Pewaliana 6
6
Kokodakena waliana manusiaꞌ
1I tempo tiꞌo, manusiaꞌ mepongkamo mawunene koworiꞌne i womboꞌ duniaꞌ hei iohi mampoꞌanaꞌkihi anaꞌ towoweꞌe, 2katoꞌo anaꞌ-anaꞌna Pueꞌ Ala ka suruga mampeꞌele anaꞌntowowalo tiꞌo hingkaꞌ manobaꞌ, katoꞌo roroa mewali hantambira himo to rolei io ropohantambi. 3Mohawaꞌmo Pueꞌ Ala, “InohaꞌKu hawaꞌi hingkiꞌ lebaꞌ nantolou-louna i lalina manusiaꞌ, alaꞌ manusiaꞌ tiꞌo tontona mahi, hei mepongka hinewoꞌena tinuwuꞌra hingkiꞌ hanatu merompuluꞌ ntoꞌalu.” 4I tempo tiꞌo, toaꞌ-toaꞌ to hingkaꞌ kodeꞌ hei maroho mpololeke uwaꞌ i duniaꞌ, iohi tiꞌo muleꞌna ka anaꞌ-anaꞌna Pueꞌ Ala hante anaꞌ ntowoweꞌena manusiaꞌ. Toaꞌ-toaꞌ tiꞌomohila to kodeꞌ liaꞌ maroho hei nipohibahaꞌhi i tempo hampiha. 5Ikonoꞌelenalu Pueꞌ waliane manusiaꞌ to kodake monono mpuꞌu i duniaꞌ, hinangkana pampekirira timulu mampowuaꞌkilu kokodakea, 6iomo horiana nohohoꞌmo laline Pueꞌ, alaꞌ Nowalimoꞌi manusiaꞌ i duniaꞌ, hei tiꞌo mampomasusa laliNa. 7Mohawaꞌmo Pueꞌ, “Hingkiꞌ Kuporopuꞌmo manusiaꞌ to Kupopewalimo tiꞌo i womboꞌ duniaꞌ, watoꞌo woꞌo lekiꞌna pinatuwuꞌ hante lekiꞌna tinti, alaꞌ konohohoꞌKu, ikoKuwalira.” 8Angkana uwaꞌ haduo to mampomotanaꞌ lalina Pueꞌ, iomo hi Nohoꞌ.
Lolitonana Hi Nohoꞌ
9Hieꞌemo lolitonane tuwuꞌna hi Nohoꞌ. Hi Nohoꞌ iomo haduo to mononto lalina, hei tungkuꞌ hante mohaꞌanu hante Pueꞌ Ala, ka lekiꞌna toaꞌ i tempo tiꞌo. 10Hi Nohoꞌ mampemuleꞌki tolu duo tomaꞌani, iomo hi Sem, hi Ham hante hi Apeꞌ. 11Angkana i tempo tiꞌo lekiꞌ-lekiꞌna toaꞌ ntaniꞌna kodake i pampeꞌelena Pueꞌ Ala, morintodiꞌi lalire hei hirorokoꞌahi. 12Pueꞌ Ala mampeꞌele kokodakena duniaꞌ, alaꞌ manusiaꞌ mowalia to kodake i duniaꞌ. 13Mohawaꞌmo Pueꞌ Ala pe hi Nohoꞌ Notiꞌi, “Kubutusimo hingkiꞌ Kuropuꞌi kotuwuꞌne hinangkana to tuwuꞌ, alaꞌ duniaꞌ buhaꞌmo kokodakea, mewaliꞌ hingkiꞌ Kuporopuꞌmohi moꞌawa-awa hante duniaꞌ. 14Mowalimoko haꞌanu duanga ka loti to maroho mpololeke. Duanga tiꞌo hangangaa iwali mokotaꞌ-kotaꞌ hei hangangaa ilopihi hante taru ka huwalina hante ka lalina. 15Koꞌiwalina duanga tiꞌo hangangaa waheꞌe, kokurauꞌna 133 meteꞌ, kokorobana 22 meteꞌ, hei kodingkaoꞌna 13 meteꞌ. 16Ipowaliki dopiꞌna, hei kohelaꞌ dopiꞌna ka porindina 44 senti, iwalimo duanga tiꞌo tolu huntu, hei ipowaliki haꞌanu wambaꞌ ka hirina. 17Alaꞌ Aku hingkiꞌ mampopehupaꞌA uwai to melobuꞌi to hingkiꞌ mamporopuꞌ hinangkana to tuwuꞌ hei to meꞌinohaꞌ i luaꞌna laniꞌ, hinangkana to tuwuꞌ i duniaꞌ hingkiꞌ mahi manasa. 18Angkana hingkiꞌ mampoꞌuwaꞌA podandi hante ingko, hei ingko hingkiꞌ mekahiko pe lali duanga tiꞌo, moꞌawa-awako hante anaꞌ-anaꞌmu hei hantambimu hante hantambina anaꞌ-anaꞌmuhi. 19Hei ka hinangkana pinatuwuꞌ, ikomi hampasa-hampasa pe lali duanga tiꞌo, hingkeꞌna terewahiꞌi tuwuꞌre moꞌawa-awa hante ingko. 20Ka hinangkana langkaꞌna tinti hante ka hinangkana langkaꞌna pinatuwuꞌ, ka hinangkana langkaꞌna to mendae i womboꞌ duniaꞌ, ka lekiꞌna tiꞌo hangangaa mehupaꞌ hampasa-hampasa pe ingko, hingkeꞌna terewahiꞌi tuwuꞌre. 21Hei ingko, ikomimo hinangkana to wadi niꞌoka, irampumohi lekiꞌna tiꞌo hingkiꞌ mewali pangkamu hante pangkara pinatuwuꞌ tiꞌohi.” 22Katoꞌo hi Nohoꞌ mampetuntui lekiꞌna tiꞌo, hitontoꞌ hante to nohowoiꞌkiꞌi Pueꞌ Ala pe io, watoꞌomola konowaline hi Nohoꞌ.
നിലവിൽ തിരഞ്ഞെടുത്തിരിക്കുന്നു:
Pewaliana 6: LAILJE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
2017 Indonesian Bible Society (Lembaga Alkitab Indonesia)