प्रेरित.कामी 11
11
जिरोसालेम रआ कलीसिया रे पतरस आला साफ-साफ उउदूः
1प्रेरितकु, हेतरअ जाहुदिया रे ताही नेनाकु बोकोकु, आयुम लअकु ची एटाअ जाईतकु होः परमेसर आला बचन के मानव नाकु। 2तेकर जे बेरा जिरोसलेम रे हीःग नेनाय दो, थोड़ेक खतना उनकु पतरस लोः, कंहड़ी-उपड़ीओ तनाकु। 3“ची आम बे खतना कु ओड़ाअ सेन केते, हुंकू लोः जोम नु लआम!” 4तब पतरस हुंकू के मि-छोर तरअः कंहड़ी सुनावोः लिकुआय।
5“ची ईङ याफा सहर रे बिनती किनिङ, हिमीन रे मियांड दर्सन नेल लाईङ, ची मियांड चावड़ा तेकर जिलींग पेछोड़ी लकान जहानअ जिनीस सिरमा राईज तरअः अड़गु केते तेकर होना रेनअः चाईरो कोना सःब केते झोलंगो लआ ईङ दुबाःड़े हीःग नेना। 6ईङ होना के जिवाईन नेल लाईङ दो धरती रिनकु चाईर गोड़वा, तेकर बुरु जनवर, तेकर रेंगाअ खाता जीव-जन्तु, तेकर सिरमा रिनकु ओड़े नेल लिकुईंङ। 7‘ए पतरस बिरिःड मे, गोएःग कुमे, तेकर जोम कुमे मेन केते, ईङ के मियांड सबद आयुम नेना!’ 8ईङ कंहड़ी लाईङ, ‘कोवान, परभु कोवान! एता लःअय ची ईङ आला आहा रे ओका हिला होः जहान अपबितर चाहे छुँत जिनीस काईङ जोम तदा।’ 9नोःआँ रआ उतारा रे, जेके परमेसर सुध ठहराव तदाय होना के छुँत आलुम कंहड़ी मेन केते, ‘सिरमा तरअः दोबारा सबद नेना।’ 10पे खेप नेकान नेना-गी, तेकर नोःआँ तयोम होना जिनीस के फिन से सिरमा रे तेङ बिरिःड लअकु। 11हिना बेरा कैसरिया तरअः ईङ दुबाःड़े कुलगोःड उनकु, पे-होड़ ईङ जे ओड़ाअ रे डेरा थिलीङ होना ओड़ाअ दुबाःड़े हीःग सोदोर नाकु। 12पबितर आतमा ईङ के, हुंकू लोः बे संका ते गाती जुनोः मे बेता लिङाय। तेकर नुकू छाव बोको होः ईङ लोः गातीः नाकु तेकर आले कोरनेलियुस आला ओड़ाअ रे सेन नेनाले। 13हिमीन रे आले के उदूः लःअय ची ईङ अपन ओड़ाअ रे, मियांड सिरमादूत के तिंगु उनी नेल लियीङ, ‘जे याफा रे होड़ कुलगोःड केते सिमोन के जेके पतरस बेताईयाकु के राअः केते आगुः चिकुमे, 14हुनी आम के नोकान बात कंहड़ीओ-केमेआय, जेकर तरअः आम तेकर आम ओड़ाअ रिनकु जामे के उधार भेटाव कोआ मेन केते ईङ के बेता लिङाय।’ 15ईङ कंहड़ी एहेःब थिलिईङ, ची जे लकान सुरू रे आबु तेङ रे पबितर आतमा अड़गु ताही नेना। हिना लकान हुंकू तेङ रे होः पबितर आतमा अड़गु नेना। 16#प्रे.कामी 1:5हिमीन बेरा ईङ के परभु आला होना बचन उईहार हीःग नेना, ‘जोहन दो दाअः तरअः बतिस्मा एमा लिकुआय, बकिर आपे पबितर आतमा तरअः बतिस्मा नाम केआपे।’ 17जदि परमेसर हुंकू के हेनेन बराकाईत एमा लिकुआय, जे आबु के परभु ईसु ख्रीस्त रे बि-बिसवासकु के भेटाव ताना, दो जे परमेसर के रोरोकाव दाड़ी वाला ईङ ओके ताही नेनिंग?”
18नोःआँ आयुम केते हुंकू सिड़िग्याः नाकु, तेकर परमेसर आला बड़ाई केते कंहड़ीः दाकु, “तब दो परमेसर एटाअ जाईतकु के होः का-अन्तोः जिनगी नानम लःअय मन रूवाड़ लःअय बराकाईत एमा तडकुआय!”
अन्ताकिया रेनअः कलीसिया
19 #
प्रे.कामी 8:1–4
स्तेफनुस रअः चलते जिरोसालेम रे बिपाईत एहेःब थिना तेकर नोःआँ चलते छितीर-बितीर ताही नेनाकु, हुंकू दांड़ा-दांड़ा फनीके, तेकर साईप्रस, तेकर अन्ताकिया रे सोदोर नेनाकु, बकिर जाहुदीकु के बाई केते ओके के होः बेस खभाईर काकु सुनाय केना। 20बकिर हुंकू मेसे थोड़ेक साईप्रस तेकर कुरेनी रे ताहिन कु ताही नेनाकु, तेकर हुंकू अन्ताकिया सोदोर केते एटाअ जाईतकु के होः, परभु ईसु आला बेस खभाईर के सुनावओ कुकेनाकु 21परभु हुंकू के मदाईतकु केनाय, तेकर ढेर एटाअ जाईतकु बिसवास लअकु तेकर परभु दुबाःड़े हीःग नेनाकु।
22जिरोसलेम रआ कलीसिया रिनकु होड़, होना बात रेनअः खभाईर आयुम लअकु, दो हुंकू बरनाबस के अन्ताकिया कुलगोःड लियाकु। 23हुनी होनाःड़े सोदोर केते, तेकर परमेसर आला दया के नेल केते खुस नाय। तेकर तन-मन लगाव केते परभु लोः इमान बनाव ताहिन पे मेन केते, समझाव लिकुआय। 24बरनाबस बेस होड़ ताही नेनाय, तेकर पबितर आतमा तेकर बिसवास रे पेरेःग ताही नेनाय, नोःआँ लकान ढेर होड़ परभु आलकु चेलाकु लोः मेसाअ-नाकु।
25नोःआँ तयोम बरनाबस साऊल रअः खोजाईर रे तरसुस सेन नेनाय। 26तेकर हुनी आला पता लगाव नेना दो, हुनी के अन्ताकिया आगु लियाय। बनाहोड़ मि-साल जगुत, होंड़े रिनकु कलीसिया कु दुबाःड़े ताही केते ढेर होड़कु के उपदेस एमा कु केनाकिन। चेलाकु जामा तरअः पहिल रे अन्ताकिया रेगी ख्रीस्तीय कहलाव नेनाकु।
27हिना बेरा रेगी थोड़ेक आगमजानीकु जिरोसलेम तरअः अन्ताकिया रे हीःग नेनाकु। 28#प्रे.कामी 21:10हुंकू मेसे, अगाबुस नुमू रिनी, मियांड तिंगु केते आतमा रअः आलवाईर रे उदूः लिकुआय, ची गोटा दुनिया रे अलाय आकाल हिजोअ वाला एदनाआ तेकर (होना आकाल कलौदियुस आला राईज बेरा हीःग नेना।) 29तब चेलाकु सलाह लआकु ची जाहुदिया रिनकु बोकोकु के ममदाईत लःअय, जामे होड़ अपन-अपन दाड़ी लकान चन्दा कुलगोःड गोअ तापे। 30तेकर हुंकू हेंकान लअकु, तेकर बरनाबस तेकर साऊल आला तीः रे कलीसिया रिनकु अगुवाकु दुबाःड़े चन्दा कुलगोःड लअकु।
Селектирано:
प्रेरित.कामी 11: ASR
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2023 NLCI CC BY-NC-ND 4.0