MATIUS 8
8
Isa ngunyaiko jelma sai bepenyakik kusta sai ngeri nihan
(Mrk. 1:40-45; Luk. 5:12-16)
1Isa regah jak bukit, rik lamon jelma nutuk Ia. 2Pada waktu seno ratongdo sai jelma bepenyakik kusta. Ia belutut di hadapan Isa, terus cawa, “Pak, kik Bapak haga, Bapak dapok ngunyaiko nyak.”
3Isa nyating jelma udi sambil cawa, “Nyak haga. Munyaido!” Waktu seno juga penyakikni lebon. 4#Im. 14:1-32 Raduni cawa Isa jama ia, “Ingokdo! Dang cerita jama sapa pun. Kidang mikdo jama imam, rik ngilu ia untuk memastiko niku radu munyai. Radu jak seno persembahko kurban sai diperintahko Musa, sebagai bukti jama jelma-jelma bahwa niku temon-temon radu munyai!”
Isa ngunyaiko jelma sai ngelayani sai perwira Roma
(Luk. 7:1-10)
5Waktu Isa kuruk mik Kapernaum, sai perwira Roma ratong ngehadap Ia, rik ngilu tulung jama Ia. 6“Bapak,” ani perwira udi, “jelma sai ngelayani nyak meruyuh di lamban. Ia pedom lumpuh di rang pedom rik menderita nihan.”
7Ani Isa, “Nyak haga mik ngunyaiko ia.”
8“Mak perlu Pak,” jawab perwira udi, “Nyak mak patut nerima Bapak di lambanku. Bapak perintahko gaoh. Kanah jelma sai ngelayani nyak ano munyai. 9Mani nyak pun haga tunduk jama perintah atasan. Rik di debahku wat juga prajurit-prajurit sai haga tunduk jama perintahku. Kik nyak ngayun sai prajurit, ‘Mik!’ ia pun mik. Nyak ngucakko jama sai bareh, ‘Mik dija!’ ia pun ratong; rik kik nyak merintahko jelma sai ngebantuku, ‘Sanido inji!’ ia pun nyanini.”
10Waktu Isa ngedengi api sai diucakko ulih perwira udi, Ia kagum nihan. Raduni Ia cawa jama jelma-jelma sai sedang nutuk Ia, “Bukan main jelma inji. Di hantara jelma Israel pun makkung pernah Nyak ngehalu iman sebalak inji! 11#Luk. 13:29 Temon! Lamon jelma haga ratong jak timur rik barat untuk besenang-senang jejama Abraham, Ishak, rik Yakub di delom Dunia Ampai Allah. 12#Mat. 22:13, 25:30; Luk. 13:28 Padahal jelma-jelma sai seharusni jadi umat Allah haga ditokko mik kekelaman di luah. Di dudi tian haga miwang rik menderita.” 13Raduni Isa cawa jama perwira udi, “Mulangdo, api sai niku percaya ano haga tejadi.”
Rik saat seno juga jelma sai ngelayani ia ano munyai.
Isa ngunyaiko lamon jelma
(Mrk. 1:29-34; Luk. 4:38-41)
14Isa mik lamban Petrus. Di dudi Ia ngeliak emak mentuha Petrus sedang meruyuh di rang pedom. 15Isa nyating culukni, raduni ruyuhni lebon. Ia minjak rik mulai ngelayani Isa.
16Pada waktu mulai dibi, jelma ngusung mik jama Isa lamon jelma sai kekurukan ruh jahat. Rik jama sepatoh cawa gaoh, Isa nguser ruh-ruh jahat udi rik ngunyaiko juga sunyinni jelma sai meruyuh. 17#Yes. 53:4 Isa ngelakuko sunyinni seno, rik sunyinni udi tejadido api sai diucakko ulih Nabi Yesaya, yakdo, “Ia nanggung penderitaan neram rik ngunyaiko penyakik neram.”
Jelma-jelma sai haga jadi jelma sai nutuk Isa
(Luk. 9:57-62)
18Wat lamon nihan jelma di sekeliling Isa. Waktu Isa ngeliak tian sunyinni, Ia ngayun jelma-jelma sai nutuk Ia nyeberangi danau. 19Raduni sai guru agama ratong jama Ia rik cawa, “Bapak Guru, nyak haga nutuk Bapa mik dipa gaoh!”
20Isa ngejawab, “Serigala wat lubang, rik burung ngedok sarang, kidang Anak Manusia mak ngedok rang pedom.”
21Raduni sai jelma sai nutuk Ia sai bareh cawa, “Pak, izinko nyak mulang pai untuk nguborko bakku.”
22Kidang Isa ngejawab, “Tutukdo Nyak, rik tagando ulun mati nguborko ulun matini tenggalan.”
Isa ngeredako angin badai
(Mrk. 4:35-41; Luk. 8:22-25)
23Isa cakak mik jukung rik jelma-jelma sai nutuk Ia nutuk jejama Ia. 24Tiba-tiba angin badai sai hibat nihan melanda danau hingga jukung dipukul umbak. Pada waktu seno Isa sedang pedom. 25Maka jelma-jelma sai nutuk Ia mik jama Ia rik ngegurah Ia. “Pak! Tulung! Ram celaka!” cawa tian.
26“Mengapi keti merabai?” cawa Isa. “Keti kurang percaya jama Nyak!” Kak raduni Isa cecok rik ngebentak angin rik danau udi. Raduni danau udi tenang nihan.
27Jelma-jelma sai nutuk Isa hiran. Tian cawa, “Jelma api Ia inji, sampai angin rik umbak pun nutuk perintah-Ni!”
Isa ngunyaiko rua jelma sai kekurukan ruh jahat
(Mrk. 5:1-20; Luk. 8:26-39)
28Isa sampai mik seberang danau di daerah Gadara. Di dudi rua jelma sai kekurukan ruh jahat ratong jama Ia. Kerua jelma udi ganas nihan, sehingga mak sai jelma pun bani liu di dudi. 29Tian luah jak guha-guha kuboran rik mekik, “Anak Allah, haga Niku apiko sekam? Api Niku radu haga nyiksa sekam walaupun makkung waktuni?”
30Mak jaoh jak udi, wat lamon nihan babui sedang nyepok kanikan. 31Ruh-ruh udi ngilu jama Isa, “Kik Niku haga ngayun sekam luah, kayundo sekam kuruk mik delom babui-babui udi.”
32“Kisit!” ani Isa. Ruh-ruh jahat udi mik jak kerua jelma udi, raduni kuruk mik delom babui-babui. Rik babui-babui udi pun tegar rik terjun jak pingger rulah mik delom danau, raduni tebenam.
33Penjaga-penjaga babui udi tegar mik kota, rik nyeritako sunyinni kejadian udi, juga mengenai api sai tejadi jama kerua jelma sai kekurukan ruh jahat udi. 34Maka sunyinni jelma sai di kota udi pun mik nungga Isa. Waktu tian ngeliak Isa, tian ngilu nihan in Ia ninggalko daerah tian.
Селектирано:
MATIUS 8: LAILJP
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
@ LAI 2002 Indonesian Bible Society (Lembaga Alkitab Indonesia)