Saŋ 20
20
A qontax ale Yeesu
(ɗeeti Mace 28:1-8; Mark 16:1-8; Lik 24:1-12)
1No mbuyukuun naa na diiboor faa, a soƥ tige a maad o niɓaanaa, Mari-Magdala a reta na mboy alaa, a ga ɓil le a mboy ale a wegit’eena a watnel. 2A ƴufa a ret maa Simoŋ Piyeer fo maa no taalbe xe Yeesu a fex’ina bo, a lay a den ee:
«O Yaal oxe a sute na mboy alaa de, too i andee me ta dooneena.»
3Piyeer fo o taalbe o lakas oxe a ndalfooxa o sutoox, a mbaaƭooxanik a mboy alaa. 4Den ɗik fop kaa ƈufoogu, ndaa o leng oxe a daɗa a Piyeer boo a adooxin na mboy alaa. 5A dalfooxa o wootnoox, too a ga’a njoor ne o dal ole a laxasit’eena, ndaa koy rokee. 6Simoŋ Piyeer fee reef’ina took um a fadiida, a rok kam a mboy ale, a ga njoor ne o dal ole a laxasit’eena 7fo ke laxas’eena no xoox le Yeesu. Keene koy fokat’aand fo njoor ne laxasit’eena o dal ole, kaa dor’el a doonel o saax. 8Naaga, o taalbe xe adooxiid’ina na mboy alaa a roka, ten itam, a ga, soo a gim. 9Kaa and’afulee a Pind a Tedu ke lay’ina yee xan a xontoox a ndeer no xon we. 10A mbi’a naaga, a nqaad.
Mari a xeta fa Yeesu
(ɗeeti Mace 28:9-10; Mark 16:9-11)
11Mari koy, kaa geenoox’u paam a mboy ale, a loolaa. Kam xa lool um a ƴuuga, a bug o wootnoox kam a mboy ale, 12too a ga’a malaaka ƭik kaa saqna tikoorik tan, a moof me o dal ole Yeesu a wondin’eena. O leng oxe a moof’a me xoox le a fod’ina, o lakas oxe na caf ake. 13A laya a Mari yee:
«Ndi tew oxe, xar taxu o loolaa?»
A doona a den ee:
«Kaa o Yaal es a guuɗel, too andiim me da ƥisuuna.»
14Yaa ta layna naaga, a wiƈaqilooxa, a ga a Yeesu ta geenoox, ndaa andid’iran. 15Yeesu a layaan ee:
«Tew oxe, xar taxu o loolaa? An o waaƭaa?»
Mari kaa foog’u yee oxe na yetooxaa a ƭing ale me poy ke a ndefna yoo. Neene a layaan ee:
«Yaal mbind! A soƥangaa yee wo ɗasnun, layaam me doonanoona, ndax um xotin.»
16Yeesu a layaan ee:
«Mari!»
Tee beret, a layin na hebre yee:
«Rabuuni!» O ɗelem oleene kaa tekit o caajangin es.
17Yeesu a layaan ee:
«Ba o duqaam, yaam ŋaayafuliim maa Faap es. Reti maa na xa teɓ es, lay a den ee mexey ŋaayaa maa Faap es fee Faap nuun, refna ref Roog es fee Roog nuun.»
18Mari-Magdala a reta, a yegin daalbe we yee a ga’a o Yaal oxe, too keene o mat a lay’un.
Yeesu a feeñooxa daalbe um
(ɗeeti Mace 28:16-20; Mark 16:14-18; Lik 24:36-49)
19Na bes diiboor faaga, taa no yaar olaa, daalbe we kaa mbokatoor’u, a mbegoox, yaam a saɗaraa Yaawuur we. Begax ke fop kaa mbeg’el. Maaga, Yeesu a gara, a geenoox a ndeer den, a lay a den ee:
«Nu yaaree jam!»
20Yaa ta layna naaga, a lala a den xa ƥay um fo o saax um. Daalbe we a ƭaay’a lool, ye da nga’na o Yaal oxe. 21Yeesu a dakooxa o lay a den ee:
«Jam fa nuun! Ne Faap fee a lultaxama, mi itam, mexe lultaa a nuun neen.»
22Cinj a ƭelem akeene, Yeesu a wuuɗa took den, a lay a den ee:
«Ndaawyo Yiif Tedu le! 23Oxuu nu layna yee: ‹Roog a waasanaang pakaad of›, xan a waasanel a den. Kaa koy, oxuu nu layna yee: ‹Roog waasanirang pakaad of›, xan a maad fa den.»#Mace 16:19; 18:18
Yeesu fa Tomaa
24Tomaa fee na xoyeel Didiim, too a fog’u no xarɓaxay fo ɗik waa, reeƭee fa den yaa Yeesu a garna. 25Daalbe lakas we a layaan ee:
«I nga’a o Yaal oxe.»
Maaga, a doona a den ee:
«A refangee kaam doon a ngid na xa yul axe na xa teng axe, ɓek teen nqol es, o ɓay es, um doonin no saax um, gimkiim muk.»
26Yaa da moofna boo bes faa a dakooxiid, daalbe we Yeesu a mbokatoora, a soƥ maaga a Tomaa. Ye fop a naagna rap a wegel, Yeesu a feeñta a ndeer den, a lay ee:
«Nu yaaree jam!»
27Cinj kaaga, a laya a Tomaa yee:
«Ɓeki meeke nqol of, ɗeet xa ƥay es. Dooni o ɓay of no saax es, fañat o gimaƭar, ndaa gimi.»
28Tomaa a doonaan ee:
«O Yaal es, Roog es!»
29Yeesu a layaan ee:
«Kaa o ga’aam, soo gimkaa. We ngimna na mi koy, too nga’iraam, a ƭaaya.»
Ke Saŋ a muukitna
30Yeesu a fi’ahina mbaambir daalbe um xa anddiloor xa mayu xaa mbindaandeena no safe leeke. 31Ke bindeena teen, kaa bindel, ndax nu ngim ee Yeesu refu Kiristaa fee, o Muumucil oxe regteena, refna ref o Ƥeenqe Roog. Nu ngimangaa, xan nu ndaaw o ñoow ole no gon um.
Селектирано:
Saŋ 20: SRR23
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright © 2015-2023 by Eglise luthérienne du Sénégal