Matiu 17
17
A Puxaan Na Yesus
Lk 9:28-36; Mk 9:2-13
1A yaan pisaxa lumui na Yesus a xel patak na Pita e ro fetinan Jems nare Jon e a paamuian narutul xe laa'ui paaliu la put e ri waan nari sang mon. 2Layaan rutul taxa faalim, a xakaaluman si Yesus a puk: a nonau ina a lang malaan sena ngaas e a marapi sina a rarapak malaan sena yaamit. 3E rutul ipulan na Moses nare Ilaija re taxa ferawai xuvul pa Yesus.
4E na Pita a kuus xe si Yesus, “Memai, a mo roxo taara taxa waan nabe'. Tamo no vubuxane ne taa vesan a sawat talatul nabe', saxa xanum, saxa xa Moses e saxa xa Ilaija.” 5La fena ferawaian sina a vata rarapak maa xafut nari e a ling ti la vata aave a ferawai malaan, “Nabe' ve a lak siak aava ne vubuxan xasingite. Nane fuuna fafaamamaasau. Langaie!” 6Layaan rutul langai a ling aave rutul mataut temasaat e rutul poxo turung xe lapi la xavala. 7Taasaxa na Yesus maa tao narutul e a kuus, “Tamasiak, muta mataut.” 8E rutul saraak xe laa'ui e xalum na Yesus mon, pi ta mataa fulaa.
9Layaan ri taxa sivi ti xuluna put na Yesus a xuus faagutan narutul, “Muta xuus ta mataa pana xakaaluman aanabe' aava mutul fo xalume fefexaxaas a yaan a Piran i taa fatatoi fa'uli a Natuna Mataa ti la mamaat.” 10E a mu fefeng aave ri fine, “Senasou a mu rabuna ina fepitaa pana vuputkai ri kuus o na Ilaija i taa filimaan paamua?”
11E nane sui nari, “A tuuna, na Ilaija i taa ulaamaan e i taa faigotan a maana rabuna. 12Taasaxa ne xuus nami o na Ilaija fo filimaan xo e a mu rabuna ri ngalngolane e ri vil a saat xe sina. E malaanabe' ri taa vil a saat vaxa xe sina Natuna Mataa.” 13E a mu fefeng ri masam o i taxa ferawai paap xe siri se Jon ina Fasufan.
Na Yesus A Vil Faroxoi A Lak Tomexaan Pana Vovau Saat
Mk 9:14-28; Lk 9:37-42
14Layaan ri sivi ulaa xe sina malila, saxa mataa maa savat si Yesus e bukaak la nona, 15e nane kuus, “Matalava, muluk na natuk. Nane toxan a giisan la putuna e fuuna gaga e maana yaan fuuna poxo xe lana fata o raarum. 16E ne lisanmaane xe sina mu fefeng siim taasaxa ri pife fexaxaas sena xavange.”
17E na Yesus a suie, “Nami mu rabuna, mi pi namkai e mi milung vulai! Mi famaareau. Ne taa waan xuvul pami pana yaan talavisan fulaa? Lisanmaan a lak xe siak.” 18Na Yesus a baras a vovau saat e a vovau saat aave ta'ulan a lak aave e monabe' mon nane roxo fulaa.
19E mui, layaan pi ta rabuna fulaa ri taxa waan, a mu fefeng ri maa fin na Yesus, “Senasou e maam pife fexaxaas sena gei tapin a vovau saat aave?”
20E nane sui nari, “Senaso a namkaian simi pife fexaxaas. Ne kuus tuuna, tamo a namkaian simi a fexaxaas malaan sena fomirak kam ina wai mastaat, mi taa kuus xe sina put aanabe', ‘Talaput nabe' e falet xe pave!’ e i taa falet. Piau ta mo mi pife fexaxaas sena vile.” 21[“Taasaxa a buk mo aanabe' i taa pife falet palau. Mi taa falfaal e fenung xena gei tapine.”]
Na Yesus A Ferawai Fulaa Pana Maatan Sina
22Layaan a mu fefeng ri waan xuvul pa Yesus pe Galili, na Yesus a xuus nari, “Faasilak, saxano rabuna ri taa pet lisan a Natuna Mataa xe sina mu rabuna aava 23ri taa punuxe. Taasaxa lamina yaan talatul a Piran i taa fatatoi fa'ulie ti la maatan.” E a mu fefeng ri kanamsaat sena ferawaian sina.
Na Yesus A Ferawai Pana Maraanaana Taakis Ina Tang Lifu Lotu
24Layaan na Yesus xuvul pana mu fefeng sina ri savat pe Kapanam a mu rabuna ina siak taakis ina tang lifu lotu ri maa savat si Pita e ri fine, “A mataa ina fepitaa simi, nane maraan a taakis ina tang lifu lotu, bo?” 25Na Pita a sui nari, “A tuuna, nane fuuna maraane.”
Layaan na Pita a laak la lifu, na Yesus a ferawai paamuine, “Saimon, no lamon malaafaa? Nase' maraan a taakis aava paamua ti la xavala a ferawai pana? A mu rafulak sina o mu topen?” 26E na Pita a suie, “A mu topen.”
E na Yesus a xuuse, “Lavaxa, a mu rafulak xo ri taa pife maraane. 27Taasaxa taara bai kawaasan a waanan sitaara xuvul pari. E voxo, falet xe la raarum e fadui a yeis ina ngaulaana din. A din mata aava no ngaule, kas a valana e no taa tingin a faat xena maraan a taakis siak e siim sait. Lisan a faat aave xe siri xena maraan a taakis sitaare.”
നിലവിൽ തിരഞ്ഞെടുത്തിരിക്കുന്നു:
Matiu 17: leu
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2014, Wycliffe Bible Translators, Inc. All rights reserved.