Jon 7
7
Jesu I Seko Tabe Qira Turana Ro
1Taramuzina pataro dena, Jesu i goe so kena Qalili, ia iki zae kaega tepa Judia, tanego vano batubatu na Jiu iri soko vae vale na ia. 2I garogaro to musaqara kelo ria vano Jiu go tarina koego pade suka ro iri zazu ne go, 3Iago turana ro Jesu iri sine ne ia, “I velaka sivala aro mo kasi ne dena mana zae Judia, go basoero iri lulu go tarina mia go zazu velaka ro tono zazu nego. 4Tanego ṉalu basoe i soko go basoero ne tarina rove go ia, ia tiniki pika kaega pataro tina zazu ne go. Tanego aro qo zazu ne pata velaka ro, iago vasadaka ze to mata qira basoero na vudu pua go.” 5Turana ro tanuna Jesu, do iriki vaogote so kaega, ia to go iri sine ne ia sekoro de.
6Gonae Jesu i sine ne qira, “Ṉalu era iara kaebo lama doka, do ramu osina to ṉalu i velaka ne qamu so. 7Basoero na vudu pua dena iri vavelaka ne qamu ramu, do era ne iri vasasakata nava, tanego qa poro sine ne qira, too ramu i sakata. 8Iago zae kelo ne ramu. Era qa ko, tanego ṉalu era iara kaebo lama doka.” 9I sine seko ro de mana i koe so tekere Qalili go.
Jesu I Vari Vatatana E Ṉalu Na Kelo Ne
10Taramuzina turana ro i zae kelo ne, Jesu i za napu, do iki za poro sadaka qira kaega basoero ne, ia i zaza pipika so. 11Batubatu ro ria vano Jiu ne, iri taqi ze Jesu loborona teṉo na kelo ne, iri vari goe dena, “Adi goe tane ia na?”
12Topu sasakata basoero iri teṉo go, kakiaro ria iri vari sine ne, “Jesu i valeke velaka, do kakia ro iri go, ‘Kaega’, kakiaro iri go, i poqe taru qirae basoero ne sekoro ia,” iri go. 13Do i kaega so kakia ria basoero dena i seko vasadaka go, tanego iri sareki ne qira batubatu ria vano Jiu.
14I doka to musaqara vari lobori na kelo ne, Jesu i keba za Pade Lotu ne mana i vatupia to vari vatatana go. 15Batubatu ria vano Jiu iri lete poloso mana iri go de, “Valeke dena iki sikulu bana so kaega, do avigo tane i lete tarove go?”
16Do Jesu i vataule ne qira igo, “Pataro qa vari vatatana nego, iki ke era kaega tanuqu, do i ke ia God i turi nava mego. 17Basoe i soko go luluna nanaona God, ia tina mazala so mia rove na vari vatatana era. I mazala so rove na, avigo vari vatatana era i reqe me dekoe God, ba i reqe meso nanao mana karaputa era tanuqu go. 18Ṉalu ka basoe i seko ne so karaputa ia so tanuna, basoe nae i soko so vazakazaka na tanuna. Do ṉalu basoe nae i soko go basoero tarina vazakazaka ia ni turine mego, basoe nae i seko ne pata ogoto mana iki poqe kaega go. 19Mosese i teke ne qamu Tamana, do kaega so kakia ramu i lulua go Tamana ne. Avigo tane qamu soko go vae vale ava go era na?”
20Basoero ne iri vataule ne ia iri go, ‘Aro qo manuru! Akena tane i soko go vele vae vale go aro na?”
21Jesu i sine ne qira, “Kameka so zazu vari vapoloso qa zazu ne era, osiqamu to qamu poloso lupo go. 22Mosese tane i teke ne qamu go Tamana na kosi de iri koego salero valeke ro ramu, do Mosese iki vatupia kaega, do vanovano bana ramu tane iri zazu kenaqa nego, mana ramu qamu kosia sale valeke ro ramu musaqara Sabat. 23Ianae i vasadake basoe i mazala so kosi musaqara Sabat go tamuniki vae kaega Tamana ia Mosese. Do avigo tane qamu muma nava era, ṉalu qava velake go tutukununa tokamana basoe ne musaqara Sabat na? 24Iago kasi taru ze vivine ramu de ikoego kakamuna ro pata, do taru ze vivine ramu loborona pataro i ogoto go.”
Basoero Ne Iri Nanao Jesu To I Mesia Go
25Kakiaro basoero na Jerusalema iri go de, “Kadigo valeke dena to ba go vano batubatu ro ne, iri soko go vae vale na. 26Mia! I vari vatatanae de go osiqira basoero iri mazala go mia na ia, do kaega to ka basoe i vanoto go ia, kadego basoero ne iri nanao iato i Mesia bago? 27Do ṉalu Mesia tina lama go, kaega ka basoe irove go adepa tina reqe mego, ba valeke dena osiqita qata rove so de i reqe me go.”
28Torana nae Jesu i vari vatatana e loborona Pade Lotu ne, i seko valavata igo de, “Oveto, qamu rove ava era mana de qa reqe mego. Do qaki lama ne kaega sauna karaputa era tanuqu. God i turi nava go era, seko ia i ogoto, mana ramu qamuki rove kaega iago. 29Era qa rove ia, tanego qa reqeme de ikoego ia, mana iato i turi nava go.”
30Ṉalu Jesu i sine seko dena, basoero iri soko pala na ia, do kaega so kakia i siba go, tanego ṉalu ia iara kaebo doka. 31Do topu ria basoero ne iri vaogote Jesu mana iri go, “Ṉalu Mesia tina za lama go, avigo qamu nanao tina vasadake topu zazu vari vapoloso ro sivala ne valeke dena?”
Vano Jiu Iri Pada Ne Pala Na Jesu
32Gonae vano Parisio iri rove basoero ne iri vari sine pika ne de igogo Jesu, iago vano Parisio mana batu ria patere ro iri vazao qira kavia vano soldia na Pade Lotu go tarina za pala Jesu. 33Jesu igo, “Ko tavisi tuna vae qamu go tiniki lete umata kaega, tanego era tuna ule za de ikoego ia i turi nava mego. 34Ramu tamuna taqi ava era, do tamuniki soba va kaega, tanego i makuru qamu garetu na de tuna zae go era.”
35Batubatu ria vano Jiu iri vari sine ne, iri go, “Adepa tane tina zae go valeke dena, go tataniki soba kaega? Avigo tina zae de iri koego vano Jiu iri koego komala lavata tepa Qrik? Avigo tina za vari vatatana e dego? 36I sine, tatana taqia, do soba kaega, mana i makuru qita zae na de tina koego, avana tane i vatalupasa zego sekoro dena?”
Besi I Soso Nego Too
37Valupolupo na to musaqara na kelo ne, mana musaqara nae to i lete mazala sivala go, Jesu i degere mana i seko valavata, igo de, “Ka basoe i kaṉoso go mara lama va era, go mara ge besi. 38Gerena so Buka tabo ne igo, ‘Ṉalu ka basoe i vaogoto ava era ne, besi vuala i soso nego too tina reqe me puṉuna!’ ” 39Jesu i sine iadena, i vatalupasa ze Spirit tabo, go ria iri vaogote go tarina toṉove. Torana ṉalu nae God iara kaebo sosone Spirit tabo, tanego Jesu iara kaebo pala na karaputa mazala na rani ne.
Basoero Ne Iri Tavota
40Kakiaro basoero iri ko tavisi ṉalu nae, iri gata pataro i sine go Jesu, iri go de, “Valeke dena i propeta bana to!”
41Kakiaro iri go, “Iato i Mesia go, do kakiaro iri go, Mesia ne, tiniki reqe me kaega Qalili!” 42Tanego Buka tabo ne i sine, “Mesia ne tina reqe me popodo ia batu lavata Davita, mana tina podo e Betelema, komala i ko banae go Davita.” 43Iago basoero ne iri tavota ne dego vaogoto ria de koe Jesu. 44Kakiaro ria basoero ne iri soko pala na ia, do kaega so ka basoe i siba go ia.
Batubatu Ria Vano Jiu Iriki Soko Kaega Vaogote Na Jesu
45Ṉalu vano soldia na Pade Lotu ne iri ule za de iri koego batu ria patere ro mana vano Parisio, iri tana ne qira, “Avigo qamuki pala mego kaega?”
46Vano soldia ne iri vataule iri go, “Kaega to ka basoe i tora go de go sekoseko na valeke dena!”
47Vano Parisio iri vane napu qira dena, “Avigo i poqe napu qamu? 48Avigo, kakia remu vano Parisio ba vano batubatu ita qemu vaogote ia? Kaega to! 49Osiqira basoero nae, iriki rove kaega Tamana ia Mosese, iago God tina vakimata qira.”
50Kaki kameka ria vano Parisio vitoṉona Nikodemus, valeke de, i za mia bana Jesu kaki ṉalu, i sine ne qira ria kero ne, 51“Tamana ita iki vamao kaega vamakuru na basoe, do ṉalu tatana pala ze ia varitanae mana rove pataro i zazu nego i kebu, ṉalu nae to qatara mazala go.”
52Batubatu ria vano Jiu, iri vataule ne ia, “Avigo aro qo valeke na Qalili? Toere mana nanao luluse Buka tabo ne, tono mia, kaega kaki propeta lavata tina reqe mego Qalili.”
നിലവിൽ തിരഞ്ഞെടുത്തിരിക്കുന്നു:
Jon 7: VRSNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament in Varisi, Solomon Islands © Bible Society of the South Pacific, 1994, 2004.