Luk 1
1
1O manigiu irasei we qoqo me ge ilo veta si a sargag tuwale o kakakae ape gene ŋaŋ iloke me ge tira ran veta amenina, 2tama iragai we gaganag tapare ma mun kamam; iragai nane me ilo mora ran ma ti alo qetegiu, wa me gagapalag o vavae; 3nau me nonom mok mulaŋ si we wia, ape nau me tatataga waririag mok veta ape savasava kalo sage ran ma, si na rave valvalug at muniko, gai wowut Theophilus, 4si ka gilala mantag moma o liŋe nun ape gene ŋaŋ ilone me vatvatogoko veta ti apena.
5Naŋ alo qoŋin Herod i maranaga ta Judea i tuara oloolo nasasana i Sakarias, wa ineia talo vavtig varleas non Abia; wa i rasoana amaia nanra nanatun Aaron, wa nasasana i Elisabeth. 6Wa irarua me toga taniniga tatarua alo nagon God, we mulemule mantag alo lea vatraŋ ŋaŋ wa o lea vatogoa ŋaŋ mon Lord, gate tila lai apena si me ava, 7wa naturara tagai, apen i Elisabeth o kelo, wa irarua me tamaragai wa me magatea veta.
8Naŋ me ge tamaike, ni we gagapalag o liŋe oloolo alo nagon God alo tanora talo vavtigiu anona, 9tama me avu veta muneira alo liŋe oloolo, o vaglala me qaloa sin kalo pata ilo iman Lord wa we siŋsiŋ o tangae punapuna; 10wa o vavtig sul nol we tataro avarea alo masao qoŋ te siŋsiŋ o tangae punapuna alolona. 11Wa o angel anan Lord me ŋaŋa lue munia we tira matua ape tano oloolo we siŋsiŋ o tangae punapuna avunana. 12Wa i Sakarias me iloa, natoqana we matikotiko, o gogogolo ti siwo ma avunana. 13Pa o angel me vava munia wa, Nipea gogolo, Sakarias; apen God me roŋotag nom o tataro; wa i rasoama i Elisabeth te vasus natuma muniko, wa ko te log nasasana i John. 14Wa ko te malakalaka wa te marekereke apena, wa o sul we qoqo te malakalaka ape non o wotava. 15Ape ni te liwoa alo nagon Lord, wa ni tete un namana o wine wa o pei te malesulesu apena, wa ni te uravag o Vui we Roŋo alo toqan ravevena ran; 16wa ni te ge vusiag kel ira nanat Israel we qoqo sur i Lord God ineira. 17Wa ni te moai goro nanagona alo vui wa alo mana non Elia, si a ge vusiag kel natoqara tamara ape natura, wa ira leasag ape liŋara taniniga we menaro, wa si a wurvag mun Lord o sul taurmate. 18Naŋ i Sakarias me vava mun o angel wa, Na te gilala gasei o ike? ape nau o tamaragai, wa i rasoak me magatea veta. 19Naŋ o angel me valui goroa, we vet wa, Inau i Gabriel, nau we tira ape nagon God, wa ni me vatraŋ nau ma si na vava muniko, wa si na gaganag muniko o lea we wia iloke. 20Wa ilo ma, ko te luto, ko tete vavava lai gai niŋa o qoŋ o gene ŋaŋ iloke te wesu alolona, ape ko gate nomtup nok o vavae ŋaŋ te wesu ran alo qoŋ ilone me vono veta apena. 21Wa o sul we toga nerei i Sakarias, wa me mamakei ape ni we maul alo ima we roŋo. 22Wa ni me rowolue, gate vava lai muneira; wa neira qara gilala si ni me ilo o taqaŋiu alo ima we roŋo; wa ni we tultul naqatuna muneira, pa ti toga luto galava. 23Wa me paso o qoŋ ŋaŋ ni we gagapalag alolora ni qara vareag kel ilo imana.
24Wa o qoŋ ŋaŋ ilone me paso, i Elisabeth rasoana me wune, wa ni me toga sus o vula tavelima, ti vet wa, 25I Lord me ge tamaike munau alo qoŋ ni me vaatev inau ma alolona si a lareag nan nau nok o vavae vasir amaira tanun.
26Naŋ alo vula laveteai God me vatraŋ o angel i Gabriel ilo laqlaqe vanua takele Galilea, wa o sase vanua a Nasaret, 27sur o malamala o qilowar me vatvatalig goroa veta mun o mereata nasasana i Joseph, talo iman David, wa nasasan o qilowar ilone i Meri. 28Naŋ ti mule pata, ti vet munia wa, We wia gai, iro gene sogov, i Lord amaiko; te logiko iro gene vawia amaira tavine ŋaŋ. 29Pa ni me iloa, natoqana we matikotiko aneane ape non o vavae, ti nom sikesike o vavae vawia iloke si we tama avea. 30Naŋ o angel ti vet munia wa, Nipea gogolo, Meri; ko me la suar o sogov amen God. 31Wa ilo ma, ko te wune alo toqama wa ko te vasus o mereata, wa ko te log nasasana i Jesus. 32Ineia te liwoa, wa te logia si Natun i Eleele; wa i Lord God te le at munia o tanoputepute maranaga non tamana i David. 33Wa ni te maranaga goro galava naiman Jakob; wa tete ulus marana anona ti tuai ti tuai. 34Naŋ i Meri me vava mun o angel wa, O ike te ge gasei? ape na gate gilala o mereata. 35Naŋ o angel me valui goro, we vet munia wa, O Vui we Roŋo te van ma avunama, wa o mana non i Eleele te malumalu goro ko: o manigiu te log i gene we roŋo te wota amaiko si Natun God apena. 36Wa ilo, i Elisabeth i sogoma me wune veta alo magatea; wa iro gene me logia we tuai o kelo navulana laveteai iloke. 37Ape itagai tea o vavae si te ae ran amen God. 38Naŋ i Meri wa, Ilo ma, iro rowrowovag anan i Lord: ni lai munau tama ko me vava ti. Wa o angel me vareag nania.
39Wa alo qoŋ ŋaŋ ilone, i Meri me tavaraka me mule gaplot sage ilo vanua vutvut, ilo laqlaqe vanua takele Judea; 40ti kalo pata lele iman Sakarias, ti wievavae i Elisabeth. 41Wa me ge tamaike, i Elisabeth me roŋotag o wievavae mon i Meri, pa o natmera we tiratira alo toqana. Wa i Elisabeth me liwat mun o Vui we Roŋo, 42wa ni we log raka mun o liŋai we poa, ti vet wa, Iniko iro vawia amaira tavine ŋaŋ, wa nawotoqama mulaŋ i gene vawia. 43Wa iloke ma avea mun nau si raveven i Lord inau te van ma surinau? 44Ape ilo, o liŋe wievavae anoma me niŋa ilo qoroksa, pa o natmera qara tiratira masekeseke alo toqak. 45Wa iro gene me nomtup mona, iro gene vawia nake; ape te ge vunvun ran aŋaisa o gene ŋaŋ ilone me vava ti munia amen i Lord apena. 46Naŋ i Meri me vava wa,
Naesuk we log ronoga i Lord,
47Wa naatak we masekeseke apen God i Vaesuk.
48Ape ni me ate sur ma avune tanun iro rowrowovag anana we pepewu:
Ape, ilo ma, nan ilokenake o taraŋiu ŋaŋ te log inau iro vawia.
49Ape i mana me ge o vasasa munau:
Wa nasasana we roŋo.
50Wa non o magarosa avunara sei we momogoa,
O taraŋiu o taraŋiu ŋaŋ.
51Ni me la lue non o vavakae mun napanena:
Ni me ara salsaleŋa ira nom liwoa kelura alo nom vasarig ŋaŋ talo toqara.
52Ni me rave sur ira liwoa nan o tano maranaga nora:
Pa ni me sau kalo ira pepewu.
53Ni me ge vaworai ira maliŋsala mun o gene ŋaŋ we wia:
Wa ni me vure mamasa ira meresom.
54Ni me tuan Israel o rowrowovag anana,
Sin nomkel ape non o magarosa;
55Tama ni me vava ti munra tamanina,
Mun i Abraham tara non o veve ti tuai, ti tuai.
56Wa i Meri me toga amaia tama o vula nitol, qara kel ilo imana.
57Wa navulan i Elisabeth me noga sin vasus, wa ni qara lav natuna. 58Wa ira tagvanuana tara sogona me roŋotag apen i Lord me vaqoqo non o magarosa munia, wa ineira me malakalaka tuwale amaia. 59Naŋ me ge si alo qoŋ lavetoliu neira me vug tuwale ma ape teve vaglala o natmera, wa te tiu nasasana si Sakarias tataga nasasan i tamana. 60Naŋ ravevena me valui goro, ti vet wa, Nipea tamaine, pa te logia si John. 61Naŋ neira me vava munia wa, Itagai tea amaira sogoma we loglogia mun o sasai iloke. 62Wa neira we qatmawui mun tamana si ni we maros we log nasasana isei. 63Wa ni me paere o tano raverave, me rave wa, Nasasana i John. Wa ineira nol me mamakei apena. 64Wa navalana me waka gaplot wa nagarameana, wa ni me vava laqa, we wievavae God. 65Wa o gogolo me ge nol iragai we toga peteŋ, wa me sororog o vavae nol iloke val vanua vutvut ŋaŋ a Judea. 66Wa irasei nol me roŋotag me map siwo ilo toqara, we vava wa, Gate tete gai iloke aŋaisa! Ape napanen i Lord me toga amaia.
67Wa i tamana i Sakarias me liwat mun o Vui we Roŋo, ti vava mun o liŋe prophet ti vet wa,
68Tur wievavae i Lord God nora Israel;
Ape ni me vaatev wa ni me tunkel o sul anana;
69Wa ni me vatira o maue esunina;
Alo iman David o tanun anana;
70(Tama ni me vava ti mun navalara prophet we roŋo anana, alo qeteg marama ma),
71O vaesunina nan o tavalalea, wa nan napanera nol we ŋustup nina;
72Sin magarosa ra tamanina, wa sin nomkel ape non o vatavata we roŋo;
73O vavae vagogonag ilone ni me ligog ti mun Abraham i tamanina,
74Sin vasoal ma munina, si te ge rowolue nina nan napanera tavalalea
Nina qara mawmawui apesov munia,
75Mun o togara we roŋo we taniniga alo nagona valqoŋinina.
76Pa iniko, tete, te logiko o prophet anan i Eleele:
Ape ko te moai goro nanagon Lord, si a wurvag namatesalana;
77A la o lolomaran ape esuva mun o sul anana,
Mun we nomvitag napugara,
78O manigiu o lolomagarosa non God inina,
O mera ma vunana te vaatev nina apena.
79Si a valawar irasei we pute alo silsiliga wa alo malumalu matea:
Si a ave taniniga naraŋonina ilo matesale tamata.
80Wa o tete ilone me poa sage, wa me vatogar alo atai, wa ni me toga alo vanua vanameag gai niŋa o qoŋ ni me ŋaŋalue taqai ma amaira Israel.
നിലവിൽ തിരഞ്ഞെടുത്തിരിക്കുന്നു:
Luk 1: MOTA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
New Testament was published by the British and Foreign Bible Society in 1931.