സങ്കീർത്തനങ്ങൾ 63

ദാവീദിന്റെ ഒരു സങ്കീർത്തനം; അവൻ യെഹൂദാമരുഭൂമിയിൽ ഇരിക്കുംകാലത്തു ചമച്ചത്.

1ദൈവമേ, നീ എന്റെ ദൈവം; അതികാലത്തേ ഞാൻ നിന്നെ അന്വേഷിക്കും;

വെള്ളമില്ലാതെ ഉണങ്ങി വരണ്ട ദേശത്ത്

എന്റെ ഉള്ളം നിനക്കായി ദാഹിക്കുന്നു;

എന്റെ ദേഹം നിനക്കായി കാംക്ഷിക്കുന്നു.

2അങ്ങനെ നിന്റെ ബലവും മഹത്ത്വവും കാണേണ്ടതിനു

ഞാൻ വിശുദ്ധമന്ദിരത്തിൽ നിന്നെ നോക്കിയിരിക്കുന്നു.

3നിന്റെ ദയ ജീവനെക്കാൾ നല്ലതാകുന്നു;

എന്റെ അധരങ്ങൾ നിന്നെ സ്തുതിക്കും.

4എന്റെ ജീവകാലമൊക്കെയും ഞാൻ

അങ്ങനെ നിന്നെ വാഴ്ത്തും;

നിന്റെ നാമത്തിൽ ഞാൻ എന്റെ കൈകളെ മലർത്തും.

5എന്റെ കിടക്കയിൽ നിന്നെ ഓർക്കയും

ഞാൻ രാത്രിയാമങ്ങളിൽ നിന്നെ ധ്യാനിക്കയും ചെയ്യുമ്പോൾ

6എന്റെ പ്രാണനു മജ്ജയും മേദസ്സുംകൊണ്ട്

എന്നപോലെ തൃപ്തി വരുന്നു;

എന്റെ വായ് സന്തോഷമുള്ള അധരങ്ങളാൽ നിന്നെ സ്തുതിക്കുന്നു.

7നീ എനിക്കു സഹായമായിത്തീർന്നുവല്ലോ;

നിന്റെ ചിറകിൻനിഴലിൽ ഞാൻ ഘോഷിച്ചാനന്ദിക്കുന്നു.

8എന്റെ ഉള്ളം നിന്നോടു പറ്റിയിരിക്കുന്നു;

നിന്റെ വലംകൈ എന്നെ താങ്ങുന്നു.

9എന്നാൽ അവർ സ്വന്തനാശത്തിനായി എനിക്കു പ്രാണഹാനി വരുത്തുവാൻ നോക്കുന്നു;

അവർ ഭൂമിയുടെ അധോഭാഗങ്ങളിലേക്ക് ഇറങ്ങിപ്പോകും.

10അവരെ വാളിന്റെ ശക്തിക്ക് ഏല്പിക്കും;

കുറുനരികൾക്ക് അവർ ഇരയായിത്തീരും.

11എന്നാൽ രാജാവ് ദൈവത്തിൽ സന്തോഷിക്കും

അവന്റെ നാമത്തിൽ സത്യം ചെയ്യുന്നവനെല്ലാം പുകഴും;

എങ്കിലും ഭോഷ്കു പറയുന്നവരുടെ വായ് അടഞ്ഞുപോകും.

നിലവിൽ തിരഞ്ഞെടുത്തിരിക്കുന്നു:

സങ്കീർത്തനങ്ങൾ 63: MALOVBSI

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

Malayalam OV Bible - സത്യവേദപുസ്തകം

സത്യവേദപുസ്തകം OV Bible (BSI) നെക്കുറിച്ച് കൂടുതലറിയുക