ܒܪܝܬܐ 6
6
ܚܛܝܼܬܵܐ ܕܥܵܠܡܵܐ
1ܟܲܕ ܫܘܼܪܹܐ ܠܗܘܿܢ ܐ݇ܢܵܫܹ̈ܐ ܠܸܙܝܵܕܵܐ ܥܲܠ ܦܵܬܵܐ ܕܐܲܪܥܵܐ، ܘܒܢܵܬܹ̈ܐ ܦܝܼܫ ܠܗܘܿܢ ܝ݇ܠܝܼܕܹܐ ܐܸܠܲܝܗܝ، 2ܚܙܹܐ ܠܗܘܿܢ ܒܢܘܿܢܹ̈ܐ ܕܐܲܠܵܗܵܐ ܠܒܢܵܬܹ̈ܐ ܕܐ݇ܢܵܫܹ̈ܐ ܕܫܲܦܝܼܪܹ̈ܐ ܝܗ݇ܘܵܘ، ܘܓܘܼܒܹܐ ܠܗܘܿܢ ܡܸܢܲܝܗܝ ܒܲܟ݂ܬܵܬܹ̈ܐ ܘܓܒ݂ܝܼܪܲܝ ܠܗܘܿܢ. 3ܘܐ݇ܡܝܼܪܹܗ ܡܵܪܝܵܐ، ”ܠܹܐ ܥܵܡܪܵܐ ܪܘܼܚܝܼ ܒܒܲܪܢܵܫܵܐ ܗܲܠ ܠܥܵܠܲܡ، ܣܵܒܵܒ ܡܵܝܘܿܬܵܐ ܝܠܹܗ، ܘܝܵܘܡܵܢܘܼ̈ܗܝ ܒܸܬ ܗܵܘܝܼ ܐܸܡܵܐܐ ܘܥܸܣܪܝܼ ܫܸܢܹ̈ܐ.“
4ܢܦ̮ܝܼ̈ܠܝܼܡ ܐܝܼܬ ܗ݇ܘܵܘ ܒܐܲܪܥܵܐ ܒܐܵܢܝܼ ܝܵܘܡܵܢܹ̈ܐ، ܘܐܘܼܦ ܒܵܬ݇ܪ ܗܵܕܵܐ، ܟܲܕ ܥܒ݂ܝܼܪܗܘܿܢ ܒܢܘܿܢܹ̈ܐ ܕܐܲܠܵܗܵܐ ܠܟܸܣ ܒܢܵܬܹ̈ܐ ܕܒܲܪܢܵܫܵܐ، ܐܲܝܢܝܼ ܕܝ݇ܠܝܼܕ ܠܗܘܿܢ ܐܸܠܲܝܗܝ ܓܲܢ݇ܒܵܪܹ̈ܐ ܕܡ̣ܢ ܥܵܠܲܡ، ܐ݇ܢܵܫܹ̈ܐ ܡܵܪܹܐ ܫܸܡܵܐ.
5ܘܚܙܹܐ ܠܹܗ ܡܵܪܝܵܐ ܕܙܝܼܕ ܠܵܗ̇ ܒܝܼܫܬܵܐ ܕܒܲܪܢܵܫܵܐ ܒܐܲܪܥܵܐ، ܘܟܠܲܝܗܝ ܨܲܠܡܲܢܝܵܬܹ̈ܐ ܕܚܘܼܫܵܒܹ̈ܐ ܕܠܸܒܹܗ ܕܒܸܗܘܵܝܵܐ ܝܗ݇ܘܵܘ ܒܝܼܫܹ̈ܐ ܝܵܘܡܵܐ ܒܝܵܘܡܵܐ، 6ܘܦܫܝܼܡ ܠܹܗ ܡܵܪܝܵܐ ܕܥܒ݂ܝܼܕ ܠܹܗ ܒܲܪܢܵܫܵܐ ܒܐܲܪܥܵܐ، ܘܡܠܹܐ ܠܹܗ ܠܸܒܹܗ ܚܲܫܵܐ. 7ܐ݇ܡܝܼܪܹܗ ܡܵܪܝܵܐ، ”ܒܸܬ ܓܵܪܕܹܢܹܗ ܡ̣ܢ ܦܵܬܵܐ ܕܐܲܪܥܵܐ ܒܲܪܢܵܫܵܐ ܕܒܪܹܐ ܠܝܼ، ܡ̣ܢ ܒܲܪܢܵܫܵܐ ܗܲܠ ܒܥܝܼܪܵܐ، ܗܲܠ ܪܲܚܫܵܐ، ܘܗܲܠ ܦܵܪܲܚܬܵܐ ܕܫܡܲܝܵܐ، ܣܵܒܵܒ ܦܫܝܼܡܵܐ ܝܘܸܢ ܕܥܒ݂ܝܼܕܲܝ ܠܝܼ.“
ܢܘܿܚ ܡܲܫ݇ܟ̰ܘܼܚܹܐ ܫܵܦܵܩܲܬ
8ܐܝܼܢܵܐ ܢܘܿܚ ܡܘܼܫ݇ܟ̰ܸܚ ܠܹܗ ܫܵܦܵܩܲܬ ܒܥܲܝܢܹ̈ܐ ܕܡܵܪܝܵܐ. 9ܐܲܢܹܐ ܝܢܵܐ ܬܵܘܠܕܵܬܹ̈ܐ ܕܢܘܿܚ: ܢܘܿܚ ܐ݇ܢܵܫܵܐ ܙܲܕܝܼܩܵܐ ܘܬܲܡܝܼܡܵܐ ܝܗ݇ܘܵܐ ܒܕܵܪܹܗ، ܘܚܕܝܼܪܹܗ ܥܲܡ ܐܲܠܵܗܵܐ. 10ܘܡܘܼܠܸܕ ܠܹܗ ܢܘܿܚ ܬܠܵܬܵܐ ܒܢܘܿܢܹ̈ܐ، ܫܹܝܡ، ܘܚܵܡ، ܘܝܲܦ̮ܬ.
ܬܵܪܲܨܬܵܐ ܕܩܹܒ݂ܘܼܬܵܐ
11ܐܝܼܢܵܐ ܚܪܝܼܒ݂ܬܵܐ ܝܗ݇ܘܵܐ ܐܲܪܥܵܐ ܒܥܲܝܢܹ̈ܐ ܕܐܲܠܵܗܵܐ، ܘܡܠܝܼܬܵܐ ܝܗ݇ܘܵܐ ܛܠܘܼܡܝܵܐ. 12ܘܚܙܹܐ ܠܹܗ ܐܲܠܵܗܵܐ ܕܐܲܪܥܵܐ ܚܪܝܼܒ݂ܬܵܐ ܝܗ݇ܘܵܐ، ܣܵܒܵܒ ܟܠ ܐ݇ܢܵܫܵܐ ܡܘܼܚܪܸܒ݂ܘܼܗ̇ ܝܗ݇ܘܵܐ ܐܘܼܪܚܹܗ ܒܐܲܪܥܵܐ.
13ܘܐ݇ܡܝܼܪܹܗ ܐܲܠܵܗܵܐ ܠܢܘܿܚ، ”ܡܛܹܐ ܠܵܗ̇ ܚܲܪܬܵܐ ܕܟܠ ܒܲܪܢܵܫܵܐ ܩܵܕ݇ܡܝܼ، ܣܵܒܵܒ ܐܲܪܥܵܐ ܡܠܝܼܬܵܐ ܝܠܵܗ̇ ܛܠܘܼܡܝܵܐ، ܒܘܼܬ ܐܵܗܵܐ ܒܸܬ ܡܲܚܪܸܒܸܢܗܘܿܢ ܟܠܲܝܗܝ ܥܲܡ ܐܲܪܥܵܐ. 14ܬܲܪܸܨ ܠܘܼܟ݂ ܩܹܒ݂ܘܼܬܵܐ ܡ̣ܢ ܩܲܝܣܵܐ ܕܓܵܘܦܸܪ؛ ܥܒ݂ܘܿܕ ܐܵܘܵܢܹ̈ܐ ܓܵܘܘܼܗ̇، ܘܡܲܟ̰ܪܸܥ ܠܵܗ̇ ܡ̣ܢ ܠܓܵܘܵܐ ܘܡ̣ܢ ܠܒܲܕܲܪ ܒܩܝܼܪ. 15ܘܗܲܕܟ݂ܵܐ ܬܲܪܨܸܬ ܠܵܗ̇، ܬܠܵܬܡܵܐܐ ܝܲܡܝܼܢܹ̈ܐ ܝܘܼܪܟ݂ܘܼܬܘܼܗ̇، ܚܲܡܫܝܼ ܝܲܡܝܼܢܹ̈ܐ ܦܸܬܝܘܼܬܘܼܗ̇، ܘܬܠܵܬܝܼ ܝܲܡܝܼܢܹ̈ܐ ܪܵܡܘܼܬܘܼܗ̇. 16ܬܲܪܨܸܬ ܚܕܵܐ ܟܵܘܹܐ ܠܩܹܒ݂ܘܼܬܵܐ، ܕܗܵܘܝܵܐ ܚܕܵܐ ܝܲܡܝܼܢܵܐ ܠܥܸܠܸܠ، ܘܬܲܪܥܵܐ ܗܵܘܹܐ ܒܕܸܦܢܘܼܗ̇؛ ܬܲܪܨܸܬ ܡܸܕܝܵܪܹ̈ܐ ܬܲܚܬܵܝܵܐ، ܬܪܲܝܵܢܵܐ، ܘܬܠܝܼܬܵܝܵܐ. 17ܗܵܐ ܐܵܢܵܐ ܫܲܕܘܼܪܹܐ ܝܘܸܢ ܛܵܘܦܵܢܵܐ ܕܡ̈ܝܼܵܐ ܥܲܠ ܐܲܪܥܵܐ، ܠܡܲܚܪܘܼܒܹܐ ܟܠ ܕܐܝܼܬ ܒܝܼܹܗ ܚܲܝܹ̈ܐ ܬܚܘܿܬ ܫܡܲܝܵܐ؛ ܟܠ ܡܸܢܕܝܼ ܕܐܝܼܬ ܥܲܠ ܐܲܪܥܵܐ ܒܸܬ ܛܵܠܹܩ. 18ܘܒܸܬ ܫܲܬܐܸܣܸܢ ܘܲܥܕܝܼ ܥܲܡܘܼܟ݂. ܒܸܬ ܥܵܒ݂ܪܹܬ ܠܩܹܒ݂ܘܼܬܵܐ، ܐܲܢ݇ܬ، ܘܒܢܘܿܢܘܼ̈ܟ݂، ܘܒܲܟ݂ܬܘܼܟ݂، ܘܒܲܟ݂ܬܵܬܹ̈ܐ ܕܒܢܘܿܢܘܼ̈ܟ݂ ܥܲܡܘܼܟ݂. 19ܘܡܲܥܒܸܪܸܬ ܓܵܘ ܩܹܒ݂ܘܼܬܵܐ ܬܪܹܝ ܡ̣ܢ ܟܠ ܐܝܼܬܝܵܐ ܚܵܝܵܐ ܕܦܵܝܫܝܼ ܚܵܝܹ̈ܐ ܥܲܡܘܼܟ݂. ܗܵܘܝܼ ܐܘܼܪܙܵܐ ܘܢܸܩܒ݂ܵܐ. 20ܡ̣ܢ ܓܸܢܣܵܐ ܕܦܵܪܲܚܬܵܐ، ܘܡ̣ܢ ܓܸܢܣܵܐ ܕܒܥܝܼܪܵܐ، ܘܡ̣ܢ ܓܸܢܣܵܐ ܕܪܲܚܫܵܐ ܕܐܲܪܥܵܐ، ܬܪܹܝ ܡ̣ܢ ܟܠ ܓܸܢܣܵܐ ܥܵܒ݂ܪܝܼ ܥܲܡܘܼܟ݂ ܠܸܚܵܝܵܐ 21ܐܘܼܦ ܫܵܩܠܹܬ ܠܘܼܟ݂ ܡ̣ܢ ܟܠ ܦܸܨܠܵܐ ܕܡܹܐܟ݂ܘܼܠܬܵܐ ܠܹܐܟ݂ܵܠܵܐ، ܘܓ̰ܲܡܥܸܬ ܠܵܗ̇، ܕܗܵܘܝܵܐ ܡܹܐܟ݂ܘܼܠܬܵܐ ܐܸܠܘܼܟ݂ ܘܐܸܠܲܝܗܝ.“ 22ܘܥܒ݂ܝܼܕ ܠܹܗ ܗܲܕܟ݂ܵܐ ܢܘܿܚ. ܟܠ ܡܸܢܕܝܼ ܕܦܩܝܼܕ ܠܹܗ ܐܸܠܹܗ ܐܲܠܵܗܵܐ ܥܒ݂ܝܼܕ ܠܹܗ.
നിലവിൽ തിരഞ്ഞെടുത്തിരിക്കുന്നു:
ܒܪܝܬܐ 6: ABTAB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Aramaic Bible Translation Assyrian Bible © 2025 Aramaic Bible Translation