VPHAUNGC VYAUNGC 1
1
Tvdungc Sungc Mvnphvnc
1Vphaungc vyaungc nuex Tishox rueq raungphaungc ghaqwaungc tvdung sung tueq nuex, 2ghaq kuex vshvmx vrvmx ngoz tueq vguez. Wanc lix wanc lawx dvyx rvtueq, svmuktvrax yuix htauk nuex vnyauk rueq puingc vtueq, yuix htauk nuex Tishox Siyac#1:2 Tishox Siyac; rvmuq ngoz ruiux Tishox Luimc Vkawc; rvmuq ngoz ruiux Tishox kox wawc raungguil. kuex kvmoay shay yaq. 3Tishox rueq, “Vwuic yaungx kuiuz,” ngoz tueq nvr koq tueq, vwuic kuex dung kaz tueq.#2Kor 4:6 4Tishox rueq vwuic lez kuex khiz vtueq thuinhvlx tueq. Kvruex yimaq vpiq rueq vwuic nuiyc vnyauk kuex tv-phvlc vtueq, 5vwuic kuex vnuiyq ngoz ruiux, vnyauk kuex vwvrx ngoz tueq muingc tueq. Raungyac kuex lvy wvnc vtueq raungnvp shex httuiuc tueq, kvruex kuex vphaungc raungnuiyq rvtueq.
6-7Kvruex yimaq Tishox rueq, “Yuix kuex pvl nueyc muex tv-phvlc httaz tvkoc khvrwuirx wuingc yaungx kuiuz,” ngoz tueq nvr tueq rulc rv-ngvlc yaungx kaz tueq. Kvkhoc rvtueq Tishox rueq khvrwuirx wuingc kuex tvhungx ruiux khvrwuirx wuingc khung wawc yuix nuiyc khvrwuirx wuingc htauk wawc yuix kuex tv-phvlc taq tueq.#2Pet 3:5 8Vpiq rueq khvrwuirx wuingc kv-ngoc “Raungx” ngoz tueq muingc tueq. Raungyac kuex lvy wvnc vtueq raungnvp shex httuiuc tueq, kvruex kuex raungnuiyq nueyc rvtueq.
9Kvruex yimaq Tishox rueq, “Raungx khung nuex taung httaz tvkoc yuix kuex baungshiz nuex dvyx rvtuimx rax,” ngoz tueq nvr tueq rulc rv-ngvlc taung dung kaz tueq. 10Taung kvruex ngoc, “Ghaq” ngoz tueq, rvtuimx yaq yuix kvruex ngoc, “Svmuktvrax” ngoz tueq muingc tueq. Tishox rueq kvruex khiz vtueq thuinhvlx tueq. 11Kvruex yimaq vpiq rueq, “Pulx thuey waqthuimx nuiyc pulx thuey jungx phvnx ruip saz kuex ghaq maq kemz kuiuz,” ngoz tueq nvr tueq rulc rv-ngvlc kemz kaz tueq. 12Kvkhoc rvtueq ghaq wawc vjungx phvnx ruip kemz wvnc tueq, Tishox rueq kvruex khiz vtueq thuinhvlx tueq. 13Raungyac kuex lvy wvnc vtueq raungnvp shex httuiuc tueq, kvruex kuex raungnuiyq thuimx rvtueq.
14Kvruex yimaq Tishox rueq, “Vnuiyq nuiyc vwvrx kuex tv-phvlc tvkoc nuiyc vnuiyq, vwawc, kuiuq vmoalx#1:14 Kuiuq vmoalx; rvmuq ngoz ruiux raungx vghaq shvmx. raungnuiyq htenc kuex htvp htaz tvkoc raungx nuex vwuic htenc mdung wvnc kueq, 15kvruex kuex ghaq htauk nuex wuic kuy tvkoc raungx maq vwuic lez dung vtueq ghaq htauk nuex vwuic mlvp shueq,” ngoz tueq nvr tueq rulc rv-ngvlc yaungx wvnc tueq. 16Kvkhoc rvtueq Tishox rueq vnuiyq shvmx yunghvlc vnueyc kuex tvdung sung vtueq shalx rueq vnuiyq kuex guimz ruiux, yapix rueq vwvrx kuex guimz tueq, vpiq rueq ruiysuiyq htenc muinz tvhungx taq tueq. 17Vpiq rueq ghaq htauk nuex vwuic lvp tvkoc muinz, 18vnuiyq nuiyc vwvrx kuex guimz vtueq raungwuic nuiyc raungnyauk kuex tv-phvlc tvkoc muinz taq shec tueq. Tishox rueq kvruex khiz vtueq thuinhvlx tueq. 19Raungyac kuex lvy wvnc vtueq raungnvp shex httuiuc tueq, kvruex kuex raungnuiyq bvlic shex rvtueq.
20Kvruex yimaq Tishox rueq, “Yuix mungx nuex yungsuiuz yawxsaz phvnx ruip m-yaungx wvnc kueq, wushawx htenc kuex raungguil httax yaq raungx htauk kvyuq mbaz kueq,” ngoz tueq nvr tueq. 21Kvkhoc rvtueq Tishox rueq yunghvlc svmuktvrax yuix nuex ngaq yungx maq phaungc vtueq yuix wawc yungsuiuz yawxsaz phvnx ruip saz nuiyc wushawx phvnx ruip saz htenc kuex tvdung sung tueq. Tishox rueq kvruex khiz vtueq thuinhvlx tueq. 22Kvruex ngvmx saz htenc muex ruimruimx kuq vtueq, “Yuix nuex httax yaq yungsuiuz yawxsaz phvnx ruip kuex svmuktvrax nuex paunghvlc mpux paung wvnc kueq, wushawx htenc muinz mpux paung wvnc kueq,” ngoz tueq nvr tueq. 23Raungyac kuex lvy wvnc vtueq raungnvp shex httuiuc tueq, kvruex kuex raungnuiyq bv-ngac rvtueq.
24Kvruex yimaq Tishox rueq, “Ghaq htauk vyuq ngvmx saz vnaungc nuiyc ngvmx saz vtsvy, vyungx vruinx phvnx ruip saz m-yaungx wvnc kueq,” ngoz tueq nvr tueq rulc rv-ngvlc yaungx wvnc tueq. 25Tishox rueq ngvmx saz lotlaz kuex kvkhoc tvdung sung ruiux vpiq rueq kvruex khiz vtueq thuinhvlx tueq.
26Kvruex yimaq Tishox rueq, “Majuiuc naungshiq rueq naungshiq shvmrvmx rulc rv-ngvlc yaq miqsaz kuex tvdung sung wuez ix; tsuingshiq muex ngaq htenc, wushawx htenc nuiyc ngvmx saz vnaungc nuiyc vtsvy, vyungx nuiyc vruinx lotlaz guimz lawc juing tsuingshiq nuex luimc vkawc mhttax kueq,” ngoz tueq jungx tueq.#1Kor 11:7 27Kvkhoc rvtueq Tishox rueq miqmac shvmx vrvmx rulc rv-ngvlc yaq miq miqwaz, miq yalxjuik kuex tvdung sung vtueq,#Mat 19:4; Mak 10:6 #V.V 5:1-2 28tsuingshiq muex ruimruimx kuq ruiux jungx tueq kuex, “Suiuz vsaz paunghvlc pux paung wvnc kuinz, ghaq baung ruip saz nuex nuimshiq suiuz vsaz htenc httax ngaungc wvnc vtueq guimz wvnc shuinz. Ngaz rueq ngaq htenc nuiyc wushawx htenc, ngvmx saz vtsvy lotlaz kuex guimz wvnc shuinz,” ngoz tueq jungx tueq. 29Tishox rueq, “Tuiz vtsvmz phvnx ruip saz, pulx thuey waqthuimx phvnx ruip saz kuex nuimshiq rueq phuiuz svy tvkoc ngaz rueq kuq phaungx. 30Ngvmx saz vtsvy lotlaz nuiyc wushawx lotlaz rueq phuiuz svy tvkoc ngaz rueq httuingx jungx phvnx ruip saz kuq phaungx,” ngoz tueq jungx tueq rulc rv-ngvlc yaungx wvnc tueq. 31Tishox vpiq rueq tvdung sung tueq phvnx htenc kuex lawc vtueq, pinhtumc raungc raq tueq. Raungyac kuex lvy wvnc vtueq raungnvp shex httuiuc tueq, kvruex kuex raungnuiyq tvruk rvtueq.
നിലവിൽ തിരഞ്ഞെടുത്തിരിക്കുന്നു:
VPHAUNGC VYAUNGC 1: HNOT01
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Hawa Naga Bible © Bible Society of Myanmar, 2014.