ዮሃንሳ 8
8
ላይማተን ኦይከትዳ ማጫስዉ
1ሽን የሱሲ ሻማሆ ዙማ ቦላ ከይስ። 2ቃስ ዎንተ ጋላስ ጉራ ፆሳ ኬ ስምስ። ዳሮ አሳይ እያኮ ይን ኡትድ ኤንታ ታማርስስ። 3ህገ አስታማረትነ ፋርሳወት ላይማትሽን ኦይክዳ እስ ማጫስዉ እያኮ ኤህዶሶና። ኤንቲ አሳ ኡባ ስንን እዮ ኤስድ፥ 4“አስታማርያዉ፥ ሀ ማጫስያ ላይማትሽን ኑ ኦይክዳ። 5ሙሰ ህገይ ሀን መላ ማጫስ ሹቻን ጫደታ ሀይቃና መላ ኪቴስ። ያትን፥ ኔኒ ዎይጋይ?” ያግዶሶና።#ሌወ 20:10፤ ዛረ 22:22-24.
6ኤንቲ ሄሳ ግዳይ የሱሳ ፓጭድ እያ ሞትያባ ደማናሳ። ሽን የሱሲ ሆክድ ባ ብራን ቢታ ቦላ ፃፍስ። 7ኤንቲ እያ ዛር ዛር ኦይችድ አጎና እፅን፥ ፑደ ቁ ግድ፥ “ህንተ ግዶን ናጋራ ኦቦና አስ ኮይሮትድ እዮ ሹቻን ጫዶ” ያግስ። 8ቃስካ ሆክድ ቢታ ቦላ ፃፍስ።
9ኤንቲ ሄሳ ስእዳ ዎደ ጭማታፐ ዶምድ እሶይ እሶይ ከይሸ ዉርዶሶና። የሱሳ ፃላል ሄ በሳን ኤቅዳ ማጫሴራ አትስ። 10እ ፑደ ቁ ግድ ማጫሴኮ፥ “ማጫሰተ፥ አሳት አዉ ብዶና? ነ ቦላ ፕርድዳይ ኦንካ ባዌ?” ያግስ።
11ማጫስያ፥ “ጎዳዉ፥ ኦንካ ባዋ” ያጋሱ።
የሱሲ ዛሪድ፥ “ታንካ ነ ቦላ ፕርድከ። ባ፤ ዛራዳ ናጋራ ኦፋ” ያግስ።
የሱሲ አላመስ ፖኦ
12ቃስካ የሱሲ አሳኮ፥ “ታኒ አላምያስ ፖኦ። ታና ካልያ ኦንካ ደኦ እምያ ፖኡዋ ኤካናፐ አትሽን፥ ማን ስመረተና” ያግድ ኦድስ።#ማቶ 5:14፤ ዮሀ 9:5.
13ፋርሳወት፥ “ኔኒ ነባ ማርካታሳ፥ ሽን ነ ማርካተይ ቱማ ግደና” ያግዶሶና።#ዮሀ 5:31.
14የሱሲ ዛሪድ፥ “ታኒ ታባ ማርካትኮካ ታ ማርካተይ ቱማ። አይስ ጊኮ፥ ታኒ አዉፐ ይዳኮ ቃስ አዉ ብያኮ ኤራይስ፥ ሽን ህንተ ኤረከታ። 15ህንተ አሳ ቆፋን ፕርደታ፤ ታኒ እስ አሳ ቦላካ ፕርድከ። 16ታኒ ፕርድያባ ግድኮካ ታ ፕርዳይ ቱማ። አይስ ጊኮ፥ ታና ኪትዳ ታ አዋይ ታራ ደኤስፐ አትሽን፥ ታኒ ታርካ ደእከ። 17ናምኡ አሳ ማርካተ ቱማ ግደይስ ህንተ ህግያን ፃፈትስ።#ዛረ 19:15. 18ታኒ ታባ ታ ሁጰን ማርካታይስ፤ ቃስ ታና ኪትዳ ታ አዋይካ ታባ ማርካቴስ” ያግስ።
19ኤንቲ፥ “ነ አዋይ አዉን ደኢ?” ያግድ እያ ኦይችዶሶና።
የሱሲ ዛሪድ፥ “ህንተ ታና ዎይኮ ታ አዋ ኤረከታ። ታና ኤርዳባ ግድያኮ፥ ህንተ ታ አዋካ ኤራናሽን” ያግስ።
20የሱሲ ፆሳ ኬን ሙፃታ ሚሽያ የግያ ሳፅነይ ደእያ በሳን ሄሳ ታማርስስ። እያ ቃማይ ቡሮ ጋክቦና ግሾ ኦንካ እያ ኦይክቤና።
21ቃስካ የሱሲ ኤንታኮ፥ “ታኒ ባና፤ ህንተ ታና ኮያና፥ ሽን ህንተ አቶተ ደሞና ህንተ ናጋራን ሀይቃና። ታኒ ብያ በሳ ህንተ ባናዉ ዳንዳኤከታ” ያግስ።
22አይሁደ ሀላቃት፥ “እ፥ ‘ታኒ ብያ በሳ ህንተ ባናዉ ዳንዳኤከታ’ ያጌስ። እ ባና ባርካ ዎነዬ?” ያግዶሶና።
23የሱሲ ዛሪድ፥ “ህንተ ጋርሳፈ፤ ታኒ ቦላፈ። ህንተ ሀ አላምያፐ፥ ታኒ ሀ አላምያፐ ግድከ። 24ህንተ አቶተ ደሞና ህንተ ናጋራን ሀይቃና ጋዳ ታኒ ህንተዉ ኦድዳይ ሄሳሳ። ‘ታኒ ታና ግደይሳ’ ህንተ አማኖና እፅኮ ህንተ አቶተ ደሞና ህንተ ናጋራን ሀይቃና” ያግስ።
25ኤንቲ፥ “ኔኒ ኦኔ?” ያግድ ኦይችዶሶና።
የሱሲ ዛሪድ፥ “ታኒ፥ ኮይሮፐ ህንተዉ ኦድዳ ታና። 26ታኒ ህንተባ ኦዳዳ ፕርድያባይ ዳሮባይ ደኤስ። ሽን ታና ኪትዳይስ ቱማንቾ፤ ቃስ ታኒ እያፐ ስእዳይሳ ፃላላ አላምያስ ኦዳይስ” ያግስ።
27የሱሲ ባ አዋባ ኦደይሳ ኤንቲ አኬክቦኮና። 28ሄሳ ግሾ፥ የሱሲ ኤንታኮ፥ “ህንተ አሳ ናኣ ፑደ ቁ ኦያ ዎደ ታኒ ታና ግደይሳ ህንተ ኤራና። ቃስካ ታኒ ታ ማታን አይኮካ ኦናይሳነ ታ አዋይ ታና ታማርስዳይሳ ኦደይሳ ህንተ ኤራና። 29ታና ኪትዳይስ ታራ ደኤስ። ታኒ ኡባ ዎደ እያ ኡፋይስያባ ኦያ ግሾ እ ታና ታ ፃላላ አግቤና” ያግስ።
30የሱሲ ሄሳ ኦድሽን ስእዳ ዳሮ አሳይ እያ አማንዶሶና።
ቱም ላአ ከሴስ
31የሱሲ ባና አማንዳ አሳታኮ፥ “ህንተ ታ ትምርትያስ ኪተትኮ ቱማ ታና ካለይሳታ። 32ህንተ ቱማ ኤራና፤ ቱማይካ ህንተና አይለተፈ ከሳና” ያግስ።
33ኤንቲ ዛሪድ፥ “ኑኒ አብራሃመ ሼሽ፤ ኑኒ ኦደስካ አይለትቦኮ። ኔኒ ዎይጋዳ፥ ‘ህንተ አይለተፈ ከያና’ ጋይ?” ያግዶሶና።#ማቶ 3:9፤ ሉቃ 3:8.
34የሱሲ ዛሪድ፥ “ታኒ ህንተዉ ቱማ ኦዳይስ፤ ናጋራ ኦያ ኦንካ ናጋራ አይለ። 35አይለይ መርናዉ ሶ አሳራ ዴና፥ ሽን ናአይ መርናዉ ሶ አሳራ ደኤስ። 36ናአይ ህንተና አይለተፈ ከስኮ ህንተ አይለተፈ ቱማ ከያና። 37ህንተ አብራሃመ ሼሽ ግደይሳ ታኒ ኤራይስ። ሽን ታ ቃላይ ህንተ ዎዛናን ባይና ግሾ፥ ታና ዎናዉ ኮዬታ። 38ታኒ ታ አዋይ ታና በስዳይሳ ኦዳይስ፥ ሽን ህንተካ ህንተ አዋፐ ስእዳይሳ ኦታ” ያግስ።
39ኤንቲ ዛሪድ፥ “ኑ አዋይ አብራሃመ” ያግዶሶና።
የሱሲ ኤንታኮ፥ “ህንተ አብራሃመ ናይታ ግድያኮ እ ኦዳይሳ ኦና። 40ሽን ፆሳፈ ስእዳ ቱማ ኦድዳ ታና ህንተ ዎናዉ ኮዬታ። አብራሃመይ ሄሳዳ ኦቤና። 41ህንተ፥ ህንተ አዋይ ኦዳይሳ ኦታ” ያግስ።
ኤንቲ ዛሪድ፥ “ኑኒ ቱማ ፆሳ ናይታ፤ ኑስ እስ አዋይ ፆሳ ፃላል ደኤስ” ያግዶሶና።
42የሱሲ ኤንታኮ፥ “ፆሳይ ቱማ ህንተ አዋ ግድያኮ ህንተ ታና ዶሳና፤ አይስ ጊኮ፥ ታኒ ፆሳ ማታፐ ያዳ ሀይሳን ደአይስ። ታና እ ኪትስፐ አትሽን፥ ታኒ ታ ማታን ያቢከ። 43ታኒ ገይሳ ህንተ ስአናዉ ኮዮና ግሾ ታ ግያባይ ህንተዉ ገለና። 44ህንተ፥ ህንተ አዋ ፃላሄ ናይታ። ቃስ ህንተ፥ ህንተ አዋይ አሞትያባ ኦናዉ ኮዬታ። እ ኮይሮፐ ዶምድ ሸምፖ ዎይሳ። ቱም እያን ባይና ግሾ እ ቱማ እፄስ። ዎርዶይ እያዉ መ ግድዳ ግሾነ እ ዎርዶ አዋ ግድያ ግሾ ዎርዶ ኦደትሸ ባፐ ኦደቴስ። 45ታኒ ቱማ ኦዳይስ፥ ሽን ህንተ ታና አማነከታ። 46ህንተፈ፥ ‘ኔኒ ናጋራ ኦሽን ታ በአስ’ ጋናዉ ዳንዳኤይ ኦኔ? ታኒ ቱማ ኦደትያባ ግድኮ ታና አይስ አማነከቲ? 47ፆሳ አስ ፆሳይ ግያባ ስኤስ። ህንተ ፆሳ አስ ግዶና ግሾ ፆሳይ ግያባ ስኤከታ” ያግስ።
የሱሲ አብራሃመፐ ስን ደኤስ
48አይሁደት ዛሪድ፥ “ ‘ኔኒ ሳማረ አስ፤ ነናን ቱና አያናይ ደኤስ’ ግሸ ልከ ግዶኮ?” ያግዶሶና።
49የሱሲ ኤንታኮ “ታ ቦላ ቱና አያን ባዋ። ታኒ ታ አዋ ቦንቻይስ፥ ሽን ህንተ ታና ካዉሸታ። 50ታኒ ታ ሁጰ ቦንቾ ኮይከ፤ ታኒ ቦንቸታና መላ ኮየይስነ ታዉ ፕርደይስ ደኤስ። 51ታኒ ህንተዉ ቱማ ኦዳይስ፤ ታ ቃላ ናግያ ኦንካ ሀይቀና” ያግስ።
52አይሁደት ዛሪድ፥ “ነ ቦላ ቱና አያናይ ደኤይሳ ኑኒ ሀእ ኤርዳ። አብራሃመይ ሀይቅስ፤ ናበትካ ሀይቅዶሶና። ሽን ኔኒ፥ ‘ታ ቃላ ናግያ ኦንካ ሀይቀና’ ያጋሳ። 53ኔኒ ሀይቅዳ ኑ አዋ አብራሃመፐ አዬ? ናበትካ ቃስ ሀይቅዶሶና። ኔኒ ነና ኦና ጋዳ ቆፓይ?” ያግዶሶና።
54የሱሲ፥ “ታኒ ታና ቦንችኮ ታ ቦንቾይ ሀዳ። ህንተ፥ ‘ኑ ፆሳ’ ግያ ታ አዋይ እ ታና ቦንቼስ። 55ህንተ እያ ኤሮና እፅኮ ታኒ እያ ኤራይስ። ታኒ እያ ኤርከ ጊኮ ህንተ መላ ዎርዶታይስ። ሽን ታኒ እያ ኤራይስ፤ ቃስ እያ ቃላካ ናጋይስ። 56ህንተ አዋይ አብራሃመይ ታ ዩሳ ጋላሳ በእድ ኡፋይታናዉ አሞትስ፤ በእድካ ኡፋይትስ” ያግስ።
57አይሁደት ዛሪድ፥ “ሀር አቶሽን፥ ነዉ እሻታሙ ላይ ኩምቤናሽን ዋናዳ አብራሃመ በአስ ጋይ?” ያግዶሶና።
58የሱሲ ኤንታኮ፥ “ታኒ ህንተዉ ቱማ ኦዳይስ፤ አብራሃመይ የለታናፐ ካሰ፥ ‘ታኒ ታና’ ” ያግስ።
59ሄሳ ግሾ፥ ኤንቲ የሱሳ ጫዳናዉ ሹች ኤክዶሶና። ሽን የሱሲ ኤንታፈ ጌምድ ፆሳ ኬፈ ከይድ ብስ።
Селектирано:
ዮሃንሳ 8: GFBEVF
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
The Word for the World International and The Word for the World Ethiopia