uLuuka 24
24
Kuzyuha ukwa Yeesu
(uMataayi 28:1-10; uMaaliko 16:1-8; uYoohani 20:1-10)
1Isiku ilya Pamulungu, inzanshi nkaani lwe kukuvhambunkana, avhantanda vhaala vhahasogola ku mbiipa. Avhantanda ivho, vhányatuuye amafuta ge gakununshila nu mulembo we vhásengiinye uwa kudinda kuuti ishaala shitahanunshe. 2Lwe vhaafiha, vhahalola ivhwe lye vhágubishiiye vhaligalagasiizye, lili pa luvhazu pa mbiipa. 3Pe vhahinjila muhati, vhahaaga ishaala isha Mwene uYeesu naashimo, vhahasukumila nkaani! 4Lwe vhakusukumila, vhahitushila avhanaavuli vhavhili, vhe vházwaye amenda amazelu, ge gakunyengʼenyela nkaani, vhimiliiye papiipi navho. 5Avhantanda ivho, ilyoga lihavhalema. Vhahakupama pansi. Pe avhanaavuli vhaala vhahavhavhuuzya vhahati, “Shooni she mukumulondola we mupuuma ku vhafwe? 6Ataliipo ipa! UMulungu amuzyusiizye! Mukumbushe amazwi ge ávhavhuziizye lwe áali ku Galilaaya pooka niimwe, kuuti, 7‘Yikwanzilwa ne Mwana wa Aadamu vhambiishe mu nyoovhe izya vhatalamalandu nu kungoga pa shihovhenkanyo, ileelo isiku ilya vhutatu ndizyuha’!”
8Avhantanda ivho, vhahakumbuha amazwi igo aga Yeesu. 9Pe vhaheepa pa mbiipa, vhahasogola kuvhavhuuzya inongwa izyo zyonti avhasundikwa avha Yeesu 11, pooka na vhanji vhonti. 10Avhantanda ivho vháali vhe vhano: uMaliiya uwa ku Magidaala nu Yowaana, nu Maliiya umaayi uwa Yaakobu, pooka na vhantanda avhanji vhe vháamile pooka navho.
11Avhasundikwa lwe vhiivwa inongwa izyo, vhahalola zya vhuvhwelevhwele, vhatahiitiha. 12Ileelo uPeeteli ahimiilila naluvhiilo, ahashimbila uluvhilo kusogola ku mbiipa. Lwe aafiha, ahinanjizya mu mbiipa, ahalola we mwenda vhweleele we vhámusyililiiye uYeesu. Aheepa paala, akusukumila zye zifumiiye.
UYeesu akuyilolesya ku vhasundikwa vhaakwe vhavhili
(uMaaliko 16:12-13)
13Isiku liniilyo ilya Pamulungu, avhasundikwa vhavhili avha Yeesu vhahasogolaga mu lutala ulwa Emaawu. Ulutala ulwo, lwámile uvhutali uvhwa kujenda amasaala gavhili kufuma ku Yelusaleemu. 14Mwi idala avhasundikwa ivho vhahapangaga inongwa zye zyáfumiiye. 15Lwe vhakujendeelela kupanga izyo, uYeesu wuuyo ahinza nu kwanda kujenzanya navho, 16ileelo uMulungu ahavhavhiiha kuuti vhatahamumanye kuuti wu Yeesu.
17UYeesu ahavhavhuziilizya ahati, “Mukupanga nongwa vhuli izi lwe mukujenda?” Avhantu ivho vhahimiilila, uku vhaswimiliilwe. 18Wooka muli vhuuvho, we izina lyakwe vhahatinji uKilewoopa, ahamwamula ahati, “Vhuli, weneewe weeka mu vhonti avha ku Yelusaleemu we utamanyile zye zivhombesile kuula insiku izi?” 19Woope uYeesu ahati, “Kuli nongwa vhuli?” Vhahamwamula vhahati, “Inongwa zye vhamuvhombeeye uYeesu uwa ku Naazaleeti. Umuntu we aamile mukuvhwi, havhili aamile na maha aminji mu mbombo na mu mazwi gaakwe, havhili uMulungu na vhantu vhamwitihaga. 20Ileelo avhapiti avha vhapuuti, na vhasongo vhiitu, vhaamutwaye kuuti alongwe nu kumugoga. Pe vhamugoga kwi idala ilya kumuhomeela pa shihovhenkanyo. 21Uyo we twamusuvhilaga kuuti, kwe atutavhule iswe swe Vhaisilayeeli. Ishi, ileelo lisiku lya vhutatu, kufuma pe zyonti izyo zyaavhombesile.
22“Havhili avhantanda vhamo mu mpuga yiitu vhatugandusiizye, mwe pe ileelo lwe kukuvhambunkana, vhasogooye ku mbiipa, 23ileelo vhaazile ishaala isha Yeesu naashimo mu mbiipa. Vhinzile kutuvhuuzya kuuti vhalolesheliilwe na vhahavhizya vhe vhavhavhuziizye kuuti uYeesu azyusile. 24Pe vhamo mu mpuga yiitu vhasogola ku mbiipa, vhoope vhaaga zili sheshiila inza vwe avhantanda vhaala vhayanzile, ileelo uweene vhatamuvhwenyi.”
25Uweene uYeesu ahavhavhuuzya ahati, “Imwe mwe vhapukupuuku! Shooni she amooyo giinyu magomu kwitiha zyonti zye avhakuvhwi vháyanzile? 26Vhuli, uChilisiti atanzilwaga kutuushila mu mayimba igo gonti, pe pisinda ayinjile mu vhushindamu vhwakwe?” 27Pe ahavhavhuuzya inongwa zyonti izya mu Vhusimbe uVhufinjile zye zyásimviilwe ku zyakwe. Ahayanga izyo kwandila amakalaata aga Moose na makalaata gonti aga vhakuvhwi.
28Lwe vhapalamila kufiha mu nkaaya ye vhahasogolaga, uYeesu ahavha ngati akupitiilila. 29Pe avheene vhahamulambiilizya nkaani vhahati, “Tudiilaje! Ishi izuvha lyaswa, ishiisi shapalamila.” Pe uYeesu ahinjila mu nyumba, ahatendama navho. 30Lwe vhatendama pooka kulya ishaakulya, uYeesu ahanyatula ikaati, ahamusalifwa uMulungu, ahamensula, ahaavhapa. 31Ahavhaliilizyo hanaaho, uMulungu ahavhavhiiha kuuti vhamanye kuuti wu Yeesu. Woope panaapo ahateega pilongolela lyavho. 32Pe vhahapanzanya vhahati, “Zye ahavhaliilizyo he apangaga niiswe mwi idala, kutuvhuuzya zye zili mu Vhusimbe uVhufinjile, amooyo giitu gaseshelaga nkaani!”
33Ahavhaliilizyo hanaaho vhaheepa, vhahagaluha ku Yelusaleemu. Ukwo vhahavhaaga avhasundikwa avha Yeesu 11 vhavhungiine pooka na vhanji, 34vhahavhavhuuzya vhavhili ivho vhahati, “Nalyoli uMwene wiitu uYeesu azyusile! Amulolesheeye uSiimoni!”
35Pe vhoope vhahavhapanjila zyonti zye zyávhafumiiye mwi idala, na vwe uYeesu ámanyisile ku kwavho lwe akumensula ikaati nu kuuvhapa.
UYeesu akuvhaloleshela avhasundikwa vhaakwe
(uMataayi 28:16-20; uMaaliko 16:14-18; uYoohani 20:19-23; iMbombo izya Vhatumwa 1:6-8)
36Lwe avhasundikwa avha Yeesu vhakujendeelela kuyanga izyo, naluvhiilo uYeesu wuuyo ahimiilila pahati yaavho. Ahavhalamuha ahati, “Muvhe nu vhutehamu!” 37Vhahaganduha nu kwogopa nkaani, mwe pe vhahasiivhaga kuuti vhamulola muzimu.
38Ileelo uYeesu ahavhavhuuzya ahati, “Shooni she mukusaaga? Shooni she muli na maganigani mu mooyo giinyu? 39Yeenyi inyoovhe zyane ni vinama vwane, pe mumanye kuuti neene. Mumpalamansye mulole, mwe pe umuzimu atali nu muvhili, poosye amafupa. Ileelo ine inza vwe mukundola, indi nu muvhili na mafupa.”
40Lwe uYeesu aamala kuvhavhuuzya amazwi igo, ahavhalolesya amavhamba aga mu nyoovhe na ga mu vinama vwakwe. 41Pe avhasundikwa vhaakwe vhahaseshela nkaani, uku vhakusukumila, vhahafishila kusiivha kuuti pamo nalyoli te wuuyo! Lwe vhakujendeelela kuseshela nu kusukumila, uYeesu ahavhavhuziilizya ahati, “Muli ni shaakulya shimo ipa?” 42Vhahaamupa ishipande isha nswi inyooshe. 43Ahaposheela nu kulya pilongolela lyavho. 44Pe ahavhavhuuzya ahati, “Izi, zye naavhavhuziizye ahavhaliilizyo he naamile pooka niimwe, kuuti inongwa zye zisimviilwe mu ndajizyo izya Moose, na makalaata aga vhakuvhwi, na mwi ikalaata ilya Zabuuli zye zikuyanga izyane, zyonti zikwanzilwa zivhombeshe.”
45Pe ahavhiigula amatwe gaavho, inga vhavhumanye uVhusimbe uvhwo, 46ahavhavhuuzya ahati, “Yisimviilwe mu Vhusimbe uVhufinjile kuuti, uChilisiti aliyimvilwa nu kufwa, ileelo isiku ilya vhutatu, alizyuha. 47Havhili kwi izina lyakwe, avhantu avha mu nsi zyonti, kwandila ku Yelusaleemu, vhalivhakumusizya kuuti vhatontaje imbiivhi zyavho, inga uMulungu avhaswile. 48Izi zye zivhombesile, imwe mwe vhahoome, muvhavhuzyaje na vhanji.
49“Tejeelezyi! Ishi ine kuuti imuleete kuli imwe uMupepo uMufinjile we uTaata waane áfinzile kuuti aliivhapa. Ishi, mutendame mu nkaaya ino iya Yelusaleemu, kufishila pe muliposheela amaha kufuma ku mwanya.”
UYeesu akunyatulwa kusogola ku mwanya
(uMaaliko 16:19-20; iMbombo izya Vhatumwa 1:9-11)
50Pisinda, uYeesu ahafuma navho mu nkaaya, ahasogola ku luvhazu kwe kwápalamiine nu lutala ulwa Besaniya. Lwe vhaafiha paala, ahavhuusya inyoovhe zyakwe kumwanya, ahavhaloota. 51Lwe akujendeelela kuvhaloota, ahaseguha hansi, pe ahanyatulwa kusogola ku mwanya.
52Pe vhahamupuuta, vhahagaluha ku Yelusaleemu, uku vhakuseshela nkaani. 53Insiku zyonti, vhahavhanga pa Nyumba iMfinjile, vhahamutiimaga uMulungu.
നിലവിൽ തിരഞ്ഞെടുത്തിരിക്കുന്നു:
uLuuka 24: nih
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2021 Wycliffe Bible Translators, Inc.