Yohana 8
8
Ai ka moso min mina jalonya la
1Isa ka taa se Zeituna tini kɔkan. 2Wo dusagbɛ sɔɔmadanina, a ka seikɔ lɔhɔlɔmabonba luu kɔnɔ. Mɔɔlu bɛ k'i madon a la. A do k'i sii k'ai kalan damina. 3Seliya kalanmɔɔlu ni Falisilu ka na moso dɔ le, ai na min minala jalonya la. Ai do ka moso lalɔ jama tɛma, 4k'a fɔ Isa yɛ, ai vɛɛ: «Kalanmɔɔ, ai na moso min minala, a tɛɛ jalonya la. 5Nabi Musa na jamali dila aa seliya kitabu kɔnɔ ko mɔ ka kan ka moso min suu bon kawa la k'a faa. Wo ma, ile y'a ko di?» 6Ai ka wo fɔ a lɔsumanko le lɔ, fɔsa ai yi dailu sɔlɔn min yi kɛ a jalaki kun ne. Kɛɛ Isa v'i bilinna ka sɛvɛli kɛ damina duu ma a bolokɔni le. 7Ai ka to a maɲiningala, Isa k'i latelen k'a fɔ ai yɛ, a vɛɛ: «Ni mɔɔ ka kɛ ài tɛma min ma julumbu ta ba bene, fɔ wo tii le yi kɛ mɔɔ kunfɔlɔ le ka moso min bon kawakulun ne.» 8A do k'i bilin kɔtunun, a vɛ sɛvɛli kɛla duu ma. 9Ai ka kuma wo mɛn mingɛ, ai vɛ bɔla je kelen kelen ne ka taa, ka damina kɛmɔbalu ma. Isa kelen ka to je ani moso min lɔnin tɛɛ a ɲakɔlɔ. 10A do k'i latelen k'a fɔ moso yɛ, a vɛɛ: «Ile moso, mɔɔ wolu yi min ne? Jalasa mɔɔ ma sɔlɔn i latɔnko lɔ?»
11Moso vɛɛ: «Ǹ Kuntii, hali ai kelen gbu ma to jan.»
Isa do vɛɛ: «Ǹe fana tɛnala i latɔnna. Taa vɛ, kɛɛ i do kà julumbu ta butu.»
Isa le dunuɲa kɛnɛya le
12 #
Matiyu 5.14; Yohana 9.5. Isa k'a fɔ jama yɛ kɔtunun, a vɛɛ: «Ǹe le dunuɲa kɛnɛya le. Ni mɔɔ min ka bila ǹ kɔ, wo tii tɛnala taamana divi lɔ butu, mafɔ a kɛtɔ kɛnɛya sɔlɔnna min yi niimaya dila.»
13 #
Yohana 5.31. Falisilu k'a javi wo lɔ, ai vɛɛ: «I yi seleya dila ka bɛn i jɛlɛ le ma. Iya seleya tɛ tuɲa le.»
14Isa k'ai javi, a vɛɛ: «Hali ni ǹ ka kɛ seleya dila ka bɛn ǹ jɛlɛ ma, ǹa seleya yi tuɲa le le, kamasɔlɔn ǹ ka m̀ bɔya ni ǹ taaya lɔn. 15Àilu le yi kiti tɛɛla ka bɛn adamadennu ya miliya ma. Kɛɛ ǹe do tɛ mɔɔ suu suu ya kiti tɛɛla. 16Hali ni ǹ ka kiti tɛɛ, ǹ jo yi kiti wo lɔ, kamasɔlɔn ǹe kelen tɛ wo tɛɛba le, fɔ ǹe ni ǹ Fa min na ǹ kelayala. 17A sɛvɛnin àiya seliya kitabu kɔnɔ ko ni mɔɔ fila ya seleyakan ka bɛn kuma kelen ma, seleyakan wo yi tuɲa le le. 18Ǹe gbu le m̀ masele le. Ǹ Fa min na ǹ kelayala, wo fana yi ǹ sele le.»
19Ai k'a maɲininga wo lɔ, ai vɛɛ: «I fa yi min ne?»
Isa k'ai javi, a vɛɛ «Ài ma ǹ lɔn, kumatɛ ǹ Fa ma. Ni ài tɛɛ ka ǹ lɔn, ài tɛɛ ǹ Fa fana lɔnne.»
20Isa ka kuma wo bɛ fɔ k'a to mɔɔlu kalanna niilifenkesulu dafɛ lɔhɔlɔmabonba luu kɔnɔ. Mɔɔ foi ma a mina, kamasɔlɔn aa waate tɛɛ ma se ba.
Isa taako a Fa fɛlɔ
21Isa vɛɛ ai yɛ kɔtunun: «Ǹ natɔle taala. Ài do kɛtɔ ǹ ɲininna, kɛɛ ài satɔle k'ài to àiya julumbulu lɔ. Ǹ taatɔ tɛɛminja, ài tɛ se taala woja.»
22Jahudiya kuntiilu k'a fɔ i ɲɔɔ yɛ, ai vɛɛ: «Jalasa a kɛtɔ a jɛlɛ faala? Kamasɔlɔn a n'a fɔla ko: ‹Ǹ taatɔ tɛɛminja, ài tɛ se taala woja.› »
23Isa do k'ai javi, a vɛɛ: «Ài sɔlɔnnin duukolo kɔkan jan ne, kɛɛ ǹe do bɔnin san ne ma. Dunuɲa ta le ài le, kɛɛ dunuɲa ta tɛ ǹe le. 24Wo le n'a kɛla, ǹ n'a fɔla ài yɛ, ǹ ko, ài satɔle k'ài to àiya julumbulu lɔ. Ǹ ko, ni ài ma limaniya k'a fɔ ‹Ǹe le wo le, Min yi je›, wo vɛ kɛla, ài satɔle k'ài to àiya julumbulu lɔ.»
25Ai ka Isa maɲininga, ai vɛɛ: «Jene i le le?»
Isa vɛɛ: «Ǹ'i mɔɔ min ne, m̀'ɛ wo fɔ ài yɛ ka ta a damina ma. 26Ko siyama yi m̀ bolo k'a fɔ ài yɛ ka bɛn àiya kititɛɛko ma, kɛɛ ǹ kelaba le tuɲande le. Ǹ na min mɛnna a da, ǹ'i wo le lasena dunuɲa ma.»
27Ai do tɛɛ m'a ɲaye ko a tɛɛ kumala ai yɛ ka bɛn a Fa Ala le ma. 28Wo lɔ, Isa vɛɛ ai yɛ: «Ài vɛ Mɔɔnivin Tanin lajɛlɛla waate min nɔ, ài kɛtɔ a lɔnna ko: ‹Ǹe le wo le, Min yi je›. Ài do kɛtɔ a lɔnna fana ko ǹ tɛ foi kɛla ǹ jɛlɛkanu ya seetiiya lɔ, kɛɛ ǹ Fa na ǹ kalanna minu la, ǹ'i wolu le lasena ài ma. 29Ǹ kelaba yi ǹ fɛ. A do ma ǹe kelen to, kamasɔlɔn ǹ'a diyanankolu le kɛla kudein.» 30A ka to kuma wolu fɔla, mɔɔ siyama ka limaniya a ma.
Nabi Ibulahima bɔzɔn bɛlɛbɛlɛlu
31Wo lɔ, Isa k'a fɔ Jahudiyalu yɛ, minu limaniyanin tɛɛ a ma, a vɛɛ: «Ni ài ka to ǹ kumakannu labatola, wo vɛ kɛla, ǹ kɔbiladen bɛlɛbɛlɛ le ài le. 32Ài kɛtɔ tuɲa lɔnna, ado tuɲa kɛtɔ ài lafɛlɛla.»
33 #
Matiyu 3.9; Luka 3.8. Ai ka Isa javi, ai vɛɛ: «Ǹu yi Nabi Ibulahima bɔzɔn ne le. Mɔ do ma kɛ ba mɔɔ suu suu ya jɔn ne bene. I y'a fɔla di wo lɔ ko: ‹Ài lafɛlɛtɔ›? »
34Isa vɛɛ: «Ǹ'i tuɲa fɔ ài yɛ, mɔɔ minu yi julumbu tala, wolu yi julumbu ya jɔn ne le. 35Ado jɔn tɛ tola jɔnfa ya bon na kudein, kɛɛ do jɔnfa denkɛ wo yi je le kudein. 36Wo ma, ni Ala Denkɛ vɛ ài lafɛlɛla, ài lafɛlɛnin yi tole bɛlɛbɛlɛ kɛ. 37Ǹ k'a lɔn Nabi Ibulahima bɔzɔn ne ài le. Wo bɛ n'a kɛ, ài yi ǹ faako ɲaɲininna, kamasɔlɔn ǹ kumakan tɛ sawatila ài ma. 38Ǹ na ko min yena ǹ Fa fɛlɔ, ǹ'i wo le fɔla. Àilu do na min mɛnna ài fa da, ài yi wo le kɛla.»
39Ai do k'a javi, ai vɛɛ: «Nabi Ibulahima le mɔ fa le.»
Isa do vɛɛ ai yɛ: «Ni ài tɛɛ vɛ kɛla Ibulahima bɔzɔn bɛlɛbɛlɛ le, ài tɛɛ a kɛko ɲɔɔziilu kɛle. 40Kɛɛ ài yi ǹ faako le ɲaɲininna yi ne, ǹe min na tuɲa fɔla ài yɛ, ǹ na min mɛnna Ala da. Ibulahima ma wo suu kɛ dɛ! 41Ài y'ài fa kɛko ɲɔɔziilu le kɛla yi ne.»
Ai do ka Isa javi, ai vɛɛ: «Mɔ tɛ ɲɔmɔden ne dɛ! Fa kelenpesa le mɔ la, min taanin kɛla Ala gbu le.»
42Isa vɛɛ ai yɛ: «Ni Ala tɛɛ vɛ kɛla ài fa bɛlɛbɛlɛ le, ǹa ko tɛɛ diyale ài yɛ, kamasɔlɔn m̀ bɔnin Ala le fɛlɔ ka na. M̀ ma na ǹe gbu ya seetiiya lɔ, mafɔ ale le na ǹ kelayala. 43Ǹ'i min fɔla yi ne, mindɛ lɔ ài tɛ wo ɲayena? Kamasɔlɔn a see tɛ ài yɛ k'ài bolo sii ǹ kumakannu kɔlɔ. 44Àilu y'ài fa Soitana ta le le, a do lɔɔ y'ài la k'ai fa ladiyanankolu le kɛ. Ka ta dunuɲa damina ma, mɔɔfaaba le a le, min m'a bolo sii tuɲandeya kɔlɔ, kamasɔlɔn hali tuɲa den kelen gbu t'a lɔ. A vɛ kɛla faɲa fɔla, wo y'a jɛlɛkanu dajoo le le, kamasɔlɔn faɲafɔba le a le ani faɲafɔbalu fa. 45Kɛɛ komi ǹe yi tuɲa le fɔla, wo le y'a kɛla, ài limaniyanin tɛ m̀ ma. 46Jene y'ài tɛma min yi se ǹe jobaliyala julumbu tako lɔ? Ni ǹe do yi tuɲa le fɔla, mindɛ lɔ ài limaniyanin tɛ m̀ ma? 47Mɔɔ min yi Ala ta le, wo tii le y'a tolomalɔla Ala kumakan ma. Kɛɛ do, àilu tɛ Ala ta le, wo le y'a kɛla, ài tɛ ài tolomalɔla a la.»
Isa buɲanin vɛ Nabi Ibulahima le
48Jahudiya kuntiilu k'a fɔ Isa yɛ, ai vɛɛ: «Mɔ jo y'a lɔ k'a fɔ ko Samaliyaka le i le, ani jinatɔ, kɛlɛ?»
49Isa vɛɛ: «Jinatɔ tɛ ǹ ne. Ǹ'i ǹ Fa le buɲala, kɛɛ àilu do yi ǹ lafeyala. 50Ǹ tɛ magbiliyali ɲininna ǹ jɛlɛ yɛ, kɛɛ dɔ vɛ je min y'a ɲininna ǹ yɛ, a do yi kititɛɛba le le. 51Ǹ'i tuɲa fɔ ài yɛ, ni mɔɔ min ka ǹ kumakan labato, wo tii tɛnala saya masɔlɔnna tuun.»
52Jahudiya kuntiilu vɛɛ a yɛ: «Mɔ v'a lɔn butu k'a fɔ ko jinatɔ le i le. Nabi Ibulahima ka sa, ani kelalu fana. Ile do y'a fɔla ko ni mɔɔ min k'i kumakan labato, wo tii tɛnala saya masɔlɔnna tuun. 53Wo lɔ saa, i buɲanin vɛ mɔ bema Ibulahima le min na sala, niwotɛ kelalu minu na sala? I i jɛlɛ jatela jene le?»
54Isa vɛɛ: «Ni ǹ ka ǹ jɛlɛ magbiliya, ǹa magbiliyali wo tɛnala kɛla foi le. Min yi m̀ magbiliyala, wo le ǹ Fa le, ai y'a fɔla min ma ko ài Tii. 55Ài ma a lɔn, kɛɛ ǹe do ka a lɔn ne. Ni ǹ tɛɛ v'a fɔla m̀ ma a lɔn, ǹ tɛɛ kɛle ài ɲɔɔzii faɲafɔba dɔ le. Kɛɛ do, ǹ ka a lɔn ne, ado ǹ'a kumakan labatola. 56Ài bema Ibulahima josola ka diya ka bɛn ǹ nalon yenko ma. A do ka a ye ka sawa.»
57Jahudiya kuntiilu do vɛɛ a yɛ: «Ile min ma ma sanji biloolu (50) bɔ ba bene, i vɛ Ibulahima ye?»
58Isa vɛɛ ai yɛ: «Ǹ'i tuɲa fɔ ài yɛ, jani Ibulahima tɛɛ sɔlɔn, ǹe le wo le, Min yi je.» 59Wo fɔ Isa bolo, ai vɛ kawakulunnu tala ko ai y'a bon, kɛɛ Isa k'i doon ka bɔ lɔhɔlɔmabonba luu kɔnɔ ka taa.
Селектирано:
Yohana 8: MBT2023
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Manya Bible Translation, © SIM International, 2023