Mberaand 13
13
Abram fa Lot a nqaajoora
1 Abram a nomtoortiida Misira, a sag no ɓemb-roog o ñamaak ole Kanaan, ten fo o teem fo ke ta jeg’ina fop. Lot a yoona fo ten.
2Abram a jeg’a halal tigi, ta ref no cegel, na xaaliis fo na wurus. 3A jangoorta no ɓemb-roog o ñamaak, a garaa boo a fadiid Betel, no mbiñ onqe ta eet’ina o sip ƭiif ne ten, ndeer Betel fa Ay, 4me ta max’ina o sadaxand yaaga. Abram a ƴufginoora gon le no Yaal oxe no mbiñ onqaaga.
5Lot fee yoonoogna fa Abram a jeg’a itam a ked fo xa siir fo ƭiif. 6Saax le da ndeeƭna deyee a den ndax da mbokatoor yaam o jeg ole den kaa may’u boo mbaag’ee ndef o mbiñ o leng. 7Nqasir a jega ndeer gaynaak we na xa siir axe Abram fo we na xa siir axe Lot. Na jamaane faaga, Kaakanaan we fo Peeperisi we maad’u o ngenaa saax le. 8Abram a laya a Lot ee:
«Ngela baa sufaaloor a ƭelem a jeg ndeer es fa wo mbaat ndeer gaynaak es fo we wo, yaam fog i ndefu. 9Saax le fop oxey mbaambir of! Retani a xoox of boog. O xotangaa na janoon, um xot na ñamaak, o xot na ñamaak, um xot na janoon.»
10Lot a ƴooklooxa, a ga joor fee no xuluɓ ole Yordaan a xuƥ sap. Yaaga o Yaal oxe yaqafulee a Sodoom fa Gomoor, a ret’a boo Sowaar a nand nen a ƭing no Yaal oxe, nen saax laa Misira.#2:10 11Lot a jilana a xoox um boog joor fee no xuluɓ ole Yordaan fop, soo a xot farna fo batand. Neene a nqaajoortu a ndeer den. 12Abram a gena kam saax le Kanaan, soo Lot a gen kam teeru ke na joor fee, a sip ƭiif ke ten farna fa Sodoom. 13Wiin we ngen’ina Sodoom koy wiin faaxeer a ndeeƭu, soo a tooñaa o Yaal oxe.
14Cinj ye Lot a xaajoorna fa Abram, o Yaal oxe a laya a Abram ee:
«Meene fodoona fod, ƴooklooxi, ɗeet farna fo ɓemb-roog o janoon fo no ɓemb-roog o ñamaak, farna fo batand fo no mudand. 15Saax le o ga’aa, xam ci’ong o ten, wo fo xa taan of boo faw.#Pi 7:5 16Xam fi xa taan of a mayit nen pep lanq, a may boo mbaagkaand o lim ne pep lanq a mbaagaandeena o limit. 17Inooxi o wid saax le bo ta xet, yaam xam ci’ong o ten.»
18Maaga, Abram a ɗisa ƭiif ke ten, a geniid no kariñ ke Mamre paam Hebron, a maxan o Yaal oxe maaga o sadaxand.
Селектирано:
Mberaand 13: SRR23
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright © 2015-2023 by Eglise luthérienne du Sénégal