Matiw 8
8
Jesu bar m'ee Gulokhom
(Mar 1:40-45; Luk 5:12-16)
1Kaarooh Jesu tong shi'bwut bwumm ni sam diy, bhi dw'uu gurum dhess mwopp langdang nyi. 2Bhi m'ee gulokhom ji kurum tekhem nyi bhi satt nyi le, “Daah, mihh ghi dh'om, bhi ghi kihh mak tu'angg lokhom a'n tihh ih dheeh wu'bhangg diy.”
3Bhi Jesu shenn sarr niy bwum nyi diy, kihh satt nyi le, “Ih kihh dh'om, ghi dheeh wu'bhangg dhakk.” Abet bhi gwoh ni kad kakhamm phi shw'al lokhom ni. 4Bhi Jesu satt nyi le, “Ghi kihh kangg, tapp ghi satt bii mihhse menguh mou. Kop kihhsheh bhi ghi dum a kihpee prist tihh dyee gha diy, yakhal ghi pihh bii'zhukhum mhi tu'angg lokhom w'u Musa gyet satt, tihh mwopp man diy le baa ghi dheeh wu'bhangg.”
Pihhzeenn khi m'ee kaptin khi mhi'lek
(Luk 7:1-10)
5Kaarooh Jesu ji dhel dhighin Kafarnahum, bhi m'ee kaptin khi mhi'lek ji kihpee nyi diy, bhi dhang phi nyi le, 6“Gwoohyon, m'ee shw'al y'aa laa'dhakk keena, kud nyi dhen tuluh, pihhzheell nyi pwetd.” 7Bhi Jesu satt nyi le, “A'n p'ee dum bar nyi.”
8Bhi kaptin ni pring Jesu le, “Ah, Gwoohyon, ai a'n a mak rooh harr gha p'ee ji luh nah mou. Ghi kadpwoo kyekk, bhi laa'dhakk keena ni p'ee bar. 9Wu'an sh'i kaah nah maah a'n a der m'ee gwooh mett wu'an zag, yakhal wu'an zag kihh mhi'lek mwopp der na. Ih kihh satt m'ee mhi'lek ni ih le, ‘Ghi dum seh,’ bhi dum; ih kihh satt wu'zeh ih le, ‘Ghi ji se,’ bhi ji. Yakhal ih kihh satt laa'dhakk keena ih le, ‘Ghi sh'in bii mihhse,’ bhi nyi p'ee sh'in nyi.”
10Kaarooh Jesu klihng bii w'u kaptin ni satt, bhi aa'phi nyi pwetd, bhi satt dw'uu gurum w'u mwopp dang niy le, “Ih kihh satt wunn, baah ih khi cham kad m'ee gurum dhighin Isra'ila w'u kihh pihhzeenn w'u bhi-bhall kaa mihhse se mou. 11Ih kihh satt wunn, p'ar gurum dhess p'ee tong koghob Puus'kaa, kihh koghob Puus'ru, mwopp ja dh'eer p'ee so-rettyit kihshag kihh Ibrahim mwopp, kihh Ishaku, kihh Yakub dhighin dhenglong khi Naan. 12Dhangg mwopp p'ee pwoorr mwooh dyinn a mwopp a zheppyill mhi dhenglong ni shen lhipwat duam dhighin pee'kwoo, pee w'u gurum mwopp p'ee nwang wall diy harr mwopp kihh shum aghaz ruh.”
13Bhi Jesu satt kaptin ni le, “Mwan gha, nyi p'ee kwed a kaa ghi pihhzeenn seh.” Bhi laa'dhakk khi kaptin ni shikhir kad kakhamm abet.
Jesu bar gurum dhirrihkk
(Mar 1:29-31; Luk 4:38-39)
14Kaarooh Jesu ji luh Bitrus, bhi kad nhikhin khi mat khi Bitrus kihh dhen kih pee'saam a gok kihh m'ee shikwong. 15Jesu bwum sarr nyi, bhi shikwong ni kyes, harr nhikhin'mat ni yakhal y'aa dhakk shap shed pihh Jesu.
16Kaarooh pee wull kan'sihkhin, bhi gurum mwopp ja kihh v'ur mwooh mumullung mwan yak mwopp Jesu, bhi shen riin ni mwopp lhipwat sh'i gab-bhellepp kyekk, yakhal bar mhi'shwal ni mwopp kwellelleh. 17A kihhsheh bhi bii w'u gyet Naan satt sh'i pwoo khi Ishaya gu'wanggshiiy gam, w'u satt le,
“A nyi m'ang shiin-kakhamm keemu
yakhal kok shw'al keemu.”#Ish 53:4
Dumdang Jesu shwal
(Luk 9:57-62)
18Kaarooh Jesu naah dw'uu gurum w'u mwopp ja okhor riy, bhi satt zheppkamm keeniy mwopp le runn taah dum yit'am w'u takhann. 19Bhi m'ee gukamm w'aar ji kihpee nyi diy bhi satt nyi le, “Gukamm, a'n p'ee lang'dang gha kapp pee w'u ghi kihh dum diy.”
20Bhi Jesu pring nyi satt le, “Asmhipangg mwopp kihh f'ung keeru, yakhal bul-shaapp mwopp kihh liz keeru, dhangg baah a'n L'aa khi Gurum kihh pee w'u p'ee dhen kaah nah mou.”
21M'ee gu'dumdang Jesu satt nyi le, “Gwoohyon, ghi yet tihh ih dum diy ih wum daa dhangg.”
22Jesu satt nyi le, “Ghi lang'dang na, yet kumm mwopp wum kumm keeru.”
Jesu dharr kihh vivirr kutt kihdab kur'am
(Mar 4:35-41; Luk 8:22-25)
23Jesu dhel dhighin kong'am, bhi zheppkamm khinyi mwopp dhel dhighin kong'am ni zag dang nyi. 24N'ook wu'khimhi bhi m'ee vivirr kutt w'u bhall-bhall yakhal vhi-khi-kihg kihdab kur'am ni, harr blam'am kihh tabbhal k'aa sam dhighin kong'am ni, bhi Jesu dheeh s'aam. 25Bhi zheppkamm khinyi mwopp dum m'ii nyi, mwopp kihh satt le, “Gwoohyon, ghi bham munn e'h! Munn p'ee ky'em e'h!”
26Bhi Jesu pring mwopp le, “A mihyeh l'e bhi kihkhirmuut yak wunn, wunn mhishiin-pihhzeenn mwopp?” Bhi yakhal tepbhellepp vivirr kutt ni kihh tabbhal khi a'm ni, bhi pee dharr tihkk.
27Aa'phi gurum ni mwopp pwetd, bhi mwopp kihh nang phi shag le, “A sherem gurum wu'kaarangg kihhshe se wunn'? Harr vivirr kutt mwopp kihh tabbhal khi a'm mwopp kihh klihng nyi 'y, mwopp'muun!”
Jesu bar m'ee gurum vel w'u kihh mumullung
(Mar 5:1-20; Luk 8:26-39)
28Kaarooh Jesu taah k'aa yit'am w'u takhann yill khi Gadarenes#8:28 Gadarenes Pakk r'an w'u gyet shak mwopp kihh ran shumm pee mhizeh ni “Gadara” mwopp, bhi m'ee gurum vel w'u mumullung dhighin mwopp tong kih kihshirr ja diy, mwopp ja p'ee dyarrang d'aam Jesu nyafv. Mwopp byaal a kaa wu'dyikk, harr baah gurum mwopp kihh mak waa arr koghob mihhseh ni dyi mou. 29Mwopp arrap dhekheh ruh mwopp satt le, “L'aa khi Naan Oo, a mihyeh kang munn kihh gha ayeh? Ghi taah se a p'ee shep nyigzheell munn bhi baah pee ni khi wull a'ng?”
30M'ee dw'uu tughuzluh gyet mwopp tapp nhighin pann zhong-zhong kihh pee mhizeh ni. 31Bhi mumullung ni mwopp so'kumbokk Jesu le, “Kum'bokk, mihh ghi shen munn, bhi ghi shenn munn lhidum dhighin tughuzluh mhizeh ni mwopp kyekk.”
32Bhi Jesu satt mwopp le “Pwat wu reen!” Bhi mumullung ni mwopp pwat rwa dhighin tughuzluh ni mwopp, bhi dw'uu tughuzluh ni kihhdihng mwopp pwoorr shu'shu tu'ru'ru'ru sam sh'i z'oor bwumm w'u pwoo'am ni, mwopp sam rwa dhighin kur'am ni mwopp mwarrap kwellelleh! 33Mhitapp tughuzluh ni mwopp shwa reen, mwopp dum yakshiiy bii mihhseh dhighin tughuzyill ni, kihh bii w'u kad mwooh dyinn mumullung dhighin mwopp seh. 34Bhi gurum w'u tughuzyill ni kihhdihng mwopp tuud pwat p'ee dum kad Jesu. Kaarooh mwopp naah nyi, bhi mwopp so'kumbokk nyi tihh yet koghobyill khimwopp diy.
നിലവിൽ തിരഞ്ഞെടുത്തിരിക്കുന്നു:
Matiw 8: Chakfem
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©️2022 Luke Initiative for Scripture Translation