Matthieu 1
1
Tà ke ɔje dè girkà le Jésu
(An-in Luc 3.23-38 tɔ)
1Magtub ke ɔje dè girkà le Jésu-Krist ngonnkà David, ngonnkà Abraham, 2Abraham oje Isaac; Isaac oje Jacob, Jacob oje Juda se ngakonnge; 3Juda se neen’n Thamar oji Pérets se Zara; Pérets oje Esrom; Esrom oje Aram; 4Aram oje Aminadab; Aminadab oje Nasson; Nasson oje Salmon; 5Salmon oje Boaz se neen’n Rahab; Boaz se neen’n Ruth oji Obed; Obed oje Jessé, 6Jessé oje ngar David.
David oje Salomon se neen njèyo Uri; 7Salomon oje Roboam; Roboam oje Abiya; Abiya oje Asa; 8Asa oje Josaphat; Josaphat oje Yoram; Yoram oje Ozias; 9Ozias oje Yotham; Yotham oje Achaz; Achaz oje Ezékias; 10Ezékias oje Manassé; Manassé oje Amon; Amon oje Josias; 11Josias oje Yékonias se ngakonnge kêm ɓal ke d’uwe’n ngannkà Jacob ɓer d’aw’n se de kêm ɓeekon ke Babylone.
12Loo ke d’uwe de ɓer d’aw se de Babylone ɓá ɓaa, Yékonias oje Salathiel; Salathiel oje Zorobabel; 13Zorobabel oje Abiyud; Abiyud oje Eliakim; Eliakim oje Azor; 14Azor oje Sadok; Sadok oje Achim; Achim oje Eliud; 15Eliud oje Eléazar; Eléazar oje Matthan; Matthan oje Jacob; 16Jacob oje Joseph; Joseph ngaw Marie ke njèkoje Jésu ke dé ɓar’n Krist.
17Unn gir dè Abraham’t sár tee dè David’t nga, kutu dèkasenange malang è dɔg-gidé-sɔ. Unn gir dè David’t sár tee’n kêm ɓal ke d’uwe’n ngannkà Jacob ɓer nga, è kutu dèkasenange dɔg-gidé-sɔ. Unn gir kêm ɓal ke d’uwe’n ngannkà Jacob ɓer d’aw’n se de kêm ɓeekon ke Babylone sár tee’n dè Krist’t nga, è kutu dèkasenange dɔg-gidé-sɔ.
Koje Jésu-Krist
(An-in Luc 2.1-7 tɔ)
18Koje Jésu-Krist nga è titeke bè. Kon’n Marie nga, è njènong le Joseph. Marie ndann ngonn se go tɔgmong le Ndil-Kêmnda kété ɓita dé se Joseph dé ger nan ke dinye se dingem ɓai. 19Joseph njènong le Marie nga, è doo ke njèra nyan se dè naje’n. E ndige le tel Marie ke kurkogo le dooge lé. E ɔje kêmn’t le mbate’n se go ngein. 20Nè loo ke Joseph ndi à gir tà dè nyan’t nè nga bè ɓai ɓaa, an! doo ke danran ke Kuwe-ɓee ule’n tee dènn’t pan ede’n tà se nin ede nè:
– Joseph, ngonn David, i ɓel le taa Marie ke neein lé, tede ngonn ke tò kêmn’t nga in ra Ndil-Kêmnda’t. 21Ngonn ke dingem ke a oje’n nga, i a kile ri’n nè Jésu. E kuwe á à ɔr kosdooge le’n dann kaiyage’t le de kaje de.
22Nyange nè malang aw loon’t deĵ titeke Kuwe-ɓee ade njèribe-dè-tà ke tann’t tam’n ndàt kété ede nè:
23«An! ngomande ke nal ger dingem ɓai a ndann ngonn,
a oje ngonn ke dingem,
d’a d’ile ri’n nè Emmanuel.»
Tel se tà koje jéi ɓaa, è «Nube nain se jéi».
24Loo ke Joseph in gir ɓi’t ɓaa, è ra titeke doo ke danran ke Kuwe-ɓee ule’n unn’n ndu’n ade’n kété nga tɔ. E taa Marie ke neen’n. 25Nè Joseph tò se’n ke neen’n lé sár ade oje’n ngonn ke dingem ke ile ri’n nè Jésu.
Селектирано:
Matthieu 1: GUL04
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Magtub Mann-ra ke Kige ©Alliance Biblique du Tchad, 2004