôn racham nuoia ânlet kelen ngâia, a cherhuon a suoka, a hâ a riela, angarjêt ngâi. Ratha saloi ha rujûlpai rangin nu ruoisingei ke ngênna, aniatachu thei mak ngei,” a tia.

19Jisua'n an kôm, “Kho anga mi iemnaboi mo nin ni! Idôrsôt mo nin kôm omin nangni ko donsûi thei ranga? Pasalte hah ko kôm hong tuong roi!” a tia. 20Ama ha Jisua kôm an hong tuonga.

Ratha saloi han Jisua a hong mûn chu pasalte hah a nunuom alo bita, masikin nuoia ân leta, a vânluoi ahônluoia, a cherhuon a suoka. 21Jisua'n a pa kôm, “Hi anga a om phutna hih khotik renga mo ani zoi?” tiin a rekela.

“Nâipang a chang renga” tiin chong a melea. 22“Ratha saloi hin ama that rang pûtin vêl tamtak meia le tuia a meleta. Ne thei ngâiin chu inrieng mi mu inla, mi san roh!” tiin a rila.

23Jisua'n a kôm, “Ani,” “nangmananâkin ni ni theiin chu! Taksônna dôn mingei ta rangin chu neinuntin anithei let,” a tia.

24A pa han harenghan, ân ieka, “Taksônna ko dôn, hannirese hun zoi mak. Taksônna ko dôn uol theina rangin mi san roh!” a tia.

25Jisua'n lokongei ama tieng an hong nâi titir a mua, masikin ratha saloi kôm han, “Ratha kuorsêt le chongloi,” ama han, “Pasalte sûng renga hong jôk roh, male a sûnga lût nôk tet khâiloi rangin chong nang ke pêk!” a tia.

26Ratha saloi hah ân ieka, pasalte hah a vôrra a nunuom a lo bita, male a hong jôk paia. Pasalte hah athi angin angarzata, male mitinin, “Ama hih athi zoi!” an tia. 27Hannirese Jisua'n a kuta a sûra, a kaithoia, male ânding zoi.

28Masuole Jisua in sûnga a lûta, a ruoisingeiin inrûkten an rekela, “Ithomo keinin ratha saloi ha kin rujûlpai theiloi?” an tia.

29Jisua'n an kôm, “Ma jât hi chu chubaithona niloiin chu, itên rujûl thei nimak,” tiin a thuon ngeia.

Jisua a thi rang roi a misîr nôkna

(Mat 17:22-23; Luk 9:43-45)

30Jisua le a ruoisingeiin ha mun hah an mâka male Galilee ram palin an sea. Jisua'n a omna tutên an riet rangin nuom maka, 31“Miriem Nâipasal hih a that rangpu ngei kuta bangin om atih. Nikhomrese, sûnthum suole chu aringin inthoinôk atih” ti chong hih a ruoisingei a minchu ngei sikin.

32Aniatachu hi minchuna aomtie hih rietthei mak ngeia, male ama rekel rang khom an chia.

Tu hih mo alientak?

(Mat 18:1-5; Luk 9:45-48)

33Hanchu Capernaum an hong tunga, insûnga an lût suole chu a ruoisingei kôm, “Lampuia han khoi roi mo nin rila nin inkhal hah?” tiin a rekel ngeia.

34Hannirese anni han thuon mak ngeia, lampuia an hong inkhalna hah ei lâia hin tumo alientak rang? ti roi hah ani sikin.#Luk 22:24 35Jisua ânsunga, ruoisi sômleinik ngei hah a koia, male an kôm, “Tukhom alientak ani nuomin chu achîntak changin mi murdi tîrlâm ani masa ngêt rang ani” a tia.#Mat 20:26,27; 23:11; Mk 10:43,44; Luk 22:26 36Hanchu nâipangte a koia, an motona a minding pe ngeia, a kuo ira, an kôm, 37“Tukhom ki riming sika hi anga nâipangte inkhat khom a modômpu chu, keima mi modôm ania; male tukhom keima mi modômpu chu, keima mi modôm vai niloiin ni tîrpu khom a modôm sa ani” a tia.#Mat 10:40; Luk 10:16; Joh 13:20

Tukhom mi chakal loi chu ei tienga kop ani

(Luk 9:49-50)

38John'n a kôm, “Minchupu, mi inkhat ni riminga ramkhoringei rujûl kin mua, male ei pâla mi ani loi sikin kin hong khap” a tia.

39Jisua'n an kôm, “Ama ha khap rang pût no roi,” tute ki riminga sininkhêl a sina harenghan ku chungroia neinun saloi ngei ti thei kelen rang reng omak ngei, tiin a ril ngeia. 40Tukhom mi chakal loi chu ei tienga kop ani.#Mat 12:30; Luk 11:23 41Adiktakin nangni ki ril, tukhom ki mi nin ni sika tuidâi kilât khat khom nangni a min nêkin chu râisânman a man ngêt rang ani.#Mat 10:42

Sietna ranga methêmnangei

(Mat 18:6-9; Luk 17:1-2)

42“Tukhom keima taka taksônna dôn mi achînte ngei lâia inkhat khom a taksônna minmang pe chu a ringa bunôinalung lienpa orrin tuikhangliena inchôm senla ata rangin sa uol atih.” 43#Mat 5:30 Masikin nu kutin na taksônna aminmangin chu tan pai roh! Kutngei inik dôna dûkmun meidîla, mei thi tet ngâiloia#9:43: Miziek senkhat ngeiin chu arachang 44 na hi an bôksa; Ha muna han chu an “rulungngei thi tet ngâi maka, male mei khom thi tet ngâi mak,” (Arachang 48 na en roh). se nêkin chu kut boia ringna taka lût nata rangin asa uol. 45-46Male ne kengei han na taksônna aminmangin chu, tan pai kelen roh! Kengei inik dôna dûkmuna paia om nêkin chu ke boia ringna taka lût chu nata rangin asa uol.#9:45-46: Miziek senkhat ngeiin arachang 46 na hi an bôksa: Ha muna han chu an “rulungngei thi tet ngâi maka, male mei khom thi tet ngâi mak,” (Arachang 48 na en roh.) 47Male ni mitin na taksônna aminmangin chu kêl pai roh! Mitngei inik dôna dûkmuna paia om nêkin chu mit inkhat dôna Pathien Rêngrama lût nata rangin asa uol.#Mat 5:29 48Ha muna han chu anni ngei sâk ngâi, “rulungngei ha khom thi tet ngâi mak ngeia, mei khom thi tet ngâi mak.”#Isa 66:24

49“Inbôlna michi alin aminthieng ngâi anghan mi murdi meiin la minthieng nîng an tih.”

50“Michi hih a ala; aniatachu a alna hah adongin chu ile mo nin min al nôk ranga?#Mat 5:13; Luk 14:34,35

“Nin lâia malinchangna michi dôn ungla, male insûk irrin om roi” a tia.

Селектирано:

Mark 9: SAKNT

Нагласи

Сподели

Копирај

Дали сакаш да ги зачуваш Нагласувањата на сите твои уреди? Пријави се или најави се

Дознај повеќе за Pathien Lekhabu Inthieng Chongtung Thar

Mark 9

Популарни Библиски стихови од
Mark 9

Слушни за Mark 9

Библија:

Sakachep

Верзија: Pathien Lekhabu Inthieng Chongtung Thar - SAKNT

Mark 9

Mark 9

Популарни Библиски стихови од Mark 9

Слушни за Mark 9

Библија:

Sakachep

Верзија: Pathien Lekhabu Inthieng Chongtung Thar - SAKNT

Mark 9

Популарни Библиски стихови од
Mark 9