സെഖ. 9
9
യിസ്രായേലിന്‍റെ ശത്രുക്കളുടെമേൽ ന്യായവിധി
1ഒരു പ്രവചനം:
യഹോവയുടെ അരുളപ്പാട് ഹദ്രാക്ക്ദേശത്തിനു വിരോധമായിരിക്കുന്നു;
ദമ്മേശെക്കിന്മേൽ അത് വന്നമരും;
യഹോവ, മനുഷ്യരിലും യിസ്രായേലിന്‍റെ സകല ഗോത്രങ്ങളിലും ദൃഷ്ടിവക്കുന്നു.
2ദമ്മേശെക്കിനോടു ചേർന്നുകിടക്കുന്ന ഹമാത്തിനും
ജ്ഞാനം ഏറിയ സോരിനും സീദോനും അങ്ങനെ തന്നെ.
3സോർ തനിക്കു ഒരു കോട്ട പണിത്,
പൊടിപോലെ വെള്ളിയും
വീഥികളിലെ ചെളിപോലെ തങ്കവും കൂട്ടിവച്ചു.
4എന്നാൽ കർത്താവ് അവളെ ഇറക്കും#9:4 ഇറക്കും പുറത്താക്കും എന്ന് മറ്റ് ഭാഷാന്തരത്തിൽ കാണാം. ,
അവളുടെ കൊത്തളം#9:4 കൊത്തളം മറ്റ് ഭാഷാന്തരത്തിൽ ധനം എന്നും കാണാം. കടലിൽ ഇട്ടുകളയും;
അവൾ തീക്ക് ഇരയായ്തീരുകയും ചെയ്യും.
5അസ്കലോൻ അത് കണ്ടു ഭയപ്പെടും;
ഗസ്സയും എക്രോനും കണ്ടു ഏറ്റവും വിറയ്ക്കും;
അവളുടെ പ്രത്യാശക്കു ഭംഗം വരുമല്ലോ;
ഗസ്സയിൽനിന്ന് രാജാവ് നശിച്ചുപോകും;
അസ്കലോനു നിവാസികൾ ഇല്ലാതെയാകും.
6അസ്തോദിൽ ജാരസന്തതികൾ പാർക്കും;
ഫെലിസ്ത്യരുടെ അഹങ്കാരം ഞാൻ ഛേദിച്ചുകളയും.
7ഞാൻ അവന്‍റെ രക്തം അവന്‍റെ വായിൽനിന്നും
അവന്‍റെ വെറുപ്പുകൾ അവന്‍റെ പല്ലിനിടയിൽനിന്നും നീക്കിക്കളയും;
എന്നാൽ അവനും നമ്മുടെ ദൈവത്തിന് ഒരു ശേഷിപ്പായിത്തീരും;
അവൻ യെഹൂദയിൽ ഒരു മേധാവിയെപ്പോലെയും
എക്രോൻ ഒരു യെബൂസ്യനെപ്പോലെയും ആകും.
8ആരും വരുകയും പോകുകയും ചെയ്യാതിരിക്കേണ്ടതിനു
ഞാൻ ഒരു പട്ടാളമായി എന്‍റെ ആലയത്തിന് ചുറ്റും പാളയമിറങ്ങും;
ഇനി ഒരു പീഡകനും അവരുടെ ഇടയിൽകൂടി കടക്കുകയില്ല;
ഇപ്പോൾ ഞാൻ സ്വന്തകണ്ണുകൊണ്ടു കണ്ടുവല്ലോ.
സീയോൻ രാജാവ് വരുന്നു
9സീയോൻപുത്രിയേ, ഉച്ചത്തിൽ ഘോഷിച്ചാനന്ദിക്കുക;
യെരൂശലേം പുത്രിയേ, ആർപ്പിടുക!
ഇതാ, നിന്‍റെ രാജാവ് നിന്‍റെ അടുക്കൽ വരുന്നു;
അവൻ നീതിമാനും ജയശാലിയും
താഴ്മയുള്ളവനും ആയി കഴുതപ്പുറത്തും
പെൺകഴുതയുടെ കുട്ടിയായ ചെറുകഴുതപ്പുറത്തും കയറിവരുന്നു. 10ഞാൻ എഫ്രയീമിൽനിന്നു രഥത്തെയും
യെരൂശലേമിൽ നിന്നു കുതിരയെയും ഛേദിച്ചുകളയും;
പടവില്ലും#9:10 പടവില്ലും യുദ്ധത്തിനു ഉപയോഗിക്കുന്ന വില്ല്. ഒടിഞ്ഞുപോകും;
അവൻ ജനതകളോടു സമാധാനം കല്പിക്കും;
അവന്‍റെ ആധിപത്യം സമുദ്രംമുതൽ സമുദ്രംവരെയും
നദിമുതൽ ഭൂമിയുടെ അറ്റങ്ങളോളവും ആയിരിക്കും.
11നീയോ - നിന്‍റെ നിയമരക്തം ഹേതുവായി
ഞാൻ നിന്‍റെ ബദ്ധന്മാരെ#9:11 ബദ്ധന്മാരെ ബന്ദികളെ, തടവുകാരെ എന്നും ആകാം. വെള്ളമില്ലാത്ത കുഴിയിൽനിന്നു വിട്ടയക്കും.
12പ്രത്യാശയുള്ള ബദ്ധന്മാരേ, കോട്ടയിലേക്ക് മടങ്ങിവരുവിൻ;
ഞാൻ നിനക്ക് ഇരട്ടിയായി പകരം നല്കും എന്നു ഞാൻ ഇന്നുതന്നെ പ്രസ്താവിക്കുന്നു.
13ഞാൻ എനിക്ക് യെഹൂദയെ വില്ലായി കുലച്ചും
എഫ്രയീമിനെ നിറെച്ചുമിരിക്കുന്നു;
സീയോനേ, ഞാൻ നിന്‍റെ പുത്രന്മാരെ യവനദേശമേ,
നിന്‍റെ പുത്രന്മാരുടെ നേരെ ഉണർത്തി
നിന്നെ ഒരു വീരന്‍റെ വാൾപോലെയാക്കും.
14യഹോവ അവർക്ക് മീതെ പ്രത്യക്ഷനാകും;
അവന്‍റെ അസ്ത്രം മിന്നൽപോലെ പുറപ്പെടും;
യഹോവയായ കർത്താവ് കാഹളം ഊതി
തെക്കൻ ചുഴലിക്കാറ്റുകളിൽ വരും.
15സൈന്യങ്ങളുടെ യഹോവ അവരെ പരിചകൊണ്ട് മറയ്ക്കും;
അവർ മാംസം തിന്നു കവിണക്കല്ലു ചവിട്ടിക്കളയുകയും
രക്തം കുടിച്ചു വീഞ്ഞുകൊണ്ടെന്നപോലെ ഘോഷിക്കുകയും
യാഗകലശങ്ങൾപോലെയും യാഗപീഠത്തിന്‍റെ കോണുകൾപോലെയും നിറഞ്ഞിരിക്കുകയും ചെയ്യും.
16ആ നാളിൽ അവരുടെ ദൈവമായ യഹോവ അവരെ തന്‍റെ ജനമായ ആട്ടിൻകൂട്ടത്തെപ്പോലെ രക്ഷിക്കും;
അവർ അവന്‍റെ ദേശത്ത് ഒരു കിരീടത്തിന്‍റെ രത്നംപോലെ പൊങ്ങി ശോഭിക്കും.
17അതിന്‍റെ ശ്രേഷ്ഠതയും സൗന്ദര്യവും എത്ര വലുതായിരിക്കും!
ധാന്യം യുവാക്കളെയും വീഞ്ഞ് യുവതികളെയും പുഷ്ടീകരിക്കുന്നു.
നിലവിൽ തിരഞ്ഞെടുത്തിരിക്കുന്നു:
സെഖ. 9: IRVMAL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
MAL-IRV
Creative Commons License
Indian Revised Version (IRV) - Malayalam (ഇന്ത്യന്‍ റിവൈസ്ഡ് വേര്‍ഷന്‍ - മലയാളം), 2019 by Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.