Luka 8
8
Moso minu ka bila Isa kɔ
1Wo timinnin kɔ, Isa tɛɛ timintiminna so ni toodalu la ka mɔɔlu kawani, ani ka Samakan Kein lase ka bɛn Ala ya masaya ma. Ado aa keladen mɔɔ tan ni fila (12) tɛɛ a fɛ. 2#Matiyu 27.55, 56; Malɛkɛ 15.40, 41; Luka 23.49.Moso dɔlu tɛɛ a fɛ, a na jinajuulu gbɛnna k'ai bɔ minu dɔlu lɔ, ani k'a dɔlu lakɛnɛya. A dɔ tɔɔ tɛɛ ko Mɔyamu Magidalaka, Isa tɛɛ vɛ jina wolowulan gbɛn k'ai bɔ min nɔ. 3Yohani, min tɛɛ Helodi ya bonkunnasiiba Kuza moso le, wo tɛɛ moso wolu tɛma, ani Susana, ani moso siyama gbɛlɛlu. Wolu tɛɛ Isa ni a kɔbiladennu madɛmɛnna ai bolofennu la.
Malofalinba ma sana
Matiyu 13.1-9; Malɛkɛ 4.1-9
4Lon dɔ, jama ba ka to bɔla so siyama la k'ai ladɛn Isa fɛlɔ, a ka sana min la ai yɛ, a vɛɛ: 5«Sɛnɛkɛba dɔ ka taa malofalinya lɔ. A ka to malo falinna, a dɔlu ka ben siya dala. Timinsennɔmɔɔlu ka wolu lɔdɔndɔn, ado kɔnɔnilu ka na k'a tɔ tɔmɔn. 6Malo dɔlu ka ben fala kɔkan. Wolu ka fɛlɛn, kɛɛ ai ka ja, kamasɔlɔn sumaya tɛɛ tɛ je. 7Malo dɔlu ka ben wonilu tɛma. Malo ni wonilu ka buɲa i ɲɔɔ fɛ, ado wonilu ka malo lɔgbalin. 8Malo dɔlu fana ka ben duu kein kan, ka fɛlɛn ka sawati kosɛvɛ k'ai den kɛmɛ (100) kɛ.»
Wo fɔ, Isa k'a kan labɔ k'a fɔ ai yɛ, a vɛɛ: «Tolo yi mɔɔ min kun, wo tii y'a tolomalɔ kuma min ma.»
Isa ka sanalu la dailu min na
Matiyu 13.10-17; Malɛkɛ 4.10-12
9Isa kɔbiladennu k'a maɲininga ka bɛn sana wo kɔlɔ ma. 10Wo lɔ, Isa vɛɛ ai yɛ: «Ala ya masaya gbonolu lɔnni vɛ di ài ma, kɛɛ ko bɛ yi fɔla dɔlu yɛ sana le lɔ. Wo le n'a kɛla,
‹Ai y'ai ɲa kaana, kɛɛ ai tɛ foi yena.
Ai y'ai tolomalɔla, kɛɛ ai tɛ foi ɲayena.› »
Isa ka malofalinba ma sana kɔlɔ fɔ teme
Matiyu 13.18-23; Malɛkɛ 4.13-20
11«Sana wo kɔlɔ le min ne: Malo yi Ala kumakan ne le. 12Malo minu na benna siya dala, wolu le mɔɔlu le minu yi Ala kumakan mɛnna. Kɛɛ wo kɔ, Soitana yi nala ka kuma wo bɔ ai josokun nɔ, alako ai kana limaniya ka kisi. 13Malo minu na benna fala kɔkan, wolu le mɔɔlu le minu yi Ala kumakan mɛnna, k'ai bolo sii a kɔlɔ telemanin sawa boloma. Kɛɛ kuma wo lilen tɛ donna ka jaanfa ai josokun nɔ. Ai yi waateni le kɛla limaniya lɔ, kɛɛ do lɔsumani waate vɛ senna ai ma, ai yi limaniya siya bilala. 14Malo minu na benna wonilu tɛma, wolu le mɔɔlu le minu yi Ala kumakan mɛnna, kɛɛ ai yi haminna dunuɲalɔtɛɛkolu le le, ani nafolokolu, ani jɛlɛdiyabɔkolu. Wo boloɲa ma, Ala kumakan lɔgbalinyine ai josokun nɔ, k'ai kɛ iwo malo fofo. 15Malo minu na benna duu kein kan, wolu le mɔɔlu le minu yi Ala kumakan mɛnna, k'ai bolo kɛ a la ai josokun ɲuma lɔ, min telenin. A do yi sawatila ai ma ka bɛn aiya sawali ma.»
Fitina ma sana
Malɛkɛ 4.21-25
16 #
Matiyu 5.15; Luka 11.33. «Mɔɔ tɛ fitina lamɛnɛnna k'a sii daa kɔlɔ, niwotɛ lafen kɔlɔ. Fɔ i y'a sii fitinasiiya le lɔ, fɔsa mɔɔ minu yi donna bon na, wolu yi kɛnɛya ye. 17#Matiyu 10.26; Luka 12.2.Ko doonnin suu suu tɛ je, min la tɛnala nkɛnɛmayala, kumatɛ gbonoko ma min tɛnala bɔla gbɛ la.
18 #
Matiyu 25.29; Luka 19.26. «Ài y'ài tolomalɔ kobɛn! Kamasɔlɔn ni fen ka kɛ mɔɔ min bolo, a dɔ latɔ wo tii ma ta kɔkan ka siyaya. Kɛɛ ni fen ma kɛ mɔɔ min bolo, hali a yi min jatela a ta le, wo minatɔle a la.»
Isa ba ni a dɔɔkɛlu
Matiyu 12.46-50; Malɛkɛ 3.31-35
19Wo waate lɔ, Isa ba ni a dɔɔkɛlu ka na a ma, kɛɛ ai ma se ai madonna a la ka bɛn jama ma. 20Wo lɔ, ai vɛɛ Isa yɛ: «I ba ni i dɔɔkɛlu lɔnin luu ma. Ai y'a fɛ k'i ye.» 21A do k'ai javi, a vɛɛ: «Mɔɔ mɔɔ vɛ Ala kumakan mɛnna k'a labato, wolu le m̀ ba ni ǹ dɔɔkɛlu le.»
Isa ka fɔɲɛ ba lɔsumaya teme tue
Matiyu 8.23-27; Malɛkɛ 4.35-41
22Lon dɔ, Isa ni a kɔbiladennu ka don kulun kɔnɔ. A do vɛɛ ai yɛ: «Ài ndaa kɔɔ kɔma.» Wo lɔ, ai vɛ taala. 23Ai ka to kɔɔ kɔkan, sunɔɔ ka Isa mina. Ado sanfɔɲɛ ba ka bɔ ka kɔɔ lajaman. Ji vɛ donna kulun kɔnɔ, k'ai bila masuwa lɔ. 24Wo kɛ, ai k'i madon Isa la k'a lakunun. Ai do vɛɛ a yɛ: «Kalanmɔɔ! Kalanmɔɔ! Mɔ satɔle!»
Isa k'i wuli ka fɔɲɛ ni kɔɔ jamannin jamali, ai do lɔ ka sumaya tue. 25Wo kɛnin, Isa vɛɛ ai yɛ: «Àiya limaniya yi min ne?»
Ai bɛ ka siyan ka kawakoya, k'a kɛ a fɔle i ɲɔɔ yɛ, ai vɛɛ: «Mɔɔ suu mindɛ le min ne? Hali a yi fɔɲɛ ni kɔɔ gbu jamalila, ai do y'a kumakan labatola.»
Isa ka jinatɔ dɔ lakɛnɛya teme
Matiyu 8.28-34; Malɛkɛ 5.1-20
26Ai do ka kɔɔ tɛɛ ka se Gelasekalu ya duu lɔ, min yi kɔɔ kɔma, a ɲatiliminnin Galile la. 27Isa jiitɔla ka bɔ kulun kɔnɔ, so wo kɔnɔ kɛ́ dɔ ka na a labɛnya lɔ, jina siyama tɛɛ min nɔ. Ka ta waate jaan ma, a tɛɛ tɛ feeyabɔ bilala a kanna, kumatɛ k'a sii bon na, fɔ kabuluso la. 28A ka Isa ye mingɛ, a ka gbanɔ k'i kɛ a sen kɔlɔ. A do ka gbanɔ k'a fɔ, a vɛɛ: «Isa, Masa Taala Denkɛ, mindɛ le ile ni ǹe wotɛ? I jon jaani, i kà ǹ jangata.» 29A ka kuma wo fɔ kamasɔlɔn Isa tɛɛ vɛ jina jamali ko a yi bɔ a lɔ. Jinajuu tɛɛ vɛ bila a lɔ siɲa siyama le, ado sokɔnɔmɔɔlu tɛɛ a gbaanna kulun na, k'a sili jɔlɔkɔ la, k'a lakana. Wo bɛ n'a kɛ, a tɛɛ jɔlɔkɔ tɛɛla ka kulun lɔkali, ado jina tɛɛ taala a le fuwa lɔ.
30Isa k'a maɲininga, a vɛɛ: «I tɔɔ di?»
A k'a javi, a vɛɛ: «Jamaba.» A na wo fɔla kamasɔlɔn jina siyama tɛɛ vɛ don a lɔ. 31Jinalu ka Isa madiya ko a kà ai jamali k'ai lataa diɲa gboon lɔjaannin nɔ.
32Wo k'a talan kɔsɛ kulu ba dɛgbɛ dɔ tɛɛ dɔnnila tini kɔkan je. Jinalu ka Isa madiya ko a yi diɲa ai yi taa don kɔsɛlu lɔ. A do ka diɲa wo ma. 33Wo kɛ, jinalu ka bɔ kɛ́ lɔ ka taa don kɔsɛlu lɔ. Ado kɔsɛ kulu vɛ tini lajiila bɔli le ka taa don kɔɔ kɔlɔ k'ai bɛ faa.
34Kɔsɛkunnasiibalu ka wo ye mingɛ, a vɛ bɔlila ka taa wo ɲafɔ so ni toodalamɔɔlu bɛ yɛ. 35Mɔɔlu do vɛ taala wo kolasaaya lɔ. Ai ka se Isa fɛlɔ mingɛ, ai ka jinatɔ kɔlɔ siinin ye Isa sen kɔlɔ, faani tɛɛ a kanna, a do hangili la tɛɛ vɛ sei a ma. Wo lɔ, ai bɛ ka siyan. 36Jinatɔ la ka kɛnɛya mɔɔ minu ɲana, wolu ka wo ɲafɔ dɔlu yɛ. 37Gelasekalu bɛ ka siyan bubale, ka Isa madiya ko a yi bɔ aiya duu lɔ. Wo lɔ, Isa ni a kɔbiladennu ka don kulun kɔnɔ ko ai yi seikɔ. 38Wo kɛ, jinatɔ kɔlɔ vɛ Isa madiyala ko a a fɛ ka to a fɛ, kɛɛ a do ma diɲa, fɔ k'a lasei, a vɛɛ: 39«Taa i fɛso. Ala na ko ba min kɛla i yɛ, i yi wo lase i balamɔɔlu ma.» Isa tɛɛ vɛ ko ba min kɛ a yɛ, a vɛ taala wo lasena so fan bɛ lɔ.
Moso jangalotɔ ni Jailusi denmoso
Matiyu 9.18-26; Malɛkɛ 5.21-43
40Isa seikɔnin kɔɔ kɔma, jama k'a labɛn, kamasɔlɔn ai bɛ tɛɛ a makɔnɔna. 41Wo waate kelen nɔ, Aladalibon ɲamɔɔ dɔ min tɔɔ tɛɛ ko Jailusi, wo ka na Isa ma. A do k'i kɛ a sen kɔlɔ k'a madiya ko a yi taa aa bon na, 42kamasɔlɔn a denmoso kelenpesa min vɛ sanji tan ni fila (12) jate sɔlɔn, wo yi sa bolo le ma.
Isa taatɔla je, jama tɛɛ a lɔgbalinna ai tɛma. 43Wo k'a talan moso dɔ tɛɛ je, min tɛɛ vɛ san tan ni fila (12) kɛ maa jangalo lɔ. Basibɔbalu tɛɛ v'a bolo latɛ tɛtɛ, kɛɛ wolu suu suu ma se a jangalo basila. 44Moso wo ka na Isa kɔma, k'a bolo tuu aa faaniba dagbolo la, ado aa jelibɔ la ka lɔ telemanin. 45Wo lɔ, Isa vɛ ɲiningali kɛla, a vɛɛ: «Jene n'a bolo tuula ǹ na?»
Mɔɔ foi m'i lɔ a la mingɛ, Piyɛli do vɛɛ a yɛ: «Kalanmɔɔ, i t'a yena i lɔgbalinnin teme jama bolo?»
46Kɛɛ Isa do vɛɛ a yɛ: «Mɔɔ dɔ na tuula ǹ na, kamasɔlɔn ǹ k'a lɔn fanga dɔ vɛ bɔ ǹ nɔ.»
47Moso k'a ye mingɛ ko a tɛ se tola doon nɔ, a lɔjaajaatɔla ka na, k'i kɛ Isa sen kɔlɔ. A do k'a fɔ jama ɲana min n'a kɛla a n'a bolo tuula Isa la, ani a na kɛnɛya sɔlɔnna teme telemanin. 48Wo fɔ, Isa vɛɛ a yɛ: «Ǹ denmoso, iya limaniya v'i lakɛnɛya. Taa hɛlɛ lɔ.»
49Isa ka to kumala, mɔɔ dɔ ka na ka bɔ Aladalibon ɲamɔɔ ya bon na k'a fɔ a yɛ, a vɛɛ: «I denmoso vɛ sa. I kà kalanmɔɔ ɲagba butu.»
50Wo mɛn Isa bolo, a vɛɛ Jailusi yɛ: «I jei kà tɛɛ. I yi limaniya le kɛ dein, wo vɛ kɛla, i denmoso yi kɛnɛyale.»
51A senin Jailusi fɛlɔ, a ma diɲa mɔɔ foi yi don a fɛ bon na, mafɔ Piyɛli ni Yohana ni Janguba, ani den fa ni a ba. 52Mɔɔlu bɛ tɛɛ gbanɔ ni saankasi le la ka bɛn denni sako ma. Kɛɛ Isa do vɛɛ ai yɛ: «Ài kà kasi. Denni sanin tɛ. A yi sunɔɔ le lɔ.»
53Ai do ka jɛlɛbɔ a lɔ, kamasɔlɔn ai bɛ tɛɛ k'a lɔn feu ko denmosoni vɛ sa. 54Isa do ka taa denni mina a bolo ma k'a kan labɔ, a vɛɛ: «Denni, i wuli!» 55Wo fɔ Isa bolo, denni nii la ka sei a lɔ, a do k'i wuli telemanin. Wo kɛnin, Isa k'ai lɔ ko ai yi dɔnni di denni ma. 56A fa ni a ba ka kawakoya, kɛɛ Isa k'ai jamali ko ai kà wo ko fɔ mɔɔ suu suu yɛ.
Селектирано:
Luka 8: MBT2023
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Manya Bible Translation, © SIM International, 2023