Matáyɔ 3
3
Ɓɔphɛi ndea Yoáni-Mɓatisi
(Ɔna phɔtɔ Mkɔ 1.1-8; Lók 3.1-18; Yoá 1.19-28)
1Ka matú ndɔ, Yoáni-Mɓatisi ɗáju ka nkanda ndea Yudɛ́a áɔphɛa ɓe: 2«Kětiani tambea anu ájeɗe, ka nyɔngɔ nde koɓoamɛ ndea Mokonga a bíbí!» 3Cɔ, Yoáni aámbé Isáya mɔtu-nyɔngɔ ndea Mokonga ɗáyɔngi nyɔngɔ akɛ, áogeae:
«Nkpa aoaba n'ɛsɔ akpɛ ka nkanda ɓe:
Ɓɔngisiagani aphe ndea Mɔkɔta!
Mamisani aphe kau dɛ#Ɔna Isa 40.3!»
4Yoáni ɗáɔ́li ngɔ́mbɛ nde ɗáɓáɓɔngisi na sáá á ngamia, áɔ̌ɓɔɛa angeɗe á mpokɔ ka cina á kuju#Ɔna 2 Ɓam 1.8. Yɛ, ɗáoea ɓaáphaa na ɓoki á k'osaa. 5Cɔ, ɓakpa á ka Yɛusalɛ́ma, na ɓato á ka Yudɛ́a na ɓato á ka nji nɛngbo bîbíbí á iɓo Yɔɔdáni ɗáɓáoga mɔtɛ á Yoáni. 6Ɓáoɓeekea ɓojeɗe nɛɓɔ, mpɔ Yoáni áǒɓatisa ɓɔbu ka iɓo Yɔɔdáni.
7Cɔ, Ɓaphaisáyɔ na Ɓasadukáyɔ ɓásii, ɗáɓámbikíí Yoáni-Mɓatisi, ka gea áeɓatisɛ, áǒngoɗea: «Ɛɓɔkɔti á kaɓokosa nde ca! Ani mmbé ɗánophangi aphe á tea á esúia ndea Mokonga nnde a bíbí á bika? 8Tɔtɔkisani pɛ ekuma ánjá ka úbisa gea ɓosagi ɓojeɗe nɛnu. 9Ɓókokanisiɛmbɛ gea, nnde ɓooianaga sasanu ka měma anu gea te: ‹Abalaámu ande tatasu#Ɔna Yoá 8.33,37,39›, sungíi ungɔ. Nenóngoɗi gea, Mokonga aɔtɔka gaiya á ɓ'ɛtɛ nde ɓáɓɛ ɓasuko á Abalaámu. 10Cɔ, ɓábisi ye eoka ka tenaga á mǐgi-mǐgi á ɓame. Me buakɛ mmbé nnaɔgɔmbisa mbuka ánjá, ɓámbiande na maka akɛ ka nsa. 11Eme, neonóɓatisa ka iɓo ka phangia base gea, ɓosagi ɓojeɗe nɛnu. Mmbé a gǎkɛ obika mbusa ani, anoɓatisande na Měma á kanga ɓojeɗe na nsa. Yɛ, amɔnyɛ́nyi ka ɓoombia, kékeni na phúia ɓiato nɛkɛ. 12Yɛ, abɛɗi ungɔ ka njaga akɛ, aɔɓɔngisiaga ɔma. Atundagande nganɔ, áobisa k'égbóngbó nɛkɛ, â gǎkɛ ɔɛkɛkisaga mapɛpɛ í ka nsa nde nnaoimika.»
Ɓatisa á Yéso
(Ɔna phɔtɔ Mkɔ 1.9-11; Lók 3.21-22)
13Ka mbenɔ ndɔ, Yéso áokiɗia ka Yɔɔdáni ka toka akɛ na Galiláya ka gea, Yoáni ámɓatisɛ. 14Yoáni â gǎkɛ ɔkpɛma, áongoɗea Yéso: «Oɓɛ aámbé okeni ɓatisa ani. Cɔ, obiki mɔtɛ-amɔ ka ɓo?» 15Yéso áonsikisia te: «Ɓeekea phɔ́ tɔtɔkisa nndɔ kɛ̌kɛnde nga, akeni ɓégeɛ ɓó, ka tɔtɔkisa á kema nde Mokonga akondi. Mpɔ, Yoáni áoɓeekea ɓatisa akɛ.» 16Mbusa á ɓatisa á Yéso, áojuana ka iɓo. Mɔngɔ moci koba áokoɗokana ka phɔakɛ. Yéso áɔmɔna Měma á kanga ɓojeɗe n'aodida gǔ akɛ ɓea mboe. 17Wa, ɛsɔ áɔɔ́kɛkana n'atóki na koba gea: «Mmbé ande miki nɛmɔ á ekondi, nena maseye ka phɔakɛ.»
Селектирано:
Matáyɔ 3: KMW
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2021, Wycliffe Bible Translators, Inc.