Mataayo 5
5
Ameeyigisho ga Yeesu ku-kiima
(5:1–7:29)
Giinonkwe na giinyanko
(Ruuka 6:20-23)
1Mmbe, bhunu Yeesu ꞉aarorere abhaanu mbabha bhaafu, ˆnaariinya ku-kiima, ˆneekara. Niwe abheeyigira bhaaye mbamugenda-ko. 2ˆNaamba okubhabhwira ati,
3“Nyakara abha emyoyo emitobhu,
kwa okubha obhukama bhwa mu-rwire ni bhwebhwe.
4Nyakara bhanu bhasurumbaaye,
kwa okubha Nyamuwanga kaaja okubhawooyeresha.
5Nyakara abhafura,
kwa okubha bhayo nibho bharigabha ekyaro.#5:5 Ringira Ijabhuri 37:11.
6Nyakara bhanu bhari na omweko na obhwiro bhwa obhurengeresi,
kwa okubha Nyamuwanga aribheegutya.
7Nyakara bhanu abhafwira abhandi ekigongo,
kwa okubha Nyamuwanga aribhafwira ekigongo.
8Nyakara bhanu bhari na emitima emyeru,
kwa okubha bharirora Nyamuwanga.
9Nyakara abhagwatanya bha bhanu bhasokeene,
kwa okubha bhayo bharibhirikirwa bhaana bha Nyamuwanga.
10Nyakara bhanu abhanyansibhwa ku-nsonga ya okukora amarengeresi,
kwa okubha obhukama bhwa mu-rwire ni bhwebhwe.
11“Nyakara emwe raabhe abhaanu bhakabhafuma, mbabhanyansha na okubhabheeyeresha amabhiibhi goone kutyo, ku-nsonga yaani. 12Mujomerwe, mubhe na orugirigiri, kwa okubha Nyamuwanga abhatuuriiye-wo ekiyaanwa kinene mu-rwire. Mwasiga okuruguura kwa okubha nikwo kutyo ꞉bhaanyansiishe na abharagi bha kara.”
Ekirengekanyo kya omuunyu na obhweru
(Maariko 9:50; Ruuka 14:34-35)
13“Emwe muri rwa omuunyu mu-kyaro. Omuunyu gukabhusha omuta gwago, kitariwo kiinu kya kugusambaarusha kweki, ogweswa iibhara ngutajwa na abhaanu.
14“Muri rwa obhweru ku-kyaro. Omusi gunu guumbakirwe iiguru ku-kiima, gutakutura okwiyibhisa. 15Na abhaanu bhatakukongeesha intara mbayifundikira mw-idebhe. Tari abhayituura ku-kisiri insonga imirikire abhaanu bhoone kutyo mu-nyumba. 16Nikwo kutyo eyeendwa obhweru bhwemwe bhumirikire abhaanu, insonga bhagungye Esomwana unu ari mu-rwire, bhakarora ebhikorwa bhyemwe ebhijomu.”
Ebhiraagiro bhya Musa na abharagi
17“Mwasiga kutoga ati niijire okusoosha-wo ebhiraagiro bhya Musa,#5:17 Musa. Ringira riingʼana rinu mu-Mangʼana Amakomeeye. amwi ati ameeyigisho ga abharagi. Wuri, niteejire kugasoosha-wo, tari nikuumishe ganu ebhiraagiro na abharagi ꞉bhaaragiriraga. 18Enibhabhwira ekimari ati, okuyikira anu orwire na ekyaro bhiriteera, ritariwo engʼana amwi ati nyuguta yimwi eya ebhiraagiro inu irisooka-ko, okuyikira anu goone kutyo garikuumira. 19Mmbe, omuunu woonewoone akasiga okukora kutyo ekiraagiro ekimwi ekitooto ekyenda akore, ˆneeyigisha na abhandi bhoone bhasige, uyo aribha na ekibharo kitooto okukira bhoone kutyo mu-bhukama bhwa mu-rwire. Tari woonewoone unu kaakora kutyo ebhiraagiro ebhiiyigisha, ˆneeyigisha na abhandi insonga bhoone bhakore kutyo, uyo aribha na kibharo kinene muno mu-bhukama bhwa mu-rwire. 20Mmbe, enibhabhwira ati, obhurengeresi bhwemwe bhutakirire obhwa Abhafarisaayo na obhwa abheeyigisha bha ebhiraagiro bhya Musa, mutariingira mu-bhukama bhwa mu-rwire kimwi.”
Ameeyigisho iiguru ya riisungu
(Ruuka 12:57-59)
21Yeesu ˆnaagenderera okubhabhwira ati, “Mwoonguuywe ekiraagiro kinu, abhaanu bha kara ꞉bhaabhwiriiywe ati, ‘Waasiga okwita omuunu!#5:21a Ringira Obhungʼaanyi 20:13. Omuunu woonewoone unu keeta oweejaabho, woone eyeendwa aramurirwe.’#5:21b Ringira Ekiyiityo kya Ebhiraagiro 17:8-9. 22Nawe anye enibhabhwira ati, omuunu woonewoone unu kaasoka oweejaabho, eyeendwa aramurirwe. Na woonewoone unu kaafuma oweejaabho, omwene woone eyeendwa aramurirwe mw-ibharaja. Na, woonewoone unu kaafuma weejaabho ati ‘Mutengʼo unu,’ eyeendwa eeswe mu-muriro gunu gutakusimá.
23“Mmbe, ukaaja na omugabho gwawo okusoosha kw-ishengero, kimwi nuuyiita ati ukayiiye oweejaanyu, 24siga okwamba omugabho gwawo kw-ishengero ayo, ugende umwagare mwikirishaanye okwamba. Ukamara okwikirishaanya nawe, niwe usubhe usooshe omugabho gwawo.
25“Iikirishaanya na unu kaakusitaakya bhwangu, mukyari ku-njira, aasiga okukuyikya ku-muramusi, omuramusi woone ˆnaakuyikya ku-bhasirikare insonga bhakubhoye mu-jeera. 26Enikubhwira ekimari ati, utarisooka-mo okuyikira anu urimara okuriya riisiiri ryone kutyo!”
Obhutaasi bhwa ameega
27Yeesu ˆnaabhabhwira kweki ati, “Mwoonguuywe ekiraagiro kinu ekyaika ati, ‘Waasiga okutaara ameega!’#5:27 Ringira Obhungʼaanyi 20:14. 28Nawe anye enibhabhwira ati, woonewoone unu kaaringira omugasi, mu-mutima gwaye ˆnaamwenda, kaabha aamarire okutaara ameega nawe mu-mutima gwaye. 29Mmbe, raabhe eriiso ryawo erya ebhuryo erikuyabhya, urisooshe-mo uryese areera eyo. Nyakara ubhurwe ekigwatanya ekimwi ekya omubhiri, nawe uwonʼye omubhiri gwawo, gwasiga kweswa mu-muriro gunu gutakusimá. 30Na okubhoko kwawo okwa ebhuryo kukakuyabhya, kubhuture-ko, ukwese areera eyo. Nyakara ubhurwe ekigwatanya ekimwi ekya omubhiri, nawe uwonʼye omubhiri gwawo, gwasiga kweswa mu-muriro gunu gutakusimá.”
Obhutaani bhwa omurume na omugasi
(Mataayo 19:9; Maariko 10:11-12; Ruuka 16:18)
31Yeesu ˆnaabhabhwira kweki ati, “Amakaamo agaaika ati, ‘Omurume akataana na mukaaye, amukaamire intaraaka.’#5:31 Ringira Ekiyiityo kya Ebhiraagiro 24:1. 32Nawe anye enibhabhwira ati, omuunu woonewoone unu kaataana na omugasi waaye, itari ati amugwatire ekiroogi, kaakora omugasi waaye uyo abhe mutaasi wa meega. Na omuunu unu kaamugabhura woone kaabha ˆnaataara ameega.”
Okurayira
33Yeesu ˆnaagenderera, ˆnaabhabhwira ati, “Mwoonguuywe kutyo abhaanu bha kara ꞉bhaabhwiriiywe ati, ‘Mwasiga okutamwa okukora amangʼana ganu ꞉mwarayiiye okukora mu-meeso ga Raatabhugenyi Nyamuwanga, tari mugakore goone kutyo.’#5:33 Ringira Abharaawi 19:12; Obhubhasi 32:2; Ekiyiityo kya Ebhiraagiro 23:21, 23. 34Nawe anye enibhabhwira ati, mwasiga okurayira ku-kiinu kyonekyone, mwasiga okurayirira ku-rwire, kwa okubha orwire nikyo ekitebhe kya ekikama ekya Nyamuwanga. 35Na mwasiga okurayirira ku-kyaro, kwa okubha ku-kyaro nikwo Nyamuwanga atuuyega amaguru gaaye. Na mwasiga okurayirira ku-Yerusareemu, kwa okubha guyo nigwo omusi gwa Nyamuwanga, Omukama Omukuru. 36Mwasiga okurayirira ku-mitwe gyemwe, kwa okubha mutakutura okuyindura orufwiri na rumwi rubhe rweru amwi ati rwirafuru. 37Tari ekimari kyemwe kibhe ‘kimari,’ na rinu ritari kimari mwaike ati ‘itari kimari.’ Amangʼana ga okwongesha-ko goone kutyo, agasooka ku-Sitaani.”
Okuriya ekisiyomba
(Ruuka 6:29-30)
38Yeesu ˆnaagenderera okubhabhwira ati, “Mwoonguuywe amangʼana ganu agaaika ati, ‘Eriiso na eriiso, eriino na eriino.’#5:38 Ringira Obhungʼaanyi 21:24; Abharaawi 24:20; Ekiyiityo kya Ebhiraagiro 19:21. 39Nawe anye enibhabhwira ati, mwasiga okuriya amabhiibhi ku-muunu unu abhakoreeye amabhiibhi. Tari, raabhe omuunu akakubhuma ku-kisaya ebhuryo, muyindurire abhume na ebhumosi. 40Na raabhe omuunu akusitaakiishe insonga akuteeshe insaadi yaawo, awe musigire agege na riikabhuuti.#5:40 Ringira Obhungʼaanyi 22:26-27; Ekiyiityo kya Ebhiraagiro 24:12-13. 41Na raabhe omuunu kaakusingʼiirisha umwitwikire omujigo gwaye ugende nawe kiromiita yimwi, awe genda nawe kiromiita ebhiri. 42Unu kaakusabha ekiinu, muyaane. Omuunu akaaja okurya riisiiri ku-awe, waasiga okumwima.”
Okwenda abhasoko
(Ruuka 6:27-28, 6:32-36)
43ˆNaabhabhwira kweki ati, “Mwoonguuywe amangʼana ganu ꞉gaaikirwe ati, ‘Wende omwikashaanya waawo,#5:43 Ringira Abharaawi 19:18. nawe siga okwenda omusoko waawo.’ 44Nawe anye enibhabhwira ati, mwende abhasoko bheemwe, bhanu abhabhanyansha mubhasabhire ku-Nyamuwanga. 45Mukakora kutyo, eyeeresha kimari ati muri bhaana bha Raata unu ari mu-rwire. Omwene niwe kaabhasisha abhakosi bha amajomu na abhakayi riisuubha. Kweki, kaagwisisha ingubha abharengeresi na bhanu bhatari bharengeresi. 46Mukeenda bhanu bhabheendere era, omunyoora muyeeroki ku-Nyamuwanga? Na abhatobhesha bha riigooti#5:46 Abhatobhesha bha riigooti. Ringira riingʼana rinu mu-Mangʼana Amakomeeye. bhoone abheenda bhanu bhabheendere era. 47Na, raabhe omukeesha abhaanyu era, omubha mukora ejomuki okukira abhandi? Na abhaanu bhanu bhatakwikirisha Nyamuwanga, bhoone abhakeeshaanya abheene na abheene era. 48Mmbe, mubhe na ntungwa njomu rwa Esomwana wa mu-rwire kutyo ari.”
Селектирано:
Mataayo 5: kya
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2023, Wycliffe Bible Translators, Inc. All rights reserved