WANGSHEMBU MWOT 4

Pitar hia Juhan Nyi Nguawangbu pomtho ma

1Nguawangbu hia zangshwom-hom nyetmixbu akhokya ilaxle saduki, le hwom hato hüiponge Pitar hia Juhan nyie khünaknu füi akaxle zangwün ngopongkha changkya. 2“Jisu zidaokya chatle azangle zokya changpu, ija ningle khünaknu zikoxchu chatle azangle zo angkya changle”, le ija wangshem nyie khünaknu hama anwot-ano ngokya khoma hwom ang huanuma mong puak. 3Idaile hwome hokhi kop ilaxle iponge hanhomünkya daile, ofüi nyix kople hokhi kun ma thom. 4Ikoxlechu ija kaxho atatkyabu khama ija to ongkyabu tüle lai; üntoxle ongkya khünakbu mixhuak hajat aga tukux ang achangle tsa.

5Ofüi nyix Jehudi nok apün-adakyabu, mixpa tüichongbu üntoxle wanlom nwotmixbu Jerusalem ma asox. 6Nguakho Anna hia Kaifa, Juhan hia Alekjendar tamchu zommix-zangmix homkha pangwüi asox. 7Hwome Pitar hia Juhan nyi hwom thüntho ma ajong ang tsan, ilaxle hokhi ma atüi: “Hünkhie ija chafai mix chemle amüi thopu? Hünkhi ma chem zong tüipu?”

8Pitar-e Otsao Chasae awang laxle hwom kax to lanle thüi: “Hünzom, khünaknu lompabu tamchu apu-apahom, 9chafaikya khünak tuita amüile müikya mwot mokkya khoma, chix chemle amüipu le anyix kukhi ma atüikya jangchang thüiba, 10hünzome pünsak ma takle langkya mix owa Zange chatle azangle zo ang tompuix, ija Nazareth nok Jisu mün ma tüikya zong makhange owüiole müilaxle ija mixsün hünzom thüntho ma ajong ang tsuakpu, le hünzom pangnue tamchu Israel khünak noke wüi awan angkya oli changle. 11#Mts 118.22.Jisu a Otsao Lai ma ile akax ngokya mix tuita changle:

‘Zingpabue chilaxle awütkya long,

tuita homkom-longnu ang achangle hüi.’

12Khosün a chix lan makhange tix ataküi; chemthüikoxle chix mün makhange kem khosün angkya hexo le zangfang ma Zange chatle owa münchu koxle thomkya müntüi.”

13Pitar hia Juhan nyi mongchongkya ngünlaxle hokhi a man-ngünkya chemchu chitüikya nyi le awanlaxle nguawangbu pangwüi abüt. Okhi a Jisu füi ngokya nyi changpu le hwome tsingle lax. 14Ikoxlechu hwome akax angkya oli chemchu chitüi, chemthüikoxle faile ngokya amüikya mixsün Pitar hia Juhan nyi füi ajongle ngokya hwome ngün. 15Idaile hwome nguawangbu katzua nui angkya hokhi tam acha ang hwom ang kaxkox, ilaxle hwom tatae süile zangwün tam azut ang süt. 16Hwome tata ma atik-asho: “Keme ija Pitar hia Juhan nyi to chemle hwonüi? Chemthüikoxle ija chafai mix amüikya ohünotün mwot a hokhie mokkya changpu le Jerusalem ma ngokya noknusae wüi awanle ilaxle kemechu münchangle thüi ang müntho. 17Itülüi, ija zangwün noke atatle chipu angkya hanpakma ‘Jisu mün laxlaxle chatle owawa hamachu taxwüno’ le azahax.”

18Ilaxle hwome hokhi tamchatle se üntoxle, tüle wüi changlax otuechu Jisu mün ma anwot-ano le hia zangwünle jangchangba münmüipuo le aza. 19Ikoxle Pitar hia Juhan nyie hwom kax to lan: “Kwome hünzom kax ma laxüi hia Zang kax ma laxüi, hünzome hünzom lualua to zangwün tsuakle fahüi. 20Chemthüikoxle kwome ngündaokya hia atat daokya mo chiwün homle zak ang müntho.” 21Nguawangbue tamtaile aza ilaxle hokhi danle apao. Hwome hokhi sikangünkya “ikhoma changpu”, le thüi angkya olom chiatak, chemthüikoxle ile changkya ngünlaxle khünaknue Zang mün achuakle ngo. 22Owa cha faikya amüile ohünotün mwot mokpuix, chix a zangpua punyi nguidaokya khünak chang.

Mongchen Hanpakma Mongong mixbu Zangjop

23Okhi dankya thuile hwom othom hato chat ilaxle Nguakho hia mixpa tüichongbue hokhi füi akaxkyabu hwom hama wün. 24#Lai 20.11; Neh 9.6; Mts 146.6.Hwome ija atatkya zuma, hwom pangnu Zang to jopkya ma tom ilaxle zex: “O Jowanpa, nang a zangkangting, chaxwannu ilaxle Molo-Tinu ilaxle ibu ma atüitüi komle zingkya hopunu changle! 25#Mts 2.1,2.Kwom putong Dawid, nang da füi Otsao Chasa makhange nange zangwün koxle chixe thüi:

‘Mixnokbu ang büthüikoxle,

kün-tsik mongmapu;

Jowanpa zongma opüi mwot,

büthüikoxle zingpu?

26Chaxwannu wanghombu,

hwom lailai azan ang achwon;

apün-adakyabu pangnusa,

Jowanpa Zang hia Messaiah,

zan to ka ang asox.’

27 # Luk 23.7-11; Mat 27.1,2; Mrk 15.1; Luk 23.1; Jhn 18.28,29. Ilailaile Hünsa Jisu, owa nange Messaiah ang achang, chix zan to ka ang Herod hia Pontias Pilat nyi mixnokbu hia Israel khünakbu füi tomlaxle ija tingnu ma asox. 28Nange amibawüi nang tsakzong hia nang tutex makhange, chempang le changüihex, ibu athut-apan tsuakdaokya pangnu angaile mok ang hwom asox. 29Idaile athax, O Jowanpa, hwome kwom to aza-anakya awan kop hüi üntoxle kwom nang dabu ang chem zazyenkya chitüi le nang kaxho apuk angkya mongchyen koxhüi. 30Khünaknu kak-lak amüi ang nang chak thuikox, ilaxle nange Messaiah ang zingkya Jisu mün ma khomtsikya hia ohünotün mwotbu mok ang tomhüi.”

31Otue hwome zangjop ashukpuix, hwom asoxle ngokya kha sile alox. Hwom pangnu wüi Otsao Chasae awang ilaxle zazyenkya chemchu chitüi le Zang kaxho apuk ang süt.

Mongong Mixbue Hwom Tuina Ahanle Lax

32 # Mwt 2.44,45. Mongong mixbu kün-mong tuita ma ngo. Owaechu ma ma tüikya makux changpu le chithüi: ikoxle hwom ma atüitüi pangnu wüi tata füi azut-ahanle lax. 33Huanu tsakzong füi wangshembue Jisu chatle azangle zokya bama kaxkhi fa, üntoxle Zange hwom pangnu to okhongui le mohiman. 34Hwom othom khama tuita ngaxchu tuitaikya mix chitüi. Haxtok hia hom-pung tüikyabue ibu hang, ilaxle hangkya ma kopkya ngun apüi; 35ilaxle wangshembu chak to kox; ilaxle wangshembue ibu ngun pangnusa ang wüi mathüt mapanpan ahanle kox.

36Ilaxle ikhama Jusep le amünkya Saipras shuazo to puxkya liwi sün tuita tüikya, owa ang wangshembue Barnaba (thüikoxle zong adünkya mix) le nyak; 37chixe chix haxtok hang laxle kopkya ngun apüile wangshembu chak to kox.

നിലവിൽ തിരഞ്ഞെടുത്തിരിക്കുന്നു:

WANGSHEMBU MWOT 4: WANCBSI

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

Wancho Naga Bible - OTSAO BAIBEL

OTSAO BAIBEL (BSI) നെക്കുറിച്ച് കൂടുതലറിയുക

WANGSHEMBU MWOT 4