Matiye 19
19
Kwata' Zezu wa dan bur ma
(Mak 10.1-12)
1Kəri məni Zezu ndo' vun dan ta' məni kuni si, mum 'ya ar nya Galile ɓay ta wə nya Zude məni wə dapa ga' sin ze Zurdeŋ. 2Sôwâ raw dle tu si wə ta zə rum, ɓay mum car gaɓ ndaya.
3Sôwâ məsin mə du kul sôwâ Zuwif mə ɗe kə Farisiyen mbə hay' rum kədan handay um kaw kə dan ge vunu. Handay ci vun rumu: «Dan dlay mba ne vari ne kə səmanji kədan nə bur ma rum zə dan cem cem si su?» 4Zezu ɗam vun ndaya: «Hi cu in dan məni wây' nə mi su? Kə təŋ zu kwa Bə gi kwa gi səmanji kə ma#Tzk 1.27; 5.2, 5ɓay mum ini: Zə rum səmanji də ar ba um kə ya um ɓay tləɓa nji kə ma rum, ɓay handay hoɓ jak də faŋ tu ɗawa. 6Ndəna' handay cu hoɓ za' mi, ama tu ɗawa. Swə cu kə vari kədan mum bur kwa məni Ifray tləɓa nji si nə mi!» 7Kul sôwâ Zuwif mə ɗe kə Farisiyen ci vun rumu: «La' ndəna' si, zə mi Moyizə ne vari ne kə səmanji kədan nə wây' ɗerwa bur nji nday ne kə ma rum ɓay 'way sə kə ndi su?» 8Zezu ɗam vun ndaya: «Moyizə ne vari bur rawkwa mi ne ni zə wa ri ɓokrok, ama kə təŋ zu kwa dan rum cu ndəna' mi. 9Na in mi ne: Səmanji la' bur ma rum məti cu gi nja mi, ɓay mum faŋ cin ma məsin si, ka bə rum gi nja#Mat 5.32; 1Ko 7.10-11.»
10Sum ta zə Zezu la' ne numu: «Dan rum la' ndəna' mbok səmanji kə ma rum si, pram dan cin nji.» 11Zezu ɗam vun ndaya: «Sôwâ daŋ' cu gak ve dan məni nə mi, say sôwâ məni Ifray ne gbəgboŋ rum ne ndaya. 12Vari cem cem məni wə tak njiwkwa dan cin ma kəta'a. Sôwâ məsin jəraw daka vra' nday, sôwâ məsin faŋ jəraw kə ɓa sumra', ɓay sôwâ məsin kərem cu cin ma mi zə handay ar tu nday kədan Ifray suk jwə wa ndaya. Swə məni gak ve dan ta' məni nə, nə ve ye!»
Zezu kuswa' dawre'e
(Mak 10.13-16; Luk 18.15-17)
13Sôwâ ra' dawre' mbə hay' Zezu kə nday kədan mum njay ɓa rum wa nday ɓay in dan kə Ifray zə ndaya. Ama sum ta zə rum dlay nday kə gbəgboŋo. 14Zə rum, Zezu la' ne ndaya: «I ar dawre' mbə hay' rin, i tak nday mi, zə Ifray wə wa' kədan mum suk jwə wa sôwâ məni ra' nji kə ndaya.» 15Mum faŋ njay ɓa rum wa nday, ɓay kəki rum, mum 'ya ar ri rumu.
Vay jiɗ mə ndaka
(Mak 10.17-31; Luk 18.18-30)
16Swə məsin mbə hay' Zezu ɓay ci vun rumu: «Bə ta' kwa, na də gi kwa mə ɓay mi kədan na fe nyî mə də hâ su?» 17Zezu ɗam vun rumu: «Zə mi ha ci vun rin wa kwa mə ɓay su? Swə mə ɓay ɗaw kəta'a. Ha la' wa' kədan ha fe nyî mə də hâ si, a ta zə dan dlaya.» 18Swə nə ci vun rumu: «Dan dlay mə ka su?» Zezu ɗam vun rumu: «A ci mar mi, a gi nja mi, a kəy hura mi, a hay dan wa swə məsin mi. 19A mbâ ba wû kə ya wû, a bə jik wû ce' ndə məni ha bə tu ru.#Psi 20.12; Lev 19.18» 20Vay jiɗ nə la' ne numu: «Na ta zə dan dlay məni kuni daŋ' si. Gwa' mə ka kədan na gi kərem su?» 21Zezu ɗam vun rumu: «Ha la' wa' kədan ha ke swə mə njeŋ si, a də gi coɓ kwa wû daŋ' də rəka, ɓay a də ɓul səlay rum ne kə sum ca, ndəna' ha də ke kə ndak wafray ɓo. Kəki rum, a mbə ɓay a ta zə rini.» 22Ama kəri məni vay jiɗ nə mun dan rum, mum 'ya dle kə dan ɗik zə mum ndak juku.
23Zə rum, Zezu la' ne kə sum ta zə rumu: «Na in mi ne, kəzin', kəcik ɓayrum kədan bə ndak ze wə ri məni Ifray wə də suk jwə wa sôwâ umu. 24Ɓay na wə in dan məni nə mi ne kərem, kəcik kədan njoŋnjoŋ pâ zra batal, ama kəcik zə bə ndak kədan ze Jwə Ifray pâ num si.» 25Kəri məni sum ta zə Zezu mun dan rum, dan rum jin' wa ne nday juk, ɓay handay ini: «La' ndəna' si, sa nə gak ke kə nyî mə də hâ su?» 26Zezu kar nday ɓay la' ne ndaya: «Sumra' cu gak gi kwa rum mi, ama Ifray gak gi kwa daŋ'ŋ.»
27Zə rum, Piyer la' ne numu: «A kar ri'i! Namba ar kwa daŋ' ɓay namba wə ta zə ru. Namba də fe mi su?» 28Zezu la' ne ndaya: «Na in mi ne, kəzini: Kəri məni Vay sumra' də suk wa kwasuk um mə kə mbra' wə nya mə mbrew, hi sôwâ mə guɓ wa hoɓ məni ta zə rin, hi də gay' wa kwasuk jwə ta' kədan hi ɓok dan wa zə saŋ Israyel mə guɓ wa hoɓo. 29Ɓay sôwâ daŋ' məni ar so nday, njər nday, njar nday, ba nday, ya nday, daw nday, kə sine nday zə rin, handay də fe kwa rum də han kis vun nyem kis, ɓay handay də fe nyî mə də hâ. 30Ama sôwâ juk məni vun kofo tam, handay də faŋ sôwâ mə kəki, ɓay sôwâ juk məni sôwâ mə kəki tam, handay də faŋ sôwâ mə vun kofo.»
നിലവിൽ തിരഞ്ഞെടുത്തിരിക്കുന്നു:
Matiye 19: KMN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Le Nouveau Testament et Psaumes en Peve © Alliance Biblique du Tchad, 2014.