Matiye 22
22
Dan mə gəgan wa kwati mə ri dərə
(Luk 14.15-24)
1Zezu in dan mə gəgan kərem kədan mum ta' kwa ne kə sôwâ məni mun dan umu. Mum la' ne ndaya: 2«Vari məni Ifray wə də suk jwə wa sôwâ um nə ra' nji kə dan məni na: Jwə məsin təŋ kə keɓ kwa zə vay um wə də gi cer cin ma. 3Mum sin sum sin um kədan handay ɗe sôwâ mbə ti kwati wə ri dər rum, ama handay cu mun mbə mi. 4Mum faŋ sin sum sin məsin kə dan mə ni na: I in ne kə sôwâ məni na ɗe ndaya: "I kar ri'i! Na gila' kwati rum si. Na fol ba naw man kuni kə daw naw man mə i ili. Kwa daŋ' gila' si. I mbə ti kwati dər rum ye!" 5Ama sôwâ məni mum ɗe nday cu tle fur dan rum mi, ɓay handay 'ya ta vun sin ndaya. Swə ɗaw ta sine um, swə məsin 'ya vari gaŋ par, 6ɓay sôwâ məsin kaw sum sin kuni, handay rik nday ɓay ci ndaya. 7Jwə nə tle bak, ɓay mum sin soje um kuni, ta ci sôwâ məni ci sum sin um kuni ɓay ge ku wa so ndaya.» 8Mum faŋ la' ne kə sum sin umu: "Kwati dər gila' si, ama sôwâ məni na ɗe nday cu nde i mbə mi. 9Zə rum, i də wə vari mə mbri, ɓay i ɗe sôwâ daŋ' məni hi za' wə han kədan handay mbə ti kwati dər rumu." 10Sum sin 'ya ta wə vari cem cem, ɓay handay ɓawa sôwâ daŋ' məni handay za' wə han, sôwâ mə bro' kə sôwâ mə ɓay ta', ɓay rawti so dər nyen kə sôwâ.
11«Jwə nə ze ta rawti so kədan mum kar sôwâ məni mum ɗe nday, ɓay mum we swə ɗaw han du nday məni cu ge mbraw dər mi. 12Mum la' ne numu: "Bây man, gi ma kədan ha ze mbə ti dan mbraw dər su?" Ama swə nə cu ɗam dan mi. 13Kəri rum, jwə nə la' ne kə sum sin umu: "I baŋ sem rum kə ɓa rum, ɓay i ge num də rəka wə ri mə ura'a: Mum də ci' kə cwə se' wə hana#Mat 8.12; Luk 13.28." 14Kəzin' sôwâ mə ɗe rum juk, ama sôwâ mə da' rum wə cepe.»
Ci vun wa po' grama
(Mak 12.13-17; Luk 20.20-26)
15Ndəna' kul sôwâ Zuwif mə ɗe kə Farisiyen ta gila' dan kədan handay kaw Zezu kə dan ge vunu. 16Handay faŋ sin sôwâ məsin mə du sum ta zə nday kə sôwâ məsin mə du kul sôwâ Zuwif mə ɗe kə Herodiyen kədan handay in ne kə Zezu: «Bə ta' kwa, namba we si, ha wə in tu dan, ɓay ha wə ta' vari Ifray njeŋ ne kə sôwâ daŋ', dan ne wəlok i sumra', zə ha cu gi sôwâ cem cem mi. 17A in dan ɗik wû ne mba ri'i: Dan dlay mba ne vari ne mba kədan namba po' grama hay' jwə mə mbri mə nya Romə si su? Ko po' mi su?» 18Ama Zezu we dan ɗik mə bro' nday, zə rum, mum ci vun ndaya: «Hi sum vur vur, zə mi hi wə keɓ kədan hi man kaw kə dan ge vun su? 19I ta' səlay məni hi wə po' grama kə ndi nə ne nan ri'i.» Handay ne səlay rum ne numu. 20Zezu ci vun ndaya: «Nyî tu kə semɗe sa wây' han məni nə su?» 21Handay ɗam vun rumu: «Nyî tu jwə mə mbri mə nya Romə na.» Zə rum, Zezu la' ne ndaya: «La' ndəna' si, i ne kwa jwə mə mbri mə nya Romə ne num, ɓay i ne kwa Ifray ne num ta'a.»
22Kəri məni handay mun dan rum, dan rum jin' wa ne ndaya. Handay ar num ɓay 'ya dle.
Ci vun wa dan pâ mbə mara
(Mak 12.18-27; Luk 20.27-40)
23Kə fəta rum, sôwâ məsin mə du kul sôwâ Zuwif mə ɗe kə Sadusiyen mbə hay' Zezu. (Handay sôwâ məni wə in i Ifray cu də ra' sôwâ mbə mar kpe mi). Handay ci vun rumu#Sin 23.8: 24«Bə ta' kwa, Moyizə ini: Swə la' mar dan ar daw si, say njər rum nə tle rənda mok njər rum cin kədan mum vra' daw kə sə tan njər rum məni mara. 25Ɓa' si, daw mə njiwkwa seɗa' kəta' wə du mba. Handay daw ya mə ɗaw, mə mbri cin ma ɓay mum mar, zə mum cu ar daw mi, mum ar rənda rum ne kə njər rumu. 26Kwa rum gi ndəna' kə buwa hoɓ rum ɓay buwa hinji' rum ta', hâ handay seɗa' daŋ'ŋ. 27Kəki nday daŋ', ma rə mar ta'a. 28Fəta məni sôwâ də pâ mbə mar, ma rə də ke ma sa du daw mə seɗa' kuni su? Zə handay daŋ' cin sa!»
29Zezu ɗam vun ndaya: «Hi wə vi' tu ri, zə hi cu we Ɗerwa Ifray ko gbəgboŋ Ifray mi. 30Zə kəri məni sôwâ wə də pâ mbə mar, njiwkwa kə rawkwa cu də cin nji mi, ama handay də ke ce' ndə sum sin Ifray mə wafraya. 31Ama wa dan sum mar məni də pâ mbə mar, hi cu in dan məni Ifray in nə mi su? Mum ini: 32Na Ifray Abraham, kə Ifray Isak, ɓay Ifray Yakub. Ifray nə Ifray sôwâ mə kə nyî mə də hâ, mum cu Ifray sum mar mi.»
33Kwata' um jin' wa ne kə raw sôwâ məni mun dan rumu.
Dan dlay mə mbri məni pâ nday daŋ'ŋ
(Mak 12.28-34; Luk 10.25-28)
34Kəri məni kul sôwâ Zuwif mə ɗe kə Farisiyen mun i Zezu ge mbi vun kul sôwâ Zuwif mə ɗe kə Sadusiyen, handay ɓa nji. 35Swə ɗaw du nday wa' kədan mum kaw Zezu kə dan ge vun, mum nə bə pay zu dan dlaya. Mum ci vun rumu: 36«Bə ta' kwa, dan dlay mə mbri məni pâ nday daŋ' nə kə mə ka su?» 37Zezu ɗam vun rumu: «A bə Bârî, Ifray wû, kə vunduk ru daŋ', kə nyî ru daŋ', ɓay kə gwet wû daŋ'ŋ. 38Mum nə dan dlay mə mbri ɓay kə mbra' ta'a. 39Bây hoɓ dan dlay mə mbri məni ra' nji nə ni na: A bə jik wû ce' ndə məni ha wə bə tu ru#Lev 19.18. 40Dan dlay Moyizə daŋ' kə dan ka' sum ka' dan daŋ' car wa dan dlay mə hoɓ mə ni kuna.»
Kris nə vay rawti sa su?
(Mak 12.35-37; Luk 20.41-44)
41Kəri məni kul sôwâ Zuwif mə ɗe kə Farisiyen ɓa nji, Zezu ci vun ndaya: 42«Hi ɗik dan mi wa Kris su? Mum nə vay rawti sa su?» Handay ɗam vun rumu: «Mum vay rawti David.» 43Zezu ci vun ndaya: «La' ndəna' si, gi ma Simbeɗ Ifray ta' ne kə David kədan mum um ɗe kə Bârî su? Zə David ini:
44Bârî in ne kə Bârî mana:
A suk ɓa fun rin,
hâ na də njay sum sî wû zə sem ru.
45David la' ɗe num kə Bârî si, gi ma kədan mum faŋ vay rawti David su?»
46Swə ɗaw du nday cu gak ɗam vun rum mi, ɓay daka fəta rum, swə ɗaw cu gak ci vun dan vun rum mi.
നിലവിൽ തിരഞ്ഞെടുത്തിരിക്കുന്നു:
Matiye 22: KMN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Le Nouveau Testament et Psaumes en Peve © Alliance Biblique du Tchad, 2014.