लूकस 24
24
येसुसी उज्जा चो'अना
(मत्ता 28:1-10; मर 16:1-8; यॊ 20:1-10)
1हप्ता ही पहिल उल्ला ऊख़ूर ऊख़ूर नू अबड़ा मुक्कर ताम सराजमा नंजका गमगमरना आलॊ गुट्ठिन ओन्द्रर ती मसड़ा गुसन केरर। 2ख़ने आर मसड़न उर्दका पखनन मसड़ा ती ताड़रका ईरियर। 3लिकिन भितरी केरर होले उर्बा येसुसी मॆदन मल ख़क्खियर। 4आर ई कत्था ही पत्त नू अकबकरर ख़ने, दुई झन आलर बिल्चना किचरी अत्तका आर ही हेद्दे इज्जर। 5आर इल्चियर ती ख़ॆख़ेल तरा तुर'उ नंजर चिच्चर। तहाँ आ आलर आरिन बाचर, “नीम उज्जुसिन केचका नू एन्देरगे बेद्ददर? 6आस इसन मलकस, आस गा उज्जा चॊचस। सुरता नना का आस गलिलेया नू र'ओ बारी निमन एन्देर बाचका रहचस? 7का मनवा ख़द्दस गे पपहा आलर ही ख़ेक्खा नू धरतारना ती क्रुस नू पिटरना र'ई, अरा तिसर उल्ला नू उज्जा चो'अना र'ई।”#मत्ता 16:21; 17:22,23; 20:18,19; मर 8:31; 9:31; 10:33,34; लूक 9:22; 18:31-33 8ख़ने येसुसी कत्था आर गे सुरता बरचा।
9ख़ने आर मसड़ा ती किर्रियर ती ग्यारा चेलारिन अरा नन्नारिन हूँ इबड़ा उर्मी कत्थन तिंगियर। 10आर ईर हिकनर का मरियम मगदलेनी अरा यॊअन्ना अरा याकॊबसी तंगियो मरियम अरा नन्ना मुक्कर हूँ आर ही गने रहचर। आरिम इबड़ा मंजका ओर्मा कत्थन तइरकारिन तिंगियर। 11लिकिन आर ही कत्था चेलर गे कमचका ख़ीरी लेक्खा लग्गिया। अरा आर आरहीन मल पत्ताचर। 12ख़ने पतरस चॊचस दरा बुंगनुम मसड़ा केरस अरा ख़ोलख़रस ती ईरियस। ख़ने असन मुसगका कफन किचरिन लेका ईरियस। अरा एन्ने मंजकी र'ई अदिन ईरियस ती अकबक मन्नुम किर्रियस।
इमाउस पद्दा ही डहरे नू चेलर गने येसुस
(मर 16:12,13)
13अउलम आर ही ती दुई झन एम्माउस नामे ओन्टा पद्दा काला लगियर। आद येरुसलॆम ती सात कोंस केम गेच्छा रहचा। 14अरा आर इबड़ा मंजका उर्मी कत्था ही पत्त नू ताम तामिम कछनख्रनुम काला लगियर। 15आर कछनख्रतेम रहचर। आ बारिम येसुस तानिम बर'अरकी आर गने केरस। 16लिकिन आर आसिन चिन्ह'आ पोल्लर का आस नॆ हिकदस। 17आस आरिन मेंजस, “नीम एन्देर कत्थन ईकनुम ईकनुम नीम नीम नू कछनख्रदर।” आर हेन्दवारर ती इज्जर केरर। 18ख़ने आर ती किलेयोपास नामे ओर्तोस आसिन आनाकिर्ताचस, “एन्देर नीन येरुसलॆम नू नीन लेका एन्ने आलय हिकदय का इन्नेला नू अइय्या एन्देर एन्देर मंजकी र'ई अदन बलदय?” 19अरा आस आरिन मेंजस, “एन्देर कत्था?” आर बाचर, “नासरेत ता येसुसी पत्त नू। आस धर्मेसी अरा ओर्मा आलर ही मुन्दहारे नलख नू अरा ब'अना नू कोड़हे सवंगिय धर्मेसी कत्था तिंगुस रहचस। 20नम्है मुध नैगर अरा मुद्धर आसिन पिटना दंडे चि'आ गे सोंपचर। तहाँ आर आसिन क्रुस नू ठोकचर। 21लिकिन एमा असरा रहचा का आस इस्राऎल आलारिन नाड़ोस। इबड़ा कत्था ही मंजका इन्ना तीन उल्ला मंजा। 22अरा इन्ना एम्है मदहे ती जोक्क मुक्कर हूँ एमन अकबक नंजर चिच्चर। आर पैरिम मसड़ा गुसन केरकाचर। 23अरा आर आसी मॆदन मल ख़क्खियर। तहाँ आर किर्रियर ती एन्ने बाचर का आर असन मेर्ख़ा पैकारिन ईरियर। अरा आर बाचर का येसुस उज्जालदस। 24तहाँ एम्है संगेर ती जोक्कोर मसड़ा गुसन केरकाचर। अरा आर हूँ एकासे मुक्कर बाचकाचर अन्नेम ख़क्खियर, लिकिन येसुसिन मल ईरियर।”
25ख़ने येसुस आरिन बाचस, “अना लूर मलका आलारो, अरा धर्मेसी कत्था तिंगुर ही उर्मी बाचकन पत्त'अना नू भकुवा आलारो! 26एन्देर ईद चाड़ मल रहचा का मसीस गे एन्ने इबड़ा खिलपतन चॊद'अरकी तंग्है महबा नू कोर'ओस?” 27ख़ने आस मूसस अरा ओर्मा धर्मेसी कत्था तिंगुर तंग्है पत्त नू लिखचका ओर्मा कत्थन आर गे बुझाबाचस।
28इवंदा नू आर एसन काला लगियर आ पद्दा अंड़सियर। अरा येसुस अउर मुन्द काना बेसे ऎदस। 29लिकिन आर आसिन गोहरारर, “एम्है गने र'आ, एन्देरगेका बीड़ी पुत्तया ने, अरा उल्ला केरा।” ख़ने आस आर गने र'आ केरस। 30एकाबारी आस आर गने मंडी ओना उक्कियस, ख़ने असमन होच्चस ती आसीस नंजस अरा अदिन किच्चियस ती आर गे चिच्चस। 31ख़ने आर ही ख़न्न तिसगरा अरा आर येसुसिन चिन्हचर। अरा आस आर गे मल ऎथ्रस। 32आर ताम तामिम ब'आ हेलरर, “एकाबारी आस नम्है गने डहरे नू कछनख्र'आ लगियस अरा नेम्हा पुथी ती बुझुरत'आ लगियस ख़ने नम्है जिया नू एन्देर धुकधुकी मल मंजा?”
33आर आ बारिम चॊचर ती येरुसलॆम किर्रियर अरा अबड़ा ग्यारो चेलर अरा आर ही संगेरिन ख़ॊंड़रका ख़क्खियर। 34अबड़र ब'आ लगियर, “येसुस मानिम उज्जा चॊचकादस, अरा सिमॊनस गे ऎथ्रस।” 35ख़ने आर इरबारिम डहरे नू एन्देर एन्देर मंजा अरा आर येसुसिन एकासे असमा किच्चो बारी चिन्हचर अदिन तिंगियर।
येसुस तंग्है चेलर गे ऎथ्रस
(मत्ता 28:16-20; मर 16:14-18; यॊ 20:19-23; तइ 1:6-8)
36आर इबड़ा कत्थन ब'अम लगियर, येसुस तानिम आर ही मझी नू इज्जस अरा बाचस, “धर्मेस निमन कोड़े उइय्दस नेकअन।” 37आर गा इल्चियर ती बयारर अरा सोच्चर का ऎम नादन ऎरा लगदम। 38लिकिन येसुस बाचस, “एन्देरगे एल्चदर? अरा एन्देरगे भरटालदर? 39एंग्है ख़ेक्खा अरा ख़ेड्डे गुट्ठिन ऎरा, ऎनिम हिकदन। एंगन ऎन्ड़र'आ अरा ऎरा, एन्देरगेका नाद ही ख़ॊचोल दरा अहड़ा मल मनी एकासे एंग्है नू ऎरदर।” 40एन्ने बाचस ती आस तंग्है ख़ेड्डे ख़ेक्खा गुट्ठिन ऎदस। 41आर रिझ मंजर होले हूँ आर मल पत्त'आ लगियर अरा अकबकरका रांगे रहचर। होले येसुस आरिन बाचस, “निम्है गुसन इन्द्रिइम मॊख़ना र'ई होले चि'आ” 42ख़ने आर आस गे ओन कूड़ी कुट्टका इंजो चिच्चर। 43अरा आस अदिन आर ही मुन्दहारे मोक्खस।
44तहाँ आस आरिन बाचस, “एका कत्थन ऎन निम्है गने र'अना बेड़ा निमन तिंकन, एन्देर एंग्है पत्त नू मूसासी पॆसका नू अरा धर्मेसी कत्था तिंगुर अरा अस्सना-पाड़ना डंडी पुथी नू लिख्रकी र'ई अबड़ा उर्मी कत्था मन्ना चाड़ र'ई।” 45ख़ने आस धर्मेसी पुथिन बुझ्र'आ गे आर ही जियन कुल्लियस। 46अरा आरिन बाचस, “नेम्हा पुथी नू लिख्रकी र'ई का मसीस दुक्खे चॊद'ओस अरा तिसर उल्ला केचका ती उज्जा चो'ओस। 47अरा येरुसलॆम ती ऒड़ मनरकी जम्मा राजी नू आसी नामे नू जियन किर्त'अना दरा पाप छमा गे तेंगा कुद्दना मनो। 48नीम इबड़ा कत्था ही गोवाह हिकदर, एकदन नीम एंग्है ती मेंजकर अरा ईरकर। 49अरा नेम्हा बॊलतन एकदन एम्बस गच्छरका र'अस अदिन ऎन निमा गे तइय्योन, अरा नीम नेम्हा बॊलतासी सवंग ख़क्खना गूटी येरुसलॆम नगरे नुम र'अके।”#तइ 1:4
येसुसी मेर्ख़ा काना
(मर 16:19,20; तइ 1:9-11)
50तहाँ आस आरिन बेतानिया नगरे गूटी होच्चस दरा तंग्है ख़ेक्खन चॊदस ती आर गे बरकत चिच्चस।#तइ 1:9-11 51आर गे बरकत चि'अनुम चि'अनुम आरिन ती छिन्डरस दरा मेर्ख़ा चॊदरस केरस। 52तहाँ आर आसिन ऒड़ लग्गियर दरा खुसमारनुम खुसमारनुम येरुसलॆम किर्रियर। 53अरा आर उर्मी उल्ला धर्मेसी ओहमा नना गे धर्मेसी मन्दिर काला लगियर।
നിലവിൽ തിരഞ്ഞെടുത്തിരിക്കുന്നു:
लूकस 24: KURUXBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.