uYoohani 1
1
UIzwi áyinzile avha muntu
1Ku vhwandilo lwe ivintu vwonti vishiili kupelwa,#1:1 uVhwandilo 1:1 kwáli uIzwi, uIzwi uyo áali pooka nu Mulungu, havhili uIzwi uyo áali wu Mulungu. 2Kufuma ku vhwandilo uIzwi uyo áali pooka nu Mulungu.
3UMulungu ávipezile ivintu vwonti kutuushila kwa Izwi. Shitaliipo ishintu she shápeliilwe ishisita kutuushila ku kwakwe. 4UIzwi uyo áali vhwandilo uvhwa vhulanzi. Vhwope uvhulanzi uvhwo vhwáli vhuzelu vhwa vhantu. 5Uvhuzelu uvhwo vhukuhozya mu shiisi, shoope ishiisi shitávhupoosite.
6UMulungu ámusonteleziizye umuntu wumo we izina lyakwe vhahatinji uYoohani.#1:6 UYoohani: Uno wu Yoohani uMwozyi. 7UYoohani áyinzile kuvhahomeshezya avhantu izya vhuzelu uvhwo, inga kutuushila ku kwakwe avhantu vhonti vhavhwitishe. 8Havhili uweene atáamile vhuzelu uvhwo, nkandi áyinzile kuvhahomeshezya avhantu izya vhuzelu uvhwo. 9Uvhuzelu uvhwo vhwáli vhwa nalyoli, vhuhinza mu nsi umu nu kuvhahozezya avhantu vhonti.
10UIzwi áliipo mu nsi. UMulungu ápezile insi kutuushila kwa Izwi uyo, ileelo poosye vhwevhulo avhantu avha mu nsi vhatámumanyile. 11Áyinzile ku vhantu vhaakwe, ileelo avheene vhatámuposheleeye. 12Ileelo vhaala vhe vhámuposheleeye nu kumwitiha, ávhavhiisile kuvha vhaana vha Mulungu. 13Ivho vhe vhaana vha Mulungu, ileelo te kulandatana ni shifumo shaavho, poosye kulandatana nu kupaapwa kwi idala ilya kuhomaana umwanaavuli nu mwantanda, poosye ku lukasamo ulwa muntu, uMulungu wuuyo we avhavhiisile kuvha vhaana vhaakwe.
14UIzwi uyo áyinzile avha muntu, ahatendama pooka niiswe. Tuhavhulola uvhushindamu vhwakwe, uvhushindamu vhwe vhukulolesya kuuti Mwana imozi we afumile kwa Taata, ali nu vhwila nu vhwanalyoli nkaani. 15UYoohani ahavhahomeshezya avhantu inongwa izya muntu uyo, ahayanga kwi izwi ipiti, ahati, “Uno we nkavhavhuzyaga kuuti, ‘Aliyinza umuntu wumo mwisinda lyane, we mupiti kunduusya ine, mwe pe uweene áliipo lwe ine nshiili kupaapwa.’” 16Kufumiilana nu vhudumbwe uvhwa vhwila vhwakwe, iswe swenti uMulungu atufwiliiye uvhwila, havhili kwe ajendeelele kutufwila uvhwila ahavhaliilizyo honti. 17Nkuyanga vhwevhulo, mwe pe uMulungu áfumwizye indajizyo zyakwe kwi idala ilya Moose,#1:17 UMoose: Vhaazya mu Ntantiho izya Mazwi aMajeni. ileelo uvhwila nu vhwanalyoli atupiiye kwi idala ilya Yeesu Chilisiti.#1:17 UChilisiti: Vhaazya mu Ntantiho izya Mazwi aMajeni. 18Ataliipo umuntu we amuvhwenyi uMulungu lumo, nkandi we Mwana imozi, we woope wu Mulungu,#1:18 UMwana imozi, we woope wu Mulungu: IBiibiliya intanzi zye zisimviilwe mu njango iya Shiyunaani nyinji. Muli izyo, amazwi iga zimo zikuti uMwana wa Mulungu wooka imozi. havhili ali nu vhuliilani uvhwa papiipi nkaani nu Taata uMulungu. Uyo we amulolesiizye uMulungu kuli iswe.
Uvhwahoome uvhwa Yoohani uMwozyi
(uMataayi 3:1-12; uMaaliko 1:1-8; uLuuka 3:1-18)
19Isiku limo, avhalongozi avha Vhayuuda vhávhasonteleziizye avhapuuti#1:19 Avhapuuti: Vhaazya mu Ntantiho izya Mazwi aMajeni. na Vhalaawi#1:19 AVhalaawi vháamile vhavhomba mbombo mu Nyumba iMfinjile. Vhaazya iMbaazyo 3:1-13. kufuma mu Yelusaleemu kumuvhuziilizya uYoohani uMwozyi kuuti uweene wu naanu. Uweene ahahomeshezya, 20ahaamula ishisita kuzyiha ahati, “Ine te ne Chilisiti.” 21Vhahamuvhuziilizya havhili vhahati, “Ishi pe we naanu? Vhuli, we mukuvhwi uEeliya?” Uweene ahavhaamula ahati, “Ine te ne Eeliya.” Avheene vhahamuvhuziilizya havhili vhahati, “Vhuli, we we mukuvhwi uwamwavho we tukumuguliilila kufuma kwa Mulungu?”#1:21 iNkumbushizyo izya Ndajizyo 18:15-22 UYoohani ahavhaamula ahati, “Te neene.” 22Vhahamuvhuziilizya vhahati, “Ishi tuvhuuzye, iwe we naanu? Tuvhuuzye, inga tusogole tuvhavhuuzye vhe vhatusonteleziizye. Iwe ukuyitaha kuuti we naanu?” 23UYoohani ahavhaamula kulandatana na mazwi ge áyanzile umukuvhwi uYisaayi ahati,
“Ine ne lizwi lya muntu we akuvhila imbila mu luugwa akuti,
‘Musenganizanyi uMWENE uMulungu idala!’#1:23 uYisaayi 40:3”
24Pe avhantu ivho vhe aVhafalisaayi#1:24 AVhafalisaayi: Vhaazya mu Ntantiho izya Mazwi aMajeni. vhávhasonteleziizye kwa Yoohani, 25vhahamuvhuziilizya vhahati, “Inga iwe te we Chilisiti, havhili te we mukuvhwi uEeliya, havhili te we mukuvhwi uwunji we tukumuguliilila kufuma kwa Mulungu, ishi ugaazile kwoshi amaha aga kwozya avhantu?” 26UYoohani ahavhaamula ahati, “Ine nkwozya na minzi, ileelo pahati yiinyu aliipo we imwe mutamumanyile. 27Uyo we akwinza mwisinda lyane, havhili ine ntahondeeye poosye kuvha ne muvhomvi waakwe uwa kuzevwa nu kusatula inkusa izya vilyatu vwakwe.” 28Zyonti izyo zyávhombesile mu lutala ulwa Besaniya, mwi isyila uluvhazu ulwa kuvhutukulo ulwa ijenje uYoolodaani, kwe uYoohani ahozyaga avhantu.
UYeesu we Hagonzi aha Mulungu
29Isiku lye likulandata, uYoohani ahamulola uYeesu akwinza ku kwakwe. Ahavhavhuuzya avhantu vhe vháliipo paala ahati, “Yeenya, uno wu Hagonzi aha Mulungu#1:29 AHagonzi aha Mulungu: Vhaazya ahagonzi mu Ntantiho izya Mazwi aMajeni. we akwefwa uvhutalamalandu uvhwa vhantu vhonti mu nsi!#1:29 uVhwandilo 22:8; Kufuma 12:21-28 30Uno we navhavhuzyaga inongwa zyakwe kuuti, ‘Akwinza umuntu wumo mwisinda lyane we mupiti kunduusya ine, mwe pe uweene áliipo lwe ine nshiili kupaapwa.’ 31Ine neneene ntámumanyile, ileelo nínzile kuvhoozya avhantu na minzi, inga amanyishe ku Vhaisilayeeli.” 32Pe uYoohani ahavhahomeshezya avhantu ahati, “Namulola uMupepo uMufinjile#1:32 UMupepo uMufinjile: Vhaazya mu Ntantiho izya Mazwi aMajeni. kufuma ku mwanya akwiha pamwanya yaakwe ku shiholanyo isha nkunda nu kusyala pooka nawo. 33Ine ntámumanyile, ileelo uMulungu we ánsonteleziizye kwozya avhantu na minzi we ámbuziizye átili, ‘Inga wamulola umuntu we uMupepo waane kufuma ku mwanya akwiha pamwanya yaakwe nu kusyala pooka nawo, we alivhozyaga avhantu nu Mupepo uMufinjile.’” 34Pe uYoohani ahati, “Niine nazilola, havhili nkuhomeshezya kuuti uno Mwana wa Mulungu.#1:34 UMwana wa Mulungu: Vhaazya mu Ntantiho izya Mazwi aMajeni.”
UYeesu akuvhasevha avhasundikwa avha kwanda
35Indaavhi yaakwe, uYoohani uMwozyi ahimiilila havhili pi isyila ilya ijenje uYoolodaani pooka na vhasundikwa vhavhili mu vhasundikwa vhaakwe. 36UYoohani ahamulola uYeesu akutuuha papiipi navho. Lwe amulola, ahavhavhuuzya avhasundikwa vhaakwe ivho ahati, “Yeenya, uyo we wu Hagonzi ha Mulungu.” 37Lwe avhasundikwa vhaakwe vhavhili ivho vhamwivwa uYoohani akuyanga amazwi igo, vhahamulandata uYeesu. 38Pe uYeesu ahagalunkana mwisinda, ahavhalola avhasundikwa ivho vhakumulandata. UYeesu ahavhavhuziilizya ahati, “Vhuli, mukulondola ishooni?” Vhoope vhahamwamula vhahati, “We Laabi (izina ili kwe kuuti Musambiilizi), ukutendama kwoshi?” 39UYeesu ahavhaamula ahati, “Nzaaji, niimwe kwe mupalole pe nkutendama.” Pe vhahamulandata. Ahavhaliilizyo aha saala 10 vhahafiha pe ahatendamaga, vhahalinda nawo isiku ilyo.
40Umusundikwa wumo mu vhaala vhavhili vhe vhívuuye amazwi aga Yoohani, nu kumulandata uYeesu, izina lyakwe vhahatinji uAndeleeya, umunine uwa Siimoni uPeeteli. 41UAndeleeya ahasogola suuti#1:41 UAndeleeya ahasogola suuti: IBiibiliya intanzi zye zisimviilwe mu njango iya Shiyunaani nyinji. Muli izyo, amazwi iga zimo zikuti, UAndeleeya we áamile mutanzi. kumulondola umunine waakwe uSiimoni. Lwe amwaga, ahamuvhuuzya ahati, “Twamulola uMeesiya!#1:41 UMeesiya: Vhaazya uChilisiti mu Ntantiho izya Mazwi aMajeni.” Izina ili kwe kuuti uChilisiti. 42Pe uAndeleeya ahinza nu Siimoni kwa Yeesu. UYeesu ahamwenya uSiimoni, ahamuvhuuzya ahati, “Iwe we Siimoni umwana wa Yoohani. Ishi, izina lyaho kuuti uvhe we Keefa.” (Izina ili kwe kuuti Peeteli poosye kuuti iyalaawe.)
UFiilipo nu Nasaniyeeli vhakumulandata uYeesu
43Indaavhi yaakwe, uYeesu ahaamula kusogola mu shigavho isha nsi isha Galilaaya. Lwe aafiha, ahamwaga uFiilipo, ahamuvhuuzya ahati, “We Fiilipo, undandate, uvhe we musundikwa.” 44UFiilipo ahatendamaga mu nkaaya iya Betisaayida, inkaaya ye vhoope avha Andeleeya nu Peeteli vhahatendamaga. 45UFiilipo ahamulola uNasaniyeeli, ahamuvhuuzya ahati, “Twamulola umuntu ula we uMoose ásimvile inongwa zyakwe mwi ikalaata ilya ndajizyo na we avhakuvhwi vhásimvile inongwa zyakwe. Umuntu uyo izina lyakwe wu Yeesu umwana wa Yoosefu we akufuma mu nkaaya iya Naazaleeti.” 46Ileelo uNasaniyeeli ahamuvhuziilizya uFiilipo ahati, “Vhuli, shintu vhuli ishinza she shingaafuma mu nkaaya inyinsi iya Naazaleeti?” UFiilipo ahamwamula ahati, “Nzaaga uyilolele weneewe.” 47Lwe uYeesu amulola uNasaniyeeli akwinza ku kwakwe, ahayanga inongwa zyakwe ahati, “Yeenya, umuntu uyo we akwinza, Mwisilayeeli uwa nalyoli we atapezile alume ilenga naalumo.” 48UNasaniyeeli ahamuvhuziilizya uYeesu ahati, “Waamanya vhuli ine?” UYeesu ahamwamula ahati, “Poosye lwe uFiilipo ashiili kwinza kukwita, ine mpezile nkuvhwenyi lwe utendiime pansi pi ituvhu.” 49Pe uNasaniyeeli ahamwamula ahati, “We Musambiilizi, ishi naamanya kuuti iwe we Mwana wa Mulungu! Iwe we Mwene uwa nsi iya Isilayeeli!#1:49 Iwe we Mwana wa Mulungu! Iwe we Mwene uwa nsi iya Isilayeeli! UNasaniyeeli kumwita amazina igo, kwe kuuti uweene ahitihaga kuuti uYeesu wu Meesiya. Vhaazya 2 uSaamweli 7:12-16; iZabuuli 2:6-7.” 50UYeesu ahamwamula nu kumuvhuziilizya kuuti, “Vhuli, ukwitiha, mwe pe nakuvhuuzya kuuti, nkuvhwenyi lwe utendiime pansi pi ituvhu? Kwe uzilole izinji impiti nkaani izya kusukumizya kuluusya izi!” 51UYeesu ahajendeelela kuyanga kuuti, “Nalyoli nkuvhavhuuzya kuuti, kwe mulole ku mwanya kwigusile, avhahavhizya avha Mulungu vhakuzuvha nu kwiha pali ine ne Mwana wa Aadamu.#1:51 UMwana wa Aadamu: Vhaazya mu Ntantiho izya Mazwi aMajeni.”
നിലവിൽ തിരഞ്ഞെടുത്തിരിക്കുന്നു:
uYoohani 1: nih
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2021 Wycliffe Bible Translators, Inc.