A pi ake 5
5
Anañaas fa Safira a maaɓa Yiif Tedu le
1Kaa koy, bes, o koor o ne’e Anañaas fo o teem Safira a njofoora, ndax da njikoox o qol den olaa da mbog’ina. 2Ye da njikooxna boo a ƈut, o koor oxe a ɗasna a seek a leng na xaaliis fee da njegna, soo a ɓis ke yoqna, a doonin na xa ƥay no apootar we. O teem koy a and’a kaaga fop. 3Maaga, Piyeer a laamta a Anañaas ee:
«Ndi xar taxu Saytaane a mayƭand xeeñ of boo o maaɓaa Yiif Tedu le? Xar taxu o ɗasin a seek a leng ale na xaaliis fee o qol ole a watna? 4Mee ndax wo jeg’un ye ta jarafuleerna? Andiro yee xaaliis fee, xaaliis of a reeƭu itam? Xar taxu o ɓalginaa o laaw of? Naxiro wiin we toox de, Roog o mat naxo!»
5Yaa Anañaas a nanna fa lay faaga, a yena, too a ɓut. Waa nan-gilooxoogna fop a ndiida diid maak. 6Leng-leng no mboƥ ngoor naa a ngara, a ñirin, soo a ngaskin.
7Cinj ngap baxtu tadik, o tew Anañaas a fadiida, too yegee tus no ke xew’ina. 8Piyeer a laamtaan ee:
«Layangaam koy ndax ke nu ƥisiid’ina rek o qol ole a jaru.»
O tew oxe a doonaan ee:
«Ii, keene a jaru de!»
9Piyeer a doonaan ee:
«Xar taxu boog nu ngiɓ o ngir, ndax nu nax Yiif le no Yaal oxe? Ga’i, we ngasik’ina o kor of owaay na carind ale, too xan a ƥisong itam.»
10Na waxtu faaga sax, o tew oxe a yena na caf Piyeer, a ɓut naaga. Yaa mboƥ ngoor naa a ndokiidna, a soƥaan ta xon, too a ƥisaan, a ngeekin paam o kor um. 11Maaga, diid maak a dama mbokatax ne no gimu we fo fop we andoona yee a yeg’a ke xew’ina.
Comlaand mayu a mbi’e kam Yeerusaleem
12Xa anddiloor xa mayu fo comlaand mayu a mbi’ooge kam xeet faa na pexey apootar we. Gimu waa fop kaa mbokatooroogu ɗuga jibir fee ne’eena Jibir Salomo. 13O leng no lakas waa koy saɗ’ee o matiid a den, ndaa xeet faa kaa simatoogu a den a maak. 14Mayu a ngimoogata no Yaal oxe, goor fo rew, a ƥaatooxaa no gimu waa. 15We njirna kaa ƥisiidoogel kam ped ke, a mbondneel took cong fo na xa sar, ndax Piyeer a jooniidangaa, mbelyook um a waag o rok wiin leng-leng na den boog. 16Faan no wiin kaa inoortiidoogu no teeru kentand kaa mbidna a Yeerusaleem itam, a ƥisiidaa jiru fo waa cini a ndamna, too a mbodooga den fop.
Apootar waa a ndame
17Maaga, o saasadax o maak oxaa fo we ndeeƭna fo ten fop, ndefna ndef we mbog’ina na qaaj ale no Sadusiya we, a inooxana apootar we, a ƈaxooxaa fo ciis. 18Naaga, a mbaara a caf o mbap den na den, soo a ƥek a den na kaso faa na teeru faa. 19Kaa koy, o yeng o njeek, malaaka no Yaal oxe a weta begax kaa na kaso faa, a sut a den, soo a lay a den ee:
20«Ndetyo moof no Mbind Roog naa, yegin xeet fee fa lay fuu jofna no ñoowooƭ olene.»
21Apootar waa a nanana, too nqes teelu, a ndeta no Mbind Roog naa, a njangnaa maaga.
O saasadax o maak oxaa fo we yoon’ina fo ten a nqoyna maak waa na xeet fee Isra’el fop, ndax da mbokat Mal maak ne. Cinj kaaga, a lulta apootar waa na kaso faa. 22Yaa waa luleena a mbadna, soƥee apootar waa na kaso faa. A nomtooxa maa no Mal maak naa, a mbetandoox a den ee:
23«Kaa i soƥ kaso faa a wegel boo a xen, soo waa yetooxoogna a ngeenoox paam begax kaa, ndaa yaa i mbetna, i soƥee o leng kam faa.»
24Yaa oxe adooxan’ina yeeyetax we no Mbind Roog naa fo saasadax maak waa a nanna fa lay faaga, a ndefa no nqalaataa no ne apootar waa a mo’itna. Kaa cungoogu ke na doonooxkaa no kaaga. 25Maaga, o qoy o leng a gara, a lay a den ee:
«Ngarangyo nga! Wiin we nu ƥek’ina kaso, owaay kam Mbind Roog naa, a njangnaa xeet faa.»
26Maaga, oxe adooxan’ina yeeyetax waa a yoona fo waa lul’eena, ndaa kaa saɗaroogu xeet faa a mbarit a den a kac. Ten taxu da ƥisiid apootar waa no njek. 27Yaa da ƥisiidna a den mbaambir Mal maak naa, o saasadax o maak oxaa a laamtooga a den. 28A laya a den ee:
«I mbañta a nuun boo nqij ee ba nu mbaare’tat gon leene. Nu nga’aan! Nu nqaɓa a Yeerusaleem na waare fee nuun, soo mbug o mbudin took in fo’oy le no koor oxeene!»#Mace 27:25
29Piyeer fo apootar waa a ndoona a den ee:
«Ndax Roog i mbaru o nanan ndi wiin we? 30Roog fee daan we in a mbaɗooxoogna, o ten o mat xontooxnooru a Yeesu fee nu mbarnoorna, ye nu ndenguuna na teex. 31Roog fa xoox um yoɗun itam, ta moofik na ñamaak um, a dodin o Maad fo o Muumucil, ndax ta ci xeet fee Isra’el da mbes pakaad den a cinj, too a ndaaw a baasan ale. 32In sax seede’u keene, in fo Yiif Tedu le Roog a ci’na we nananuuna.»
33Yaa waa mbog’ina no Mal maak ne a nanna kaaga, a mbuux’a fuux maak, too a mbug’a o mbarnoor apootar waa. 34Kaa koy, a jega a ndeer den o Farisiya xaa ne’eena Gamaliyel. Xeet fee fop kaa niw’un. O caajangin no kebil ke Moyiis a reeƭu. Naaga a inooxa, a geenoox a ndeer no Mal maak naa, a hebil ee fat apootar we a sutel o ndik rek. 35Cinj kaaga, a laya a den ee:
«Nuun wiin we Isra’el, mbootooxyo ke nu mbugna o mbi wiin weeke. 36No miñeer ke rek Tudaas a inooxu, a fi’ooxaa o kiin o maak, boo kaa fadna wiin teemeed nahik a ndabiidin. Kaa koy, yaa ta wareena, we ndeefooguuna fop a pictoora nen xa ƥiy tol, too layit’ataand. 37A cinj um, Yudaa o Kaagalile xe a inooxa na jamaane faa na pindax alaa, a kooc wiin boo da ndeefin. 38Nu anda koy ke um laykaa a nuun ndiiki: Ba a ƭat nuun a yongat no wiin weene, nqaƴyo a den da ndet. Yaam a soƥangaa yee pexey neene mbaat a pi akeene no kiin a ngatu, xan a sañtoox, 39ta soƥ koy ee na Roog a ngatu, nu mbaagee o sañit a den. Mbootooxyo boog o ñoxor fa Roog!»
Mal maak ne a njaɓa yiif laaga na Gamaliyel. 40A nqoyahina apootar waa, a nqaw a den xa cap, a mbañit a den da layit gon le Yeesu. Cinj kaaga, a mbokta a den da ndet. 41Naaga, apootar waa a ndiƈatooxa Mal maak naa. Den fop a ƭaaya yaam tedaanga fee Roog a ci’’ina a den, da toroxandeel yaam gon le Yeesu. 42Ñaal nuu refna, kaa maad’u o mbokatooraa kam Mbind Roog naa fo kam pind ke, a njangnaa, a yegnitaa Yegil mbaax ne yee Yeesu refu o Muumucil oxe regteena.
Селектирано:
A pi ake 5: SRR23
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright © 2015-2023 by Eglise luthérienne du Sénégal