KADADDIYAN 14
14
Abram nolonge Lud
1Badha rato kaempa, iya areya Rato Amrafel dhari Babilonia, Rato Ariyokh dhari Elasar, Rato Kedorlaomer dhari Elam, ban Rato Tideyal dhari Goyim. 2To-rato jareya aperrang ban rato laenna se kalema bannya'na, iya areya: Rato Bera dhari Sodom, Rato Birsya dhari Gomora, Rato Syinab dhari Adma, Rato Syemeber dhari Zebo'im, ban rato nagara Bela se esebbut keya nagara Zowar. 3Rato se kalema jareya areng-bareng makompol tantarana e Cora Sidim, se sateya enyamae Tase' Mate. 4Ra-nagara jareya ekobasae Rato Kedorlaomer dhubellas taon abidda, tape e taon se kapeng tello bellas padha aberonta' kabbi. 5E taon se kapeng pa' bellas, Kedorlaomer ban tu-sakutuna dhateng ngeba tantarana, bangsa Refa'im epakala e Asyterot-Karna'im, bangsa Zuzim e Ham, bangsa Emin e Syawe-Kiryata'im, 6ban bangsa Hori e pagunongan Edom. Sa-bangsa jareya eserser terros sampe' napa' gan Elparan e penggirra sagara beddhi. 7Saellana jareya reng-oreng se nyerser gella' padha abali ka En-Mispat se sateya enyamae Kades, ban makala sakabbinna dhaerana bangsa Amalek, bariya keya bangsa Amori se neng e Hazezon-Tamar.
8Saellana jareya rato Sodom, rato Gomora, rato Adma, rato Zebo'im, ban rato Bela se esebbut keya Zowar ngator tantarana e Cora Sidim, 9laju aperrang ban Rato Kedorlaomer dhari Elam, Rato Tideyal dhari Goyim, Rato Amrafel dhari Babilonia, ban Rato Ariyokh dhari Elasar; daddi rato kalema ngadhebbi rato kaempa. 10Cora jareya bannya' somorra aspalla. E bakto rato dhari Sodom ban Gomora aehteyar buruwa dhari paperrangan jareya, pas labu ka mor-somor jareya. Laenna se gi' odhi' ahasel buru ka nong-gunong. 11Sabarang se badha e Sodom ban Gomora, tamaso' kakanan, egiba kabbi bi' moso dhari nagara se pa'-empa' gella'. Saellana jareya moso padha ondur. 12Sarrena Lud, ponakanna Abram rowa bengkona neng e Sodom, daddi Lud ban dhi'-andhi'na kabbi egiba moso keya.
13Tape badha oreng lalake' kasorang se ngenneng buru. Oreng jareya notorragi kadaddiyan gella' ka Abram, oreng Ibrani se kalenggiyanna e seddi'na ka'-bungka'an se karamat kennengnganna kabakteyanna Mamre, oreng Amori rowa. Mamre ban tan-taretanna, iya areya Eskol ban Aner, akanca ban Abram. 14E bakto Abram meyarsa ja' ponakanna etangkep moso, laju makompol reng-oreng e parkemahanna se padha penter aperrang, bannya'na tello ratos ballu bellas oreng. Rato se kaempa gella' laju eserser sampe' gan kottha Dan. 15E jadhiya reng-orengnga bi' Abram egi-bagi epadaddi pan-barampan bagiyan. E baja malem mosona eserrang ban epakala. Mosona jareya eserser sampe' ka Hoba e dhaja'anna Damsyik. 16Kabbi rang-barang rampasan ahasel erebbu' pole dhari mosona, bariya keya Lud ban sakabbinna dhi'-andhi'na, sarta babine'an ban reng-oreng tawanan laenna.
Melkisedek aberkadi Abram
17Saellana mennang aperrang bi' Rato Kedorlaomer ban to-rato sakutuna, Abram pas abali ka kalenggiyanna. Rato Sodom ngamba' e Cora Syawe se enyamae keya Cora Rato. 18#Ibr. 7:1-10 Melkisedek, rato Salem se arangkep daddi imamma Allah Se Mahatenggi, abakta roti ban anggur, laju eatorragi ka Abram. 19Melkisedek laju aberkadi Abram, pas adhabu, “Moga-moga Abram eberkadana bi' Allah Se Mahatenggi, se nyepta'agi langnge' ban bume! 20Molja'agi Allah Se Mahatenggi, se mamennang junandalem ka mosona.” Dhari sabarang se erampas pole dhari so-mosona rowa, saparpolonna bi' Abram eparengngagi ka Melkisedek.
21Rato Sodom mator ka Abram, “Ampon, pondhut sadajana barang rampasan paneka, namong ra'yat abdidalem manabi kengeng eso'ona balina.”
22Tape Abram adhabu, “Kaula asompa e ajunanna PANGERAN, Allah Se Mahatenggi, se abadhi langnge' sareng bume, 23kaula ta' ngala'a dhi'-andhi'na sampeyan, sanajjan namong bennang salambar otabana talena sapatu. Daddi e budhi are sampeyan ta' kera adhabu, ‘Abram rowa sogi polana sengko'.’ 24Kaula ta' ngala'a pa-ponapa kaangguy kaparlowan kaula dibi'. Kaula namong poron narema ponapa se ampon eangguy sareng reng-oreng kaula. Namong ca-kanca kaula, enggi paneka Aner, Eskol sareng Mamre, diggal me' olle mondhut bagiyanna bang-sebang.”
നിലവിൽ തിരഞ്ഞെടുത്തിരിക്കുന്നു:
KADADDIYAN 14: MAD
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക