John 6
6
5,000 haela eapai lalavahaeape
1Ma eharu karia lei Iesu Galilee ma haru ukai ve elaupe, la ma ve rare Tiberius. 2Haela oaria areve aire auvahaeape ehovea ere are maea heahaha haela v'ila leivahaeape la horova veveke oaria eavavahaeape. 3Iesu kela akea pekape, are i kilea haela ila hareho le avape. 4Passover hurai, Jew haela ve hurai eapapo la, kihorera va maea iele. 5Iesu ovohae iupei haela oaria areve leia ekevahaelula ovohae eavape: Are Philip maeape, Ela ma haela hovea leiki eapai ilaea lahoa arilai ha? 6Are arero ma oharo v'ila au amuraeape — ehovea are va ore overa leipe are learia leikilai. 7Philip kavale maeape, 200 denarius#6:7 See Mt 18:28 ve pai kara hovea ka ma haela oaria eapai perepere hiki larilai. 8Areve kilea haela ae Andrew, Simon Peter ve akoreheari mari maeape, 9Akore hekai me aeave — areve barley pai 5 i ekaka 2 ila me apearo; aka ere va haela oaria hovea hovea lei va ka. 10Iesu mariape, Haela oaria au avakive maeaeaila. La ita ve hohe oaria, laelave haela oaria avape, ereve numera va 5,000 hovea. 11Iesu pai kaili ivaiva oharo ai kilea haela v'ila hamureape; kilea haela au avape, haela oaria aiarape; ekaka kara are laria hamureape, erero hovea hovea aiarape. 12Ere eharau huharaila. Are kilea haela maeaeape, Eapai eroe oaria korukaiavahaeaki, eharu ae va havoavaki ave. 13Laelave ere erero korukaiavahaeai — hara 12 la barley pai ve hakakaea ve heheloekoavape, la va eapai lalavahaeape haela ve kepea. 14Iesu leipe la horova eavape haela oaria maria maeaeape, O iele, ma va meahaiapo kihoreraki la peroveta haela iele.
Iesu lahua ivaiva leipe: Are ma ve loa veavelaripe
15Iesu eavape ere va arero eakea ila hakeavi arero amua leivahaeape, laelave are lahua ai muruhari kela pekape.
16Mea aeaki maeamaea areve kilea haela ma poe ve hoahukape. 17Ere vevaea horeavi Capernaum ve ukaki elahukape. Iesu aiai mea muru hoa ereve leia au horeraila. 18Mea eapapo hareavi, la ma aroaro le leipe. 19Ere ka 3 aka 4 mile hovea para koa koa ere va Iesu ma akea ve ekevila eavape; vevaea maeamaea vea; ere oaoka eapapo leivahaeape. 20Aka are erero maeaeape, “E oaoka kalaivahailue — Ara hiki ma.” 21Ere va ikiveveke ila arero hareavi vevaea ureve la aepape. Ere laria lei hoa haroapo ere va aupe la ita vevaea miri le pekape.
Haela ihova ve apevelavela leipe
22La opoa hare ma ukai apeape la haela eavape — vevaea aea karia — Iesu ve kilea haela elahukape la vevaea hiki: Iesu kara ere i hareho vevaea ve au horeavaila — aka areve kilea haela lahua elahukape. 23Lae vi va Iesu erero eapai hamuri aiarape. Tiberius maeamaea ve, la ita ve vevaea uku elahukape. 24Haela ovohae eavape Iesu i areve kilea haela ila leia karia — ere kara vevaea horeavi Capernaum leia pekai arero haropape.
25Ere arero ma ukai ve koarape la hoa ere arero mari maeape, Rabbi, a maia leahau leikila?
Ovokake ve Pai
26Iesu erero kavale maeaeape, O iele, o iele ara ero maeaeaive — eva araro la haropila iele ehovea horova veveke ikivere va ka, aka, ehovea e pai lalavahaeai eharau huharavahaeape. 27Poae leivila la eapai v'ila horova lei va arekaea — aka ovokake haiapo aeavila la eapai v'ila. Haela ve Akore la eapai ero aiarakilai, ehovea Oa Aualari are v'ila ihova leipe. 28Ere arero velavela leipe, Aualari ve horova hovea leikive va, ela learia leikilai ha? 29Iesu erero kavale maeaeape, Aualari ve horova iele ma — e va are paraeape la haela ikikekelakive. 30Laelave ere arero maeape, A va le ihova avivoila — ela ovohae eavi aro ikikekelakilai? A va le horova leikilai ha? 31Elave Aualau haela huakara ita manna lalavahaeape. Hohoa buka ve maria hape, Are erero kaia ve eapai larive avarape. 32Iesu erero maeaeape, Iele havahu ara ero maeaeaive — Moses ero la eapai kaia ve au avaraila. Arave Oa kaia ve la pai iele avarakilai. 33Ehovea Aualari ve pai iele — kaia ve kihoaupe ovokake avarakive la haela. 34Ere arero maeape, Amua, mea oaria hela elaro ma pai aikiaraki.
35Iesu erero maeaeape, Ara va ovokake ve pai iele — Arave maia ekeki la haela eroa he va ka — ae va arave rare kekelaki la haela are ma karave koa va ka. 36Aka ara ero lamaeaila — e araro ovohae eavi iki au kelavaila. 37Oa araro aikiarape la haela oaria ere va arave maia ekevahaeakilai. Arave maia ekeki la haela ara avaka va ka. 38Ara va kaia ve au kihoaila ara havahu ve ikivere horova leikive; 39Araro kiparaeape Oa ve ikivere maria — Are araro aikiarape la haela oaria, aire basileia hihi leiki la hoa, haroapo havoava va ka, are erero lei uralapakilai. 40Araro kiparaeape haela ve ikivere maria — Akore ovohae eavi ikikelavalula haela oaria ovokake haiapo apeakilai. Ara va aireaki la hare erero lei uralapakilai.
41Judea haela arero o vere maeape ehovea are meaeape, Kaia ve kihoaupe la pai va ara ma. 42Ere kai mari avahaeape, Ma va Iesu Joseph ve Akore ka ha? Ela va areve oa i lou ila ore. Are learia kimaeaive, Ara kaia ve kihoaupe. 43Iesu erero kavale maeaeape, Eva elarelare hihiri oharo kahukavalue. 44Haela ae arave maia ekeva ka: araro kiparaeape la Oa hiki araro hakeavakilai. Ara arero aireaki la hare lai urapakilai. 45Peroveta buka oharo mari hape, Ere oaria Aualari v'ila ore leikilai. Laelave overa iapai ore leivahaeape la haela arave ma oki ekekilai. 46Haela oaria Oa au cavaila: Aualari ve ekepe la haela hiki Oa eavape. 47Iele havahu, ara ero maeaeaive — araro ikikelavaki la haela ovokake haiapo apeakilai. 48Ara va ovokake pai havahu. 49Eve papa haela huakara manna lalavahaeape. Kahara ere va karia le leivahaeape. 50Ma va kaia ve kihoaupe pai — haela ae la larikilava, are apa va ka. 51Kaia ve kihoaupe la pai ovokake, ara ma. Haela ae ma pai la larikilava are ovokake haiapo le aeakilai. Ara avaraki pai va iele — arave aivau: Ara arero avarakilai meahaiapo haela oaria ovokake leivahaeakive.
52Jew haela elarelare oharo hahari mari avahaeape, Ma haela elare aivau larive learia avikiarakilai? 53Iesu erero maeaeape, Eva haela ve Akore ve aivau i apu ila le aue la leikilava, e va ovokake leivahaea va ka. 54Arave aivau i apu ila larikilai la haela ovokake haiapo aeakilai — ara arero aireaki la hare urapakilai. 55Ehovea arave aivau va eapai iele, arave apu kara ma iele. 56Arave apu i aivau ila larilai la haela are arave ureve aeavila, ara ka areve ureve aeavila. 57Ovokake Oa araro kiparaeape — laelave ara Oa v'ila ovokake leivila, araro larilai la haela — are kara ara v'ila ovokake leikilai. 58Ma va kaia ve kihoaupe pai. Eve papa haela manna lalavahaeai le apihaea ka leivahaeape, laria mai ka. Ma pai lariki la haela laria apihaea va ka, ovokake haiapo le apeakilai.
Ikihorahora kilea haela
59Are Capernaum kileape la hoa are ma oharo synogogue ureve maeape.
60Areve kilea haela uku ma oharo iapai mari avahaeape, Ma oharo mehau iele, arero hovea leita leikilai? 61Iesu areve kilea haela ve ma oharo iki ure ore lei mari maeaeape, Eva ma oharo ikihairihairi ha? 62Eva haela ve Akore overa aeaveape la ita ma pekaila la eavakilava, e lehae ha? 63Ove Veveke haela, ovokake leivila — aivau ve iele karia; ara ero maeaelula la oharo ove oharo, ovokake iele ila. 64Aka e v'ila uku haela kelava va ka. Ehovea Iesu avare koare ore leipe — uku haela arero iki aireaki kelava va ka, arero hihila epaki la haela. 65Are mariape, Laelave ara ero maeaeape haela va Oa arero avaraki la oki hiki arave maia ekekilai.
66La hoa areve kilea haela uku arero hakorepape, kai are i hareho au auvahaeaila.
Peter Iesu va Keriso hihika maeape
67Iesu kilea haela maeaeape, E kara araro hakorepakilai ha? 68Simon Peter arero maeape, Amua ela va leita la kai loakilai ha? A hiki ovokake haiapo ve oharo kileahaevila. 69Ela iki le kelavaro, ela va ore. A va Keriso, ovokake Aualari ve Akore la. 70Iesu erero kavale maeaeape, Ara ero 12 haela ikivere leivahaeape, aka eve haela haroapo haelaharihu hovea leivila. 71Are Judas Iscariot Simon ve akore v'ila maeape. Ehovea are 12 haela ve haela ae va la Iesu la hihila aire epakilai.
നിലവിൽ തിരഞ്ഞെടുത്തിരിക്കുന്നു:
John 6: ORO
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society 1963-1972