LUKA 23
23
Pilat Hma-ah Jesuh Ahoih O
(Mat 27:1-2,11-14; Mrk 15:1-5; Jhn 18:28-38)
1Anihcae boih mah angthawk o moa Jesuh to Pilat hma-ah ahoih o. 2Anihcae mah zae a net o moa, “Hi kami mah kaicae kaminawk hae a caeh haih pazae, Rom Sangpahrang khaeah tamut paek han aiah a thuih pae moa angmah hoi angmah to sangpahrang Messiah ni, tiah a thuih,” tiah a naa o.
3Pilat mah, “Nang loa Judah kaminawk ih sangpahrang?” tiah a duengh.
Jesuh mah, “Na thuih ih batiah ka oh,” tiah pathim pae.
4Topacoengah Pilat mah qaihma kacoetanawk hoi mipuinawk khaeah, “Hi kami hae zaehaih tidoeh ka hnuh ai,” tiah a naa pae.
5To-e anihcae mah kana aep aep ah, “A patukhaih ih hoiah Judea prae bum boih ah kaminawk salak thungah lokpunghaih to a sak. Galili hoitoah amtong moa vaihi hiah a phak boah,” tiah a naa o.
Herod Khaeah Jesuh Patoeh O
6Ato to Pilat mah a thaih na-ah, “Hi kami hae Galili kami maw?” tiah a duengh. 7Jesuh loa Herod mah a uk ih prae thungih kami ni tito panoek na-ah Herod khaeah to a patoeh; tona tue thuemah Herod doeh Jerusalem ah a oh. 8Herod mah Jesuh to a hnuk na-ah palung anghoe phi, kawmawtiah anih ih kawng to a thaih toemoe boah moa hnuk han koeh ih to akraa parai boah. Jesuh mah dawnraihaih hmuen maemaeto sak ih to hnuk han a oepdoeng. 9Topongah Herod mah Jesuh to lok zetpui a duengh, to-e Jesuh mah pathim pae ai. 10Qaihma kacoetanawk hoi Tawklok patukkungnawk to a hma-ah tacawt o moa Jesuh to kana paraiah zae a net o. 11Herod hoi angmah ih risanawk mah Jesuh to pacaekhlaek o moa tidoeh tamu suem aiah tamhnuih tamsak lok a sak o haih; moa kahni kahoih to angkhuksak o moa Pilat khaeah patoeh o let. 12Tona ni ah Herod hoi Pilat loa ampui kahoih ah angcoeng hoi; ato ai nahlanah loa misa ah oh hoi.
Jesuh Hum Hanah Lok Takroek O
(Mat 27:15-26; Mrk 15:6-15; Jhn 18:39—19:16)
13Pilat mah qaihma kacoetanawk, pahoikungnawk hoi mipui to a kawk cu moa, 14anihcae khaeah, “Hi kami hae kai khaeah nanghoih o moa kaminawk to a caeh haih pazae, tiah na thuih o. Vaihi nangcae hma-ah hiah lok ka duengh lipaci boih boah, nangcae mah zae na net o haih ih batiah a sak ih zaehaih ih tita doeh ka hnuh ai. 15Herod mah doeh a zaehaih to hnuh ai toeng, topongah kai khaeah ang patoeh let. Hi kami mah a duekhaih han khoekto a sak ih hmuen tidoeh om ai. 16Topongah ka boh moa ka prawt let han,” tiah a naa. 17(Takantak Poi oh kruekah Pilat mah thongkrah longto a prawt pae toemtoem.)
18Pilat ih lok to a thaih o na-ah mipuinawk loa, “Anih to hum ah! Barabbas to na prawt pae oah!” tiah a hangh o bukbuk. 19(Barabbas loa vangpui thungah lokpunghaih ka omsakkung hoi kami hum pongah thongim ah pakhrak o.)
20Pilat loa Jesuh to prawt han a koeh, topongah mipui khaeah lok a thuih let bae. 21To-e anihcae loa, “Kraws ah takhing ah! Kraws ah takhing ah!” tiah a hangh o let toengtoeng bae.
22Pilat loa vai thum roekto a thuih bae moa, “Ti zaehaih ih to maw a sak? Duekhaih han khoekto ka krah a sak ih zaehaih tidoeh ka hnuh ai roeroe. Ka boh moa ka prawt let han,” tiah a naa.
23To-e anihcae loa ta-aw ka taem khawk ah a hangh o moa Jesuh to kraws ah takhing han oh roeroe, tiah a hangh o aep aep pongah hnukkhuem aloa a hangh o haih ih mah a pazawk. 24Topongah a hnik o ih batih toengah Jesuh to hum hanah lok a takroek. 25Mipui mah a koeh o ih, lokpunghaih tacawtsak pong hoi kami hum pongah thongim ah pakhrak o ih kami to Pilat mah a prawt pae; topacoengah Jesuh to angmahcae koeh o ih batih toengah sak hanah anihcae ban thungah a paek.
Kraws Ah Jesuh Takhing O
(Mat 27:32-44; Mrk 15:21-32; Jhn 19:17-27)
26Risanawk mah Jesuh to ahoih o moa a caeh o haih li nathuemah vangca hoitoah vangpui ah kangzo Sairin vang ih kami longto ahmin Simon to angqum o. Anih to a naeh o, kraws to aputsak o moa Jesuh hnukah to a baangsak o.
27Kami paroeai mah ahnuk ah bang o; tonawk thungah saoek kang tum moa anih hanah ka qah haih tuek nongpui thoemto a oh. 28Jesuh mah anihcae bangah angqoi moa, “Jerusalem nongpuinawk, kai hanah na qah o haih hmah; nangmahcae han hoi na caanawk han to mah qah o haih lat ah. 29Kawmawtiah ‘Caanawk ka tawn vaih ai, naukta ka za vaih ai hoi naukta tahnutui panaek vaih ai nongpuinawk loa natanmaw tahamhoih o’ ti ih atue to na pha tih. 30Ato tue loa kaminawk mah maesangnawk khaeah, ‘Kaicae nuiah na krahthuih rup ah,’ tihoi maenawk khaeah, ‘Kaicae na etthuih man ah,’ tiah na thuih o ih atue ah om tih.#Hos 10:8; Lph 6:16 31Kawmawtiah thing a hing na-ah mataeng hibatih hmuennawk to sak ah oh nahaeloa angqo na-ah taoe loa kawbangmaw om tih?” a naa.
32Jesuh hoiah nawnto hum hanah kami kazae longhnetto doeh a caeh o haih toengh. 33“Luhuh,” naa pae o ih ahmuenh to a phak o na-ah ato hmuenh ah Jesuh to kraws ah takhing o moa kami kazae longhnetto hnit doeh a bantang bangah longto, banqoi bangah longto takhing o toeng. 34#Sam 22:18Jesuh mah, “Pa, anihcae zaehaih tahmen pae ah. A sak o ih to panoek o ai,” tiah a naa.#23:34 Thoemto banrikcabu ah loa Jesuh mah, “Pa, anihcae zaehaih tahmen pae ah. A sak o ih to panoek o ai,” tihae om ai.
A khukbuenhnawk to qoihcung azuhaih hoiah amzet o. 35Mipuinawk loa toah angdoet moa a khet o li na-ah Judah kami pahoikungnawk mah, “Mi kalahnawk loa pahlong; Sithaw mah qoih ih Messiah ah a oh nahaeloa angmah hoi angmah to amhlong na soe,” tiah padaeng o.#Sam 22:7
36 #
Sam 69:21
Risanawk mah doeh pahnuih o haih; a caeh o thuih moa atho tamsi misurtui kathaaw to a paek o moa, 37“Judah Sangpahrang ah na oh nahaeloa nangmah to amhlong khae,” tiah a naa o.
38A lu ranui ah, “Hi kami loa Judah Sangpahrang ni,” tiah tarik ih ca to a bet o.
39Toah bangh o ih kami kazae longto mah, “Nang loa Messiah na ai maw? Nangmah hoi nangmah to amhlong aloa kai hnit doeh pahlong toeng khae,” tiah padaenghaih hoiah a naa.
40To-e longto mah loa a zoeh, “Sithaw na zi ai maw? Nang loa anih batiah raekhaih kangvan to na hak. 41To-e aihnit ih raekhaih ih loa kahmaan ni, kawmawtiah aihnit loa a sak hoi ih pongah hak hankoi ka krah to a hak hoi; to-e anih loa zaehaih tidoeh sah ai,” tiah a naa. 42Jesuh khaeah, “Jesuh, Sangpahrang batiah nangzoh na-ah kai na pahnet hmah,” tiah a naa.
43Jesuh mah anih khaeah, “Lok kamaih: Vaihni ah kai hoiah nawnto Paradis ah na om tih,” tiah a naa.
Jesuh Duekhaih
(Mat 27:45-56; Mrk 15:33-41; Jhn 19:28-30)
44Athun nitue hlaihnetto thuemtham ah ni to a ving moa a vinghaih mah prae bum boih to nitue thumto karoekto a khuk. 45Tempal thungah kahnizang ih to hnetto ah angsih rak.#Exo 26:31-33 46Jesuh loa khoeh puiah a hangh moa, “Pa, ka pakhra hae na ban thungah kang tahlang,” tiah a thuih moa a paqam.#Sam 31:5
47Risa angraeng mah totiah ka om to a hnuk na-ah Sithaw to saphaw moa, “Hi kami loa kami kahoih tangtang ni,” tiah a thuih.
48Ato hmuen khet hanah toah ka cu kaminawk boih mah hmuen ka om to a hnuk o na-ah palungset loiah saoek angtum o moa im bangah amlaem o. 49Jesuh to miloeng ah ka panoek kaminawk boiboih hoi Galili prae hoitoah ahnuk ah ka baang nongpuinawk mah doeh kahla ah angdoet o moa a danh o.#Luk 8:2-3
Jesuh Aphumhaih
(Mat 27:57-61; Mrk 15:42-47; Jhn 19:38-42)
50-51Judea prae Arimathea vang ih Joseph naa pae o ih kami longto a oh. Anih loa kami kahoih hoi khangza kaom kami ah a oh moa Sithaw Poenghaih kangzo han to ka zing kami ni. Anih loa kawngsi thungih longto ah oh toeng eloa lok takroek o haih ih hoi hmuen sak o haih ih to naakrah ai. 52Anih loa Pilat khaeah a caeh moa Jesuh ih qok to a hnik. 53Topacoengah a qok to a khringh moa kahni naemding hoiah abam moa hlungkhaw thuk ih, patoh vaih ai vop ih, taprong kangtha thungah up o. 54Ato ni loa Amtukhaih Nipanga ni ah a oh moa Sabbath ni to amtong tom boah.
55Galili prae hoitoah Jesuh hnukah ka baang nongpuinawk loa Joseph hoiah nawnto a caeh o moa taprong hoi a thungah Jesuh qok to kawbangmaw up o tito doeh a hnuk o king. 56Topacoengah im bangah amlaem o moa Jesuh qok to nok hanah hmuihoihnawk hoi hmuihoihtuinawk to aroep o.#Exo 20:10; Deut 5:14
Sabbath ni aloa Tawklok mah lok a paek ih batih toengah anghak o.
Селектирано:
LUKA 23: AKNT2023
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Asang Khongso New Testament in Eastern Khumi © Bible Society of Myanmar, 2023.