Luka 2
2
Betlehem ge Jisu i saw
1Se ñeto ge Kesar Agastas ichivye gow shotuko-kunu kihua, vyow Roman gow ĝadzü-ĝaĝi nañiñ ĝimyoweñe. 2He uvromashü iñiñ ĝimyow ye Keriniyas í Siriya gow dümbraw dadaw ñetow ge daw. 3Vyew na nañiñ í ĝimyojoñe nudzo-nudzo ñetrü ge katsüküĝatsü. 4Sünda: Joseb je Dawud i ñeŝü go üŝü umu, sündada i Galil go Nazret ñetrü yo kañe Yahudi ge Dawud i ñetrü Betlehem ge ka. 5I iñiñ ĝimyow, í goido Mariyam dju so mafoma idra jisa. 6Na süge dulu ge, agü sajo ümdrü kuadabi. 7Sünda i agü üsaw samkyo a saa sündañe í gyeka ge ĝüshüñe káko ge zua ve, hado chemeje nabo süge ñe ĝyojo mapa.
Fugulu ĝokrüw nabo soĝgomuko í ñu kidaw
8Seyo se ñetrü a küña fugulu ĝyokrüw duma, se na ñegi ge vi ge ĝyoñe ná hokrü ĝow. 9Seyo Tawgyew i soĝgomuko a nangko ye gudzukülye, sünda Tawgyew i ĝagra nangko ye dubrokülyeg, sündawñe na ŝupo ĝyeatsüg. 10Sündawñe soĝgomuko i na che, “Dju ĝejo dawe; Hado cheholya chemeje howe, no djo ŝüpo lüshüw ñu a trujome, se i vyew nabome, 11Yow Dawud i ñetrü ge djobo muchoaijo a sadame, sünda sei Tawgyewme.” 12Sünda se ye ba chi shewme, sei ye ba agü a ye gye ĝüshüñe seyo káko ge zuw hohujome. 13Sündawñe soĝgomuko a üdra ye soĝgomuko upua a Tawgyew i iñiñ la troñe ana chew hohuda, 14“Ñedzü ge Tawgyew í ĝagrawe sünda no ge se nüna na ĝüdzüw djüwe djú Tawgyew i uw veima.”
Fugulu ĝaksüw na Betlehem ge jiw
15Soĝgomuko i natrü go soĝgo ge katralyewñe, fugulu ĝaksüw na ĝütchü cheĝi, “Tchow, ñi Betlehem jiñe he ñu chedaw i, seyo Tawgyew i trudaw i, hobo.” 16Sünda na mekutcho djeñe Mariyam ñe seyo Josep naksü ütrü ge anga i káko ge vedaw hohu. 17I holyeñe na se anga ufo gow na ha trudama se ñu chedaw na truzeĝiatsü. 18Seyo vyew dzühutsüdaw na fugulu ĝaksüvow na ñu trudaw yo mavenghuatsüg. 19Seŝo Mariyam i he ñu na üdrü-ulu ge veñe vemchepüñe. 20Sünda fugulu ĝaksüw na ná küna trudama, sünambo vyew dzühuñe hohuñe Tawgyew i trolyeñe lüshüñe katsütcho.
Jisu ichi fyuñe seyo iñiñ ñiw
21Ñegi ŝügzü kufiahuñe, seyo i fyumdrü kuadabi, sünda iñiñ Jisu ñe ñi, he iñiñ ye soĝgomuko i uluhudrü ge mañilugomdo djülyedabi. 22Sünda Musa í shotuko dalyedaw yo Mariyam i güdraw ĝyow ye ĝomdzoahuwñe sünda Joseb ñe Mariyam naksü í Tawgyew uvro ge shew Jerusalem lañe jike. 23Tawgyew i shotuko ge ĝimbo: “Vyew saw samkyo na Tawgyew ibó güdraw vyejome.” 24Sünda Tawgyew i shotuko dalyedaw go chemeje, “Aŝüm osa ksü, momeje paĝusa üsasa ksü lañe küĝüwe.”
Simon i ñi-how
25Se ñeto ge Jerusalem ge Simon iñiñ yo nüna a duw, sünda i güdraw nüna seyo Tawgyew i küĝüw nüna, sünda Israyel ge ĝüdzüjo i ĝyokrü, seyo ĝulo ĝüdraw üdra dusa. 26Sünda ĝülo güdra yo truhua, ba Tawgyew i saw i mahohulu, ba madzüvzüjome. 27Sünda i ĝulo í hoñe ñegru ge jiku; sünda üyow ñe üyañ naksü se agüsa Jisu í naksü üdra lañe jikuke, ibo ahugo ñom shotuko ge ĝilyembo süna dakyewe, 28sünda i í üdrü ge lolalyeñe sünda Tawgyew í üdrü-ulu yo uw cheñe ana che: 29“He Tawgyewwa, ba bá kulo i ba shi-ñu ge ĝidaw sünambo ĝüdzüw yo kadügyejodabe; 30Hado chemeje noñi yo ba muchoadügyedaw ye hohudamme. 31Djú ba vyew druguw-drulyiw gow nüna na hovow sa a dadrü kikülyadama. 32I utro sama nabo umsow truhoahuw müsaw da kakülyajome, sünda Isrel go djo nüna nabo lüshü-lübajome.” 33Sünda üyow ñe üyañ naksü ubo gow ñu chedaw yo mavenghuatcheseñgudru. 34Sündawñe Simon i í ĝaĝüzü djüñe, üyañ Mariyam í che, “Howe, i Israyel go na gaañe seyo pülyidügyejo go, seyo ana a chi shedügyejoñe ĝyokrüdügyeda, seifo go ñu zeĝijome.” 35(Sünda ba ĝülo je vetsü yo vudüga-vudüga dajome) he yo ŝüpo na drü-lu ge vedaw na truhuajome.
Hanna i yo trudaw ñu
36Sünda Asher ĝübye go Fanual üsam a duw iñiñ Hanna, i ñihow trum: I ŝüpo mukrombi, I ülshi üdra gzü daw yo odje mro kuw ĝyofisawba. 37I odje ŝügzüĝütrü psüĝi gow müjem: sünda ñegru keje matrahuw ñegiw-ñetow drüpsü-ñilyi mañiw seyo küĝüñe ĝyonggudruwba. 38Sünda i sehu ñeto süge jikuñe Tawgyew i drü-lu yo uw che, sünda vyew ná, dju Jerusam i yo muchoajoñe ĝyokrüvodaw na, ifo go ñu trumyokülye.
Josep ñe Mariyam naksü ñe katcho
39Sünda na Tawgyew davyedaw üĝü ye vyew damdzoahuwñe sese Galil ge nudzoĝ ñetrü Nazrat ge katcho. 40Sünda angasa ye nugow lya, sünda bolu dukülyebi, seyo patsü-sholu tukoaha, sünda Tawgyew i nülvo üdra sa dusa.
Angasa Jisu ñegru ge
41Üyaw ñe üyañ naksü oje drü-drü Jerusalem ge rhano ge jinggudru. 42I oje ĝüyo ksü kuwñe, na rhano ge ĝidaw ñom í daw Jerusalem ge ji. 43Sünda na vyew ñegi ĝyomdzolye sese katcho, se angasa Jisu Jerusalem ge ĝyotralye; sei üyow ñe üyañ naksü madanghu. 44Na ana veñ, i upu jiw nadra dusamada, ñegi a kapseajebi: sünda na í nadraw seyo na ñeŝü nangko ge tchüpüñe. 45Sé matchülawñe na tchü-tchüñe Jerusalem ge katcho. 46Seyo ñegi dzü sefum ye na í ñegru ge dadrüw nangko ge ĝyosañe, ná ñu dzüñe seyo naje i chi dzü ĝyodaw hohu. 47Seyo küña na i ñu truw dzü ĝyodama, se na vyew í danghuw yo seyo i ñu hutrow yo mavenghuatsü. 48Sündawñe na í holyeñe mavenghualyeñe seyo üyañ i í che, “No sawwa, ba ñidra ana hado daña? Howe, baw ñiksü ba taĝaw na veduw tchü ñegiaha.” 49I í che, “Ba no hado tchüña? Hadoma madanghuma, no nó awu i ñe ge dujobabi cheñe?” 50Seŝo i í ha ñu chedama, i se i madzüsüla. 51Sündawñe i üdra kasa, sünda Nasrat ge kaku, sünda na chew dzü ĝyosa; sünda üyañ i he ñu ye üdrü-ulu ge ve. 52Seyo Jisu i patsü-sholu seyo udru ge lyifilyi sünda Tawgyew ñe nüna naksü ubo yo go shülyi.
Селектирано:
Luka 2: HBe
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се