Matiw 7
7
Wu nook bheez shag
1“Tapp wu kihh bheez menguh mou, tapp'baa Naan bheez wu'wunn zag. 2P'ee mihh wu kihh bheez mwoohzeh a rih-rangg bhi Naan p'ee bheez wu'wunn a kihhsheh zag. Zhangg'kamm w'u wu kamm dhighin bhi Naan p'ee kamm nyi wu'wunn a dhighin zag.
3“A mihyeh l'e bhi ghi kihh naah reb chidyillipp w'u yit em'nangg, dhangg baah wu'gha ghi naah gag gwallang-yokhomm w'u yit mag mou ayeh? 4Diy sh'in a rangg bhi ghi satt em'nangg ghi le, ‘Yet tihh ih m'ang reb chidyillipp w'u yit gha seh lhi'baa,’ dhangg gag gwallang-yokhomm yit mag ayeh? 5Gu-raanaan wu'baan! Bii w'u rett tihh ghi sh'in sh'ee, bhi ghi m'ang a gag gwallang-yokhomm w'u yit mag'gha seh lhi'baa dhangg, a kihhsheh bhi gha p'ee naahpee dhak rih-rett ser'seh p'ee m'ang reb chidyillipp w'u yit em'nangg seh.
6“Tapp wu kihh pihh bii wu'bhangg mhi-shigbis mou, w'u mwopp ruh a kaa as se; h'aa kooh wu kor dhakk'shin keewu w'u krhim kaa pangg'krhim se kihkyeen mhi-shigbis mwopp, w'u mwopp ruh a kaa tughuzluh se. Mihh wu sh'in kihhsheh bhi mwopp p'ee vwapp nyi kihh shiiy ruh yakhal mwopp merrep lang kaah wuh, mwopp m'ang wunn yillang.
Wu dhang, wu dyoo, wu kihh bwappee
(Luk 11:9-13)
7“Wu kihh dhang, bhi Naan p'ee pihh nyi wunn; wu kihh lyap, bhi Naan p'ee l'e tihh wu kad; wu kihh bwappee, bhi Naan p'ee wangg pwooluh wunn. 8P'ee koohweeh w'u kihh dhang, bhi Naan p'ee pihh nyi gwoh ni; koohweeh w'u kihh lyap, bhi Naan p'ee l'e tihh kad diy; yakhal koohweeh w'u kihh bwappee, bhi Naan p'ee wangg pwooluh nyi.
9“A weeh dhighin wunn w'u kadmihh l'aa khinyi nang gutt phi nyi, bhi diy pihh a pangg nyi? 10H'aa kooh diy dhang a sherep, bhi diy pihh a w'oo nyi? 11Dheeh kad kan wu'wunn, w'u kooh bhalang phirooh wunn a mwoohbis, wu man pihh zhukhum wu'rett zhepp wuh mwopp, dhangg dheeh diy a Puup wu w'u kih dhengNaan a'ng? Ai nyi p'ee pihh zhukhum wu'rett mwooh mwopp kihh dhang phi nyi. 12Pee'mhinyi bhi kapp bii w'u wu kihh dh'om tihh mwoohzeh sh'in wunn, bhi wu sh'in a kihhsheh wu'mwopp zag. P'ee a mihhse a shiiy khi kamm w'u dhighin W'aar mhi Musa, kihh r'an khi Mhi-wanggshiiy mwopp weett.
Fokhol'pang w'u wuh-weell kihh rooh kih-kaam
(Luk 13:24)
13“Wu dhel dhighin a phi fokhol'pang w'u wuh-weell. P'ee fokhol'pang w'u kih-kaam kihh arr w'u kihkaam dhen chl'am a arr kyemm, dhangg dw'uu gurum dhess mwopp a dyikihh. 14Dhangg fokhol'pang w'u wuh-weell kihh arr w'u wuh-weell a arr seen, dhangg a gurum lee'lee kyekk kih arr mhizeh ni.
Tihngsheep kihh zhepp rah
(Luk 6:43-44)
15“Wu kihh kangg kihh mhi-wanggshiiy mhidwungg mwopp e'h. Mwopp kihh mwaall shut ja kihpee wu diy sh'i shoop mhi tihm, dhangg takhann dhighin bhi mwopp a asmhipangg w'u nyee'gullung. 16Wunn p'ee man mwopp a sh'i dhakk'shin khimwopp. Gurum mwopp kihh cham yak zhepp'anab tihngg ghir, kooh mwopp yak koon tihng mong'mongg mihngg? 17Nyi a kihhsheh zag, kapp tihngsheep wu'rett kihh la a zhepp wu'rett; tihngsheep wu'bis kihh la a zhepp wu'bis. 18Tihngsheep wu'rett kihh mak la zhepp wu'bis mou, yakhal tihngsheep wu'bis kihh mak la zhepp wu'rett mou. 19Kapp tihngsheep w'u baah la zhepp wu'rett mou, bhi mwopp p'ee gab nyi ming dhighin wus. 20Pee'mhinyi, bhi wunn p'ee man gurum mihhseh ni mwopp a sh'i dhakk'shin khimwopp.
21“Baah a koohweeh w'u khi peet a'n, ‘Gwoohyon, Gwoohyon’ p'ee dhel dhighin dhenglong khi Naan mou, a gwooh kihh sh'in bii w'u Daa w'u khi dhengNaan kihh re'bhet kyekk p'ee dhel. 22P'ar puus mhizeh ni bhi gurum dhess p'ee satt an le, ‘Gwoohyon! Gwoohyon! Hah, dhok gyet a munn shi mu kihh satt pwooNaan dhighin shumm gha 'y? Yakhal gyet mu kihh pwat kihh v'ur mumullung mwopp, yakhal mu sh'in v'ur bii'aapwoo dhess dhighin shumm gha 'y?’ 23Weett kihhsheh, a'n p'ee f'eer zeenn ih satt mwopp ih le, ‘Baah ih cham man wunn kooh lee'lee. Duam wu reen kihh bii wu pwoo na, v'ur m'ee mhi-dhakk'wubis mwopp!’
Gu'dyik w'u sih-soon kihh w'u yi-yokhor
(Luk 6:47-49)
24“Pee'mhinyi bhi koohweeh w'u kihh klihng kamm keena mhize, harr kihh kyeer mwopp, bhi nyi a kaa m'ee gwooh sih-soon, w'u dyik luh keeniy a kih laar. 25Fwan laiy pwetd harr a'm gam kihgoon mwopp bwellekk, yakhal vivirr kutt m'ang luh ni vling pwetd; weett kihhsheh bhi baah luh ni rumm mou, p'ee kugluh ni a kih laar. 26Dhangg koohweeh w'u klihng kamm keena mhize dhangg kyeer mou, bhi nyi a kaa yo'khor w'u dyik luh keeniy a kih ees. 27Fwan laiy pwetd harr a'm gam kihgoon mwopp bwellekk, yakhal vivirr kutt m'ang luh ni vling pwetd, bhi abet luh ni rumm rhighib n'ook wu'khimhi.”
28Kaarooh Jesu kyes kamm ni mwopp bhi aa'phi dw'uu gurum ni mwopp kihh kamm ni mwopp; 29p'ee sh'in kaam ni mwopp a kaa gwooh kihh satt mhi kaah m'iin, baah a kaa mhikamm khimwopp, w'u a mhikamm W'aar mhi Musa, mwopp kihh sh'in seh mou.
നിലവിൽ തിരഞ്ഞെടുത്തിരിക്കുന്നു:
Matiw 7: Chakfem
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©️2022 Luke Initiative for Scripture Translation