MATIYE Kel gə minti áŋ fələy giidə kefter toŋaŋ
Kel gə minti áŋ fələy giidə kefter toŋaŋ
Kəmtəŋ də kel gə minti Markə təknəy giidə kefter nuutuŋa bə tope gud Kel pəsaŋ kəmarwaŋ, Matiye təkaŋ haa té gəm. Yə haa kənaŋ:
– Ku mini bə minti Zaŋ Batisi jugnuŋ (3.1-12).
– Bə minti yə jəŋ batem a Yeesu daana Nərtitiŋ kəənu kuŋ (3.13—4.11).
– Joŋre kə Yeesuŋ giidə seŋka də Galileŋaŋ: anə kel gə minti wə wəətənəy, kel gə minti wə hataŋ kaŋ diiriŋ, wə seerteŋ kaa kə ɗemeŋ (4.12—18.35).
– Gəryi nuutu bə ɗe Zeruzalem (19.1—20.34).
– Wə jəŋ aluma məna Zeruzalema, yə jəmnu kəəti du, yə əwnu wəra. Kel gə minti ŋələŋ kaŋ ha'aŋ, wə haraŋ wəra dədərgə adordə meŋa daana wə vəɗaŋ kusru wəraŋ (21.1—28.20).
Matiye məlaŋ gud kel nuutuŋ ha'aŋ, wə topoŋ bəlam də kəmoomo də Yeesu, wə wəətunu sam we du də si du keɗe (Kəmtəŋ du 1—2). Le ku bə minti «Yeesu haa mindi mo?» giidə Kəl pəsaŋ kəmarwaŋ kə Matiyeŋ na anə hoŋ, wə ɗəlaŋ hare bə kel ne wəra ciiri ɗaw. Wə minti: Yeesu haa Kumnaŋ bə seere kaa bə minti Pepeŋ a wəətunu səmu wəra a niiniŋ, wə haa ‹Emanuwel› pa (gud sam toŋ minti Pepeŋ də áŋ). Kel gə minti Pepeŋ a wəətənəy giidə jaa də ajew daŋ koloŋ wəra karman bə jəə-ji kay haa duuru.
Giidə Kel pəsaŋ kəmarwaŋ kə Matiyeŋaŋ, karman bə minti wə juunu hal, haa bə minti wə taptaŋ cəərə daŋge də hate kə Yeesuŋ wəra bə maltə-malte giidə kəmtəŋ də kela ta'-ta'i wiiɗiw.
1. Kel gə minti Yeesu wəətənəy cəərə pərkiŋaŋ (5.1—7.29), yə tope bəlam də ɓeti bə gəəzə-gəəzi bə sar kaa kə kolə-kole kəmarwaŋ gə minti Kumna kə Pepeŋ neeteŋ.
2. Kel gə minti Yeesu giliŋ kaa gə minti teŋ kir waate kel cəərə bi bə Kumna kə Pepeŋaŋ (10.1-42).
3. Kel kə ŋili kaŋ cəərə Kumna kə Pepeŋaŋ, wə tupnuy bəlam di də ku kumti seeɗa. Kumna toŋ kəm hebkəna bə metə-mete, səma bulum də minti wə bə pəərəŋ, bə ji wəra kəkər (13.1-58).
4. Kaa kə doo-deŋ kir ji də kumsi naanaanə giidə seŋka təmarwa taŋa mo, də minti haa Kumna kə Pepeŋ (18.1-35).
5. Bulum tá də adoroŋ də minti wə bə pəərəŋ, yə məərə la haa naanaanə mi moŋ (24.1—25.46).
Kel waate giidə kefter kə Matiyeŋa cəərə Yeesu haa minti wə Hulum bə hate kaa bə minti bi a biŋi ku kuli bə Kumna kə Pepeŋ, daana wə aye hate bə minti kaa gə ɗe a ve adaŋ kir fəlu bə ji bərdə kəkəy wəra cəərə Kumna toŋa a kaŋ.
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Texte de la Bible: Kera © Alliance Biblique du Tchad, 2004.