isizwur 1
1
rbbi ih̬lq ignwan d‑wakal
1ġ‑isizwur ih̬lq rbbi ignwan d‑wakal. 2ih̬wa‑wakal, ur‑gis‑illi yat. tillas ad‑kullu‑idln aman dranin, ar‑itkka rruḥ n‑rbbi f‑iggi n‑waman. 3yini rbbi: «a‑tili tifawt» s‑tlla tifawt. 4iẓr rbbi is‑tfulki tifawt. ibḍu rbbi tifawt d‑tillas, 5ig i‑tifawt ‹azal›, ig i‑tillas ‹iḍ›. tzri‑tdggʷat ifaw ṣbaḥ, ig ass amzwaru.
6yini rbbi: «a‑yili lhawa ġ‑wammas n‑waman a‑tn‑ibḍu s‑sin,» 7s‑illa ġmkan. iskr rbbi lhawa, ibḍu srs aman n‑ddu lhawa d‑waman n‑iggi n‑lhawa, 8ig i‑lhawa ‹ignwan›. tzri‑tdggʷat ifaw ṣbaḥ, ig wis sin‑uwssan.
9yini rbbi: «ad‑kullu‑munn‑waman n‑ddu ignwan ġ‑yat‑tsga, f‑a‑di‑tban taġart,» s‑illa ġmkan. 10ig i‑taġart ‹akal›, ig i‑waman lli‑munnin ‹amda›. iẓr rbbi mayan ifulki. 11yini ilmma: «a‑di‑tmġi‑tzgzut ġ‑wakal, gn igʷlasn s‑imadn‑nsn d‑iṣġarn s‑lġllat lli‑ġ‑llant taqqayin‑nsn, kraygatt kra d‑mklli iga ġ‑wakal,» s‑illa ġmkan. 12tmġi‑tzgzut ġ‑wakal, gn igʷlasn kraygatt kra d‑mklli iga‑wamud‑ns, gn iṣġarn kraygatt kra d‑mklli tga lġllt‑ns. iẓr rbbi mayan ifulki. 13tzri‑tdggʷat ifaw ṣbaḥ, ig wis kraḍ‑uwssan.
14yini rbbi: «ad‑ilint tifawin ġ‑lhawa n‑ignwan, ar‑aṭṭunt azal d‑iyḍ, ar‑malant timitar d‑izmaz, ar‑ssbayannt ussan d‑isggʷasn. 15ad‑sufunt ġ‑ignwan ar‑tisfiwnt i‑wakal,» s‑illa ġmkan. 16iskr rbbi snat tifawin mqqurnin, iskr tafukt a‑tḥkam azal, iskr ayyur a‑iḥkam iḍ, iskr itran ula ntni. 17ig‑tn‑in ġ‑lhawa n‑ignwan ad‑isfiwn i‑wakal, 18ar‑tḥkamn azal d‑iyḍ ar‑aṭṭun tifawt d‑tillas. iẓr rbbi mayan ifulki. 19tzri‑tdggʷat ifaw ṣbaḥ, ig wis kkuẓ‑uwssan.
20yini rbbi: «ad‑ɛmmrn‑waman s‑kullu ma‑igan lmh̬luqat ddrnin, ilin ula igḍaḍ ar‑taylaln ġ‑ignwan f‑iggi n‑wakal.» 21ih̬lq rbbi luḥuš mqqurnin n‑umda, ula kullu lmh̬luqat lli‑itmussun ġ‑waman kraygatt kra d‑mklli iga, ula kullu ma‑itaylaln kraygatt kra d‑mklli iga. iẓr rbbi is‑ifulki. 22ibark‑tn yini‑asn: «tarwat tigatm tɛmmrm imdwan, tigatm ula kunni n‑igḍaḍ f‑wakal.» 23tzri‑tdggʷat ifaw ṣbaḥ, ig wis smmus‑uwssan.
24yini rbbi: «ad‑ilint lmh̬luqat ddrnin f‑wakal, gn lbhaym d‑luḥuš n‑lh̬la d‑kullu ma‑itštutuln f‑wakal, kraygatt kra d‑mklli iga,» s‑illa ġmkan. 25iskr rbbi luḥuš kraygatt kra d‑mklli iga, iskr lbhaym kraygatt kra d‑mklli iga, iskr kullu ma‑itštutuln f‑wakal kraygatt kra d‑mklli iga. iẓr rbbi mayan ifulki.
26yini rbbi ġakudan: «a‑nskr adam f‑ṣṣurt‑nġ ad‑gn zund nkkʷni. rad‑ḥkamn f‑islman n‑imdwan d‑igḍaḍ n‑ignwan d‑lbhaym d‑luḥuš n‑lh̬la ula kullu ma‑itštutuln f‑wakal.» 27ih̬lq rbbi mddn f‑ṣṣurt‑ns. awtm d‑tuwtmt, f‑ṣṣurt n‑rbbi a‑f‑tn‑ih̬lq. 28ibark‑tn yini‑asn: «tarwat tigatm, tɛmmrm ddunit tḥkamm fllas, tili kullu ġ‑ddu‑ufus‑nun. a‑tḥkamm f‑islman n‑imdwan ula igḍaḍ n‑ignwan ula kullu ma‑iddrn ar‑ittidu f‑wakal.» 29yini‑asn rbbi: «hati fkiġ‑awn kullu ma‑igan imndi s‑wamud‑ns ula kullu ma‑igan aṣġar s‑lġllt‑ns a‑zġ‑gisn‑tšttam. 30fkġ kullu tazgzut nna‑itmġayn i‑luḥuš n‑lh̬la d‑igḍaḍ n‑ignwan d‑ma‑itštutuln f‑wakal a‑zġ‑gis‑šttan ntni ula kullu ma‑ġ‑tlla rruḥ n‑tudrt.» s‑illa ġmkan. 31iẓr rbbi kullu ma‑iskr, hati ifulki bahra. tzri‑tdggʷat ifaw ṣbaḥ, ig wis sḍis‑uwssan.
നിലവിൽ തിരഞ്ഞെടുത്തിരിക്കുന്നു:
isizwur 1: SHILOT20
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Selected Old Testament in Tashelhayt (Latin script) © United Bible Societies, 2020.
Robert Bernard Dann.