Zãa 8
8
Nɔɛ pɔ wa kũ̀ ń gɔ̃o
1Yesu gɛ̀ Kukpɛ sĩsĩpɔlɛu. 2Kɛ́ a gu dɔ̀ gɔ̃̀ɔ, à ɛ̀a gɛ̀ Lua ua. Gbɛ̃pii mɔ̀ aà kĩi, ɔ̃ à zɔ̃̀lɛ àlɛ yãdanɛ́. 3Ɔ̃ Mɔizi ikoyãdanɛdeɔ ń Falisiɔ mɔ̀ ń nɔɛ pɔ wa kũ̀ ń gɔ̃oo. Aa aà zɛ̀ zã guu 4ɔ̃ aa ò Yesuɛ: Mɛtulu, wà nɔɛɛ bee kũ̀ ń daakɛaoɛ. 5Mɔizi dìlɛwɛ̃ɛ wá ikoyã guu wà nɔɛ bee taa papa ń gbɛo wà dɛɛ.#Iko 22.22-24 Ń è kpelewa sɔ̃i? 6Aa bee ò kɛ́ aalɛ likpalɛwà wà yãdaaala yãiɛ. Ɔ̃ Yesu nàalɛ, àlɛ ɔgbɛkɛ̃ tɔɔlɛwa. 7Kɛ́ aa gì aalɛ aà lala, ɔ̃ à a mi fɛ̀lɛ a ònɛ́: Á gbɛ̃́ pɔ i duunakɛ yãao, aà aà pa ń gbɛo sɛ̃ia. 8Ɔ̃ à ɛ̀a nàalɛ, àlɛ ɔgbɛkɛ̃ tɔɔlɛwa lɔ. 9Kɛ́ aa mà màa, ɔ̃ aa gɛ̃̀zɛa dodo sɛa za gbɛ̃zɔ̃ɔɔwa. Ɔ̃ Yesu gɔ̃̀ ado ń nɔɛpio. 10Ɔ̃ à ɛ̀a à a mi fɛ̀lɛ a òɛ̀: Nɔɛ, aa tà má ni? Wi yãdanla lɔoa? 11Nɔɛpi wèwà à mɛ̀: Baa, gbɛ̃e ku la lɔo. Ɔ̃ Yesu òɛ̀: Mapi má yãdanla sɔ̃o. Gɛi. Za gbã nsu duunakɛ lɔo.
Yesu mɛ́ gupua ũ dũniaɛ
12Ɔ̃ Yesu yã'ò bilaɛ lɔ à mɛ̀: Mamɛ má gupua ũ dũniaɛ, gbɛ̃́ pɔ tɛmazi aɔ ku gusiau lɔo, gupua pɔ ì ń ká wɛ̃niwa ɔ̃ aɔ vĩ. 13Ɔ̃ Falisiɔ òɛ̀: Ń dɛ nzĩa seelade ũ, n yã naai vĩo.#Zãa 5.31 14Ɔ̃ Yesu wèmá à mɛ̀: Baa tó mazĩa yã malɛ o, ma yã naai vĩ, asa má dɔ̃ gu pɔ ma bɔu ń gu pɔ malɛ táuo. Apiɔ, á gu pɔ ma bɔu ń gu pɔ malɛ táuo dɔ̃o. 15Àlɛ ma taae'e kpalɛa yãi sai. Malɛ gbɛ̃e taae'eo. 16Tó masu gbɛ̃́ taae'è, ma aà taae'ea aɔ naai vĩ, asa má ku madoo, ma Mae pɔ ma zĩ kumanɔ. 17Wa kɛ̃̀ á ikoyã láu wà mɛ̀, seelade gbɛ̃ɔn plaɔ yã mɛ́ naai vĩ. 18Mamɛ má dɛ mazĩa seelade ũ. Ma Mae pɔ ma zĩá ma seeladeɛ lɔ. 19Ɔ̃ aa aà là aa mɛ̀: N mae ku má ni? Yesu wèmá à mɛ̀: Á ma dɔ̃o mɛ́ á ma Mae dɔ̃o. Tó a ma dɔ̃, dɔ̃ a ma Mae dɔ̃̀.
20Yesu yãpi ò ɔsikĩi, gɔɔ pɔ àlɛ yãdanɛ́ Lua uaɛ. Wi aà kũo, asa aà gɔɔ i pa yãao.
21Ɔ̃ Yesu ònɛ́ lɔ: Malɛ tá mɛ́ á ma wɛɛlɛ, ãma á ga ń á duunaoɛ. Á fɔ̃ mɔ gu pɔ malɛ táuo. 22Ɔ̃ gbãadepiɔ mɛ̀: À mɛ̀ wá fɔ̃ mɔ gu pɔ álɛ táuo. Asu azĩa dɛ yã̀ mɔɔɔ? 23Ɔ̃ Yesu ònɛ́: Zĩlɛ la gbɛ̃́ɔn á ũ, musu gbɛ̃́n ma ũ. Dũniaɛ bee gbɛ̃́ɔn á ũ, dũniaɛ bee gbɛ̃́n ma ũo. 24A yãi tò má òɛ́ á ga ń á duunaoɛ. Asa tó i si mamɛ má aà ũo,#Bɔa 3.14 á ga ń á duunaoɛ. 25Ɔ̃ aa aà là aa mɛ̀: Mmɛ ń déi? Yesu wèmá à mɛ̀: Gbɛ̃́ pɔ má òɛ́ za káauɛ. 26Má yã vĩ dasi mà o á yãmusu, mí yãdaòála. Gbɛ̃́ pɔ ma zĩá sĩandeɛ, yã pɔ má mà aà kĩi ɔ̃ mi o dũniaɛ.
27Aai dɔ̃ kɛ́ Mae Lua yã ɔ̃ àlɛ onɛ́o, 28ɔ̃ Yesu ònɛ́: Tó a Gbɛ̃nazĩn Nɛ sɛ̀ á dɔ̀ musu, ɔ̃ á dɔ̃ sa mamɛ má aà ũ. Mili yãe kɛ ń mazĩaoo, yã pɔ ma Mae dàmɛɛ ɔ̃ mi o. 29Gbɛ̃́ pɔ ma zĩ kumanɔ, i ma to madoo, asa miɔ yã pɔ ì kaaagu kɛ gɔɔpiiɛ. 30Gɔɔ pɔ Yesu lɛ́ yãpiɔ o, wà aà naaikɛ̀ dasi.
Yesu dɛa Ablahaũa
31Ɔ̃ Yesu ò Yuda gbãade pɔ aa a yãsìɔnɛ: Tó á ma yã kũa, áɔ dɛ ma iwaɔ ũ sĩanaɛ. 32Áɔ sĩana dɔ̃, sĩanapi i to à gɔ̃ wɛ̃ɛɔ ũ. 33Ɔ̃ aa òɛ̀: Ablahaũ buin wá ũ, wi zɔble gbɛ̃eɛ yãao. Ɔ̃ nlɛ o wá gɔ̃ wɛ̃ɛɔ ũa? 34Yesu wèmá à mɛ̀: Sĩana malɛ oɛ́, gbɛ̃́ pɔ ì duunakɛá duun zɔɛ. 35Zɔá ua gbɛ̃́ɛ gɔɔpiio, ua nɛ mɛ́ ua gbɛ̃́ ũ gɔɔpii. 36Tó Lua Nɛ á bó, á gɔ̃ wɛ̃ɛɔ ũ sĩanaɛ. 37Má dɔ̃ kɛ́ Ablahaũ buin á ũ, ãma álɛ ma wɛ, kɛ́ ìli ma yãda á nɔ̀sɛuo yãi. 38Yã pɔ má è ma Maewa ɔ̃ malɛ o, yã pɔ á mà á mae kĩi ɔ̃ álɛ kɛ. 39Ɔ̃ aa òɛ̀: Ablahaũ mɛ́ wá mae ũ. Ɔ̃ Yesu ònɛ́: Tó Ablahaũ ɔlɛsɛnaɔn á ũ, dɔ̃ álɛ Ablahaũ kɛa kɛ. 40Tia kɛ́wa álɛ ma wɛ, ma gbɛ̃́ pɔ ma sĩana òɛ́, sĩana pɔ má mà Lua kĩi. Ablahaũ i yã bee taa kɛo. 41Álɛ á mae kɛa kɛɛ.
Ɔ̃ aa òɛ̀: Naaenɛɔn wá ũo. Wá mae mɛndoɛ, ɔ̃n Lua ũ. 42Yesu ònɛ́: Tó á maen Lua ũ, dɔ̃ á yemazi, asa Lua kĩi ma bɔu ma mɔ. Mi mɔ ń mazĩaoo, aapi mɛ́ ma zĩ. 43Bɔyãi á ma yã mi dɔ̃o ni? Kɛ́ á fɔ̃ à swãdɔ ma yãio yãiɛ. 44Á mae Ibiisi pɔn á ũ, aà pɔeã ɔ̃ á ye kɛ. Gbɛ̃́dɛnan aà ũ za káau, i zɛ ń sĩanaoo, kɛ́ a sĩana vĩo yãi. Tó à ɛɛtò, aazĩa dàan we, asa ɛɛden aà ũ, ɛɛdeɔ de'iaɛ. 45Mapi sɔ̃ mi sĩana o. A yãi ili ma yãsio. 46Á guu, demɛ duuna èai? Lá sĩana malɛ o, bɔyãi álɛ ma yãsio ni? 47Gbɛ̃́ pɔ dɛ Lua pɔ ũ ì swãdɔ yã pɔ Lua lɛ́ oiɛ. Á dɛ Lua pɔ ũo, a yãi ili swãdɔ ma yãio.
48Ɔ̃ gbãadepiɔ òɛ̀: Samali gbɛ̃́n n ũ! Ń tãa vĩɛ! Wá yã na noa? 49Yesu mɛ̀: Má tãa sɛao. Mi a Mae kpɛla, ɔ̃ i ma kpɛbɔ. 50Mili wɛɛlɛ mà azĩa tɔbɔo, Lua mɛ́ ì wɛɛlɛmɛɛ, ɔ̃mɛ yãgɔ̃gɔ̃na ũ. 51Sĩana malɛ oɛ́, gbɛ̃́ pɔ ma yã kũa a ga bauo.
52Ɔ̃ gbãadepiɔ òɛ̀: Wá dɔ̃ sa kɛ́ ń tãa vĩ. Ablahaũ gà ń ãnabiɔ pii, ɔ̃ nlɛ o gbɛ̃́ pɔ n yã kũa a ga bauoa? 53Ń dɛ wá dezi Ablahaũ pɔ gàla yã? Ãnabiɔ gàga lɔ. Dé nlɛ nzĩa dilɛ a ũi? 54Yesu mɛ̀: Tó mazĩa tɔ́ malɛ bɔ, a gbiao. Ma Mae pɔ álɛ mɛ á Luaɛpi, ɔ̃mɛ ì ma tɔbɔ. 55Á aà dɔ̃o, ãma má aà dɔ̃. Tó ma mɛ̀ má aà dɔ̃o, máɔ dɛ ɛɛde ũ lááwaɛ. Má aà dɔ̃ mɛ́ má aà yã kũa. 56Á dezi sɛ̃ia Ablahaũ pɔnakɛ̀ ma gɔɔ ea yãmusu. A è, ɔ̃ aà pɔ kɛ̀ na. 57Ɔ̃ gbãadepiɔ òɛ̀: Ni ka wɛ̃̀ blakwi yãao, ɔ̃ n Ablahaũ èa? 58Yesu ònɛ́: Sĩana malɛ oɛ́, e wàɔ gɛ́ Ablahaũ ii, má ku.
59Ɔ̃ aa gbɛsɛ̀lɛ aa ye aa aà papaò. Ɔ̃ à ùlɛ à bɔ̀ Lua ua.
നിലവിൽ തിരഞ്ഞെടുത്തിരിക്കുന്നു:
Zãa 8: Boo2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Boko Bible © SIM International, 2024.