സങ്കീർത്തനങ്ങൾ 64

സംഗീതപ്രമാണിക്ക്; ദാവീദിന്റെ ഒരു സങ്കീർത്തനം.

1ദൈവമേ, എന്റെ സങ്കടത്തിൽ ഞാൻ കഴിക്കുന്ന അപേക്ഷ കേൾക്കേണമേ;

ശത്രുഭയത്തിൽനിന്ന് എന്റെ ജീവനെ പാലിക്കേണമേ.

2ദുഷ്കർമികളുടെ ഗൂഢാലോചനയിലും

നീതികേടു പ്രവർത്തിക്കുന്നവരുടെ കലഹത്തിലും ഞാൻ അകപ്പെടാതവണ്ണം എന്നെ മറച്ചുകൊള്ളേണമേ.

3അവർ തങ്ങളുടെ നാവിനെ വാൾപോലെ മൂർച്ചയാക്കുന്നു;

നിഷ്കളങ്കനെ ഒളിച്ചിരുന്ന് എയ്യേണ്ടതിന്

4അവർ കയ്പുള്ള വാക്കായ അസ്ത്രം തൊടുക്കയും

ശങ്കിക്കാതെ പെട്ടെന്ന് അവനെ എയ്തുകളകയും ചെയ്യുന്നു.

5ദുഷ്കാര്യത്തിൽ അവർ തങ്ങളെത്തന്നെ ഉറപ്പിക്കുന്നു;

ഒളിച്ചു കെണിവയ്ക്കുവാൻ തമ്മിൽ പറഞ്ഞൊക്കുന്നു;

നമ്മെ ആർ കാണും എന്ന് അവർ പറയുന്നു.

6അവർ ദ്രോഹസൂത്രങ്ങളെ കണ്ടുപിടിക്കുന്നു;

നമുക്ക് ഒരു സൂക്ഷ്മസൂത്രം സാധിച്ചുപോയി എന്നു പറയുന്നു;

ഓരോരുത്തന്റെ അന്തരംഗവും ഹൃദയവും അഗാധം തന്നെ.

7എന്നാൽ ദൈവം അവരെ എയ്യും;

അമ്പുകൊണ്ട് അവർ പെട്ടെന്നു മുറിവേല്ക്കും.

8അങ്ങനെ സ്വന്തനാവ് അവർക്കു വിരോധമായിരിക്കയാൽ

അവർ ഇടറിവീഴുവാൻ ഇടയാകും;

അവരെ കാണുന്നവരൊക്കെയും തല കുലുക്കുന്നു.

9അങ്ങനെ സകല മനുഷ്യരും ഭയപ്പെട്ട്

ദൈവത്തിന്റെ പ്രവൃത്തിയെ പ്രസ്താവിക്കും;

അവന്റെ പ്രവൃത്തിയെ അവർ ചിന്തിക്കും.

10നീതിമാൻ യഹോവയിൽ ആനന്ദിച്ച് അവനെ ശരണമാക്കും;

ഹൃദയപരമാർഥികൾ എല്ലാവരും പുകഴും.

നിലവിൽ തിരഞ്ഞെടുത്തിരിക്കുന്നു:

സങ്കീർത്തനങ്ങൾ 64: MALOVBSI

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

Malayalam OV Bible - സത്യവേദപുസ്തകം

സത്യവേദപുസ്തകം OV Bible (BSI) നെക്കുറിച്ച് കൂടുതലറിയുക