Mataayi 3
3
ɄYohani ʉMwofughi ipʉlɨsia kʉ lɨhaka
(Malɨka 1:1-8; Lʉʉka 3:1-18; Yohani 1:19-28)
1Amaaka minga ghakakila. Pambele akahʉmɨla ʉmuunhu jʉmonga jʉno akatambʉlwagha Yohani Mwofughi. Ʉmuunhu ʉjuo alyale kʉ lɨhaka kʉ Yudea ipʉlɨsia, iiti, 2“Mʉlataghe inyɨvi siinu, ʉlwakʉva ʉVʉtwa vwa kʉkyanya vʉlɨ piipi.” 3ɄYohani ʉjuo ghwe jʉno ʉmʼbɨli ʉYesaya alyajovile kuuti,
“Ɨlɨsio lya muunhu lipʉlɨkɨka kuhʉma kʉ lɨhaka liiti,
‘Mʉnnosekesyaghe ʉMʉtwa ʉNgʉlʉve ɨsɨla,
na kulɨngʼhania muno kyaikilila.’ ”#Yesaya 40:3
4ɄYohani akafwalagha ʉmwenda ghʉno ghwatendilue nʉ lwaghe lwa ngamɨla,#3:4 Ngamɨla: Ɨkɨ kɨkanu kɨvaha, kɨno kidɨmua vwɨmɨla ɨmbombo ɨja kʉpɨnda avaanhu na masigho. akipinyagha nʉ lʉkova ʉlwa ngʼhwembe mʉ nsana. Kʉ lɨhaka ʉkuo, akalisagha imhaasi nʉ vwʉki. 5Avaanhu kuhʉma mʉ lɨkaaja ɨlya Yelusalemu na mʉ kɨghavo kyoni ɨkya Yudea ni mbale sooni isa kɨkogha ɨkya Yolidani, vakava vilʉta kwa mwene 6na kulaata inyɨvi saave. Neke ʉYohani akavofughagha mʉ kɨkogha ɨkya Yolidani.
7ɄYohani ye avwene aVafalisayi na Vasadukayi#3:7 AVafalisayi na Vasadukayi: Ɨmba ɨlɨsio Vafalisayi nɨ lɨsio Vasadukayi kʉ Vʉghanʉle vwa Masio aMahesia. vilʉta kwa mwene kuuti vofughue, akavavʉʉla akati, “Ʉmue mwe kɨsina kya njoka! Ghwe veeni jʉno avapaviile kuuti mʉkɨmbɨle ɨngʼhalaasi ja Ngʉlʉve jɨno jikwisa? 8Lɨno, amaghendele ghahʉfyaghe ʉlʉlaato lwinu. 9Mʉlekaghe kusaagha kuuti, ‘Tʉkulwike, ʉlwakʉva ʉsue tʉlɨ kɨsina kya Abulahamu!’#3:9 Tʉkulwike, ʉlwakʉva ʉsue tʉlɨ kɨsina kya Abulahamu: AVayahudi vakatisagha aveene navilihɨghua nʉ Ngʉlʉve ʉlwakʉva vaholilue mʉ kɨsina ɨkya Abulahamu. Ɨmba ɨlɨsio Abulahamu kʉ Vʉghanʉle vwa Masio aMahesia. Kyangʼhaani nɨkʉvavʉʉla, ʉNgʉlʉve anoghiile kuhambʉsia amavue agha kuuva vaana va Abulahamu! 10ɄNgʉlʉve angiike ɨnhemo, kuuti ʉmpiki ghʉno naghukoma ifipeke ifinofu, aghʉdumule na kunyaanya pa mwoto.
11“Ʉne nɨkʉvofugha na malenga, kuvonia kuuti mʉlatile inyɨvi siinu. Neke jʉno ikwisa mʉmbele mʉlyʉne alɨ ni ngʉfu kukila ʉne. Nanɨnoghiile nambe kuuva mʼbanda ghwa kʉkola ifilatu fyake. Ʉmwene ɨkʉvofughagha nʉ Mhepo ʉMwɨmɨke nʉ mwoto. 12Ʉmwene ilibaghʉlania avɨmɨke na vahosi, ndavʉle ʉmuunhu pano ikwelʉsia ɨngano pa lʉvʉgha, ikongʼhania ɨngano na kuvɨɨka mʉ kɨhenge, neke ɨlyelelo inyaanya nʉ mwoto ghʉno naghusima.”
ɄYesu ikwofughua
(Malɨka 1:9-11; Lʉʉka 3:21-22)
13Ʉnsiki ʉghuo, ʉYesu kuhʉma kʉ Galilaya, akafika kʉ kɨkogha ɨkya Yolidani kuuti ofughue nʉ Yohani. 14Neke ʉYohani akakaana akati, “Ʉne nilondua kukwofughua nuuve, lwandaani ghukwisa kʉlyʉne?” 15ɄYesu akamwamʉla akati, “Ʉve ɨtɨka kuvomba ʉluo lɨno, ʉlwakʉva lʉnoghiile kukwɨlanɨsia sooni sino ʉNgʉlʉve ilonda.” Pe ʉYohani akɨtɨka, akamwofugha.
16ɄYesu ye ofughue, ʉnsiki ghʉghuo akahʉma mʉ malenga. Ʉvʉlanga vʉkadinduka, akamwagha ʉMhepo ghwa Ngʉlʉve ikwika hwene ngʼhʉnda, jikwisa pakyanya pa mwene! 17Pe ɨlɨsio kuhʉma kʉkyanya lɨkati, “Ʉjʉ ghwe Mwanango ʉmʉghanɨke, nɨnkeliile.”
നിലവിൽ തിരഞ്ഞെടുത്തിരിക്കുന്നു:
Mataayi 3: wbi
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© (Active), Wycliffe Bible Translators, Inc. All rights reserved.