KA BUKE MUA A MOSE, I KAPA ʻIA KINOHI 3
3
MOKUNA III.
1 No ka hoʻopunipuni ʻia ʻo ʻEva e ka nahesa. 6 Ka hāʻule ʻana o ke kanaka. 9 Hoʻokolokolo mai ke Akua. 14 Hoʻohewa ʻia ka nahesa. 15 No ka hua i ʻōlelo ʻia. 16 Ka hoʻopaʻi ʻana i kānaka. 21 Ko lāua ʻaʻahu mua. 22 Ua hoʻokuke ʻia ma waho o ʻEdena.
1¶ Ua ʻoi aku ka maʻalea o ka nahesa i ko nā holoholona o ke kula a pau a Iēhova ke Akua i hana ai. ʻĪ maila ia i ka wahine, “He ʻoiaʻiʻo anei, ua pāpā mai ke Akua, ‘ʻAʻole ʻolua e ʻai i ko nā lāʻau a pau o ka mahina ʻai nei’?”
2ʻĪ akula ka wahine i ka nahesa, “E pono nō māua ke ʻai i ka hua o nā lāʻau o ka mahina ʻai nei;
3akā, ʻo ka hua o ka lāʻau i waenakonu o ke kīhāpai, ua ʻī mai ke Akua, ‘Mai ʻai ʻolua ia mea, ʻaʻole hoʻi e hoʻopā aku, o make ʻolua.’”
4ʻŌlelo maila ka nahesa i ka wahine, “ʻAʻohe ʻoiaʻiʻo e make ʻolua.
5“No ka mea, ua ʻike nō ke Akua, a i ka lā e ʻai ai ʻolua ia mea, e hoʻokaʻakaʻa ʻia auaneʻi ko ʻolua mau maka; a e like ʻolua me ke Akua, i ka ʻike i ka pono a me ka hewa.”
6A ʻike aʻela ka wahine, he ʻono ko ia lāʻau i mea ʻai, a he maikaʻi hoʻi i nā maka, a he lāʻau makemake ʻia i mea hoʻonaʻauao, lālau akula ia i kona hua, ʻai ihola, a hāʻawi akula hoʻi na kāna kāne me ia, a ʻai ihola nō hoʻi ʻo ia.
7A hoʻokaʻakaʻa ʻia aʻela nā maka o lāua a ʻelua, a ʻike ihola lāua, ʻaʻohe o lāua kapa; kui ihola lāua i nā lau fiku a paʻa, i mau pāpalu no lāua.
8¶ Lohe aʻela lāua i ka leo o Iēhova ke Akua, e holoholo ana ma ka mahina ʻai i ka wā malu o ka lā; peʻe ihola ʻo ʻAdamu me kāna wahine ma waena o nā lāʻau o ua mahina ʻai lā, mai ke alo aku o Iēhova ke Akua.
9Hea maila ʻo Iēhova ke Akua iā ʻAdamu, ʻī maila iā ia, “ʻAuhea ʻoe?”
10ʻĪ akula ʻo ia, “I lohe au i kou leo i loko o ka mahina ʻai nei, a makaʻu nō wau; no ka mea, ʻaʻohe oʻu kapa, a peʻe ihola au.”
11ʻĪ maila kēlā, “Na wai i haʻi mai iā ʻoe, ʻaʻohe ou kapa? Ua ʻai anei ʻoe i ko ka lāʻau aʻu i pāpā aku ai iā ʻoe, mai ʻai ʻoe?”
12ʻŌlelo akula ke kanaka, “Na ka wahine āu i hāʻawi mai ai naʻu, nāna nō i hāʻawi mai i ko ka lāʻau, a ʻai ihola au.”
13ʻĪ maila ʻo Iēhova ke Akua i ka wahine, “He aha kēia mea āu i hana ai?” ʻĪ akula ka wahine, “Na ka nahesa wau i hoʻowalewale mai, a ʻai ihola au.”
14ʻĪ akula ʻo Iēhova ke Akua i ka nahesa,
“No kāu hana ʻana ia mea,
E ʻoi aku kou ʻāhewa ʻia i ko nā holoholona laka a pau,
A i ko nā holoholona hihiu a pau o ke kula;
I lalo kou alo e kolo ai ʻoe,
ʻO ka lepo kāu e ʻai ai
A pau nā lā o kou ola ʻana.
15“E waiho nō au i ka inaina
Ma waena o ʻolua a me ka wahine,
A ma waena hoʻi o kou hua a me kona hua;
Nāna e paopao iho kou poʻo,
A nāu hoʻi e pākuʻikuʻi aku kona kuʻekuʻe wāwae.”
16ʻĪ maila hoʻi ʻo ia i ka wahine,
“E hoʻonui loa aku au
I ka ʻeha o kou hāpai ʻana;
Me ka ʻeha hoʻi ʻoe e hānau mai ai i nā keiki;
A ʻo kou makemake aku aia nō ia i kāu kāne, a ʻo ia hoʻi kou haku.”
17ʻĪ maila hoʻi ʻo ia iā ʻAdamu, “No ka mea, ua hoʻolohe ʻoe i ka leo o kāu wahine, a ua ʻai hoʻi i ko ka lāʻau aʻu i pāpā aku ai iā ʻoe, i ka ʻī ʻana, ‘Mai ʻai ʻoe ia mea,’
Ua hoʻohewa ʻia ka ʻāina nou;
Me ka luhi ʻoe e ʻai ai i kāna
A pau nā lā o kou ola ʻana.
18“E hoʻokupu mai nō hoʻi ia i nā kākalaioa a me nā pua kala nāu;
A nāu nō e ʻai i nā mea kanu o ka waena.
19“Me ka hou o kou maka e ʻai ai ʻoe i ka ʻai
A hiki i kou wā e hoʻi hou aku ai i ka lepo;
No ka mea, mai laila ʻoe i lawe ʻia mai ai;
No ka mea, he lepo nō ʻoe,
A e hoʻi hou aku ʻoe i ka lepo.”
20Kapa akula ʻo ʻAdamu i ka inoa o kāna wahine, ʻo ʻEva; no ka mea, ka makuahine ia o nā kānaka a pau.
21A hana ihola ʻo Iēhova ke Akua i nā kapa ʻili no ʻAdamu a no kāna wahine, a hōʻaʻahu ihola iā lāua.
22¶ ʻĪ ihola ʻo Iēhova ke Akua, “Aia hoʻi, ua like ke kanaka me kekahi o kākou, ka ʻike i ka pono a me ka hewa; ʻānō hoʻi, o lālau aku kona lima, a lawe hoʻi i ko ka lāʻau ola, ʻai iho a ola mau loa aku.”
23No ia mea, kipaku akula ʻo Iēhova ke Akua iā ia i waho o ke kīhāpai ʻo ʻEdena, e mahi i ka lepo, kahi āna i lawe ʻia mai ai.
24Pēlā ʻo ia i kipaku ai i ke kanaka; a hoʻonoho ihola ma ka hikina o ka mahina ʻai ʻo ʻEdena i nā kerubima, a me ka pahi wakawaka e kā ana i ʻō i ʻaneʻi i maluhia ai ke ala ma ka lāʻau ola.
നിലവിൽ തിരഞ്ഞെടുത്തിരിക്കുന്നു:
KA BUKE MUA A MOSE, I KAPA ʻIA KINOHI 3: KBH
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Ka Baibala Hemolele © Partners Development Foundation, 2018.