Litanga 3
3
1Kunangwa inzoka ya li nobugeeri bwobugadi kuvita tsinyama tsyosi tsya Yahova Nyasaye ya li kulomba. Nayo ya volera mukali, Yee, Nyasaye a voye, Mu ta lia ku misala gyosi gyomulimi? 2Na mukali ya volera inzoka, Ku makuyu gemisala gyomulimi ku nyala kulia: 3navutswa ku makuyu gomusala gu veye hagati homulimi, Nyasaye a voye, Mu ta lia ku, kinga kudira ku, gase mu la kudza. 4Na inzoka ya volera mukali, Ligali si mu la kudza mba: 5kigira Nyasaye a manya ku lidiku lya mu lia ku, tsimoni tsyenyu tsi la kunulwa, na mu la va kuli Nyasaye, mu limanya ubulahi nobudamano. 6Na mukali lwa ya lola musala zana gu veye mulahi kulia, nagwo kandi gu yanzidza tsimoni, na kandi nomulahi kugerihidza, ya vugula ku makuyu gagwo, na a lia; kandi ya ha musatsa wewe halala naye, na a lia. 7Nonoho tsimoni tsyavo vombi tsya kunuka, navo va manya va veye kyahonyo; na va nava amatu gemisala gamakuyu, na velombera avene tsingubo. 8Na va hulira mwoyo gwa Yahova Nyasaye a gendanga mmulimi inyinga yembuudza yomgolova: na musatsa nomukali wewe vevisa mmoni mwa Yahova Nyasaye hagati ha misala gyomulimi.
9Na Yahova Nyasaye ya langa Adamu, na a mu volera, U veye haliha? 10Naye ya tivula, Nda hulira mwoyo gugwo mmulimi, ni ntia kigira nda li kyahonyo; ma nzivisi. 11Naye ya mu teva, Ni bwaha wa ku volera u veye kyahonyo? U mali kulia ku musala gwa nda ku laga u ta lia ku? 12Adamu ya vola, Mukali wa ive wa mpa kuva halala ninze, ya mpa agomusala ma nda lia. 13Ma Yahova Nyasaye ya teva mukali, Ni kindu ki kya u koli? Na mukali ya vola, Inzoka ya ngada ni ndia. 14Ma Yahova Nyasaye ya volera inzoka, Kigira u koli likuva yili, u laameywi kuvita mitugu gyosi, nokuvita tsinyama tsyosi tsyombulimu; u la molera inda yoyo, kandi u la lia ulugukyi madiku gosi gelimenya lilyo: 15kandi nda vika ubusigu hagati hoho nomukali, noku visukululwi vivyo nevisukulwi vivye: a la shonolanya mutwe gugwo, nive u la shonolanya liki lilye. 16Kandi ya volera mukali, Nda kiridza ligali ubusaliri bubwo na livereka lilyo; u livula avana nobusaliri; kandi likayirwa lilyo li la yeka ku musatsa wowo, naye a lameha ku ive. 17Kandi ya volera Adamu Kigira ive u huliye livola lyomukaii wowo, na u liye ku musala, gwa nda ku laga, ni mbola, U ta lia kugwo: marova ga laameywi kigira ive; u la lia vyokulia vivyo mu liyinzira lidinyu madiku gosi gelimenya lilyo lyosi; 18kandi ga la letera ive amafwa namatagalu, na u la lia amatu gomulimi; 19mu lugeri lwommoni mumwo u la lia vyokulia, kuduka ive u lirana mu marova; kigira wa twulidzwa mugo: kigira u veye ulugukyi, na u lirana mu lugukyi. 20Na Adamu ya langa lieta lyomukali wewe, Hawa; kigira a veye mama wa vosi va veye mwoyo. 21Na Yahova Nyasaye ya lombera Adamu nomukali wewe tsingubo tsya masero, na a va vika.
22Kandi Yahova Nyasaye ya vola, Henza, Adamu u gwiye kuli mulala ku kwinye, ku limanya ubulahi nobudamano; kalunu gase a la nyira mukono gwigwe, nokuvugula kandi ku musala gwelivamwoyo nokulia, nokuhindira mihiga nemihiga: 23kigira yaga Yahova Nyasaye ya mu twulidza mu mulimi gwa Edeni, kulima marova ga ya twulidzwa mu. 24Kunangwa ya kunga Adamu na a mu hila kyova; naye ya vika Vakerubi ku luvega lwevugwe womulimi gwa Edeni, na kivavi ki ng'ereng'ananga kya voyongana kulinda inzira yomusala gwelivamwoyo.
നിലവിൽ തിരഞ്ഞെടുത്തിരിക്കുന്നു:
Litanga 3: MBE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©Bible Society of Kenya, 1967