Luk 15
15
Pɔ pɔ vũ̀aaɔ
(Mat 18.12-14)
1Ɔsinaɔ ń duunkɛnaɔ lɛ́ sɔ̃ Yesuzi aà yãmai mpii. 2Ɔ̃ Falisiɔ ń Mɔizi ikoyãdanɛdeɔ lɛ́ yãkũtɛ̃ka aa mɛ̀: Gbɛ̃́ɛ bee ì duunkɛnaɔ si aa pɔble sãnuɛ.#Luk 5.29-30 3Ɔ̃ Yesu yãɛ bee lɛ̀ɛũnɛ́ à mɛ̀: 4Tó á gbɛ̃e sã vĩ mɛn basɔo mɛ́ ado vũ̀aa, ìli a mɛn basɔo mɛndosai to sɛ̃u à pɛ̀lɛ a pɔ pɔ vũ̀aapizi e à gɛ bɔwào le? 5Tó à bɔ̀wà, ì sɛ da a gãu ń pɔnaoɛ, 6ì taò bɛ, ì a gbɛ̃naɔ ń a fãanideɔ sisi, ì onɛ́: À pɔnakɛmanɔ. Ma a sã pɔ vũ̀aapi è. 7Màaɛ lɔ malɛ oɛ́, wa pɔnakɛ luabɛ duunkɛna mɛndo pɔ nɔsɛlìlɛ yãmusu dɛ gbɛ̃maa gbɛ̃ɔn basɔo mɛndosai pɔ an bàa ku ń nɔsɛlilɛaooɔla.
8Nɔɛ pɔ ãnusu ɔwatɛ̃ vĩ mɛn kwi sɔ̃ bɛ, tó a mɛndo vũ̀aawà, a filia na, i kpɛwaa, i wɛɛlɛ busɛbusɛ e à gɛ bɔwào le? 9Tó à bɔ̀wà, a a gbɛ̃naɔ ń a fãanideɔ sisiɛ, i onɛ́: À pɔnakɛmanɔ. Ma a ãnusu ɔwatɛ̃ pɔ vũ̀aapi è. 10Malɛ oɛ́, Lua malaikaɔ ì pɔnakɛ duunkɛna mɛndo pɔ nɔsɛlìlɛ yãmusu màa lɔɛ.
Nɛ pɔ sã̀sã
11Yesu ò lɔ: Gbɛ̃e mɛ́ ku a nɛgɔ̃ɛɔ vĩ gbɛ̃ɔn pla. 12Ɔ̃ Se ò a maeɛ: Baa, asea pɔ máɔ vĩ tubi guu kpaa. Ɔ̃ maepi a aizɛɛ kpaalɛ̀nɛ́. 13I kɛ gɔɔplao, ɔ̃ Se a pɔɔ nàaa pii, à tà busu pãleu zã̀zã. We à a aizɛɛ dɛ̀u lalasikɛa guu. 14Kɛ́ aà ɔ̃a midɛ̀wà pii, ɔ̃ nɔan zɔ̃ɔ kà busupiu, ɔ̃ à gɔ̃̀ ń wɛ̃nao. 15À gɛ̀ nà busupi gbɛ̃ezi, ɔ̃ gbɛ̃́pi aà gbàɛ a bualoũ blɛ kpai sawakusanaɔwa. 16Ɔ̃ ìɔ ye libɛ pɔ sawaɔ lɛ́ ble mɔmɔ bɛ̃̀ɛ, ãma wìli pɔe kpawào.
17Kɛ́ aà wɛ́ kɛ̃̀ à mɛ̀: Ma mae zĩkɛnaɔ blɛ vĩ diɛ, ɔ̃ malɛ ga ń nɔanao la. 18Má fɛlɛ mà ta ma mae kĩiɛ, mí oɛ̀: Baa, ma duunakɛ̀ Luaɛ ń mpio, 19mi ka màɔ dɛ n nɛ ũ lɔo. Ma dilɛ n zĩkɛnaɔ do ũ. 20Ɔ̃ à fɛ̀lɛ, àlɛ tá a mae kĩi. Kɛ́ a bɛ kãaa, aà mae aà è, ɔ̃ à kɛ̀ɛ̀ wɛ̃naũ. À baalɛ̀, à gɛ̀ kùsiwà, à lɛpɛ̀wà. 21Ɔ̃ nɛpi òɛ̀: Baa, ma duunakɛ̀ Luaɛ ń mpio, mi ka màɔ dɛ n nɛ ũ lɔo. 22Ɔ̃ maepi ò a zĩkɛnaɔnɛ: À kɛ kpakpa, à ulada maa pɔ dɛńla sɛ́, à mɔ à daɛ̀, í tãanadaɛ̀, í kyalekpaɛ̀. 23Í gaae mɛkpaa kũ à dɛ wà so pɔnakɛa guu, 24asa ma nɛpi gà à vùɛ. À sã̀sãɛ, ɔ̃ ma aà è. Ɔ̃ aa nà pɔnakɛawa.
25Woo kpɛ́ bua. Kɛ́ àlɛ su, à kãikũ̀ ń bɛo, ɔ̃ à kɔ̃ɔ'okɔ̃fĩ mà, wàlɛ ɔ̃wã. 26Ɔ̃ à zĩkɛnaɔ do sìsi à aà là bɔmɛ kɛ̀i. 27Ɔ̃ a wèwà à mɛ̀: N dãuna mɛ́ sù, ɔ̃ n mae gaae mɛkpaa dɛ̀, kɛ́ à aà è aafia yãi. 28Ɔ̃ Woo pɔ pà, à gì gɛ̃i ua. Kɛ́ aà mae bɔ̀ awakpaiɛ̀, 29ɔ̃ Woopi ò a maeɛ: E'e, à kà wɛ̃ ũma malɛ zĩkɛnɛ, mi fokɛma ziio, mɛ́ baa blesan giana ni kpaa mà pɔnakɛò ń ma gbɛ̃naɔo. 30Kɛ́ n nɛ pɔ à n aizɛɛ kàalɛ kaaluaɔnɛpi sù, ɔ̃ n gaae mɛkpaa dɛ̀ɛ̀. 31Ɔ̃ aà mae òɛ̀: Ma nɛ, ń kumanɔ gɔɔpiiɛ. Pɔ pɔ má vĩ pii, n pɔɛ. 32À kũ̀ wà blɛble ń pɔnaoɛ, asa n dãunapi gà à vùɛ. À sã̀sãɛ, ɔ̃ wà aà è.
നിലവിൽ തിരഞ്ഞെടുത്തിരിക്കുന്നു:
Luk 15: Boo2024
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Boko Bible © SIM International, 2024.