Matie Sɛbɛ 6
6
1“Nyɩ́ tɛrɛ nyɩ mɩ̃ɛ a nyɩ torfʋ tʋmɔ ɩnɛ, a nyɩ kɔ̃ wa maal bom kãw a nɩbɛ nii-sɔw a ba ꞌwuoro nyɩ wa. A nyɩmɩ wa maal a lɛ, nyaa pɔwrɔ a yar a nyɩ Sãa na be a saa juu jie wa.
2“A lɛdaar fʋ na kurɔ a nãw sʋbɔ a bom, taa maala nɩ a yo-bɔb wa. A-na-ɩ lɛ a poe ayi deme ma maal a ba *puorfʋ yie pʋʋr nɩ a sɔɛ pʋʋr, a mɩnɛ a nɩbɛ na nyɛ ba ɩ̃ pɛwrɛ ba. Yel-mɩ̃ɛ ɩ̃ yele nyɩ, a bala, ba gɔrʼã pɔw a ba yar. 3Ɩ̃ a fʋ̃ʋ kʋrɔ a nãw sʋbɔ a bom taa tɩɛr a ɩ fʋ bom kpɛ̃ɛ wa. 4Sɔɔlɩ̃ maal, ɩ̃ a fʋ Sãa na nyɛ a fʋ sɔɔlɩ̃fʋ tʋmɔ na ya fʋ na.
A NAAŊMƖN PUORFƲ ƳƐRƖ̃
(Lu 11.2-4)
5“A nyɩmɩ puoro a Naaŋmɩn, nyɩ taa maala a mɩnɛ a poe ayi deme na ma maal wa, a-na-ɩ a nʋmɔ ba na a ba ma ir ɩraa puoro a ba *puorfʋ yie pʋʋr nɩ a sɔ-carsɩ pʋʋr a mɩnɛ a nɩbɛ na nyɛ ba. Yel-mɩ̃ɛ ɩ̃ yele nyɩ, ba gɔrʼã pɔw a ba yar. 6Ɩ̃-cɛ a fʋ̃ʋ, a fʋ̃ʋ puoro a Naaŋmɩn, kpɛ a fʋ diem, pɔw a pan ɩ̃ puor a fʋ Sãa na be a be a sɔɔlɩ̃fʋ jie, ɩ̃ a fʋ Sãa ʋlɔ na nyɛ a ala fʋ na sɔɔlɩ̃ maal, ʋ na ya fʋ na.
7“A nyɩmɩ puoro, nyɩ taa dɔɔlɔ a ƴɛr-pɔrsɩ a mɩnɛ a nɩ-kpeesɩ na ma maal wa. A-na-ɩ ba ma tɩɛrʼã beeka a ba ƴɛr-yaw ɩnɛ a Naaŋmɩn na wonaa. 8Nyɩ taa maala a ba kaarɩ̃ wa, a-na-ɩ a lɛdaar nyɩ na ma sʋɔr sɛr wa, a nyɩ Sãa de na nĩe bɔ̃w a ala na sɛw nɩ nyɩ. 9Ɩ̃-cɛ nyɩ́ nyɛ a mɩnɛ na sɛw a nyɩ na sʋɔrɔ:
‘A sɩ Sãa na be a saa juu, a fʋ yuor ú ow kpee,
10a fʋ fãw ú wa, a fʋ pʋ-tɩɛrʋ̃ ú maal a tẽw pʋɔ,
a mɩnɛ ʋ na maal a saa juu.
11Kʋ sɩ a dɩb ala na sɛw nɩ sɩ a dɩnaa.
12De a sɩ maal-faar bar kʋ sɩ, a mɩnɛ sɩ na ma
mɩ de a maal-faar ala a nɩbɛ na maal sɩ bar kʋ ba.
13Taa bar sɩ a sɩ kpɛ a bɩɩrfʋ pʋɔ wa,
ɩ̃-cɛ faa sɩ a Fãa Sʋbɔ jie.’
14“A-na-ɩ a ala ɩ nyɩ de na a nɩbɛ maal-faar bar kʋ ba, a nyɩ saa juu Sãa na mɩ de na a nyɩ ben bar kʋ nyɩ. 15Ɩ̃ a nyɩmɩ ma de a nɩbɛ maal-faar bar kʋ ba wa, a nyɩ Sãa kɔ̃ mɩ de a nyɩ maal-faar bar kʋ nyɩ wa.
A NƲƆR LŨFƲ ƳƐRƖ̃
16“A nyɩmɩ lũ a nʋɔr, nyɩ taa maala a poe ayi deme kaarɩ̃, sɔbɔ nɩ a nii-sɔw wa. A-na-ɩ ba ma lɩɛbʼã a ba nii-sɔw wɔ̃ taa nɩ nãw deme ba ɩ, a mɩnɛ a nɩbɛ na tʋɔ bɔ̃w a nʋɔr ba lũ. Yel-mɩ̃ɛ ɩ̃ yele nyɩ, ba pɔw na a ba yar. 17Ɩ̃ a fʋ̃ʋ, a fʋ̃ʋ lũ a nʋɔr, pɛw a nii-sɔw ɩ̃ ir a juu 18a mɩnɛ a nɩrɛ kɔ̃ wa bɔ̃w ka nʋɔr fʋ lũ wa, ɩ̃ a ɩ a fʋ Sãa tɛw na be a be a sɔɔlɩ̃fʋ jie. Ɩ̃ a fʋ Sãa ʋlɔ na nyɛ a ala fʋ na maal a sɔɔlɩ̃, na ya fʋ na.
A NA-YELE BƆFƲ ƳƐRƖ̃
(Lu 12.33-34)
19“Nyɩ taa bʋɔrɔ a na-yele dɔɔlɔ taa a ka a tẽw pʋɔ wa. A-na-ɩ a ka, a kpolo be na ka mɔɔrɔ, a bajɩ̃ɩ mɩ dɩrɛ sãwna, ɩ̃ a nyanyube mɩ kpɛɛrɛ jure. 20Ɩ̃-cɛ nyɩ́ bʋɔrɔ a saꞌlon na-yele dɔɔlɔ taa. A-na-ɩ a be, kpolo ma be be mɔɔrɔ wa, bajɩ̃ɩ ma mɩ be be dɩrɛ sãwna wa, ɩ̃ nyanyube ma mɩ kpɛɛrɛ be jure wa. 21A-na-ɩ a jie ʋlɔ a fʋ na-yele na be, a be a fʋ tɩɛrɩ̃sɩ na mɩ be.
A Ɩ̃GAN CÃA
(Lu 11.34-36)
22“A mimie ɩ̃ ɩ a ɩ̃gan lãpa. A fʋ mimie wa ɩ mimi-sono, a fʋ ɩ̃gan ʋ jaa na caarɩ̃ na. 23Ɩ̃-cɛ a fʋ mimie wa sãw, a fʋ ɩ̃gan ʋ jaa na liw na. Ala-ɩ̃-sɔ, a cãa ʋlɔ na be a fʋ suur pʋɔ, a ʋlɔ ma caara wa, mɩnɛ a libe na bɛrmɛ jɛ̃!
A NAAŊMƖN NƖ A LIBIE ƳƐRƖ̃
(Lu 16.13)
24“Nɩrɛ ma be be na tʋɔrɔ tʋnɔ a nɩ-bɛrɛ ayi tʋn wa. Ʋ na ꞌlaarʼã a kãw ĩ nʋnɔ a ƴen sʋbɔ, mɩɩ ʋ na ƴɔnɔ na a bõ-yen ɩ̃ kpɛrɛ a kãw. Nyaa tʋɔrɔ puoro a Naaŋmɩn ɩ̃ mɩ ɩrɛ a na-yele gbãgbaar wa.
BARꞌƖ̃ A NAAŊMƖN NYÃA
(Lu 12.22-31)
25“Ala-ɩ̃-sɔ ɩ̃ yele nyɩ, nyɩ taa waala a nyɩ baafʋ ɩnɛ wa, yele nɩ a bõ nyɩ na dɩrɛ ɩ̃ mɩ nyuure, mɩɩ mɩ waala nɩ a nyɩ ɩ̃gan ɩnɛ a bõ nyɩ na nyɛ su wa. A baafʋ ma gãw a bõ-dɩraa wa mɩɩ? Ɩ̃ a ɩ̃gan ma mɩ gãw a cẽcen wa mɩɩ? 26Nyɩ́ ꞌwuor nyɛ a lili na be a saꞌlon. Ba maa bʋr wa; ba maa ŋma wa; baa mɩ tɛrɛ boor wa, ɩ̃-cɛ a nyɩ saa juu Sãa ʋlɔ guolo ba. Ɩ̃ a nyɩmɩ, nyaa sa gãw a lili wa mɩɩ? 27A nyɩ waalɩ̃fʋ pʋɔ, ala be a nyɩ pʋɔ na tʋɔ tɔ a ʋ baafʋ bibie dɔɔl fɩ̃ɩ?
28“Bõ ɩ a nyɩ ma waala a cẽcene ɩnɛ? Nyɩ́ ꞌwuor nyɛ a mɩnɛ a mɔɔpʋɔ tɩ-pube na wɔ. Ba maa tʋ̃ tʋn wa; ba maa mɩ sɛ cẽcene su wa, 29ɩ̃-cɛ ɩ̃ yele nyɩ na, a ala ɩ a Salʋmɔ na dãa le ʋ, ꞌwaa dãa tɛrɛ cẽcen ʋ wɔ̃ taa nɩ a tɩ-pube asɩmɛ bõ-yen kaarɩ̃ wa. 30A ala ɩ a Naaŋmɩn na maal a mɔɔ pʋɔ tɩ-pube a vɩɛlɛ a lɛ, a tɩ-pube ala na be a be a dɩnaa, ɩ̃-cɛ a bio vɩɛ a ba de lɔb ƴɔ̃w a vũu pʋɔ, ʋ kɔ̃ tʋɔ maal nyɩ a gãw a lɛ wa mɩɩ? A nyɩ ƴɔ̃w-nyãa pabʼã a Naaŋmɩn jie. 31Ala-ɩ̃-sɔ, nyɩ taa waala yele nɩ: ‘A bõ nyɩ nɔɔ nyɛ dɩ, mɩɩ á bõ nyɩ nɔɔ nyɛ nyu wa, ɩ̃ cɛ á bõ nyɩ na nyɛ su.’ 32Tɩbɛ deme ɩ̃ ma bʋɔrɔ a ana yele a jaa, ɩ̃ a nyɩ saa juu Sãa bɔ̃w na bɔ̃w ka nyɩ bʋɔrɔ na a ana yele. 33Nyɩ́ bʋɔrɔ a ʋ fãw nɩ a ʋ torfʋ sɛr, ɩ̃ a ala a jaa na cɛ ʋ na de na kʋ nyɩ dɔɔl. 34Nyɩ taa ɩ a bio tɩɛrɩ̃sɩ a dama nyɩ wa, a-na-ɩ a bio tɩɛrɩ̃sɩ mɩ sɛw nɩ ʋ na. A bibie a jaa tɛrɛ na a ba won na mɩ sɛw ba.
നിലവിൽ തിരഞ്ഞെടുത്തിരിക്കുന്നു:
Matie Sɛbɛ 6: BNT93
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Le Nouveau Testament en langue birifor © Alliance Biblique au Burkina Faso, 1993.