HLIMI 2
2
1Ki pomo na, Nyɛʔɛlɛ ní tra ní pi yrɛbɛ ní à pi po pí ma hanri mà kɔ. 2Nyɛʔɛlɛ pa li da gâ li tunŋu kì bɛfu kɔ, wlɛrɛ nasyɛnwoʔo na à li fyonri.#2:2 ma wèle wa Ebr 4:4,9-10 ni wè.
3Li dá ki wlɛʔɛ nasyɛnwoʔo hanri, àʔa po wlɛgbɔʔɔ mà yo ki klɛ́n mà liì kan, mɛjɛn li dá li ahranma tunŋu kì bɛfu yaʔa mà fyonri.#2:3 ma wèle wa Nyi 20:11 ni wè.
4Ki dá bo ban Nyɛʔɛlɛ à li nyɛʔɛlɛ ní tra hanri de.
Edɛn nagɔ kayoʔo
Nyiŋi ga na Bajegɔ Nyɛʔɛlɛ li dá tra ní nyɛʔɛlɛ hanri le, 5tiri gbogbolo lɛ̀ ìn dà bo naʔa kpɛn tra na de. Nya fanna kɛ̀ ìn bo ki fín naʔa kpo, mɛjɛn Bajegɔ Nyɛʔɛlɛ li dá bo li ìn jé hɔgɔ pan naʔa kpɛn tra na de. Hɛɛn ìn bo naʔa kpo bì da ti fali. 6Di nyumu mà dàá jrɛʔɛ tra ni ná tra hoʔo de.
7Bajegɔ Nyɛʔɛlɛ à li taplɔʔɔ kpe mà hɛn fan we mà nyuwyeʔe tiflɛʔɛ fɛ wa wi minaʔa ni ge. Ki hɛn wɔ̀ɔ po nyuwyeʔe na.#2:7 ma wèle wa 1Kor 15:45 ni wè.
8Ki kruʔu ma, Bajegɔ Nyɛʔɛlɛ à li nagɔ hanri wa Edɛn klɛnmɛ ni me yaa jɛhaʔa na ge, jango bì hɛn wa we wa ŋa liì li dá hanri ge. 9À li tiri tyɛnʔɛ kè bɛfu hanri, à ke fin wa tra na de. Ki tiri à ti po kmara. Ti pibi fanna à pi po tanma. À li nyuwyeʔe tiʔi hanri, àʔa fin wa nagɔ nulala ni le, ní tiʔi ga nì kí na kanʔa á pe na kmaʔa nì tipeʔe cɛnni ge.#2:9 ma wèle wa Tyɛ 2:7; 22:2,14 ni wè.
10Lɔkpɔʔɔ kà dà bo na jrɛʔɛ wa Edɛn ni mà báa nagɔ hoʔo we. Ki deʔe na, àʔa konʔolo kì na mà hanri lɔkluru ticɛrɛ. 11Lɔklukplɛʔɛ pé naʔa yeri Pison. Kí ma Afila klo kolo mà li krɛʔɛ. Wa ki klo ni pé na tɛ nyaʔa wa ceŋge. 12Ki klo li tɛ wí nyɛ kmaa. Nudanʔa yraʔa nyɛ wa ga pé na yeri Bedɛliyumu ní pɛgbanra ŋglɛnʔɛ ga nì pé na yeri Onikisi ge. 13Lɔkluʔu syɛnwoʔo pé naʔa yeri Gihon. Kí ma Kusyi klo kolo mà li krɛʔɛ. 14Lɔkluʔu tanriwoʔo pé naʔa yeri Tigre. Kí na fo na sye wa Asiri kaʔa ki yaajɛhaʔa namyɛlɛ na le. Lɔkluʔu ticɛrɛwoʔo kí nyɛ Yufrate nì.
15Bajegɔ Nyɛʔɛlɛ à li hɛn kpe we mòo tɛnŋɛ wa Edɛn nagɔ ni jango wi dɔɔ fali, wii wi kɔrɔsi. 16Bajegɔ Nyɛʔɛlɛ à li ki kayoʔo ga yo wì ma mà yo: «Pa ma gban bì dá nagɔ tiri ti pibi pì bɛfu ka, 17fɔ mà laʔa tiʔi ga na kí bi gban bì ma kân ma tipeʔe ní kmaʔa cɛn ge. Nà ma kà ka wlɛʔɛ ga na, pa ma gu.»
18Bajegɔ Nyɛʔɛlɛ à liʔi yo mà yo: Ki ìn yala naŋa wi kò wì yɛ. Mí bi haʔafɔlɔ hanri wí kan wi ba yala wí ni. 19Bajegɔ Nyɛʔɛlɛ à li tra kpe mà nya ajobo tyɛnʔɛ ní kajɛnʔɛ woʔo kè bɛfu fan mà pi troʔo wa naŋa krugu jango bìʔi cɛn wí bi yegee gee kan pí na, pa pe dá pi yeri ban. 20Naŋa wɔ̀ɔ yegee kan kàʔà ajobo na be mà plɛn nya wobo ní, ní kajɛnʔɛ ní ge. Di wi ìn haʔafɔlɔ wà nya wí bi yala wí ni. 21Ki nyiŋi na, Bajegɔ Nyɛʔɛlɛ à li ŋlonmo kpangbanma wa naŋa na we, wɔ̀ɔ ŋolo. À li bâ wi kodikanla là fara mà ki deʔe ton ge. 22À li kodikanla kpe mà cɛlɛ hanri mà kɛri wí ni naŋa kan we. 23Naŋa wi gáa wi nya, wɔ̀ɔ yo:
«Ki tɔ na, ki woo ŋa wí nyɛ na disyan kà gi
mà po na wre kpo.
Pé bi dɔɔ yeri cɛlɛ,
mɛjɛn wí ma nyini wa naŋa wiì ni.»
24Kiì kɔsɔ na kí ma yala naŋa wi ba làʔá wi to na, ní wi no nì wi wì pwɔ wi cɔ na we. Pe syɛnmu pe krɛ̀ʔɛ̀ wre nigbe.#2:24 ma wèle wa Mat 19:5; Mar 10:7-8; 1Kor 6:16; Efɛ 5:31-33 ni wè.
25Naŋa nì, wi cɔ nì pe syɛnmu pe dá bo waʔafeele, di fɛrɛ ti ìn dàá donni pé na.
Селектирано:
HLIMI 2: NLK10
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bible Society of Côte d'Ivoire