Luk 14
14
Yesu kua Falisie bɛ
1Kãmabogɔɔe zĩ́ Yesu gɛ̀ pɔblei Falisiɔ gbɛ̃zɔ̃ɔ bɛ, ɔ̃ gbɛ̃́ pɔ aa ku weɔ lɛ́ aà kpakpa. 2Kakagyãkɛnae ku Yesu aɛ we. 3Ɔ̃ Yesu yãsɛ̀ a ò ikoyãdɔ̃naɔnɛ ń Falisiɔ: Gbɛ̃́ gbãgbãa kãmabogɔɔzĩ zɛ́ vĩa ge a zɛ́ vĩo? 4Ɔ̃ aa nilɛ kílikili. Ɔ̃ Yesu gyãepi kũ̀, à aà gbã̀gbã à aà gbàɛ. 5Ɔ̃ a ònɛ́: Á dé nɛ ge aà zu, tó à zù lɔ̀ɔu kãmabogɔɔzĩ, a aà bɔ gɔ̃̀ɔo ni? 6Aai fɔ̃ yãzãsìwào.
7Yesu è lá gbɛ̃́ pɔ wà ń sisìɔ lɛ́ zɔ̃lɛkĩi maaɔ kũkũ, ɔ̃ à yãlɛ̀ɛũnɛ́ à mɛ̀: 8Tó wà n sisì nɔsɛpɔnablɛwa, nsu zɔ̃lɛ zɔ̃lɛkĩi maauo. Tó wà gbɛ̃́ pɔ a bɛɛɛ dɛnla sìsi sɔ̃ bɛ! 9Tó á sisina mɔ̀ a ònɛ: Fɛlɛ ǹ zɔ̃lɛkĩi kpa deewa, ńyɔ̃ fɛlɛ ǹ gɛ́ zɔ̃lɛkĩi kpɛɛu ń wíoɛ. 10Tó wà n sisì, nìli zɔ̃lɛkĩi kpɛɛ kṹ, kɛ́ tó n sisina mɔ̀, a onɛ: Ma gbɛ̃na, mɔ aɛ la. Bee a to wà n da gbia gbɛ̃́ pɔ á sãnuɔnɛ.#Yaa 25.6-7 11Gbɛ̃́ pɔ ì azĩa kãfĩ, Lua a aà busaɛ, mɛ́ gbɛ̃́ pɔ ì azĩa busa, Lua a aà kãfĩ.
12Ɔ̃ Yesu ò a sisinapiɛ: Tó nlɛ gbɛ̃́ɔ sisi blɛ fãanɛ bleawa ge a oosi pɔ, nsu ǹ n gbɛ̃naɔ sisio ge n vĩiɔ ń n dãunaɔ ge n daɛɔ ge n ɔde deeɔ. Tó ń kɛ̀ màa, aa ɛa aa n sisiwà sɔ̃ɛ, aai fĩabonɛ. 13Tó nlɛ gbɛ̃́ɔ sisi pɔbleawa, taasideɔ sisi ń ɛɛɔ ń kɔ̃̀ɔɔ ń vĩ̀aɔ, 14ńyɔ̃ gɔ̃ baaade ũ, asa aa pɔe vĩ aa gĩa fĩabonɛo. Lua mɛ́ a fĩabonɛ gbɛ̃maaɔ vugɔɔ.
Pɔna blɛblea
(Mat 22.1-14)
15Kɛ́ gbɛ̃́ pɔ aa sãnuɔ do yãpi mà, ɔ̃ a ò Yesuɛ: Baaaden gbɛ̃́ pɔ a pɔble kpala pɔ Lua kpà guu ũ. 16Yesu òɛ̀: Gbɛ̃e mɛ́ ye pɔnablɛkɛ, ɔ̃ à gbɛ̃́ɔ gbɛ̀a dasidasi. 17Blɛblezĩ ɔ̃ à a zĩkɛna zĩ̀ oi gbɛ̃́ pɔ à ń gbɛaɔnɛ aa mɔ́, wa làa sa. 18Gbɛ̃́ sɛ̃ia òɛ̀: Ma bú lùɛ, sema mà gɛ́ gwai. N yã na, ma awakpàɛ. 19Gbɛ̃pãle mɛ̀: Ma zu lù soon sɔo, má gɛ́ wɛsiɛi. N yã na, ma awakpàɛ. 20Gbɛ̃pãle mɛ̀: Ma nɔsɛ̀ dafuɛ. Ayãmɛto má e mà mɔo. 21Ɔ̃ zĩkɛnapi ɛ̀a tà, à ń lɛgbɛ dàu a sìu a diiɛ. Ɔ̃ uabelepi pɔ pà a ò a zĩkɛnaɛ: Gɛ wɛ̃lɛ guu kpakpa gãaɛɔ ń zɛaɔ, ní taasideɔ ń ɛɛɔ ń vĩ̀aɔ ń kɔ̃̀ɔɔ naaa ǹ suńnɔ la. 22Bee gbɛa zĩkɛnapi mɔ̀ a òɛ̀: Dii, ma yã pɔ ń ò kɛ̀, mɛ́ zɔ̃lɛkĩi gi ku. 23Ɔ̃ diipi ò zĩkɛnapiɛ: Gɛ́ zɛ́ɔ guu ń zɛwɛwɛnaɔ pii, gãna gbɛ̃́ɔwa aa gɛ̃, ma ua e pa. 24Malɛ oɛ́, gbɛ̃́ pɔ ma ń gbɛapiɔ kee a e lɛzɔ̃ ma blɛpiwao.
Gɔ̃a Yesu iwa ũ
(Mat 10.37-38)
25Wa bɛ zɛ́u ń Yesuo dasidasi, ɔ̃ à lìli a ònɛ́: 26Tó gbɛ̃́ mɔ̀ ma kĩi mɛ́ a ye a de ń a dao ń a nao ń a nɛɔ ń a vĩiɔ ń a dãunaɔ, baa azĩapizi dɛmala, a fɔ̃ gɔ̃ ma iwa ũo. 27Gbɛ̃́ pɔ aɔ a lipãakɔ̃a sɛa àɔ tɛòmazio, a fɔ̃ gɔ̃ ma iwa ũo.#Luk 9.23 28Tó á gbɛ̃e ye kpɛdiakɔ̃a dɔ, à zɔ̃lɛ gĩ́a à a ɔ̃a dɔdɔ à gwa, tó a fɔ̃ zĩpi kɛ à laa ya? 29Tó i kɛ màao, tó à ɛ̃kpàlɛ mɛ́ i fɔ̃ à a midɛ̀o, gbɛ̃́ pɔ à aà è pii a aà laanikɛ 30a mɛ: Gbɛ̃́pi kpɛ́ dàalɛ, i fɔ̃ à a midɛ̀o. 31Ge tó kia ye gɛ́ zĩkai ń kia pãleo, a zɔ̃lɛ gĩ́a à a waaipa à gwa, tó a sosa gãli kwiɔ fɔ̃ kuakpa sosa gãli bao pɔ lɛ́ mɔwaɔwao le? 32Tó a è á fɔ̃o, a zĩnaɔ zĩ lɛdoũkɛa yã gbɛaiwà zadɔ̃ i ka kãioɛ. 33Màaɛ lɔ, tó á gbɛ̃e i ɔzɔ̃ pɔ pɔ a vĩɔzi piio, a fɔ̃ gɔ̃ ma iwa ũo.
34Wisiá pɔ naɛ, ãma tó a í na tà, kpelewa wa kɛ à nakũ lɔi? 35A maa tɔɔlɛɛo ge zugbɔ̃kɔlɛkĩio, wì kɔlɛɛ. Gbɛ̃́ pɔ nɔ̀sɛ vĩ aà yãpi ma.
നിലവിൽ തിരഞ്ഞെടുത്തിരിക്കുന്നു:
Luk 14: Boo2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Boko Bible © SIM International, 2024.