मत्ती 10
10
यीशु रै बारह चेलै
(मरकुस 3:13-19; लूका 6:12-16)
1यीशुऐ अपणै बारह प्रेरिता जो हैदी करी, तियां जो दुष्टात्मा जो कढणै रा अधिकार दिता, कि तियां जो कड्ड़ी सकन अतै सब तरह री बमारी अतै सब कमजोरी जो दूर करन।
2अतै बारह प्रेरिता रै नां ऐह हिन पैहला शमौन, जैसिओ पतरस भी बलदै हिन, तसेरा भाई अन्द्रियास; जबदी रा पुत्र याकूब, अतै तसेरा भाई यूहन्ना; 3फिलिप्पुस अतै बरतुल्मै थोमा अतै चुंगी लैणै बाळा मत्ती, हलफै रा पुत्र याकूब अतै तद्दै। 4शमौन कनानी, अतै यहूदा इस्करियोती, जिनी तैसिओ पकड़ाई भी दिता थू।
बारह चेलै रा सेवा रै कम
(मरकुस 6:7-13; लूका 9:1-6; 10:4-12)
5बारह प्रेरिता जो यीशुऐ ऐह हूक्म दी करी भैजु कि “गैर यहूदी री कनारी मत गान्दै, अतै सामरिया रै कसी भी नगर मन्ज प्रवेश मत करदै। 6पर इस्त्राएल रै घरानै री गवाचुरी भैड़ा बलै ही गच्छैं। 7अतै चलदै चलदै प्रचार करा कि ‘स्वर्गा रा राज्य नेड़ै हा।’ 8बमारा जो ठीक करा, मरूरै जो जिय्आ, कोढ़ी जो शुद्ध करा, दुष्टात्मा जो कडआ। तुहै मुफ्त मन्ज पाऊरा, मुफ्त मन्ज ही देय्आ। 9अपणै बटुए मन्ज ना ता सोना, अतै ना रूपियें, अतै ना तांबा रखणा। 10बत्ता तांयें ना झोल्ळी रखा, ना दोई कुरतै, ना जुटै अतै ना ही होट्ठी लेय्आ, क्ओकि मजदूर जो तसेरी मजदूरी मुळना चहिन्दीआ।
11“जैस कसी नगर या ग्राँ मन्ज गान, ता पता करा कि तैड़ी कुण विस्वासा लायक हा जैहणै तक तैड़ी रैहन तैस बलै ही रेय्आ। 12अतै घरा मन्ज प्रवेश करदै टैमैं तैसिओ आशीष दिन्यै। 13अगर तैस घरा रै मणु योग्य भोलै ता तुन्दी आशीष तियां तक पुजणा पर अगर योग्य ना भोलै ता तुन्दी दितुरी आशीष तूसु बलै ही फिरी ईणिआ। 14अतै जैडा कोई तुसिओ ना ग्रहण करला, अतै तुन्दी गल्ला ना हुणला, तैस घरा या तैस नगर थऊँ नकैन्दै अपणै पैरा री धूड झाड़ी फैकैं। 15अऊँ तूसु सोगी सच बलदा, कि न्याय रै दिन तैस नगर री दशा सदोम अतै अमोरा#10:15 सदोम अतै अमोरा सदोम अतै अमोरा मन्ज प्रमात्मैं अम्बरा थऊँ अग बरसाई करी दण्ड दिता थू क्ओकि तिन्यै प्रमात्मैं रा बचन ना मनी करी पाप करू। रै शहरा रै बुरै मणु री दशा थऊँ भी बुरी भुणीआ।
इणै बाळा संकट
(मरकुस 13:9-13; लूका 21:12-17)
16“हेरा, अऊँ तुसिओ असहाय भैड़ा साईयें ऐसै मणु रै मन्जै भैजु करदा जैड़ै भेड़िये सांईयै खतरनाक हिन। ठेरै तांयें कीड़ै सांई बुद्धिमान अतै कबूतरा सांई भोळै बणा। 17पर मणु थऊँ सावधान रेय्आ, क्ओकि तियां तुसिओ यहूदी महासभा मन्ज घसिटणा, अतै अपणै सभागार मन्ज कोड़ै मरवाणै। 18तुसै मेरै तांयें हाकमा अतै राजा रै सामणै तियां मणु पुर, अतै गैर यहूदी पुर गवाह भूणै तिकर पुजायै गाणै। 19जैहणै तियां पकड़वाणा ता ऐह चिन्ता मत करदै कि कस तरीकै, या कै बलणा क्ओकि जैडा कुछ तूसु बलणा भोला, सो तैस ही टैमैं तुसिओ दसी दिणा। 20क्ओकि बलणै बाळै तुसै ना हिन, पर तून्दै पितै री आत्मा तूसु मन्ज बलदा हा।
21“भाई, भाई जो अतै पितै पुत्रा जो, मारनै तांयें पकड़ाणा, अतै बच्चै बाळै माता पिता रै वरोधा मन्ज खड़ी करी तियां जो मरवाई दिणा। 22मेरै नां री वजह थऊँ मणु तूसु सोगी बैर करना, पर जैस अन्त तक धीरज रखणा उद्धार तसेरा ही भूणा। 23जैहणै सो तुसिओ अक्की नगर मन्ज सतान, ता दूये नगरा जो नह्ही गच्छैं। अऊँ तूसु सोगी सच बलदा, जैहणै तूसु इस्त्राएल रै सबी नगरा मन्ज घुमी बैहणा ता मणु रै पुत्रा चली ईणा।
24“चेला अपणै गुरू थऊँ बड़ा निय्आ; अतै ना दास अपणै स्वामी थऊँ। 25चेलै रा गुरू रै, अतै दासा रा स्वामी रै बराबर भूणा ही बड़ा हा। जैहणै तिन्यै घरा रै स्वामी#10:25 घरा रै स्वामी ऐस बचन रै अनुसार घरा रा स्वामी यीशु हा अतै घरावाळै चेलै हिन। जो शैतान बल्लू ता तसेरै घरावाळै जो कजो ना बललै?”
कस थऊँ डरना?
(लूका 12:2-7)
26“ठेरैतांये तियां थऊँ मत डरदै, क्ओकि कुछ भी छिपुरा निय्आ जैडा खुलणा निय्आ, सब कुछ जैड़ा छिपुरा सो प्रकट भूच्ची गाणा। 27जैडा अऊँ तूसु सोगी चुपचाप बलदा जियां मणु नैहरै मन्ज बलदै हिन्न, सो उजालै मन्ज बला अतै जैडा कुछ कनै हुणदै हिन, तैतिओ उच्ची जगह थऊँ प्रचार करा। 28जैड़ै शरीरा जो मारदै हिन, पर आत्मा जो ना मारी सकदै, तियां थऊँ मत डरदै पर प्रमात्मैं थऊँ ड़रा, जैडा आत्मा अतै शरीर दूनी जो नरक री अगी मन्ज करी सकदा हा। 29अक्क पैसै री दोई चिड़ी बिकदी हिन? फिरी भी तून्दा पिता प्रमात्मां जाणदा जैहणै तियां मन्ज अक्क भी पैन्दी हा। 30पर तून्दै हैरा रै बाळ भी सब गीणुरै हिन।#लूका 12:7. 31ठेरैतांये ड़रा मत; तुन्दी किमत मती चिड़ी थऊँ बदिकरी हा।”
32“जैस कसी मणु सामणै मिन्जो मनी लैणा, सो मुँ भी स्वर्गा मन्ज बैहुरै अपणै पितै रै सामणै मनी लैणा 33पर जैस कसी मणु सामणै मेरा इन्कार करना मुँ भी तसेरा स्वर्गा मन्ज बैहुरै अपणै पितै रै सामणै इन्कार करना।”
यीशु रै आगमन रा परिणाम
(लूका 12:51-53; 14:26,27)
34“ऐह मत समझा, कि अऊँ धरती पुर मणु मन्ज मेल मिलाप करवाणा छूरा; अऊँ मेल मिलाप कराणा ना, पर तलवार चलवाणा छूरा।” 35अऊँ ता छूरा, कि
“मणु जो तसेरै पिता थऊँ,
अतै कुल्ळी जो तसारी मौआ थऊँ,
अतै नूहा जो तसारी हहुआ थऊँ अलग करू।
36मणु रै बैरी तसेरै घरा रै मणु ही भूणै।”
37“जैडा माता या पिता जो मिन्जो थऊँ मता प्यारा जाणदा, सो मेरै लायक निय्आ अतै जैडा दब्बू या कुल्ळी जो मिन्जो थऊँ प्यारा जाणदा सो भी मेरै लायक निय्आ।#लूका 14:26. 38अतै जैडा अपणा क्रूस लेई करी मिन्जो पिचो ना चला सो मेरै चेला ना भुच्ची सकदा।” 39“जैडा अपणै प्राण बचांदा, तैस सो खोई दिणै; अतै जैडा मेरी वजह थऊँ अपणै प्राणा जो देला, तैस सो पाणै हिन।
प्रतिफल
(मरकुस 9:4)
40“जैडा तूसु जो ग्रहण करदा, सो मिन्जो ग्रहण करदा; अतै जैडा मिन्जो ग्रहण करदा, सो मेरै भैजणै बाळै जो ग्रहण करदा। 41जैडा भविष्यवक्ता जो भविष्यवक्ता जाणी करी ग्रहण करदा, तैस भविष्यवक्ता रा इनाम पाणा; अतै जैडा धर्मी जाणी करी धर्मी जो ग्रहण करदा, तैस धर्मी रा इनाम पाणा। 42जैडा कोई ईयां हल्कै थऊँ अक्की जो भी मेरा चेला मनी करी सिर्फ अक्क गलास ठंड़ा पाणी पयांदा, अऊँ तूसु सोगी सच बलदा, तैस अपणा इनाम जरूर पाणा।”
നിലവിൽ തിരഞ്ഞെടുത്തിരിക്കുന്നു:
मत्ती 10: GBKNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
This work is licensed under Creative Commons Attribution-ShareAlike 4.0 License.