Jon 1
1
Seko I Teke Qita Go Too
1Tarakenaqana kolabana pua iara zari go ‘Seko’ i ko bana so. ‘Seko’ dena i ko tavise God. Mana iru varipada God go. 2I ko tavisi bana meso God kokoso vatupiana na osina pata. 3Mana de ikoego to ‘Seko’ dena, God i vazaria go osina pata i koego kolabana pua dena. 4Loborona ia ikoe too. Too nae, iato tatavata i damara qira basoero na kolabana pua ne. 5Tatavata dena i damarae de i rodoko go, mana rodoko i makure sivale na iago.
6God i turine ne kameka valeke vitoṉo na Jon, 7tina lama sine ne qira basoero ne sauna tatavata dena, go osiqira basoero tarina gata mana vaogote go. 8Valeke dena iki tatavata kaega, do ia i lama go tina sine de go zazao na tatavata. 9Iato dena tatavata ogoto, tatavata i lama ego kolabana pua ne mana i damara qira osiqira basoero ne.
10‘Seko ne’ i koe kolabana pua ne, mana loborona to ia, God i vazari ze go kolabana pua ne, do kolabana pua dena iki mia rove kaega ia. 11I lamae vudu ia, do basoero na komala ia, iriki soko kaega ia 12Do ria iri soko go ia, iri vaogote ia, ria nae i teke qira vatoqe go tarina salesalero ia God. 13Iriki podo gere kaega salero iri podo ego parasa qiru valeke mana qole, do God i zazu ne qira go, iva gere qirae salero ia.
14‘Seko’ dena i lama taitana mana i basoe, i purake Mana mana seko ogoto mana iko tavisi qita go. Remu qi mia karaputa mazala ia, ia to i kameka so Tuna go i pala go karaputa mazala nae de ikoego Tamana.
15Jon na bapitema tane i sine ne qira basoero sauna valeke dena, ia i koru valavata me igo, ‘Tato dena basoe qa pepeu ne qamu go,” qa sine go, “Basoe tina lama go taramuziqu era, i lete mazala sivala nava era, tanego basoe nae i ko bana so ia qara podo go era.”
16Mana loborona nanao na, i purake kula ia de qata koego, osina ṉalu i teke ne qita manava ia. 17God i tekene Tamana ia de ikoego Mosese, do Mana mana seko ogoto i reqe me de ikoego Jesu Kristo. 18Kaega kaki basoe i miasoba God. Do Jesu kameka minena so Tuna God mana i God napu go, mana i koe rikisina Tamana, iato iva sadaka me God de qata koego ita.
Jon Na Bapitema I Tarama Ne Jesu
(Matiu 3.1-12; Maka 1.1-8; Luka 3.1-18)
19Iato dena seko ia Jon na bapitema i sine ne qira go vano Jiu iri koego Jerusalema, ṉalu iri turine qira go vano patere ro mana vano Livai ro, go tarina za tana ne Jon, “Ake na tane ia?”
20Jon iki kasi kaega vataule ne qira, do i sine vatatavata velaka ne qira, igo, “Era qaki Mesia kaega.”
21Gonae iri tana napu, “Akena bana go aro na? Aro go propeta Ilaiza?” Jon i vataule, igo, “Era qaki propeta Ilaiza kaega.” Iri tana napu, “Aro to propeta qi piri ne go remu?” Jon igo, “Kaega.”
22Ṉalu gonae, “Sine ne qemu akena tane aro,” iri go. “Remu timuna pala vaule, taule na tana dena de iri koego basoero iri turine qemu mego, iago avana tono sine sauna tanumu?”
23Jon i vataule ne qirae seko i sine bana go propeta Isaia,
“Era qa gere kaki ovaṉa na kaki basoe i za korukoru me de i kaega go pata podopodo lavata na,
igo vatotoloṉe zuka go tina goe go Batu ne!”
24Ria basoero iri turine qira mego, vano Parisio iri tana 25napu ne Jon, “Ṉalu aro qoki Mesia kaega, propeta Ilaiza kaega, ba kakia propeta kaega gogo ne, avigo tane qo bapitema qira basoero ne?” 26Jon i vataule ne qira igo, “Era qa vari va bapitema ne besi, do kameka valeke i koe loboro qamu, mana ramu qamuki rove kaega.
27Ia tina lama taramuziqu era, do era iki ara torava kaega patavolomo lupase na qolo na makebotu ia.”
28Osina pataro dena i sadake loborona Betani, tepa uguru Jodan, de i za keba ne go saṉa ne, de goto i vari va bapitema ego Jon.
Jesu I Gere Tunana Sipi Ia God
29Bakubaku na ne Jon i mia Jesu i lamae de ikoego, mana igo, “Iato dona Sipi ia God i vakuziki ne go vasakata pata na kolabana pua ne. 30Iato dena valeke qa pepeua go qa go, ‘Valeke tina lama taramuziqu era, i mazala sivala nava era, tanego valeke dena i ko bana so ia, qara podo go era. 31Patavolomo qaki rove go kaega ia, do era qa lama variva bapitema ne so besi, go basoero na Izirel tarina rove ia.’ ”
32Gonae Jon i seko e de iri koego basoero ne, “Qa mia Spirit tabo i qoqoro ne tepa rani ne, i gere kurukuru mana i lama koe de ikoego ia. 33Era qaki rove kaega akena tane valeke dena, do God ni turi nava era tuna variva bapitema ne besi, i sine bana nava igo de, ‘Tono mia Spirit tabo tina qoqoro me mana koe de ikoego Valeke ne. Valeke nae to tina bapitema qira e go basoero ne Spirit tabo.’ 34Tanuqu qa miasoba bana to, mana iato qa sine ne qira go basoero, valeke dena i Tuna God.”
Disipolo Kenaqa Ro Ia Jesu
35Bakubaku na napu Jon i ko napue so dego mana i degere tavisi qiru karua disipolo ia, 36ṉalu i miasoba go Jesu i lama sivala go, igo de, “Iato dona Sipi ia God.”
37Ṉalu karua disipolo ne iru gata go seko i sine go Jon, iru kasi ne ia mana kale muzi ne Jesu iru go. 38Jesu i tabali mana i mia qiru iru kale muzi ne, i tana ne qiru, “Avana tane qaburu taqia go?” Iru vataule ne, “Rabae! Ade tepa tane qo koego na?” Seko ‘Rabae’ dena talupasana, “basoe vari vatatana.”
39Jesu i sine ne qiru, “Lama mana mia go.” Torana nae i vele kavasi kiloko to kikinaka raravi bago. Iago iru lulua ia mana iru za mia to de ikoego, gonae iru ko tavise ia kuse so.
40Kaki kameka riru disipolo ne vitoṉona Aduru, kaena Saimon Pita. 41Aduru i za soba togana, Saimon mana i sine ne, “Remu qi miasoba to Mesia.” Seko dena talupasana Kristo. 42Gonae i lulu me Saimon de ikoego Jesu. Ṉalu Jesu i reṉa ne Saimon igo dena, “Aro vitoṉomu Saimon sale ia Jon, do vitoṉomu tina Kepas to ninidena.” Vitono dena i gere napua so Pita, talupasana bakoso.
Jesu I Koru Qiru Pilipi Mana Natanel
43Bakubaku na napu Jesu i nanao mara zae Qalili igo. I soba Pilipi mana i sine ne, “Lulu ava era.” 44Pilipi i reqe napu meso Betsaida komala iri koego Aduru mana Pita. 45Pilipi i soba Natanel mana i sine ne, igo, “Valeke ni karo valu bana ne Mosese loborona buka na Tamana ne, mana karo ro ria propeta ro go ne, qi soba to remu. Vitonona Jesu, sale ia Josepo i reqe me komala Nazaret.”
46Natanel igo, “Kaega so kaki pata velaka tina mazala go reqe me Nazaret?” Do Pilipi i vataule ne ia, “Lama mana ono mia.”
47Ṉalu Jesu i mia Natanel i lamae go de ikoego, i vane ia de, “Valeke dena i basoe ogotona to Izirel, mana iki rove kaega poqe go.”
48Natanel i tana ne Jesu, “Avigo tane qo rove ava era?” Jesu i vataule, “Tarakenaqana Pilipi iara garetu koru go aro, era ga mia go aro qo kolokue polana moki iri vitoṉo ze piqi.”
49Natanel i vataule, “Valeke vari vatatana, aro qo Tuna God! Aro to qo Batu lavata na Izirel.”
50Do Jesu i sine ne ia, “Qo vaogoto tanego qa sine nigo, qa mia go ṉalu qo koloku ego polana moki piqi ne. Do tono ara mia pata lavata ro, i sivala ne ianae.” 51Mana i sine napu ne qira igo, “Ma sine ne qamu pata ogoto, tamuna mia zakazaka ne tina papaqa mana aqelo ro ia God tarina popoka za rani mana qoqoro me de qa koego era, Tuna Basoe.”
നിലവിൽ തിരഞ്ഞെടുത്തിരിക്കുന്നു:
Jon 1: VRSNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament in Varisi, Solomon Islands © Bible Society of the South Pacific, 1994, 2004.