Matye 4
4
Luseengulu lu Yeesu
(Mak 1.12-13; Lik 4.1-13)
1Oboobo, Ciluunzi cisë natë Yeesu ku ntaandu ciyumi mu kusoku ke dyaabu. 2Kwakaanji n'sweelë fë mëkumë-na më bilumbu i mëkumë-na më bwiilu, nzaalë yisë kun'taatë. 3Wo wulë kun'sokë kubelëmë i wusë n'kaambë : « Ningë njeeyi wuli Mwaanë Nzaambi, we tumisi mëmanyi omo mëcitukë mëmpa. » 4Yeesu wusë n'vutulilë : « Lisonëmë : “Muutu wusë n'zingilë tokë mu limpa ko, kasi mu lyosuku libuungu lim'basikilë mu munu Nzaambi#4.4 Det 8.3..” »
5Oboobo, dyaabu wusë n'natë ku livulë lisemu i wusë n'tuulë kusalaangë yilu n'zo-Nzaambi 6i wusë kaambë Yeesu : « Mooti njeeyi wuli Mwaanë Nzaambi, we yilaci fësi, busonëmë :
“Mu cibilë cyaaku njeeyi, naandi wun'tumisi siyaanzi :
i syaawu sikunatë mu myookwaawu
mu kumaangë kuulu kwaaku kukubë ntuutu mu limanyi#4.6 Twi 91.11-12. .” »
7Yeesu wusë n'kaambë : « Busonëmë yivaandi : “Wuseengë Fumwaaku Nzaambi ko#4.7 Det 6.16. .” »
8Dyaabu wusë bën'natooso kusalaangë moongo wunenë. Naandi wusë n'leesi twaangu tooso tu buloongo yimunë bumpumu bwaawu, 9i wusë n'kaambë : « Byakë byooso obyo miinu yikuvaanë byaawu mooti njeeyi wube kum'bongiminë i be kun'kuundë. » 10Foofë, Yeesu wusë n'kaambë : « Yakënë, a Satënë! Ka busonëmë : “Fumu Nzaambyaaku, na wufwenikini vwiili kukuundë#4.10 Det 6.13..” » 11Vyaasi ayi, dyaabu wusë m'biikë i siyaanzi kum'belëmë i kun'salilë.
Yeesu watoonë cisalu cyaandi ku Ngalilee
(Mak 1.14-15; Lik 4.14-15)
12Bunë kwayuwu ti Za watuulu mu buloko#4.12 Za bën'tuulë mu buloko : mati Za Batiisë. 14.3., naandi wusë ke yendaangë ku Ngalilee. 13Naandi sye kalilë ko ku Nazaleetë, kasi wusë ke kalilë ku Kapelënawuumë, livulë like ku lweeku lu liyaangë li Ngalilee, mu libweeti li Zabuloonë i Nefëtali#4.13 Zabuloonë i Nefëtali : mëziku mwaali më moongo Islayeelë.. 14Lya lisë beelë boobo bwiinji buvangininë mëbuungu më m'bici Ezayi :
15« A n'toto Zabuloonë i n'toto Nefëtali,
ku lweeku lu m'bu, ku lweeku lumesë lu Yulëdaanu,
ku Ngalilee, n'toto wun'kalilaangë bo bëkeeli ko Sizwiifë!
16Mboongu baatu yilë mu kuzingilë kusi citoombi ci lufwa,
yim'monë cyeseesë cinenë,
i bo bëke mu kuzingilë kusi citoombi ci lufwa,
cyeseesë cin'selukë#4.16 Ezy 8.23–9.1.! »
17Kutoonë ntaangu be yooyo, Yeesu wusë kutendulë i kutubë : « Lwe vilukaanu#4.17 Lwe vilukaanu : balulaanu mëvaangë. , cibilë Lwaangu lu mëyilu lwabelëmë! »
Yeesu watelë bivubë-toongo bi na
(Mak 1.16-20; Lik 5.1-11)
18Yeesu wulë ke lyataangë mu ndaambu liyaangë li Ngalilee, bunë kwamoni baanë bë nguli bë bwaali babë bivubë-toongo, Simu bën'teelë Pyeelë i mwanaandi nguli Andëlee. Baawu bëlë ke lakaangë n'talaafu mu liyaangë. 19Yeesu wusë bëkaambë : « N'daandyaanu, yilucitulaanu bivubë baatu. » 20Mëlengë-lengë, baawu bisë biikë mitaambwaawu i bisë ke n'laandaangë. 21Kwakwesini ku ntwaalë i wusë monë baanë bë nguli bwaali bën'ka, Zaakë i Za, baanë bë Zebedee, babë mu bwaatu bwaawu yimunë Zebedee, tataawu i bëlëloondaangë mitaambwaawu. Yeesu wusë bëtelë. 22Mëlengë-lengë, baawu bisë biikë bwaatu i tataawu i ke n'laandaangë.
Yeesu wulë mu kuloongë i kubelusi
23Yeesu wulutaabaangë li Ngalilee lyooso, i naandi wulë ke loongaangë mu bizutunu, ke tendulaangë Mpolu Mboti yi Lwaangu i ke belusyaangë sincyeenzu syakë syooso i bubolikinyi bwaawu booso. 24Ndumwaandi yisë laambë bwendi si yi Sili yooso i bëlën'natinaangë bakë booso bëlëbeelë sincyeenzu i simpasi simpilë i mpilë yaandi : banë bëvwaatu ke biluunzi bibi, banë bëlëbeelë nzyeetë#4.24 nzyeetë : muutu wulë mu kubeelë ncyeenzu yi n'tu, wulë mu kubwa mpaci., bikatë. Yeesu wulëbëbelusyaangë. 25Sinkoongë sinenë silë ke n'laandaangë kubotukë fë Ngalilee, fë libweeti li Dekapoolë, fë Yelusaleemë, fë Zudee i ku lweeku lumesë lu mwiilë Yulëdaanu.
Селектирано:
Matye 4: NTVIL
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2019, Wycliffe Bible Translators, Inc. and © Alliance Biblique du Congo. All rights reserved.