Matiye 11
11
Daw sin Zaŋ-Baptistə
(Luk 7.18-35)
1Kəri məni Zezu ndo' vun ta' kwa rum ne kə sum ta zə rum mə guɓ wa hoɓ, mum 'ya ar ri rum kədan mum ta' kwa kə ka' dan wə so cem cem mə nya rumu.
2Zaŋ-Baptistə, məni wə so daŋgay', mun dan sin Kris. Zə rum, mum sin sôwâ məsin mə du sum ta zə rum hay' Zezu. 3Handay ci vun rumu: «Ha swə məni wə də mbə nə su? Ko namba ji swə məsin su?» 4Zezu ɗam vun ndaya: «I də in dan kwa məni hi we ɓay dan məni hi mun daŋ' ne kə Zaŋ: 5Dəŋâr wə weri, lem wə ta, mgbo' wə faŋ kəleŋ, ndum wə mun hum, mar wə car i, ɓay sôwâ wə ka' Dan mə Kəɗam ne kə sum ca#Esa 35.5-6. 6Kəɗam zə swə məni cu də ar ô um ge mi!»
7Kəri məni sum ta zə Zaŋ 'ya dle, Zezu təŋ kə in dan wa Zaŋ ne kə raw sôwâ: «Hi ta kar mi du gop su? Hom məni simbeɗ wə nyen su? Cu mə su? 8La' cu mi si, hi ta kar mi su? Swə məni ge mbraw mə kə mbra' su? Ama sôwâ məni ge mbraw mə kə mbra', handay gay' wə so jwa. 9La' ndəna' si, hi ta kar mi su? Bə ka' dan su? Awo, na in mi ne, hi we swə məni pâ bə ka' dan nə si. 10Zə Zaŋ nə swə məni Ɗerwa Ifray wə in dan wa rumu: A kar ri'i, na sin vay sin man kofo ru kədan mum gila' vari wû ne#Mal 3.1. 11Na in mi ne, kəzini: Wə du sôwâ məni rawkwa wə vra' daŋ', swə mə pâ Zaŋ-Baptistə kə mbra' cu mi. Ama swə mə kî wə du sôwâ məni Ifray wə suk jwə wa nday pâ Zaŋ kə mbra' si.» 12Daka ri məni Zaŋ-Baptistə ka' dan hâ tam, sôwâ wə ɓar Jwə Ifray, ɓay sôwâ mə kə gbəgboŋ gak ve ri rumu. 13Sum ka' dan daŋ' kə dan dlay Moyizə in dan wa ri məni Ifray wə də suk jwə wa sôwâ hâ day ri Zaŋ. 14Ɓay hi la' wa' ve dan man si, Zaŋ nə mum Eliya məni sum ka' dan ka' dan wa mbə rumu. 15Swə məni kə hum, say bə rum nə munu! 16Na də kənji' sôwâ mə tam kə sa su? Handay ra' nji kə dawre' məni gay' wə lumo ɓay wə do dan mbok nji:
17"Namba pe duɓ kəya', ama hi cu dla' mi!
Namba ɗâ nyem tum vun zra, ama hi cu ci' mi!"
18«Kəri məni Zaŋ mbə, mum cu ti kwati ko ce sum mi, ɓay hi ini: mum kə gam wa rumu! 19Kəri məni Vay sumra' mbə, mum ti kwati kə ce kwace mi, ɓay hi ini: I kar swə mə ni na! Mum nə bə ti mə mbri kə bə ce kwa mə mbri. Mum bây sum ɓawa kwa kə sum gi kwa mə bro'o! Ama sôwâ gak we gwet Ifray zə sin mə njeŋ məni mum wə gi.»
So cem cem məni vaɗ Zezu
(Luk 10.13-15)
20Kəri rum, Zezu təŋ kə mgbor so cem cem məni mum gi yew wə han, zə sôwâ məni gay' wə so rum kuni cu faŋ vunduk nday mi. Mum ini: 21«Boni wa riŋ, so Korazin! Boni wa riŋ, so Betsayda! Zə yew məni na gi kuni wə hay' ri la' gi kəzə wə so Tir kə so Sidoŋ si, ka ɓa' si sôwâ so rum ge mbraw zim bor, ɓay handay far but tu nday kədan handay ta' i handay faŋ vunduk ndaya si#Esa 23.1-18; Eze 26.1—28.26; Amos 1.9-10. 22Zə rum, na in mi ne: Kə bəka dan ɓok, boni də ke wa ri ɓayrum, pâ boni məni ke wa so Tir kə so Sidoŋ nə si. 23Ɓay həŋ, so Kapernawum, həŋ ɗik i Ifray də maŋ tle hâ də wafray su? Cu mi! Mum də maŋ jar hâ də ri məni sum mar wə hana. Zə yew məni na gi kuni wə hay' riŋ la' gi kəzə wə so Sodomə si, so rum də ke hâ tama. 24Zə rum, na in mi ne: Kə bəka dan ɓok, boni də ke wa riŋ ɓayrum, pâ boni məni də ke wa so Sodomə si.»
I mbə hay' rin kədan hi fe pemâya
(Luk 10.21-22)
25Kəri rum, Zezu ini: «Bəba, Bârî mə wafray kə mə nya, na gi soko ne nu zə ha ta' kwa məni ha pe' hay' sum gwet kə sum kwawe ne kə dawre'e. 26Awo, Bəba, kwa rum gi ndəna', zə ha kə məni wa'a.» 27Ba man ar kwa daŋ' wə ɓa rini. Swə ɗaw cu we Vay mi, say Ba Vaya. Ɓay swə ɗaw cu we Ba Vay mi, say Vay kə sôwâ məni Vay nə wa' kədan mum um ta' nday ne#Zaŋ 3.35.
28«Hi sôwâ daŋ' məni cik kə kwazi' mə kə mbra' wa ri, i mbə hay' rin, ɓay na də mi ne pemâya. 29I tle gu jewre rin cin də jewre ri, ɓay i wum kwa hay' rin, zə na kəɗam, ɓay vunduk rin 'yeŋe. Ɓay hi də fe pemây zə tu ri#Jer 6.16. 30Gu jewre məni na də mi ne cu kəcik kədan hi tle mi, ɓay kwazi' məni na də cin wa ri nə cu kə mbra' mi.»
നിലവിൽ തിരഞ്ഞെടുത്തിരിക്കുന്നു:
Matiye 11: KMN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Le Nouveau Testament et Psaumes en Peve © Alliance Biblique du Tchad, 2014.